رملة والقاسم ع


يالرحت عن عيني راح اتسله بطيوفك
حسره ظلت بيه اشوفن حنة اجفوفك
ابني ذابت شمعته .. ويه حركت خيمته
. . . . . . . . . . . . . . . . .

الفاكده شاب اتعرف لوعة عذابي
هي بس الوالده التعرف مصابي
ابني عمر اربعطعش ورده ابحسابي
ترف ابني وادري ما يحمل عتابي

هاجس ابكلشي احسه عايش ويايه
بدمي يجري وصار نبضي وشوف عينايه
كلبي سكتت نبضته .. ويه حركت خيمته
. . . . . . . . . . . . . . . . .

انه ظهري اعله المهد ياما حنيته
هرش جبدي جاسم ابدمعي سكيته
شفته يكبر جنت اظن ثمري جنيته
اكبال عيني اتهدم الحلم البنيته

عشت احلى ايام عمري بوكت تربيته
والنعم يبني التعبئه وياك وفيته
وفي من دم ركبته .. ويه حركت خيمته
. . . . . . . . . . . . . . . . .

حاسبه للموت بس احسبته اليه
ما حسبته ياخذ اوليدي امن اديه
وينه اليحب راسي كل صبح ومسيه
باللحد ومعطر احضان المنيه

الموت لو ماخذني اليه وعايف وليدي
اعليه فكدت اسنين عمري وفرحتي وعيدي
بوجهي ماتت بسمته .. ويه حركت خيمته
. . . . . . . . . . . . . . . . .

راح اصبر روحي يوليدي بغيابك
راح اكعد يمه اسولف وي ثيابك
الخاطر حسين اقبلت يبني ابمصابك
انه مو ندمانه بس حزني المصابك

شيل راس امك ييمه ابكطعت اوريدك
وللحسن وديله شمعة عرسك بأيدك
عمك اسعي النصرته .. ويه حركت خيمته
. . . . . . . . . . . . . . . . .

هاي اخر كلمه من عندي استمعها
فاطمه اعله حسين يبني امسح دمعها
كافي هم امصابها ولوعة وضعها
من تون الونه تلجمها ابظلعها

سجل اسمك بالشهاده ولا تعز روحك
وروح يم الزهره يبني تضمد اجروحك
وكلبي عوفه بحركتها .. ويه حركت خيمته
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ميمر .. للقاسم ع


سيف النصر من دم وريدك حده
واتخير الابطال من تتحده
لحسين بالك شمر يوصل حده
ذخر الابن .. يوم المحن
وانته البقيه امن الحسن
والعنده عم مثل حسين يا دنيا يترجاها
. . . . . . . . . . . . . . . . .

يامن الهاشم بالمراجل عينه
بهاي الحرب لحسين عمك عينه
بكطعة ركبتك للحسن گر عينه
من تلتمس .. بدر وشمس
ذكرهم ابصولات امس
سيف الحسن بي صولات التاريخ ما ينساها
. . . . . . . . . . . . . . . . . . . .

رايتك خلها ابأيد خل سيفك بيد
والصاف طبعه ايلكط احيايه البيد
لكطهم وفرسانهم خل تبيد
نار الغضب .. زادت لهب
خلي العده لنارك حطب
من تشتعل نارك غيض ياهو اللي يتحداها
. . . . . . . . . . . . . . . . .

بيض الصوارم لا ترد من سلها
لاكي السمر لا تشتكي من سلها
هالعده لازم ينكطع منسلها
هاي الحرب .. صد وظرب
والكثره معروف اتغلب
تالي النصر مو للسيف الدم رايته علاها
. . . . . . . . . . . . . . . . . . .

عمك ينادي ومهجتي ماردها
دون ابو اليمه شوفتك ماردها
جيوش العده يبني ظهر ماردها
سيف النصر .. بي ينكسر
ماردها والعسكر تفر
كابلها بسم العباس وبيا علي اتلكاها
. . . . . . . . . . . . . . . . . . .

فخر الهواشم يبني يا جاسمها
هاي الحرب همها اجه وجا سمها
ماريدك الا وهامتك جاسمها
يا كل هلي .. لترد الي
ودمك اخبطه بدم علي
الاكبر وگر عين عيني وهاي يا جاسم الارجاها
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ليلى والأكبر ع



فراكك يالاكبر يسلب الروح . ورمح الفراك اتكسر ابصدري
وداع الابن ويه الام اجروح . و وياك احسّن ودعت صبري
آه .. بحسراتي كلبي محترك
آه .. يالبيك دلالي يدك ..... يالاكبر
. . . . . . . . . . . . . . . . . .

يالساكن عرش كلبي يفتشت عيني يايمه
اودعك بس وداعك موت موش اوداعك ابجلمه
يانبضة فؤاد امك يا دنيايه والبسمه
ياشريان عمري البيك يفتر عالكلب دمه

ما حسّبت تبعدنا الايام . ذاخرتك انه الكبري يوليدي
ما حسّبت تنباك الاحلام . وانه اقدمك للذبح بيدي
آه .. وشلون عني تفترك
آه .. يالبيك دلالي يدك ..... يالاكبر
. . . . . . . . . . . . . . . . . .

يصبي النظر ياهيل يوجه المصطفى جدك
يريح الجنه يا قداح يبستان الورد خدك
اروح وياك . تمشي وياي بكيفك بس اظل عندك
اخذ روحي شلي بالروح والمن عايشه بعدك

نحرك ييمه اتقبله السيوف . ومسامر الطعنات بجروحك
متعني ليك الموت ملهوف . رايد تشابك بالاجل روحك
آه .. ورماح شابكتك شبك
آه .. يالبيك دلالي يدك ..... يالاكبر
. . . . . . . . . . . . . . . . . .

يالطولك شبرته اشبار لحد ما شاب حسيتك
ولحد ما ميزت طولك وعجنت ابروحي شخصيتك
تكبر وانه اكول ازغير امس بالمهد ناغيتك
امس فوك ايدي من تغفه يريح حسين شميتك

ما شبعت عيوني النظر بيك . ولاني اشبعت من جلمة اليمه
ولاني اكتفيت اسمع محاجيك . وكوس البعد سدد علي سهمه
آه .. وموادعك اصبح صدك
آه .. يالبيك دلالي يدك ..... يالاكبر
. . . . . . . . . . . . . . . . . .

اصبر روحي بوداعك واحبس دمعة اجفوني
بين الحسره والتنهيد ذابت مقلة عيوني
بين الويل والياويل ضاعت حيرة اظنوني
اصبر روحي لو اصبرك جبل هم وعلى امتوني

لو انه اصبرك اصبر شلون . ولو صبّرت نفسي منو يصبرك
هاك اخذ كلبي واخذ العيون . واخذ العمر يبني فده العمرك
آه .. روحي بوداعك تنمزك
آه .. يالبيك دلالي يدك ..... يالاكبر
. . . . . . . . . . . . . . . . . .

روح انته فده لحسين وافدي نحرك ابنحره
واسي حسين وانه البيك اواسي فاطمه الزهره
ويّه حسين يا يمه ويّه سيوف التوذره
جسمك خلّه يتوذر وسيل ادماك عالغبره

ماريد يبني سالم تعود . وحسين ابوك يروح مايسلم
كون انته كبله ابروحك اتجود . ومن كبل دمه يسيل منك دم
آه .. حسين الوجد درب العشك
آه .. يالبيك دلالي يدك ..... يالاكبر
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ابتده موسم جروح الطاهره الزهره
وجرح العاشكين حسين ما يبره
العاشك لو جره العين .. يواسي ام الحسين
. . . . . . . . . . . . . .

ابتده عاشور واحنا جروح مفتوحه
وكل عاشك لابو الاكبر وهب روحه
نحرم بالسواد ونرتدي الأحزان
ونلبي ونطوف ابكعبة اجروحه

طول العام نقسم ما نسينه حسين
وبعاشور كلنا بحرگه متحزمين
لام الحسن نصبح مثل قنبر كون
رغم كلشي نقدمه نگولها .. مقصرين

كلشي نقدّمه لحين مو كافي
(مصباح الهدى) فوك الترب طافي
اليخدم طول السنين .. يواسي ام الحسين
. . . . . . . . . . . . . .

مثل موسم الحج من تحرم الحجاج
للحضره تجيله العاشكين أمواج
شهر الخدمه بي كلشي فده لحسين
يتساوه بعطاءه الغني والمحتاج

جرح الطف مثل عين المحب يجري
وانه اتمنه الحوافر داست ابصدري
كون آنه النبال اغصان بيه تصير
ويظل سالم الزينب ليلة القدرِ

ليلة قدر لا . بل . أعظم بقدره
وقرآن الإصلاح اتهشم ابصدره
توذر بالميادين .. يواسي ام الحسين
. . . . . . . . . . . . . .

كل مره محرم تگرب ايامه
نحضر اكفانه ونحضّر القامه
ويلوم اليضدنه وما يهمنه يلوم
لحسين الفخر سمونه خدامه

خدمه بلوعه خدمه بهظم خدمه بآه
على المذبوح بالطف نحره من اگفاه
على الايتامه فرّت بين ردس الخيل
عالمخيم الشب ولا فرد طفاه

من خيمه اعله خيمه تركض أطفاله
بسياط الاعادي روعوا اعياله
وبحال النساوين .. يواسي ام الحسين
. . . . . . . . . . . . . .

حرگتنا اعله ابو السجاد تتجدد
عليه اسيوف صلت والجسد معبد
سجدتله الرماح وقبّلت جسمه
قبلات النصل صار الطعن ازيد

نبلات اعله جسمه لبت الدعوه
ولمن طاح صارت كل سهم تچوه
والمثلث تميّز قصته بوحده
اخذ ثلثين جبده وطلع بالگوه

ابّاب الجنه وكفت فاطمه تناظر
على أرض الطفوف بكسرة الخاطر
وكلشي بدمعة العين .. يواسي ام الحسين
. . . . . . . . . . . . . . . . .

هل شهر الحزن وعيون تتربّه
تتنطر ضعن ينسبي اعله الغربه
وعيون الشماته تريد بس تنظر
زينب بت علي مكسوره بالخَرِبه

الجانت شامخه يردون ذلتها
حاشه وما يمس اذيال حشمتها
الشافت راس اخوها اعله الرمح عالي
ولا حرمه اگدرت تحمل مصيبتها

شهر حزن العقيله يعيد احزانه
اذاها بمصابه وحيل اذانه
الحزن طال اويه السنين .. يواسي ام الحسين
. . . . . . . . . . . . . .


خادم اهل البيت عليهم السلام
عمار العيساوي الكربلائي

#فاطمةالعليلةع


ابتعدتوا وكبرت بعيني المسافات
تركتوني عليله ابحظن الآهات
لون امشي اعله الجدام
طريق الطف بالف عام
يهون وجرحي يلتام .. اذا اشاهد ضعنكم
. . . . . . . . . . . . . . . .

عليله وجرحي يلتام اذا اشاهد تردون
اشاهد وجه الحسين وكحل شوف العيون
تهون وعلّتي اتطيب اذا يمي تكعدون
ولكن عندي احساس واظنكم ما ترجعون

على الباب واتانيكم يالاحباب
يمل من انتظاري ويجزع الباب
وآنه معلكه العيون
بلكت لو تردون
كل صعبه الي تهون .. اذا اشاهد ضعنكم
. . . . . . . . . . . . . . . .

اتاني منكم اخبار رساله اتطمن الحال
ولا طارش تودون رغم وقت السفر طال
اوصي الطير والريح يودن مني مرسال
ظرف بي دمعة العين وظرف بي احط دلال

بلكت يوصل المرسال لحسين
مكتوب بحسرتي ودمعة العين
وانطر منكم اجواب
يشرح حال الاحباب
احسّن كل جرح طاب .. اذا اشاهد ضعنكم
. . . . . . . . . . . . . . . .

اتاني واسهر الليل واعد ساعات وايام
واذا سلهم جفن عين اسافر ويه الاحلام
واوصل كربلا بطيف واركض صوب الخيام
وانشد ليش الأطفال ينعتوهم بالايتام

صريخ وكل خيمهم لاهبه ابنار
وانه افتر ابأثرهم وانشد اشصار
واشاهد عسكر ايجول
ويتامه ابين الخيول
احتار الكلب شيكول .. اذا اشاهد ضعنكم
. . . . . . . . . . . . . . . .

دخلت الكربلا بطيف حلم بس شيّب الراس
شفت مذبوح الحسين وصدره بخيل ينداس
وشفت يم النهر سيف ورايه وجود عباس
ولكيته ابلايه جفين عمود امهشم الراس

ركضت الزينب ارد اتأمن الخوف
لكيت الحره عالتل واكفه تشوف
ذهيله وكلبي مفجوع
من شاهدت الظلوع
تغفه بعيني الدموع .. اذا اشاهد ضعنكم
. . . . . . . . . . . . . . . .

افزن والعن ابليس واعوّذ نفسي بالله
واسمع ام البنين تنادي اه ويلاه
وابن حذلم نعه حسين ودموع تفيض عيناه
راسه اعله الرمح صاح وجسمه امسلب ارداه

وكف كلبي واحسن غابت الروح
من اسمعت راس حسين مذبوح
ويرد الضعن بايتام
ورمله بلايه جسام
ماصدك بالايام .. اذا اشاهد ضعنكم
. . . . . . . . . . . . . . . .

خادم اهل البيت عليهم السلام
عمار العيساوي الكربلائي

سيدةُ الحزن على حُسينها الذبيح
ماتت وفي فؤادُها بَنَت له ضريح
سفيرةُ العزاء ... لطف ِ كربلاء
. . . . . . . . . . . . . . . .

عاشت سنين امن العمر وي الحزن رفاكه
حنّت على حسين وصفن الها حنين الناكه
تتأمله بيوم ويرد ما تقتنع بفراكه
صبح ومسه بوسط المقل لكن اله مشتاكه

تنتَظرُ العودةَ والظعنُ لها يعود
بنورِ طلة وجههِ يمتلئُ الوجود
حينَ ترى الضياء ... لطف ِ كربلاء
. . . . . . . . . . . . . . . .

بعيونها صورة ظعن ماشي وترك دياره
وكل يوم تنتظره يرد بكباره وبزغاره
ولحسين تدعي بكل فرض وتذوب بانتظاره
ومن تقره بالمصحف تسمي وتاخذ استخاره

وكلما فيهِ رأت خِيرتُها حزينه
تبكي على انينَها ازقةُ المدينه
ويبتدي البكاء ... لطف ِ كربلاء
. . . . . . . . . . . . . . . . .

أيامها دموع وحزن وساعتها التعدها
ساعة هظم ساعة جرح ساعة بذكر ولدها
ولحظاتها حسين السبط تسبيحها وحمدها
تتمنى كل رمشة جفن باقي ابنها عدها

لكنها تعلمُ في وداعهِ الاخير
قد ودعت فؤادها وبدرها المنير
وظلت انتماء ... لطف ِ كربلاء
. . . . . . . . . . . . . . .

ليليه تغفه اعله الدمع حد ما ذبل جفنها
ومن ايست من رجعته كل الغصص لفنها
ضاعت مفاتيح الهنا طيور السعد جِفنها
اختنكت ومن خيط الأمل تنسج غدت كفنها

وصار في صميمها جمرٌ من الفراق
امنيةَ الموتِ بأن تذهبَ للعراق
تشاركُ البلاء ... لطف ِ كربلاء
. . . . . . . . . . . . . . .

كتبت مواثيق العزه والخدمه اسستها
وانطلقت اطوار النعي من طور مدرستها
هيَّ ابتدت هذا اللطم خدمه بوفه كستها
وخدام ابو الاكبر ابد للحره ما نستها

وجاءَ يومٌ ترتحل فيهِ إلى السماءِ
وتلتقي حسينها مخضب الدماء
وينتهي اللقاء ... لطف ِ كربلاء

. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

استقبل اليوم مسلم واهل دمعي
بيد آنه اداويه وايد أسند ابضلعي
واكعد آنه وياه .. بالحسره والاه
. . . . . . . . . . . . . . . . . . .

آنه الزهره ام الحسن تدروني
اباب الجنه اتلگه اليحبوني
اول ناصر البي صدگت اظنوني
سفير حسين مسلم گرّة عيوني

ما انشد اشصار جنت انظر الحاله
وشفته بالحبال سحبته الخياله
تتنازف ادماه .. بالحسره والاه
. . . . . . . . . . . . . . . . .

اول ناصر اتلكيته بالعبره
وذكرني ابهظمتي وبابي والعصره
الكافر رامي جثته من سطح قصره
ومثلي اضلوعه من الوكعه متكسره

اتلكيته عطشان والحركه بضلوعه
لكن على حسين تتذارف ادموعه
بالدمعه واساه .. بالحسره والاه
. . . . . . . . . . . . . . . . . .

مسلم عاف طفله امتانيه ازغيره
تنادي ابأسمه كلما مرّت ابديره
احس بيها . بهظمها ساعة الحيره
النظر من بعد ابوها المن اتديره

ما قصّر حسين يعزها مثل بنته
بس للابو تريد تبجي البنت سكته
كل لحظه تتناه .. بالحسره والاه
. . . . . . . . . . . . . . . . . .

حميدة اتيتمت راح الابو منها
مثل زينب يتيمه من زغر سنها
اعرف حالة اليمشي الابو عنها
تمل الناس منها ومن كثر ونها

مسلم فده الروح وميتم أطفاله
من أجل الحسين والنصرة اعياله
دمه اللي ضحاه .. بالحسره والاه
. . . . . . . . . . . . . . . . . . .

اجاني امعذب ومذبوح ومترب
وجسمه من الجروح الداميه امخضب
سفير حسين عنده غايته ومطلب
يشوف حسين يم جده امخضب طب

يشكيله يا حال يا لوعه يا غدره
ويشوف الحسين شلون انهشم صدره
للهادي شكواه .. بالحسره والاه
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

يالتسألوني . عن هظم حالي
بدمعة عيوني . اشرح احوالي
العمر جان بأوله .. وحاضر بطف كربله
. . . . . . . . . . . . . . . . . .

بأول سنيني افجعوني وكلبي بالهم امتله
زغير حاضر بالمصيبة الحصلت ابطف كربله
اكبرت ويه الغاضريه وذكريات العايله
شلون انسه حسين جدي راسه عالرمح اعتله

شفت بعيوني . الشمس مذبوحه
مغسله الجثه . من دمه اجروحه
عاري ظل اعله الفله .. وحاضر بطف كربله
. . . . . . . . . . . . . . . . . .

اليوم من سموا دليلي والسم ابجسمي سره
مو اشد من يوم عاشر نار كلبي اموجره
اربع اسنين آنه عمري وشاهد اعله المجزره
وبالضمه كلبي تكطع والشفاه امفطره

لسه بعيوني . حركة اخيامي
وعمتي زينب . واكفه اتحامي
وحيدر ابكل بسمله .. حاضر بطف كربله
. . . . . . . . . . . . . . . . . .

اتطشرت كل اليتامه حين حركوها الخيم
امراكض ابين الحوافر والسياط ابلا رحم
والزغار اتصيح زينب عمه مو حمل الألم
وزينب اتصبر وتنادي كوم ياراعي العلم

وآنه اصد الها . تحبس الدمعه
حسين عالتربان . خافت اتسمعه
الفلك جان ابأكمله .. حاضر بطف كربله
. . . . . . . . . . . . . . . . . .

آنه رحت اويه السبايا والسياط اعله المتن
وشفت زينب عاليتامه تركض وما تستجن
طفل يعثر طفله توكع طفله للوالد تحن
وآنه اصد اعله الرماح الروس فوكاها وتون

وراس ابو السجاد . شابحه عيونه
والرمح بالكاع . ما يشيلونه
وبالدموع الهامله .. حاضر بطف كربله
. . . . . . . . . . . . . . . . . .

اليوم بالسم كلبي ذايب والمنيه تدنه الي
واحتكم للدنيا جعفر ابني من بعدي ولي
اليوم عن دنيانه ارحل والتقي بجدي علي
والتقي بأمي الزجيه وعالظلع دمعي يهلي

والحسن عمي . والطشت يمه
وجاسم العريس . كاعد ايكلمه
وكل فرد بالعايله .. وحاضر بطف كربله
. . . . . . . . . . . . . . . . . .

اليوم الگه حسين جدي بالجنان اويه الكمر
مو مثل ما عفته جثه اموذره وبلا نحر
والكه جفين الكفاله الغيرن مسره النهر
اصبحن جنحين . غطن زينب ابعزة وفخر

وعمتي رقيه . وي علي الاكبر
و والدي السجاد . لحالتي كبّر
كرم من رب العلا .. حاضر بطف كربله
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

داري خالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

من طلع ضعن العايله .. واتجه نيته الكربله
علكت عيني اعله الدرب والكلب ظل ولهان اله
محتاره امشي اويه الظعن لو ابقى وحدي معلعله
راحوا وظل بس الجسد مني ومدامع هامله

دمعي هالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

ظليت أنه بطرك الصبر .. شجره وخريف ابلا جذر
كلما هوى الشوك ايعصف اندب حسين واعتبر
كلما يهز بابي الهوى اطلع على الباب انتظر
وتحركني نيران البعد ومسلمه لله الأمر

هذا حالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

يوميه اتأمل يرد .. ظعن الحبيب امن البعد
وانذرت لو سالم اجه ازرع طريق الطف ورد
طال انتظاري والكلب ينسحن حركه وينمرد
لو بس ابو الاكبر يجي اقبل ولاريد الولد

الهم بجالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

لو اسمع ايرد للوطن .. بس الحسين اويه الظعن
بجفوفي اظمه اعله الكلب ضلوعي عليه يتقفلن
وتخيله ايطب حجرتي وعيوني بي يتكحلن
ابني وحبيبي ومهجتي عيوني لو ما يرجع عمن

يسهى بالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

واسمعت بالناعي نعه .. وشفته يهل ابمدمعه
جيت استمع منه الخبر بلكي الظعينه راجعه
كال أعظم الله اجرج على فكد البنين الاربعه
وحسين كتله . ورد الي جثة الحسين امكطعه

وشصفالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

من لوعتي وجمري صحت .. نهاريت لاجله وفرفحت
وعضيت اصبع ندمتي جي ويه ضعنه مارحت
كون آنه كبله اعله الثره وكون آنه كبله اتذبحت
ولاعيش عمري بحسرتي شتنفع حسرتي اشما نحت

فكدي غالي .. وبالليالي .. ابگه احسّب ها يجوني وما يجوني
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

من حان الموادع ويه الحسين
شبك عباس اخوه ابلا جفين
كله اتركني عالماي .. وجودي يموت وياي
. . . . . . . . . . . . . . . . . . .

توسد عالنهر وبآخر انفاسه
وعمود الغدر صابه ومنهشم راسه
سلم عالحسين ابنبضة احساسه
بضميرة اتشابك ومن البعد باسه

ابدمه اعله الشريعه كاتب اوداع
وفرشها ابرايته وبجود وذراع
هاي المشرعه هاي .. وجودي يموت وياي
. . . . . . . . . . . . . . . . . . . .

حسين اتعنه اخوه ابلهفه وبحركه
وصل محني الظهر من كلفة الفركه
حس عباس . هم لعضيده بالملكه
بلايه اجفوف بيش ايحظنه ويشبكه

فوك الترب نام وبيه السهام
ويكله يا حبيبي رد للخيام
رد الزينب براي .. وجودي يموت وياي
. . . . . . . . . . . . . . . . . . .

حسين ايكلّمه ودمع النظر يجري
قلت حيلتي الان ونفذ صبري
شمت بيه عدوي ونكسر ظهري
خويه ارجوك خل راسك على حجري

لا تكطع انفاسك يا ضوه العين
شكول الزينب وباقي النساوين
يا كافل يوفاي .. جودي يموت وياي
. . . . . . . . . . . . . . . . . .

موادع والكواكب هجرت اسمانه
تشوف الكمر مخسوف اعله دنيانه
يمه الشمس مكسوفه اعله ذرعانه
ونجوم المخيم كلها حزنانه

يكل لحسين عوف المشرعه وروح
بعد لحظات جسمي يفارك الروح
كل ما تنزف ادماي .. جودي يموت وياي
. . . . . . . . . . . . . . . . . .
عيون الكمر وحده السهم طفاها
والأخرى من نزيف الراس غطاها
اليمين اعله الأخوة الكافل انطاها
اليسار الزينب العباس ضحاها

فاضت روحه يم الماي عطشان
وهو الذي اسمه ايروي الأكوان
كال اتقبل اضماي .. وجودي يموت وياي
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

يهالناس العلي الاكبر خذوني
مثل يعكوب اله ابيضّت عيوني
عمت عيني المنيه .. بعد ميرد اليه
. . . . . . . . . . . . . . . . . .

طول غيبته وانشد متى يعود
عزيز النظر عن النظر مفكود
اطب للخيمه واطلع انشد اردود
كالولي وكع ما بين الجنود

وكع وتولته جيوش الاعادي
طعن وذروه برماح وهنادي
علي راح امن اديه .. بعد ميرد اليه
. . . . . . . . . . . . . . . . . .

ما ودعته ردته يرد للخيام
ويحضر زفة العريس جسام
ما حسبت هيج اتدور الايام
ويرمي الدهر كلبي ابأربع اسهام

اول سهم شفت اوليدي دامي
بجي وغربه وسبي باقي المرامي
والحبال البديه .. بعد ميرد اليه
. . . . . . . . . . . . . . . . . .

كرة عين ابوه ومهجة الروح
اتوذر بالمعارة ابكثر الجروح
شبيه المصطفى بعطر النبي ايفوح
عليه اكظي العمر بالحسرة والنوح

أصعب حاله لمن جابه الحسين
لم جسمه التوذر بالميادين
وبهاي الرزيه .. بعد ميرد اليه
. . . . . . . . . . . . . . . . . .

رحت اركض عليه ودموعي بالعين
ولكيته محني يمه امخوصر حسين
ومن دمه الكمر خضب الجفين
ورقيه بخيمته اتنادي علي وين

وزينب من تصبرها اشتكلها
وتدري بالاخو ما يرجع الها
افجعتني الغاضريه .. بعد ميرد اليه
. . . . . . . . . . . . . . . . . .

وصلته وقبّلت راسه التطبر
واخضب شيبتي من دمه المنحر
صحت يا ناس ليش . اللهُ اكبر
امكطع بالمواضي ابني الاكبر

توذر وانفرش عالرمل خده
بغضاً من علي ومن طه جده
وبغضاً بالزجيه .. بعد ميرد اليه
. . . . . . . . . . . . . . . . . .

صريع وبالعطش متفطره اشفاه
ودعت الفرح والبسمة وياه
اخلص عمري عكبه بحسره وبآه
شلي بعمري اذا يخلص بلياه

ابيعن عمري وشري سنين عمره
وخل جسمي ايتوذر وذره وذره
اذا اطلع سبيه .. بعد ميرد اليه
. . . . . . . . . . . . . . . . . .



خادم اهل البيت عليهم السلام
عمار العيساوي الكربلائي

مثل ظهر ابويه بمصاب الكفيل
على الاكبر آنه انكسر ظهري حيل
جرت دم دموعي .. اويه كسرت ضلوعي
. . . . . . . . . . . . . . . .

شبيهَ المصطفى خاضَ القتالِ كأنهُ حيدرْ
وروحي بينَ جنبيهِ تراهُ طشّرَ العسكرْ
ومن سل سيفه بيمينه مثل جده علي بخيبر
وجندل بكر ابن غانم و وكف بين العده وزمجر

بكر چنه مرحب. علي بذو الفقار
بسم جده حيدر لهُ الانتصار
.. اويه كسرت ضلوعي
. . . . . . . . . . . . . . . .

أتى نحوَ الخيامِ وقد عادَ النورُ في عيني
وخاطبَ والدي هل لي بشربةِ ماءِ ترويني
صحت ياخويه احس نارك بين اضلوعي تجويني
يمالك بسمتي وروحي وحياتي وفرحة اسنيني

اخذ روحي عنك تصد السيوف
وذر آنه اطيح اعله كاع الطفوف
.. اويه كسرت ضلوعي
. . . . . . . . . . . . . . . .

سُرّت امهُ ليليى فقد عادَ الضنى سالم
ولكن ودّعَ الثكلى وراحَ يعانقُ الصارم
اخذ نور الخيام اوياه وكلشي بروحته هايم
واخذ حيلي وصفت روحي مثل شمعة عرس جاسم

صحت يا عضيدي الك كلبي ذاب
حريمه اعله خدك ينام التراب
.. اويه كسرت ضلوعي
. . . . . . . . . . . . . . . .

هوى نجماً على الارضِ وضجَّ الكونُ بالدمعِ
شبيهُ المصطفى هللا شبيهٌ ثاني بالجمعِ
وانه السجاد ابو الباقر عليل ومنعرف وضعي
أنه بطيحة علي الاكبر احس جن انكسر ضلعي

انكسرت واشاهد انخطف لون ابوي
وانه بعالي صوتي صحت رد يخوي
.. اويه كسرت ضلوعي
. . . . . . . . . . . . . . . .

على البيداءِ مطروحٌ وانهارَ الدِما تجري
ف أولَ هاشميٍّ خطَ بالدمِ سورةَ الفجرِ
وانه وي طيحة اوصاله توذر بالفلا عمري
وأم الاكبر تنادي يتعبي ويا ثمر سهري

واحس وي نعيها ينوح الدليل
وبعد ماكو ثاني للاكبر بديل
.. اويه كسرت ضلوعي
. . . . . . . . . . . . . . . .


خادم اهل البيت عليهم السلام
عمار العيساوي الكربلائي

اليوم عالغبرة توسد
حسين لو جده محمد
نادت الحوراء .. امنا الزهراء .. انظري الاشلاء.. بالغاضريه
. . . . . . . . . . . . . . . . . .

من على التل وتصيح .. انظري هذا الذبيح
فاطمه يمه الجسد هم .. تعرفينه
بلايه راس اعله التراب .. بالجروح وبالخضاب
ابلا كفن ومغسل ابدم .. تعرفينه
هذا المنكطع من القفا نحره
وطبر سيف الشمر نحره اثنعش طبره
كبل ذبحه الشمر جاثم على صدره
ويشتم والدي يا فاطمه الزهره

الباغي لمن حز وريده
وشال راس السبط بيده
دمه بالميدان .. عالارض طوفان .. اهتزت الأكوان .. من هالرزيه
. . . . . . . . . . . . . . . . . . . .

من على تل كربلاء .. الفاطمه توجه النداء
يمه هاي جروح ترعف .. انظريها
حسين لو صدر الرسول .. بالحوافر والخيول
تهشم و اوداجه تنزف .. انظريها
صدره من الحوافر منطحن عظمه
وطبك صدره اعله ظهره امن السحك يمه
من التل أنزلت ردت اعتني يمه
زجر صار بطريقي بسوط وبلطمه

مارعوا قدري ومقامي
والشمر واكف أمامي
سوطه بيده يلوح .. وانه بيه جروح .. ابجي عالمذبوح .. فوك الوطيه
. . . . . . . . . . . . . . . . . . . .

عالترب مرمي صريع .. وآنه دلالي فجيع
من شفت جسمه التوذر .. بالحوافر
جسم مثخن بالجراح .. راس هايم عالرماح
والظلع مثلج تكسر .. بالحوافر
فاق اعله المصايب كلها وتعده
حسين اعله الرمل يمه انفرش خده
والمثلث اخذ ثلثين من جبده
اشتبه مابينه مابين النبي جده

اغتالوا ابصدره الرساله
حتى لا يحق العداله
عاري عالتربان .. والنبال اغصان .. ترست الجثمان .. وآنه سبيه
. . . . . . . . . . . . . . . . . . .

وليده الاكبر كطعوه .. وظهره مكسور اعله اخوه
شاف جفينه رميه .. عالشريعه
الكمر طايح من سماه .. ذابله منه الشفاه
آ يولية ال اميه .. عالشريعه
على العباس ابو الاكبر جرت عينه
وقبّل يسرته المكطوعه ويمينه
من يم النهر وآنه اسمع اونينه
انهدم يم النهر من حيله ثلثينه

ويلي عالكطعوا وريده
وابنه مذبوح اعله ايده
مثله لا ميكون .. ابد وبهالكون .. كل مصيبه تهون .. بالغاضريه
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

نخطت لافته يم باب السمه
مكتوبه بحزن ماتت فاطمه
عدكم علم هالسيده الجليله
مستشهده بأيد الكفر قتيله
. . . . . . . . . . . . . . .
هاليوم وبكبر السمه منصوب مأتم للحزن
بي حاضره كل الملك عالزهره بالمدمع تون
والينعه مقتلها الوحي والمصطفى البنته يحن
بلكت تجيه ابلا كسر ولا بيها سطره اعله الوجن
بلكت من تجي ما تجري الدمع
ولا من الألم محنية ظلع
ولا من سياط المعتدي عليله
مستشهده بأيد الكفر قتيله
. . . . . . . . . . . . . . .
رايات سود يرفرفن منشوره يم ساك العرش
والحور يم جنة عدن حضرن موكب للنعش
فتّحت وردة واذبلت عبرت استوها اثمنطعش
بين المصايب والمحن عين ويحاوطها الرمش
حاوطها الألم والهم والهظم
شافت فاطمه انواع الظلم
من العصره ظلت فاطمه سليله
مستشهده بأيد الكفر قتيله
. . . . . . . . . . . . . . .
كلشي بسماوات العلى ينعه الوديعه فاطمه
شافوها اجت متوجّيه من الضلع متألمه
عرش الله خاطبها بحزن يام الاسباط العالمه
لو بيه كسرج ينتقل وضلوعج اتظل سالمه
دمعج من يهل يكسر خاطري
وادري بعتبج عاث السامري
لو ساگي يصبح للضلع بديله
مستشهده بأيد الكفر قتيله
. . . . . . . . . . . . . . .
وكفت مواقيت الهظم الها و وكف حتى الهوى
انجوم السمه يمها طفت والكمر صار ابلا ضوه
من نار باب ام الحسن ظِل العرش بيها انجوه
تسبيحه جانت عالارض ودعوتها للمعتل دوه
عند أهل الوثن عالرحمه حقد
ومشكاة السمه لابد تنحسد
كلب الحقد وج الحسد غليله
مستشهده بأيد الكفر قتيله
. . . . . . . . . . . . . . .
باجر يوكفوهم سره ولجهنم الزمره ترد
الصدر امر اول فرد الكاسر ضلع ثاني فرد
واللي شعل باب الوحي واللي سطر خدها بحقد
قصتها كدام الملا  بأمر الله باجر تنسرد
وكل الشاركوا وكل واحد قِبل
ولجهنم يطب الشكك والسأل
وكلمن يقدم بالحشر دليله
مستشهده بأيد الكفر قتيله
. . . . . . . . . . . . . . .
خادم اهل البيت عليهم السلام
عمار العيساوي الكربلائي

اليوم زينب جاريات ادموعها
وتنغز الآهات حدر اضلوعها
. . . . . . . . . . . . . . .


زينب بكسرة ضلوع امها تحس
وتنلجم بالنفس لا مو باللمس
تشوف بالسطره حَمَر عين الشمس
والكسوف ابتده كبل اطلوعها
. . . . . . . . . . . . . . . .


تشوف خلف الباب لاذت فاطمه
وضربة البسمار من تنزف دمه
شلون بالعصرة انخطف وجه السمه
تألم بهالكون كلشي ابطوعها
. . . . . . . . . . . . . . . .


شاهده الحره العقيله اعله الجره
الباب شافتها ابلهيب اموجره
وامها تتوچه بهظم عالخاصره
والجنين أصبح جرح موضوعها
. . . . . . . . . . . . . . . . .


صار موضوع الجنين اكبر جرح
بين امها وبين محسن منطرح
تشوف بسمار الزجيه أصبح رمح
صابها وزيّد جرحها وروعها
. . . . . . . . . . . . . . .


تشوف اخوها اعله الارض يمه اللهب
وتنشد اشذنبه الطفل واليا سبب
زمرة الظلّام ما تسمع عتب
ناشدت بس الصدى بمسموعها
. . . . . . . . . . . . . . . .


زينب اويه امها تشارك بالمصاب
ومن دمه المحسن توشحت بالخضاب
شاهده اعله الكوم في يوم الحساب
يم اله الكون وكت ارجوعها
. . . . . . . . . . . . . . . .


يوم مر عالعايله ايعادل سنين
اللحظه منه بألم وبنوح و ونين
لو نشدنه شحال امير المؤمنين
انكسر ظهره ويه كسر اضلوعها
. . . . . . . . . . . . . . . .


خادم اهل البيت عليهم السلام
عمار العيساوي الكربلائي

لا حسين الحاضر بساعة منيتي
ولا بنيني التحضر وتسمع وصيتي
بيهم امأملة الظنون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .

فاطمة ام البنين الناذره عمري وسنينه
الخدمة الكرار وافخر من صرت اخدم بنينه
للحسن وحسين اكتب دنيتي كلها رهينه
وزينب الدلال هيه وفرحته وحزنه وحنينه

وآنه اولادي انذرتهم اربعتهم
فدوه للخوه وفده الدمعة اختهم
بيهم اتقر العيون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .

حسين من انوه الرحيل الكربله وباشر سفرهم
مارحت مدري شجاني ولا مشيت اتبع ضعنهم
عمري كظييته انتظار ولحد هاللحظه انتظرهم
وهسه من كربت منيتي ما وصل طارش خبرهم

على فراش الموت ويهلن دموعي
الهوى لو هز بابي يهتزن ضلوعي
بشوفهم كلشي يهون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .

على فراش الموت جسمي وخبر من حسين مارد
وتشب نار الفرگه بيه النار من دلالي ابرد
عيوني مشبوحه بدربهم والكلب بالطف توسد
نهر . والمنبع حسين . وكربلا ابيناتنه السد

بالنهار اتنطره ومانام ليلي
يا إلهي عجّل ابموتي ورحيلي
بدونهم عمري شجون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .

سنين وآنه اعله انتظاري ولهفتي الجيّت حبيبي
بلسمي وگلبي وفرحتي وضحكتي وحيلي وطبيبي
سنين ما نشفت دمعتي ولا سكن نوحي ونحيبي
من نصيب الطف . دماءه . والحزن أصبح نصيبي

امه ومفارگته واشتاكيت اضمه
كربله احتظنته لمن طاح جسمه
دمعتي صارت فنون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .

نعشي من ينشال باجر منهو بالمدمع يشيله
حسين بجروحه يجيلي من النزف مهدوم حيله
وابني جفينه كطيعه بيمن النعشي يشيله
على نعشي يخلي خده و ونته تصبح ثجيله

كون بآخر لحظه من عمري يجوني
يودعوني يغسلوني يشيعوني
قبل لاغمض العيون
بلكت بساعه ويجون
الراحوا أخذوا نور عيني ونور بيتي
. . . . . . . . . . . . . . . . . . . .


خادم اهل البيت عليهم السلام
عمار العيساوي الكربلائي

بالغربة شلون . تغمضلي عيون
واعداء هواي . بيه يحيطون
هجموا عالدار . بحجه واعذار
ضد القانون . حضّرت انصار
. . . . . . . . . . . . . .

هجموا على الدار شكثر والعذر جذاب
تهموني ضد الحاكم آنه امهيأ انصار
كل هجمه تمتد ابأثر من دفعة الباب
من كسرة اضلوع الأمس دلالي منصاب

التاريخ انعاد . نفس الأوغاد
رهبوا نسوان . فجعوا اولاد
مابيني وبين . ام الحسنين
قصة أحزان . بدموع العين
. . . . . . . . . . . . . . .

السامره جابوني غصب واتركت الديار
بالغربة رادوني اذل وآنه ابن الأطهار
آنه اللي يسجدلي النجم وتسجدلي الأقمار
لو شلت ايدي للشمس شمس الله تندار

كل همسه وصوت . وكل يوم يفوت
كوم الظلام . يردولي الموت
وآنه بكل حال . عانيت أهوال
أصعب ايام . بين الانذال
. . . . . . . . . . . . . . .

بالغربة واتأمل هلي شو كلهم اغراب
وسط المدينه فاطمه غربوها الأصحاب
وللكوفه حيدر مبتعد عن دار الاحباب
ومدفون أصبح بالنجف سر داحي الباب

تدور الايام . ونفس الآلام
نفس الكتّال . نفس الظلّام
شما بينه جروح . تبقى ومتروح
والأصعب صار . جرح المذبوح
. . . . . . . . . . . . . . . .

اتأمل حسين الغريب بكربلا صار
واتطشرت انجوم ابسمه أجساد الانصار
لا ظل اخو لا ظل ابن ظل وحده محتار
مابين أطفال وحرم وخيامه بالنار

طاحن للجود . عالشاطي ازنود
شلون ايخليه . ولخيامه يعود
يصد الجسّام . مطبور الهام
والاكبر طاح . طاح وما كام
. . . . . . . . . . . . . . . . .

صاروا غريبين بقبر بالكاظميه
الأول ابسجنه وينسگي سم المنيه
والثاني نفس امصيبته السم والرزيه
وبطوس مدفون الرضا بنفس القضيه

وآنه المهضوم . ادري بهاليوم
احسب ساعات . ويسگوني سموم
دلالي يذوب . بالسم مصيوب
وبسامراء . قدري المكتوب
. . . . . . . . . . . . . . . .

بسامره عشت بغربتي ياناس مهموم
وانه الامام المفترض بالطاعه معلوم
هاليوم ينطوني العده كاس امن السموم
ايكطّع دليلي وارتحل للباري مظلوم

يم المختار . اشكيله شصار
ظلينه اغراب . مامش انصار
الجانوا أصحاب . صاروا أحزاب
كل حقد الصار . ضد داحي الباب
. . . . . . . . . . . . . . . .



خادم اهل البيت عليهم السلام
عمار العيساوي الكربلائي

السلام على جبل الصبر زينب الكبرى
السلام على شهيدة الاشتياق والفراق