✍️ Выраз дня: "All thumbs" – "усе пальцы - адзінец (вялікі палец)" - няздатны, няўмека, усё валіцца з рук.

📖 Беларускія адпаведнікі:
- НІ МЛЁН НІ ТАЎКАЧ
"На якое ліха такі зяць? ён жа ні млён ні таўкач."
(Крыніца: Фёдар Янкоўскі, "Беларуская фразеалогія")

Калі ласка, пакідайце свае прыклады ў каментарах. Таксама вы можаце прапанаваць вашыя любімыя выразы на любой мове - будзем спрабаваць шукаць адпаведнікі разам 🤗

#устойлівыявыразы #eng

Як галінка за ліст залаты, я – за кожны дзень
У трымценні шчымлівым трымаюся ўсё ахайней.
Не палепшыцца свет, але ведаю: дзе-нідзе
Ёсць у ім і цяпло, і спагадлівасць, і каханне.
Мяне сшылі з пакутаў, пад скуру ўвагналі жах –
Я народу майго скатаваная лялька вуду.
Але ўчуеш прадвесне ў задорлівых капяжах –
І ўсміхаешся зноў, як дзіця, і чакаеш цуду…
І калі гэта ўсё прамінае, бы марны шквал,
Калі не застаецца ні іскры ад нас, нічога,
Дык адкуль тады столькі бязлітаснага хараства
Расцякаецца ўсцяж – па зямлі, па галлі, па шчоках?..

Наста Кудасава
#вершы

📆 31 студзеня 1975 нарадзіўся Альгерд Бахарэвіч — пісьменнік і перакладчык

🤯 Лаўрэат літаратурнай прэміі «Гліняны Вялес», пяціразовы пераможца літаратурнай прэміі імя Ежы Гедройца, двойчы лаўрэат літаратурнай прэміі «Кніга году», уладальнік прэміі Эрвіна Піскатара (Германія) «за моц манументальных раманаў і грунтоўных эсэ", Лейпцыгскай кніжнай прэміі за раман "Сабакі Еўропы" (2024)
Сябра беларускага ПЭН-цэнтра ✍️

📚 Пераклаў з нямецкай мовы паасобныя творы братоў Грым, Франца Кафкі, Г. Г. Эверса, вершы Ганса Энцэнсбергера, раман Катрын Шміт «Ты не памрэш» 📖

📆 1 лютага 1892 нарадзіўся Браніслаў Тарашкевіч — грамадска-палітычны дзеяч, мовазнавец, пісьменнік-перакладчык.

✍️ Аўтар першай агульнапрынятай граматыкі беларускай мовы (Беларуская граматыка для школ, 1918).

📖 У 1918 годзе падрыхтаваў і выдаў у Вільні першую «Беларускую граматыку для школ». Абагульніў і замацаваў пісьмовыя традыцыі, што складаліся тым часам у мастацкай, навукова-папулярнай і публіцыстычнай літаратуры. "Граматыка" перавыдавалася 6 разоў, працяглы час была галоўным падручнікам па беларускай мове, асабліва падчас беларусізацыі 1920-х гадоў у БССР.

📚 Пераклаў на беларускую мову «Іліяду» Гамера і «Пана Тадэвуша» Адама Міцкевіча.

📆 4 лютага 1808 нарадзіўся Вінцэнт Дунін-Марцінкевіч — паэт, драматург, перакладчык

✍️ Пісаў па-беларуску (лацінкай) і па-польску. Творчую дзейнасць пачаў з оперных лібрэта. Таксама вершаванае апавяданне, аповесць, балада. У творах адзначалася цікавасць да народных звычаяў, традыцый і імкненне перанесці на грунт рэальнага жыцця матывы, вобразы народных легенд, казак, паданняў. У баладах абапіраўся на традыцыі і народную творчасць 📚

📖 Пераклаў на беларускую мову «Пана Тадэвуша» (забаронены царскай цэнзурай)

✍️ Выраз дня: "Good things come to those who wait" – "добрыя рэчы прыходзяць да таго, хто чакае" - падкрэслівае важнасць цярпення і настойлівасці, намякаючы на ​​тое, што рэзкія дзеянні могуць не прывесці да жаданага поспеху.

📖 Беларускія адпаведнікі:
- Цярпі, Грышка, карчма блізка
- Цярпі гора, будзе й мёд
- Хто цярплівы, той шчаслівы
(Крыніца: З.Санько, "Малы руска-беларускі слоўнік прыказак, прымавак і фразем")

Калі ласка, пакідайце свае прыклады ў каментарах. Таксама вы можаце прапанаваць вашыя любімыя выразы на любой мове - будзем спрабаваць шукаць адпаведнікі разам 🤗

#устойлівыявыразы #eng

Не ведаеце, чым заняць выходныя? Завітайце на наш Ютуб!
Гісторыі і вершы на беларускай мове даўно чакаюць вас 🤗

Чаму важна развіваць і захоўваць беларускую культуру?
Запыталіся пра гэта ў сябровак нашай каманды⬇️

📌 Аліна Герашчанка:
“Беларуская культура – аснова нашай нацыянальнай ідэнтычнасці. Калі мы падтрымліваем беларускамоўны кантэнт, мы ствараем попыт, які стымулюе тварыць больш.

Калі мы абіраем сваё, мы інвестуем у незалежнасць, умацоўваем сувязь з нашай гісторыяй і будучыняй.

Шукайце і падтрымлівайце беларускамоўны кантэнт. Гэта лепш, чым умацоўваць залежнасць ад чужога.

Беларуская культура жыве, пакуль мы выбіраем яе”.

📌 Лізавета Ветрава:
“Падтрымка беларускага – гэта не проста пра захаванне традыцый, а пра стварэнне асновы для нацыянальнай ідэнтычнасці, самапавагі і культурнага суверэнітэту.

Калі мы не будзем спрыяць развіццю сваёй культуры, яе месца зойме чужая, а разам з ёй прыйдуць чужыя каштоўнасці і погляды.

Захаванне і папулярызацыя беларускай культуры – гэта ў першую чаргу ўнёсак у будучыню, у якой мы бачым сябе самадастатковай нацыяй”.

✍️ Выраз Дня з іспанскай: (Tiene mas) lana que un borrego - (У яго) больш шэрсці, чым у авечкі

📖 Беларускі адпаведнік:
- (У яго) аж з горла прэ
"Пан багаты, усялякага ў яго дабра многа, аж з горла прэ."
(Крыніца: Фёдар Янкоўскі, "Беларуская фразеалогія")

Калі ласка, пакідайце свае прыклады ў каментарах. Таксама вы можаце прапанаваць вашыя любімыя выразы на любой мове - будзем спрабаваць шукаць адпаведнікі разам 🤗

#устойлівыявыразы #esp

📆 13 лютага 1973 года нарадзіўся Андрэй Хадановіч — беларускі паэт, філолаг, перакладчык.

🤯Лаўрэат прэмій: «Залаты апостраф», «Залатая літара», «Крышталь Віленіцы», імя Збігнева Даміняка, Польскага ПЭН-клуба, імя Карласа Шэрмана, імя Наталлі Арсенневай, Ежы Гедройца.
Узнагароджаны медалём Ордэна Пагоні (2024) 💪

🤩 Як мы ўжо пісалі, сапраўдная Рок-Зорка беларускай культуры. Перакладчык, які, мабыць, пераклаў (ці ўдзельнічаў у перакладах) на беларускую мову... амаль усё. Вось толькі невялічкі спіс:
📚 «Уводзіны ў геаграфію», «Сёмае неба», «Іншага канца свету не будзе», «Рапарт з Гораду ў аблозе», «Рэканструкцыя паэта», «Выратаванне», «Эвангельле паводле Пілята», і яшчэ прыкладна 30+ твораў 🤯🤯🤯

📖 Апавяданні Гілберта Чэстэртана ”Ціхмянасць айца Браўна” выйдуць у перакладзе на беларускую мову Уладзіміра Бруя

📚 У зборнік увайшлі найбольш папулярныя апавяданні англійскага класіка. Бліскучы талент аўтара, багацце мовы, невычэрпная выдумка ў пабудове дэтэктыўных сюжэтаў па-свойму вырашаюць спрадвечную задачу літаратуры: абвясціць чалавека найвялікшай каштоўнасцю Сусвету і веру ў Бога наймагутнейшай сілай дабра.

📆 Папярэднюю замову можна зрабіць у выдавецтве Рамана Цымберава

✍️ Выраз дня 🇬🇧: Talk through one's hat – "Гаварыць праз шляпу" - гаварыць абы-што, малоць языком, малоць лухту.

📖 Беларускія адпаведнікі:
- ПЛЕСЦІ ЛАПЦІ (з кашалямі)
- НАПЛЕСЦІ ЛАПЦЕЙ (з кашалямі)
"Той вам нагаворыць, — ён напляце вам лапцей з кашалямі. Толькі слухай, то нарасказвае."
(Крыніца: Фёдар Янкоўскі, "Беларуская фразеалогія")

Калі ласка, пакідайце свае прыклады ў каментарах. Таксама вы можаце прапанаваць вашыя любімыя выразы на любой мове - будзем спрабаваць шукаць адпаведнікі разам 🤗

#устойлівыявыразы #eng

У нашай Мовы акрамя нас больш нікога няма

Якія вы маеце планы на #ДзеньРоднай#Мовы ? Калі пакуль ніякіх, прапануем вам паўдзельнічаць ў добрай справе 😇

На Amazon KDP усе ахвочыя могуць выдаваць свае кнігі любым накладам і без перадаплаты: вершы, прозу, даследванні, падручнікі, коміксы, маляванкі і гд. Але не па-беларуску!

Каб гэта выправіць, Марыя Грыц зрабіла петыцыю і запусціла акцыю #BezosGiveMeMyBook

Далучайцеся і вы! Для гэтага трэба падпісаць петыцыю і распавесці пра яе, адзначыць @amazonkdp і перадаць эстафету беларускасці хаця б 3м сваім сябрам.

Давайце разам адчынім дзверы вялікай беларускай літаратуры!

Петыцыя: http://surl.li/vrausl ці на change.org BezosGiveMeMyBook