tgoop.com/ayy264/7050
Last Update:
نزله للقاسم ع
هاشمي وبالحومه مثل حيدر يومه
شوف راسك شوف جسمك شوف أديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
طبها والسيف بيمينه ونشر بالناس الرعب
والارض كلها أمتلكها وصار سلطان الحرب
جندل الـفرسان بيده ومـاشـعر جفه بتعب
هذا تربات الـهواشم غيرة ينضح لو غضب
شدعلى الملثومه
وسابگاته اعلومه
شوف وجهك شوف ظهرك شوف اديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
هذا جـسام اعله أبوه و اخـذ شمـرت حـيدرة
وكلها خافت من يمينه الموت وي سيفه جـرة
فصل الحومه اعله كيفه تگول سبع الـگنـطـرة
ورخص الفرسان بـيده وصارت ابـسعـر الـثـرة
الجيش والخياله
ماتساوي انعاله
شوف نبضك شوف دمك شوف أديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
نزل ومذهبه بيده يصيح وين أهل السبي
ويـنهه الگالت تجيها وتسبي اعـيال الـنبي
والله ياغلمان آميه الـيوم الـــبسكم عبي
وهيجي اطباع الهواشم عـالمخاطر تعتني
غاره تتبع غارة
وهزهم ابتاره
شوف دربك شوف ربعك شوف أديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
كوم الناس اعله ناس وصعد فوگ الگـومه
وگلب يمنتها اعله يسره والـتفر ملزومه
الريح مهرة وشدعليها وكسر ظهر الـحومه
وحارت الـچيمان بيه وفرت من اعـلومـه
هزهم ابصولاته
وحيدريه أرباته
شوف صدرك شوف رجلك. شوف اديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
وگله الحسين اعله هونك لاتخـلص الوادم
ويبني اتريض عليها وبلـكي بـيهم نـادم
فدوه اروحلك يعمي هالـخـنگ مـو لازم
خلي بس صيتك يروحي يذبح و يالصارم
يخنگ ابنفاسهم
منه شيب راسهم
شوف روحك شوف نفسك شوف اديك
لو وصلها ابن الحسن ضاعت عليك
هاشمي وبالحومه مثل حيدر يومه
ـــــــــــــــــــــــــــــــــــــــــــــــــــــــــــــــ
خادم الزهراء //ع //ابو احمد الطائي
BY ويبقى اݪحسين (ع) *
Share with your friend now:
tgoop.com/ayy264/7050