بنت بيت ، حتى ف جنانك يا ستي
عصبيتك ، إفراطك المُدهش ف أيام عُزلتك

وانا اللي خارج من جيوب حنيتك بضحك لأيامي
اللي جايه

القصه اياها المتعاده
مليتها وقرصت بزيادة
لو علت قلبي إن انا بهوى
فالقهوة بتفضح بزيادة
السكر ف حضورك سادة
واللي مغلطوش هما السادة
مسكين من شاف فيلم لأخرة
وبيحسن ظنه على إعادة

كان لازم أخر للقصه
ملعونه يا لسه ف كل غرام

شعراً تضميد الحب حرام
والأصل ف اي خِلاف تركه

العيب على كل اللي اشتركوا ف تحويل الحب لحزن طويل

محتاج ل حضن يرجعك كامل
من حد مش كامل وانت مش وياه

انا قلبي بكل ما فيه شايفك
حاسس بالرعشه ال شفايفك بتخبيها
متفاءل بيكي وحاسس انك قولتيها

واديني قصاد جمال قلبك
لا مال ولا قوة ولا حاشية
بداوي جرحي بحنانك
يا رحمة ربنا الماشية ! 🥺❤️

بزيادة العند اللي ف طبعك
بزيادة الخوف اللي متابعك
انا مش عايزك ف رهان بايخ
ولا جاي ابيع سهم ف برصه
انا جاي عشان بس اقولك
استاهل اخد فرصه ؟

انتي الست اللي انا بتمنى تغلبني التجاعيد ف وجودها 💕

انا جايب بكره اتفاوض بيه
على حصة وجعك ف امبارح

انا مش كداب
ولا جاي اقدم للسايب وجع المتساب
انا جاي عشان بس اقولك
وحياتك بزيادة غياب

وان كان فاضل ليا محبة
لو فاضل حب ولو حبة
اسمعي مني كلامي وحسيه

انا مش طالب إلا وجودك !

حنني والنبي قلب جنودك
عينك ومشاعرك وردودك
وافتحي بابك اللي قفلتيه

انا عمري م خدت فرص من حد
ودفعت الأتمان الكامله
انا عمري م قولت ياريت لو كان
نرجع ل زمان
ولا فكرت ف ايه هيكون
من بعد م كان
لكن الموضوع المرادي
يستاهل أجرب من تاني

انا مش عاوز اقدم اسباب
انا جاي اقول انا مش كداب
ف غيابك مهما مشيت ورضيت
وعملت صحاب واغاني وبيت
هفضل مكسور مهما اتلميت
هفضل شارد مهما اتونست

ريحتك روحي
بمشي ف اوقات والليل واسع
والناس نايمين والخوف لاسع
بتخيل ايديك ماسكاني
وبشوف قفلة عينك فالضحك
زي ما كنت بشوفها الأول

بتمنى الحاصل دا يطول
تتحرك مزيكا بسيطه
شبه الفستان اللي عليكي
اقفل على ايدي بلا اديكي
يوجعني حنيني ويخنقني
دي اول مرة وعهد الله بطلب من حد يصدقني !