علي الليلة الفاتحة.... ناصبتلك فاتحة
                 بويه...بويه
..............
الليلة من سبع المثاني لحدّ اخر ســورة
تنحب الايات كلها ملثمة ومكـــــــسورة
يا حجاب اســم الجـلالة ويابداية نورة
هامتك هاية يحيدر لو ســـماه مطبورة
والمساجد نايحة.... ناصبتلك فاتحة
____
يمـــــــــــشي بالآيات حزنك آيه تنعى لآية
وبين كل سورة واختها الزهرا عدها اقراية
التمن ونزلن ينوحن فـــــــــــوگ المصلاية
مثل ماناحـــــــــــــــــن بناتك يم المسناية
ويم دماك الطايحة....ناصبتلك فاتحة
____
ضيفك القرآن نازل يبو حســـــــــين الليــلة
واگف ابابك يريدك گــــــــــــــــوم يا ترتيلة
الجاي عطشان اعله صوتك ياعلي شحجيلة
ياكريم شعجب ضيفــك لسّة ماماشـــــــيلة
جرح راسك جارحة.... ناصبتلك فاتحة
____
ذابلة طيور المدينة اليوم هيّة وناســـــها
تنتـــــظر مثل اليتامى وتجر گوة انفاسها
يالچنت تشعر بالمهة وتســمع البحساسها
من ٱنطبر راسك يحيدر كلها لزمت راسها
امتانية من البارحة.....ناصبتلك فاتحة
___
ياعلي الليلة الأمـــان بلا أمـــــان بدونك
خاف تنسد نعمة الله لاتغـــــمض عيونك
ها يلون الفاگدينك فـــدوة بويه شلونك
اجفاك من هاللحظة بان بوجه اليحبونك
ارسومه صارت واضحة....ناصبتلك فاتحة

الخادم كاظم الحولاوي

تهدمت والله أركان الهدى
:::::
اليــوم جبرائيل كبــر بالسمه
انطبر حيدر علي حامي الحمه
الليله هاي الليله كلش مؤلمه
مو جرح جرحين صار بفاطمه
تبچیلك الزهراء  أركان الهدى
:::::
انطبر حيــدر علــي خير العمل
بالجوامع صوت ابو اليمه انچتل
حيره شكتبلك علـــي يا مستهل
شلــــون بالتابوت ينشال الجبل
ظل النبي ينعى    أركان الهدى
:::::
اليوم تنعى المرتضى ليلة قدر
شلون لو تنظر علي ام الخدر
صعبة مثلك يا علي يضمه الگبر
اليوم عالخد مو دمع ينزل جمر
جرحك فلا ننساه   أركان الهدى
:::::
الله يلعـن ابــن ملجــم والسبب
شال سيفه وبي ضرب اطهر نسب
عجب تنشال بنعش حيدر عجب
بالحــديد شلــون ينقاس الذهب
كون اليتامه وياه   اركان الهدى
:::::
الليله زينب تنتظر حيدر يـرد
الليله حتى العطر ميت بالورد
كلها مفجوعه السور حتى الحمد
ابن ملجم چان عند حيدر عبد
مجرم ضرب مولاه   أركان الهدى
:::::
تنتظــر عــالباب زينب رجعته
لون اخوها الحسن اصفر شافته
حسين شنهي الخبر رگضت حاچته
گــالها الکـــرار طبــرو هامته
عالمرتضى ويلاه   أركان الهدى
::::
علي جبار الكعبي
الفاتحه لوالدي

ياعلي أولادك يتامه الليله
ياهو من بعدك علي تشكيله

تنوح ظلت ياعلي أيتامك
تذكر سنين المضت وأيامك
عمت عين الشطر حيدر هامك
وخله دمك بحر يجري بسيله

ياوسافه تروح تتركها وتغيب
ظلت جروح اليتامه بلا طبيب
انت بگلوب التحبك ياحبيب
كل يتيم اليوم رايح حيله

يا شمسنه الغابت وراح الضوه
ياهوانه وبعد ما انشم الهوه
ياطبيب جروحنه وضاع الدوه
يا جتاف ونعشك اللي تشيله

عيون عميه الما تشوف اخيالك
الصاب راسك ياعلي جتالك
حرم من شوفتك كل عيالك
حگها عين الما بجت تبچيله

مات كل الأمل يوم اللي متت
راح كل الفرح يوم اللي رحت
شلون عينك ياعلي من غمضت
ياهو غيرك حتى هم نشكيله

ل اسعد الناصري

غداً على بركة لله تعالى

على بركة لله تعالى

نعي الى الأمام علي عليها السلام
****
ذهب زينب الى حجرة امير المؤمنين وهي تقول


كالولي بويه امصوب الهام
ويمك تون وتنوح الأيتام
تحرمني منك ليش الأيام 
واشلون تغمض عيني وتنام

اريدن بيدي اشد جرحك وداويك
وشوف اليوم بويه اشبيك ما بيك
وترد تمشي اعله اطولك وانه اناديك
ويم الباب ارد اكعد وتانيك

عذبني زماني وحيراني
ومن اهل المحنه يتماني
وره الجناز ناديت بحناني
اريد ابجي اعله بويه الدللاني

انه زينب ودمعي اهواي عدله
ولا مره مشت وياي عدله
بعد ساعه ودليلي يموت عدله
وعلي امن تروح اشوف انه المنيه

جبل حسرات فوكي الدهر صاباه
وسمعت الخبر وتعنيت صاباه صوبه
ابن ملجم اشلون الراس صاباه
انكسر كلبي ودوت نيران بيه



صلب كلبي وابد للضيم مالان
وما يوم الدموع اعليك مالان ملن
يبويه امتوني من فركاك مالن
نحت والطير حن كلبه عليه

الشاعر
تحسين الخفاجي