هاي مواد الثاني كاملة وبالترتيب ويرجع لفضل كم طالب من مرحلتنا الله يحفظهم صورهن ونشروهن لحضة بلحضة بايام الدوام والدراسة😘 ، واذا ألله خلانة طيبين نكمل وياكم بشرح المهمات ونمط كل دكتور مثل مرحلة1🎀

سلام عليكم طلاب
مقبلين ع سنة دراسية جديدة
مبروك النجاح للي صعدو مرحلة2
والمكملين ان شاء الله تلحكون جماعتكم لل2

باعو طلاب ، المرحلة1 جانت عبارة عن مقبلات
يعني سنة تعارف وتهيئة نفسية وعملية للكلية

المرحلة 2 طفرة كلش جبيرة
راح تختلف عدكم كمية المواد والمعلومات المتراكمة ، بالبداية ، اول شهر تمرون بصدمة ويئس من كمية المواد المتراكمة ، بس اياكم ثم اياكم واحد منكم يستسلم الهن ويعلن خسارته للمرحلة2 من اول شهر ، كومة طلاب من عدنا صار بيهم هيج وبالكوة تلاحكو ع نفسهم بالكورس 2 ونجحوا الحمدلله واكو رسبوا واكو حملوا
بالمرحلة 2 حضور اللكجرات كلش مهم ، بي درجات وبي كوزات عليهن درجات ، وكذلك كل دكتور يكول مهمات يجن ٨٠% منهن اكو بيهم ميكولون
واللابات بعد اهم خصوصا البروس اياكم تضربون ولو ربع لاب ، لان يأثر عليكم باللاب الوراه
المهم طلاب ارجع واكول لحد يستسلم الها
كبرتو سنة ، خبرتكم ازدادت ، عقلكم كبر ، حفظكم ل اللغة ال E راح يصير عدكم زلاطة ، الملزمة ام 5 صفحات الي تقروها ب5ساعات راح تقروها بساعة
رتبو اموركم من اول شهر وكلشي يمشي عدكم وتصير مرحلة سهلة وبسيطة بالقراية اليومية البسيطة بدون ضغط ع نفسكم

وان شاء الله اني مستمر وياكم بالمهمات والملاحظات حول الدكاترة وملازمهم
بالتوفيق ان شاء الله🌷

مكان مختبرات المرحلة 2 طب اسنان بغداد

#بروس بظهر التسجيل يم اللوكرات(الباب يمه مجمدة)

#الانتومي نفسه طابق اخير كلية

#الهستو نفسه البايو

#الفزيو يم البايو ع صفحة

#بايوكمس ط1 من جهة باب الكلية ع يسار الطابق ثم يسار كبل

ال #dm طابق ارضي مستشفى ، مقابيل قطع باصات البيشنت اول باب ع اليمنة

#الاورال_والامبريو نفس اللاب ط7 مستشفى مقابيل نهاية صعدة درج الطابق

مساء الخير طلاب
هلسنة اسلوبي بالمهمات راح يتغير وياكم لان المادة جبيرة مو مال هذا مهم وهذا مهم

وهذا الاسلوب يفيدكم اكثر من ناحية كمية المادة
بالبداية راح اشرحلكم كل مادة من ناحية دكاترتها شلونهم وشلون مزاجهم وطبعهم بالاسئلة وتسهيلاتهم وية الطلاب ، وكذلك شراح يصير وياكم وتمرون بيه ع مدار سنة دراسية كاملة

والمهمات بس الواضحة كلش و 70% تجي اكلها الكم
اما الباقي يبقة عليكم من بالاعتماد ع شرحي لكل دكتور من ناحية مزاجه وتعامله ونمطه وتسهيلاته تكدرون تحرزون نوعية الاسئلة
ومثل مكتلكم اللكجر كلش مهم من عدة نواحي
الدرجات والكوزات والحظور والمهمات(بالنسبة للدكاترة الي يطون مهمات)الي تجي منها خير من الله..
🌷

#البروس

احلا مادة بالمرحلة 2 واكثر مادة مهمة ك طبيب اسنان

دكاترة البروس النظريين كلش حبابين ومساهلين وية الطالب وملازمهم بسيطة ومو معقدة

نجي ع اللاب ،
د.علي جميل اكثر دكتور مشدد وصارم بالمرحلة2
حاولو تتسايرون وياه قدر الامكان ،

د.يقظان يعني ارحم من علي جميل

عملي البروس هو عبارة عن صنع طقم اسنان من قاعدة(ريكورد بيس) ومصفطة عليها الاسنان بواسطة شمع (البايت رم) وكل هذا تشتغلوه ع جهاز(ارتكيوليتر)
هم يطوكم كل الادوات والاجهزة

راح تمرون بعدة مراحل عملية يمكن 5 او 6 مراحل ع مدار السنة
وتقييم العملي(الدرجات) كل مرحلة ع حدة تتقيم بنهايتها
اخير مرحلة من تنتهون ويقيمونكم ، راح تفلشون شغلكم كله ويطوكم بايت رم بالبيت تلزكوه ع الريكورد بيس تحضيرا للفاينل العملي

طبعا مصطلحات جديدة عليكم بس من طبون لاب تفتهمون كلامي

ملاحضة/ البروس لابه مينضرب ابد ، لان الشغل التالي يعتمد ع السابق ، والسابق اذا جان غلط التالي غلط وهكذا

تقسيم الدرجات

#كورس_اول 15 درجة
11 عملي
4 نظري ما بين كوزات لابات(90℅ من الكوزات ، سؤال واحد تعداد) ومحاضرات(كل 3 محاضرات كوز بيهن)

#مد 20(الاسئلة كلش كلش سهلة مال كل الدكاترة ومكررة 80% سنين سابقة)

#كورس2 نفس كورس 1

#فاينل 50
20 عملي(تشتغلون المرحلة الاخيرة من الطقم وهي تصفيط الاسنان)
30 نظري(هم كلش سهلة ومكررة)