او زي راجل قولها
انك بقيت محتاجلها
وانك تحب تموت ف بيت من حضنها

ساعتها قولت
بحب الشبابيك الخشب أكتر
وأحب ألوان المعيشة دافيه أكتر
كلب طيب ف التراس
بورتريه ف الصالة من فنان صديق
وبخور مفاجئ عند باب البيت

ما أفسدته العلاقات القديمة
تُصلحه أحلام جديدة طيبة ..

على أي حال
مُهتم أقول كلمة أخيرة للتاريخ
انتي أجمل ست فالعالم عموماً
أو عموماً ، انتي أجمل ما رأيت

بنت بيت ، حتى ف جنانك يا ستي
عصبيتك ، إفراطك المُدهش ف أيام عُزلتك
وانت اللي خارج من جيوب حنيتك
بضحك لأيامي اللي جايه

هكتب كدا ، خلاص هكتب كدا
خارج حدود الشِعر
بلا إلتزام بالمجازات العريضة
إثبات القدرات ف الكتابة
لينا شُعرا يعملوا الاشياء دي أجمل مني بكتير الحقيقة

أما انا ف هكتفي بسذاجة العاشِق
وعشان " بحبك " هي أبلغ شِعر يتقال عن بحبك
هقولها صافية مُجردة

لو كان بإيدي يارب أتحول كمانجة
كان ساعتها ممكن ألمس كتفها
وأقول بإني بحبها مرة يارب
وبعدها أروح ل حالي

في بنت أبعد من خيالي
أقرب إليا من حبل الوريد
الشعر يفعل ما يُريد
والحب يفعل ف النهاية
ما يُريد

قسمة ونصيب وخلاص
وهتفضلي ع الراس مهما السنين مرت
مهما الخيوط كرت والعمر فات بيا
هتفضلي المُلهمه والبنت ف النيه
والمخرج اللي لقيته ف دايرة مقفولة
أول ظهور رسمي للسيدة الأولى 🍁

ف الليل يا ميّ وضحكتك شمسين
طير انطلق ف الشك قومي ناديه

قابلك ، وقابلك بصدّك بس ساكنه حنين
ف أمانة حِنّي شوية وانتي بتصُديه

لما أتولد ف الصُدفه كان طِفل بلا إسم
جالك ف اشهدي وسمّيه

انتي نهاره ومِساه وجنونه وهدوءه
يا مضيعاه ف الظنون ومكسّله تلاقيه

انتي اختياره ل ملابسه وضحكته وقهوته
وانتي الموسيقى اللي ف ودانه ، وطن وبنيه

في سِت أيام الحياة بينكم نشِت
ف لحن واحد لُه سِت أرواح إذا سمعتيه
راجح داوود
عمر خيرت
عمار الشريعي
مارسيل خليفة
نصير شمّه
وهشام نزيه

كان شكسبير بيحكي عنه ف المأساه
وكان نِزار قبّاني كاتب اسمه ومخبّيه

كان جابريل ماركيز مدوّن قصته معاناه
وكان فرانك سيناترا بيقلد غُناه ف أغانيه

يمشي في بُعدك كإنه الضل ف المترو
مش مرئي لكن بيشعُر باللي مروا عليه