🔔 Ужо заўтра! У польскім Бельску распачынаецца фэст “Бардаўская восень”. Далучыцца да вірлівай фестывальнай плыні запрашаюць старшыня Беларускага ПЭНа Таццяна Нядбай і кіраўнік фундацыі Tutaka Павел Станкевіч.

У праграме: канцэрты, літаратурныя дыскусіі, уручэнне прэміі імя Міхала Анемпадыстава, кніжны кірмашык, шмат-шмат цікавостак і, натуральна, мора беларускай музыкі.

Каб нічога не прапусціць, сачыце за праграмай фестывалю на афіцыйных старонках галоўных арганізатараў — фундацыі Tutaka ў Telegram i Instagram

Сёлетні партнёр “Бардаўскай восені” — Беларускі ПЭН.

❕Старт!
⏰ 25 кастрычніка, 18:00 у Бельскім доме культуры

Пры падтрымцы #ArtPowerBelarus @radakultury і Дацкага інстытута культуры і фінансавым спрыянні Еўразвязу.

📱 Каго мы падтрымалі: відэапраект Лявона Вольскага “Нашы ў Польшчы”.

Вядоўца праграмы – знаны беларускі музыка і мастак Лявон Вольскі разам са сваімі сувядоўцамі – Трыма чарапахамі наведвае Варшаву, Беласток і Бельск, каб шукаць і знаходзіць там вуліцы, што носяць імёны слынных беларусаў і беларусак. У кожным выпуску Лявон расказвае захапляльныя гісторыі з жыцця знакамітых ураджэнцаў нашай зямлі, а чарапахі імкнуцца яму дапамагаць, але, калі надта захапляюцца, дык перашкаджаюць.

Цягам праекта аўтары выявілі, што самыя беларускія гарады (паводле назваў вуліц) – на Беласточчыне, там ёсьць вуліцы, названыя імёнамі беларусаў, якія ўсведамлялі сябе менавіта беларусамі — Тарашкевіча, Каліноўскага, Коласа.

Але, калі адштурхоўвацца ад колькасці, дык самы беларускі горад Польшчы — Варшава. Тут ёсць вуліцы Манюшкі, Касцюшкі, Плятэр, Міцкевіча, Кандратовіча (і Сыракомлі), Чачота, удзельнікаў антырасейскіх паўстаньняў беларускага паходжання.

На канале Лявона Вольскага ўжо апублікаваныя 5️⃣ ролікаў пра выбітных беларусаў — Кастуся Каліноўскага, Браніслава Тарашкевіча, Уладзіслава Сыракомлю (сапр. Людвіка Кандратовіча), Станіслава Манюшку і Эмілію Плятэр. Гісторыя апошняй, прызнаюцца стваральнікі праекта, самая любімая. Бо Эмілія Плятэр — дзяўчына з магнацкага роду, якая магла б да канца жыцця квітнець у пастаральным дабрабыце і ні ў чым сабе не адмаўляць, але пакінула ўсё гэта дзеля змагання за свабоду айчыны.

Сачыце за абнаўленнямі каналу на YouTube і глядзіце новыя выпускі пра беларусаў, якімі мы можам ганарыцца!

Пры падтрымцы #ArtPowerBelarus @radakultury і Дацкага інстытута культуры і фінансавым спрыянні Еўразвязу.

#ArtPowerBelarus падтрымала стварэнне двух арыгінальных спектакляў да Ночы паэтаў. Іх вы можаце паглядзець ужо сёння, у гадавіну Чорнай ночы.

▫️ “Святло ў цемры” — праца рэжысёра Андрэя Саўчанкі, сумесны праект фундацыі Tutaka і “Тутэйшага тэатру”. Праз тэксты і біяграфіі рэпрэсаваных творцаў пастаноўка сцвярджае: лёсы паэтаў не зніклі ў цемры, яны па-ранейшаму натхняюць, асвятляюць жыццё беларусаў.

📱 Глядзець на YouTube

▫️“Мая мама ў турме” — спектакль па аднайменнай кнізе псіхолага Вольгі Вялічкі. Вучні тэатральнай школы Razam і прафесійныя акторы ажывілі аповеды пра рэпрэсіі. Гаворка пра гісторыі дзяцей і жанчын, запісаныя ў наш час, а таксама пакуты незаконна асуджаных у савецкі час у жаночым лагере АЛЖЫР.

📱 Глядзець на YouTube

Далучайцеся да прагляду, каб у гэты вечар быць у думках разам.

🔥 Не прапусціце гарачыя #магчымасці для беларускіх дзеячаў культуры.

Больш абвестак пра навучальныя праграмы, арт-рэзідэнцыі і адкрытыя колы – на канале @sekktor. Дарэчы, sekktor цяпер мае ўласны сайт, з яго дапамогай стала яшчэ прасцей арыентавацца ў свеце магчымасцяў.

▪️ Цэнтр усходнееўрапейскіх даследаванняў Варшаўскага ўніверсітэта ладзіць конкурс на атрыманне Прэміі імя Льва Сапегі. Гэта адмысловая праграма для грамадзян Беларусі. Арганізатары прапануюць: пражыванне, прэмію, інстытуцыйную падтрымку.

👉Даведацца больш і падаць заяўку (да 1 лютага 2025 г)

▫️ Праграма MOST, якую рэалізуе Інстытут імя Гётэ, адкрыла чарговы сезон конкурсу на стажыроўкі і іншыя прафесійныя візіты ў ЕС. Гэта праграма мабільнасці для беларусаў і беларусак. Прыём заявак пачаўся 29 кастрычніка 2024 і працягнецца да вясны 2027 года.

👉 Даведацца больш і падаць заяўку

▪️ Старамейкі дом культуры ў Варшаве аб’явіў набор на літаратурныя рэзідэнцыі. Браць удзел у конкурсе могуць паэты, празаікі, перакладчыкі, драматургі з Беларусі.

Дэдлайн: 18 лістапада

👉 Даведацца больш

▫️ Хуткі дэдлайн! Акселератар ByWomen запрашае беларусак, якія жывуць у Польшчы, узяць удзел у праграме падтрымкі. Калі вы хочаце распачаць сваю справу альбо рэалізаваць адукацыйны, культурніцкі, экалагічны альбо іншы праект, шукаеце ментарства і парадаў, то гэтая праграма — для вас.

Дэдлайн: 8 лістапада.

👉Даведацца больш

👀 Не ведаеце, як бавіць доўгія лістападаўскія вечары? Вось 8️⃣ фільмаў, якія раім паглядзець онлайн на фестывалі «Паўночнае Ззянне-2024», што праходзіць з 4 па 21 лістапада пад слоганам «Вярнуцца да каранёў».

❕Паглядзець усе фільмы можна на платформе фэсту бясплатна, але важна зарэгістравацца.

▶️ «Скрозь святло», рэж. Вікторыя Ягорава
Пераканальная псіхалагічная драма з актуальным сюжэтам: дзяўчына з Беларусі спрабуе знайсці сябе ў эміграцыі, але сутыкаецца з дамагальніцтвамі з боку тых, хто нібыта ўзяўся ёй дапамагчы.
⏰ Калі? 15, 20 лістапада 00:00-23:59

▶️ «Песні зямлі, што павольна гарыць», рэж. Вольга Журба
Эмацыйнае падарожжа ў самае сэрца вайны – Украіна і ўкраінцы ніколі не будуць ранейшымі: жорсткі ды бескампрамісны позірк на разбуральны для краіны ды свядомасці людзей канфлікт.
⏰ Калі? 10 лістапада, з 00:00 да 23:59

▶️ «Кроў і караоке», рэж. Юры Сямашка
Мінімалістычны анімацыйны сюжэт ад беларускага генія-самавука. Айчынныя маргіналіі ў дасціпнай ды надзвычай эстэтычнай форме – парадаксальны погляд на звычайныя рэчы.
⏰ Калі? 10,16, 19 лістапада, з 00:00 да 23:59

▶️ «Чамадан», рэж. Даша Брыян
На вялікі жаль, валізы сталі сімвалам сучаснага свету міграцыі, рэлакацыі ды бежанства. Кароткае, але вельмі яркае відэаэсэ пра намаганні застацца сабою, пакінуўшы радзіму.
⏰ Калі? 10,13, 18 лістапада, з 00:00 да 23:59

▶️ «Лазневы дзень», рэж. Ганна Хінтс, Тушар Пракаш
Хвілінка на тое, каб прыпыніць бег складаных эмоцый і зняць цяжар ад пражытага. Групавы партрэт-рэлаксацыя, спроба зазірнуць ў самую сутнасць загадкавай эстонскай душы.
⏰ Калі? Сёння, 8 лістапада, з 00:00 да 23:59

▶️ «Песні зямлі», рэж. Маргрэт Олін
Смелая задума паказаць прыгажосць роднай зямлі, фільм-медытацыя, заглыбленне ў некранутую прыроду Нарвегіі. Рэжысёрка-філосафка прапануе маляўнічае падарожжа гарамі, фіёрдамі ды леднікамі з максімальным набліжэннем да сутнасці рэчаў у цэлым сусвеце.
⏰ Калі? 9 лістапада, з 00:00 да 23:59

▶️ «5 1⁄2 гісторый кахання ў адной вільнюскай кватэры», рэж. Томас Венгрыс
Калектыўны партрэт новых ды старых еўрапейцаў – жыццё зводзіць іх разам на некалькіх дзясятках квадратных метраў. Камернае драмедзі пра чалавечыя адносіны, розныя характары ды агульныя лёсы.
⏰ Калі? Сёння, 8 лістапада, з 00:00 да 23:59

▶️ «Nice Ladies», рэж. Марыя Панамарова
Цікавы і дасціпны расповед пра людзей у складаных абставінах, дакументальны партрэт украінскіх жанчын, якія не скараюцца лёсу і не збіраюцца губляць гумару ды імпэту. Натхняючы прыклад для ўсіх, каму зараз складана ды незразумела.
⏰ Калі? 18 лістапада, з 00:00 да 23:59

😊 Хочаце больш? Вывучайце праграму сёлетняга фэсту і выбірайце кіно на свой густ.

🔔 Каго мы падтрымалі грантам #ArtPowerBelarus? Акселератар "Тут і цяпер!" пад ментарствам Валярыны Куставай, паэткі, культурніцкай менеджаркі, аўтаркі і вядоўцы шэрагу праектаў на "Белсат".

Цягам некалькіх месяцаў 20 адабраных удзельнікаў праходзілі адукацыйна-тэарытычную частку, падчас заняткаў і кансультацый распрацавалі свае ідэі. Амаль дзясятак ініцыятываў змог разам з ментарамі зладзіць уласныя імпрэзы і рэалізаваць ідэі.

– Я натхніўся на арганізацыю такога акселератара, бо бачу шмат цікавых, ініцыятыўных людзей навокал. У кожнай і кожнага ёсць свае задумкі, але амаль кожнаму і кожнай чагосьці не хапае для іх рэалізацыі, — кажа менеджар праекта Канстанцін Акінчыц — Я доўгі час займаўся арганізацыяй мерапрыемстваў, прычым не толькі музычных. Разумею, якія крокі трэба рабіць і часта бачу, якія памылкі здзяйсняюць нават мае знаёмыя. Шкада, калі на класны канцэрт праз недахопы арганізацыі можа ніхто не прыйсці. Таму задачамі акселератара былі сабраць людзей розных, даць ім веды і падтрымаць іх.

Праграма праекта ўключала:
▫️Блок тэарэтычных і практычных заняткаў
▫️Прыватныя і камандныя кансультацыі з адказамі на пытанні ўдзельнікаў
▫️Прэзентацыю праектаў і рэалізацыю найцікавейшых з іх

Як вынік — у выпускнікоў атрымалася зладзіць самыя розныя падзеі: ад майстар-класаў ці вандровак да ўласнага фестывалю.

Больш прыкладаў праектаў, падтрыманых ArtPower Belarus, знойдзеце ў адмысловай галерэі (дапаўняецца)

📱 Серыя адукацыйных відэа “Пра гэта не раскажуць у школе” ад праекта “Васьміног” даступная цалкам.

Аўтары ролікаў — Каця Барушка і Яўген Шапчыц — ставілі сабе на мэце шукаць нечаканыя і яскравыя факты пра Беларусь, каб бязлітасна здзіўляць імі гледачоў. Падаецца, літаральна ў кожным відэа гэтая мэта была дасягнутая. Не верыце? Праверце самі 😉

На YouTube-канале “Васьмінога” можна паглядзець усе 15 ролікаў. Над кожным з выпускаў працавала каманда журналістаў разам з вядомымі дзеячамі культуры.

Сярод кансультантаў: Наталля Бібікава, Ілля Бажко, Дзяніс Марціновіч, Тарас Тарналіцкі і многія іншыя. Для стварэння некаторых відэа аўтары выкарыстоўвалі візуалізацыі штучнага інтэлекту.

Кінематограф, фатаграфія, цэнзураваная літаратура, паўстанне пад кіраўніцтвам Кастуся Каліноўскага, гісторыя беларускай мовы і нават лайфхакі, якія дапамогуць вучыцца эфектыўней… Пасля прагляду ролікаў вашыя веды і веды вашых дзяцей стануць заўважна глыбейшымі ў кожнай з гэтых тэмаў.

👁 Глядзець відэа

* Распрацоўка канцэпцыі і беларусацэнтрычнасць праекта: @radakultury.

🔈 Каго мы падтрымалі грантам #ArtPowerBelarus: альбом "Пазначаныя жоўтым".

Музычны зборнік сёння прэзентаваны праваабарончым цэнтрам "Вясна" і творцамі, якія працавалі над праектам. Гэта аўтарка ідэі і менеджарка Крысціна Дробыш, аўтар тэкстаў і рэпер Аngst, музыка і рэжысёр Арцём Ставер, праваабаронца "Вясны" Дзіяна Пінчук. Да запісу далучыліся акторы і музыкі, сярод якіх — Андрэй Новік, а таксама былыя палітзняволеныя Алесь Папковіч і Алана Гебрэмарыям. З прычынаў бяспекі імёны ўсіх удзельнікаў не называюць.

У альбом увайшло 6 трэкаў, кожны з якіх апісвае важны момант ці аспект жыцця палітзняволенага Беларусі: затрыманне — умовы — суд — лісты — пасля вызвалення — дзеці.

“Для мяне ў гэтым праекце найважнейшым элементам з’яўляецца дакументальная праўда, — кажа Крысціна Дробыш. — Музычная частка вельмі моцная, але ж і яна дакументальная. Калі разбіраць складнікі інструменталу, то там бачыцца паўнавартасная драматургія. Тэксты будуюцца на аповедах, інтэрв’ю, прыватных размовах з палітвязнямі і іхнымі сваякамі. Таксама выкарыстоўваюцца запісы рэальных людзей. Такі сабе музычны вербацім”.

Што было самым складаным у працэсе працы? Запытваемся ў каманды.

“Усё. От рэальна ўсё. Чытанне кіламетраў тэкстаў, збіранне каманды. Начныя запісы, мантаж, — кажа Крысціна Дробыш. — Прасцей сказаць, што было простым — заварыць чарговую каву, каб далей ісці працаваць у максімальнай уключанасці”.

“Мне ж было складана адпачатку намаляваць у сябе ў галаве, якой мусіць быць музыка. Потым — якія трэба мастацкія прыёмы ўжыць, хацелася выкарыстаць паболей розных інструментаў”, — разважае Арцём Ставер.

🔗 Слухаць альбом на: Youtube i Soundcloud

❕Больш прыкладаў праектаў, падтрыманых ArtPower Belarus, у адмысловай галерэі (дапаўняецца)

🔈 Каго мы падтрымалі: оперная спявачка і выкладчыца вакалу Дар’я Новік.

Дзякуючы праграме мабільнасці #ArtPowerBelarus Дар’я зарганізавала тур па гарадах Польшчы і Літвы, дзе зладзіла серыю майстар-класаў па гукавой імправізацыі. Прыпынкамі ў вандроўцы сталіся Вільня, Беласток, Познань і Гданьск.

— На сустрэчы прыходзілі абсалютна розныя людзі! Аматары, прафесіяналы, спевакі, акторы, студэнты і нават тыя, хто ніколі ў жыцці не спяваў. Хтосьці хацеў разняволіцца, хтосьці — палепшыць свае навыкі і паглыбіць веды, а хтосьці — для тэрапіі, бо такія майстар-класы маюць тэрапеўтычны характар, — дзеліцца ўражаннямі Дар’я. — Мая галоўная задача — вяртаць ідэнтычнасьць, якую мы ўсе часам губляем у шалёным рытме жыцця ў мегаполісах. Хачу, каб людзі зноў пачалі ўспрымаць спеў як норму, а не як падарунак, дадзены выбраным. І каб карысталіся спеўнымі тэхнікамі з мэтай супакоіцца, палепшыць настрой і свой псіхалагічны стан.

Дар’я распавядае, што падарожжа было натхняльным і для яе самой як для прафесіяналкі. У выніку з’явілася задумка новага праекта. Было месца і для рэфлексій:

— Гэтая вандроўка паказала мне, што людзям вельмі не хапае такіх сустрэч! Удзельнікі не хацелі сыходзіць, хацелі далей спяваць, гутарыць, дзяліцца эмоцыямі. Гэта дарагога каштуе, бо сапраўды чалавеку патрэбен чалавек.

Відэа: 📱 darya_novik_vokal

✔️ Больш прыкладаў праектаў, падтрыманых ArtPower Belarus, знойдзеце ў адмысловай галерэі (дапаўняецца)

💥 Дасылаем нашыя самыя сардэчныя віншаванні беларускай пісьменніцы і перакладчыцы Ганне Янкуце з нагоды атрымання ІІ месца прэміі імя Ежы Гедройця!

Адметна, што гэтай высокай узнагародай адзначаны раман пра наш час, у якім лірычная гераіня, беларуская эмігрантка, спрабуе знайсці сваё месца ў новай краіне. “Час пустазелля” — кніга-рэфлексія пра наш час, пра лёсы беларусаў, якія апынуліся ў выгнанні і намацваюць жыццё на новай глебе. Гэта кніга-тэрапія, праз чытанне якой можна — услед за гераіняй — перастварыць уласнае ўспрыманне сябе і свету навокал.

Раім прачытаць 📚 на паперы | у лічбе

Мы вельмі ўсцешаныя, што дзякуючы праграме #ArtPowerBelarus і гранту мабільнасці, атрымальніцай якога з’яўляецца Ганна Янкута, раман “Час пустазелля” знайшоў дарогу да новых чытачоў. Таксама падчас вандроўкі Ганна змагла працягнуць працу над сваім новым праектам — даследаваннем лёсаў беларускіх эмігрантаў у Паўднёвай Амерыцы.

✔️ Больш прыкладаў праектаў, падтрыманых ArtPower Belarus, знойдзеце ў адмысловай галерэі (дапаўняецца).

🔥 Сабралі гарачыя #магчымасці для беларускіх дзеячаў культуры.

Больш абвестак пра навучальныя праграмы, арт-рэзідэнцыі і адкрытыя колы – на канале @sekktor. sekktor цяпер мае ўласны сайт, з яго дапамогай стала яшчэ прасцей арыентавацца ў свеце магчымасцяў.

▫️ “Дом творцаў” ладзіць конкурс заявак на стыпендыю. Запрашаюць беларускіх артыстаў любых кірункаў і іх праекты, якія немагчыма рэалізаваць у Беларусі або няма магчымасці для яго рэалізацыі за мяжой.

❕ Дэдлайн: 28.11 (сёння) да 23.59
Даведацца больш

▪️ Інстутыт імя Гётэ запрашае на онлайн-прэзентацыю праграмы стажыровак для беларусаў і беларусак MOST IV. Падчас сустрэчы можна даведацца пра магчымасці праекта, умовы ўдзелу, a таксама задаць пытанні.

Калі? 17 снежня 2024 а 18:00 (Менск)
Патрэбная рэгістрацыя (да 16 снежня ўключна)
Даведацца больш

▫️ Cross Culture Programme прапануе беларускім прафесіяналам і прафесіяналкам стажыроўку ў арганізацыях Германіі і іншых краін-партнёраў цягам 2-3 месяцаў. Пасля атрымання стыпендыі ўдзельнікаў размяркуюць на месца, адпаведнае досведу і сферы інтарэсаў.

Даведацца больш і падаць заяўку
Дэдлайн: 5 снежня

📣 Праект “Беларускія магістраты”, які рэалізуецца ў межах Рэсурснага цэнтра Беларускай Рады культуры, дзеліцца навінамі і запрашае на заўтрашні стрым!

На сёння актыўныя 2️⃣ магістраты: спартовы клуб “Волат” і Беларуская школа ў Варшаве.

👀 Што ў іх новага?

▫️ у штаце Беларускай школы ў Варшаве цяпер афіцыйна працуюць 15 настаўнікаў;
▫️днямі выйшаў трэці нумар часопіса “Буслянка”. Сачыць за ім можна тут, таксама школа рыхтуе ютуб-праграму для дзяцей пра навакольны свет (хутка будуць навіны!);
▫️школка і яе супрацоўнікі растуць і прафесійна развіваюцца: запусцілі онлайн-заняткі па гісторыі Беларусі, зладзілі запуск некалькіх анлайн-курсаў для дзяцей і дарослых (ангельская мова, матэмытака, прыродазнаўства, клясычны правапіс), узялі ўдзел у настаўніцкім форуме "Адукацыя ў Беларусі і эміграцыі"

✔️ сачыць за падзеямі ў школе: Facebook | Instagram

▪️ужо працуе новы філіял клуба “Волат” у Варшаве (Kowieńska, 12/20, школа № 127), тут праходзяць трэніроўкі па каратэ і агульнай фізічнай падрыхтоўцы для дзяцей 6–16 гадоў;
▪️у клубе развіваюцца новыя кірункі працы: вывучэнне англійскай мовы, трэніроўкі па боксе і ММА для дзяцей ад 7 гадоў, падлеткаў і дарослых;
▪️выхаванцы і выхаванкі “Волата” ўзялі ўдзел у гарадскіх, рэгіянальных і міжнародных спаборніцтвах у Польшчы і Славакіі;
▪️“Волат” ладзіць традыцыйныя сустрэчы-тэставанні фізічнай падрыхтоўкі для спартсменаў ва ўзросце ад 6 да 40 гадоў.

✔️ сачыць за падзеямі ў клубе: Instagram | Facebook