والليل جفنه نعس .. والجفن يادوبه
‏باقي له من الليال ، اللي معك باقي

‏وان قلت : ربي يقدّرني على التوبه
‏طارت مشاعر وفاي ، وطاح خفاقي

‏لا واهني قلبه اللي ما أنت محبوبه
‏ماتلت اعماقه .. اللي تلت اعماقي

‏الطعنه اللي من الغالين محسوبه
‏إما على جيتي .. ولا على فراقي

‏يا من رمتني دروب العمر بدروبه
‏إن كان لي خاطر بمْحبتك شاقي

‏صحيح مالـ البنادم .. غير مكتوبه
‏بس أنت يمديك ترحمني من أشواقي

‏أنا على كثر ما انجى منك " بأعجوبه "
‏إلا اني أسلمك عمري .. وأنا هاقي

‏لا ميّل الشوق قلبك .. والتفت صوبه
‏جعل العوض في مجيّك عن تعب ساقي

طالت عناقيد الغلا وأينع الغرس
‏هبي بعطرك .. يارقاق الهبايب

‏من يوم خلانا الجفا نحفظ الدرس
‏وحنا مثل كل الحبايب .. حبايب

‏إن رحت .. راح الليل حبرٍ على طرس
‏وإن جيتني محدٍ من الناس غايب

‏من علم عيونك تسولف وهنّ خرس
‏علمني أرفى عن خطاك السبايب

‏والله لترجع من الدنيا وأهلها وحيد
‏لا شفت فالحب .. حب العالم لروحها

‏خلك كذا لا أنت بقريّب ولا أنت ببعيد
‏احيان الأشياء ، بشاعتها من وضوحها

فدتك الرايحات من السنين الا الزعل بالذات
لا يطري لك ترد القلب عنّك وتختبر شوقه

هزمت الصبر مره وانهزمت من الصبر مرّات
عسى الله لا يذوّقك الشقا اللي عقبك اذوقه

مسيري فالحياة احق من حزني على مافات
ولكن لاخلت من وصلك الأيام ملحوقه

ترا اكثر من يحبك من يبادلك السكات سكات
ماهو باللي ليا من طال هرجه زّل منطوقه

ليته خطا واعذرك لو ما أنت معذور
‏من قبل تفرح بالجفا هرّاجته

‏كان أبشع أنواع التطرّف فالشعور
‏شعورك إني شي .. ما أنت بحاجته

مرحبا يا أغلى على النفس النقيّه
من ملذات الهوى - زينه وشينه

اذكرك من يوم ماكنتي بنيّه
قبل تنهين الخفوق وتامرينه

يومها كان المطر مدري سميّه
حمّل الغيمه سلام الياسمينه

جعل يومٍ معك .. ينساني قفيّه
مايجي والشمس في راحة يدينه

لين اشيلك باللحون السامريّه
في دجا ليلٍ غدوا به سامرينه

ماعصم قلبي .. وأنا قلبي متيّه
غير من يوضي سنا البرق بجبينه

حبيبي زاحمت ذكراك صدري لين صدري ضاق
‏وانا اعرف الشتاء لامن رجع .. شرّه على السالين

‏ياصِبرك والسحاب يذكرّك فيني ، ولا تشتاق
‏ياقوّك ينشدك عني المطر .. وتقول له بعدين

‏كثر ما اجهل مصيري في عيونك والزمن سرّاق
‏يطمّني على الحب .. إنك أكثر من عرفني زين

‏مرورًا في شعور أول لقا ، لشعور أخير عناق
‏وش الأيام هذي كلها .. اللي كنّها يومين !!

ماجرح قلبي ولا هزّ الفراق احساسي
‏ذكرياتي معك أنا نادم على مجمَلها

‏لا تعاتبني ليامن صرت مثلك قاسي
‏غيّرتني مجريات الوقت ، وأنت أوّلها

عزوّا به الشعر ، وزن وقاف وعروض
‏ماسال وبل السحاب - وما تنشّى

‏مسفر خطا كان مسفر ، كان مفروض
‏نجمة سهر في السما الدنيا تمّشى ..

‏⁧ #مسفر_الدوسري_في_ذمة_الله ⁩

صادق من تصادق ، وحب اللي تحب
‏أنت أعلم ف نفسك وفي تكوينها

‏مصيرك تشوف الحقايق عن كثب
‏الأيام شدّتها .. تغالب لينها

‏لا أقدامك إن زلّت وصوتك لا انتحب
‏مرآة احاسيس الأوادم .. عينها

‏لو تعرف شعور الدموع بلا سبب
‏عفت الدموع اللي تطيح بحينها