اللي لاحظتو بآخر فترة هو اختلاف جم بين خطاب السلطة وخطاب جمهور السلطة
وطبعاً، هاد كمان كان موجود على دور النظام المخلوع
كانت لغة النظام مباشرة، قانونية، غامضة، ما فيها تصريحات مباشرة بالقتل او التصفية، وحتى آخر لحظة، ضل مثلا النظام يقول : أنا ما عم اضرب براميل ولا عم اقصف المناطق المدنية
ولكن، خطاب جمهور النظام كان جدا عنيف طائفي شعبوي وغاضب

نتابع،

أولاً: خطاب السلطة السورية الجديدة
هاد الخطاب رسمي، محسوب، وبيعكس محاولة إظهار دولة جديدة و”ناضجة سياسياً"
بيتميز بـ:
• لهجة هادئة، عقلانية، وفيها مفردات ديبلوماسية
• تركيز على مفاهيم متل “المرحلة الانتقالية”، “الوحدة الوطنية”، “الحفاظ على مؤسسات الدولة”، "إشراك الاقليات في العمل السياسي"….الخ
• تبرير الأخطاء بأنها “نتيجة تراكمات النظام السابق”
• تجنّب الخطاب الطائفي أو الإقصائي علناً
• محاولة كسب شرعية دولية وإرضاء الخارج (خصوصاً أميركا وتركيا)

مثال:
“نحن نمر بمرحلة حساسة من تاريخ سوريا، وملتزمون بإرساء دولة القانون والمؤسسات، رغم التحديات الأمنية والاقتصادية"

ثانياً: خطاب جمهور السلطة (المؤيدين للشرع)
هاد الخطاب شعبي، مباشر، مشحون بالعاطفة، وغالباً بيكون غير منضبط وطائفي وعنيف

بيتميز بـ:
• لهجة استفزازية أو عدائية تجاه المعارضين، وخاصة العلويين أو الدروز أو “العلمانيين”
• تمجيد شخصي للشرع باعتباره “رجل المرحلة” أو “سيف السنة” أو "صمام الأمان"
• استعلاء على باقي المكونات بحجّة النصر العسكري أو “أحقية الحكم” و "من يحرر يقرر"
• تأييد الإجراءات القمعية بحجّة محاربة الفساد أو الإرهاب
• تصوير أي نقد أو معارضة كخيانة أو تغلغل بعثي/علماني/يساري وتمويه وأيتام وأذيال

مثال:
“الشرع رجّع الكرامة لأهل السنة، خلصنا من كلاب إيران والأسد، وكل مين مو عاجبو يبلّط البحر، الطم بترتاح، ما عاجبك انقلع مو البلد، اين كنت زمن بشار"


زبدة الحشي:
• السلطة بتحاول تبني خطاب وطني جامع ومحسوب، لتكسب الداخل والخارج.
• الجمهور أحياناً بيفضح السلطة بخطاب غوغائي، طائفي، بيضرها أكتر ما بينفعها

وهاد التناقض بين الخطابين بيخلق تحدي كبير للشرع، لأنو أي “شرعية” بدو يبنيها ممكن تنهدم بخطابات جمهوره المتشنّجة 🙇🏻‍♀️

#يتبع

#دخيل

اليوم كل البوستات رح تكون عن السلطة وجمهورها والمعارضة الجديدة

اسا خمس بوستات عن هالموضوع ف اتحملونا للساعة عشرة المسا ❤️

تأثير خطاب جمهور السلطة على النسيج الوطني خطير جداً، وهاد واحد من أخطر التحديات يلي عم تواجه سوريا الجديدة بقيادة أحمد الشرع

ليش؟

1. تعزيز الانقسام الطائفي
لما جمهور السلطة يستخدم خطاب فيه شماتة أو تحقير تجاه الأقليات (علويين، دروز، إسماعيليين…) أو المعارضين السابقين، فهاد الشي:
• بيعمّق الجراح الطائفية وبيعمل شرخ بين المكونات السورية
• بيمنع أي مصالحة حقيقية
• بيخلق شعور عند المكونات التانية إنو سوريا الجديدة مو إلهن

2. ضرب الثقة بأي مشروع وطني
السلطة بتحكي عن “وطن جديد”، بس جمهورها بيحكي بمنطق الانتقام والتشفي:
• هاد بيخلي الناس تشوف إنو الخطاب الرسمي مجرّد واجهة
• بيزرع شك عند أي مواطن بيفكر يرجع يشارك ببناء البلد

3. خلق حالة خوف وسلبية عند الناس
الناس ما عاد عندها طاقة تسمع خطاب فيه تهديد أو تخوين أو شتائم:
• خطاب جمهور السلطة بيخلّي كتير من السوريين يلزمو الصمت
• أو يهاجرو أكتر، أو حتى يحنّو للنظام القديم رغم جرائمو

4. تقويض أي أمل ب”عقد اجتماعي جديد”
لحتى يرجع السوريين يعيشو سوا، لازم يصير في خطاب جامع، متوازن، عادل
بس جمهور السلطة عم يكرّس:
• خطاب إقصائي: “نحنا المنتصرين، والباقي يسكت”
• منطق الغلبة: “الحق معنا لأنو نحنا ربحنا”

زبدة الحشي:
خطاب جمهور السلطة عم ينسف من تحت لتحت كل محاولة للُّم الشمل أو لإعادة بناء نسيج وطني سليم
إذا ما تم ضبط هالخطاب، أو الرد عليه بخطاب وطني حقيقي، فرح نضل نعيش بذات الدوامة: سلطة بتحكي عن وحدة وطنية، وجمهور بيشتغل عكسها تماماً 🙇🏻‍♀️

#يتبع

#دخيل

كيف السلطة الجديدة بسوريا فيها تحارب خطاب جمهورها الإقصائي؟

مو معقول تحكي عن “وطن لكل السوريين”
بينما جمهورك عم يصيح: “نحنا المنتصرين والباقي يسكت!”

إذا السلطة عنجد بدها تبني شرعية جديدة، لازم تبدأ من هون:
من ضبط خطاب جمهورها، مو من التسويق لنفسها فقط

كيف؟
• ترفض علناً الخطاب الطائفي والتحقيري
• تحاسب كل شخص محسوب عليها وعم يبث كراهية (محاسبة فورية)
• توجّه إعلامها ليحكي عن المواطنة والمصالحة مو عن الغلبة والإنجازات فقط
• تدعم مبادرات أهلية بتقرّب السوريين من بعض
• وتعمل على تغيير لغة المؤسسات من لغة أمنية لإدارية وطنية

القيادة القوية مو يلي بيطبلولا جمهورها،
القيادة القوية يلي بتعرف تقول لجمهورها: “هالطريقة بتأذيني، وبتأذي البلد” 🙇🏻‍♀️

#يتبع

#دخيل

كمان، مو بس السلطة مسؤولة عن شكل الخطاب العام، كمان جمهورها عندو دور كتير مهم

كيف ممكن جمهور السلطة يتعامل مع الخطاب الرسمي الجديد إذا فعلاً بدو يكون شريك ببناء سوريا مو بس ببقّ الحكي؟


1. فهم المرحلة الجديدة
. لازم الجمهور يعرف إنو مرحلة “نحنا ربحنا، والباقي يخرس” انتهت
. سوريا ما عاد تتحمّل خطاب الغلبة، هلأ وقت العقل والمسؤولية

2. ضبط اللغة على وسائل التواصل
. وقف الشتائم، التخوين، والتحقير بحق أي طائفة أو معارض
. لازم الجمهور يكون قدوة بهالمرحلة، مو عبء على السلطة

3. التمييز بين النقد والهجوم
. مو كل شخص بينتقد الشرع هو “عدو” أو “خائن”
. يمكن يكون عندو وجهة نظر بتفيد البلد أكتر من ألف مطبّل

4. دعم خطاب المصالحة
. شارك، شجّع، وانشر أي كلام بيوحّد الناس وبيقرّبهن من بعض
. الجمهور قادر يكون جسر، مو خندق

5. محاسبة القادة اللي عم يحكو بلغة الإقصاء
. إذا في شيوخ، قادة فصائل، إعلاميين محسوبين على “المعسكر المنتصر” وعم يبثوا حقد؟ احكي ضدهم.
. الولاء لسوريا أهم من الولاء لأي شيخ أو زعيم

زبدة الحشي:
إذا بقيتو عم تحكو بلغة الحرب، فمهما قالت السلطة عن السلام، ما وح تصدقوها
وإذا عنجد بدنا نبني بلد، لازم نبدأ من هون:
من جمهور واعي، بيعرف إنو “النصر الحقيقي” هو وقت كل السوريين يحسّو إنو البلد إلهن 🙇🏻‍♀️

#يتبع

#دخيل

كيف فينا نحنا كمعارضين نتصدى لخطاب جمهور السلطة الإقصائي؟
مو بالسخرية، ولا بالرد الطائفي، ولا بلغة الثأر

في فرق كبير بين أنك تعارض السلطة، وبين أنك تتحول لنسخة تانية من جمهورها

شو لازم نعمل؟
• نفضح خطاب الكراهية، بدون ما نعمّم أو نحقّر جمهور كامل
• نرد بخطاب وطني جامع، مو بلغة “ونحنا كمان عانينا”
• نتحالف مع أي صوت معتدل أو عاقل حتى لو من جمهورهن
• نفتح منصات نقاش، نحاور المختلف بدل ما نشيطنو
• ونواجه علناً أي رمز عم يغذي الكراهية، من أي طرف كان

النضال مو بس موقف سياسي، هو كمان موقف أخلاقي تجاه مستقبل البلد
وإذا بدنا نربح هالمعركة، لازم نظل نحكي بلغة الوطن مو بلغة الحرب 🙇🏻‍♀️

#يتبع

#دخيل

|توثيق|
نفذت قوى الأمن العام حملة في قرية سارجة بريف القصير غربي حمص، أسفرت عن اعتقال عدد كبير من الشبان دون إعلان رسمي عن الأسباب. تخلل الحملة إحراق منازل واعتداءات على الأهالي، بينهم نساء، مما أثار استياءً وغضباً واسعاً في القرية. وتدخلت الجهات المسؤولة لفتح حوار مع السكان وتهدئة الأوضاع.
المصدر

@Syria_N_D_bot

#S_N_D

وأخيراً عن موضوع السلطة وجمهورها :

شو لازم يكون موقفنا كمعارضين من السلطة الجديدة بقيادة أحمد الشرع؟

لا نركع، ولا نزاود
نكون العين يلي بتراقب، والصوت يلي بيطالب، والضمير يلي ما بينباع
• ننتقد السياسات، مو الطوائف
• نرفض الاستبداد، مو الأشخاص
• نفضح الفشل، ونشيد بأي خطوة صح
• ما نخوّن جمهورهن، ولا نصير متلهن
• منفتحين على أي حل وطني، بس بلا تنازلات جوهرية

نحنا ما بدنا “كرسي”، بدنا بلد عادل
بدنا دولة قانون، مو دولة فصائل
بدنا عقد اجتماعي جديد، مو إعادة تدوير لمشروع قديم بوجه جديد

موقفنا؟
معارضة ناقدة، مسؤولة، وطنية، وصاحبة مبدأ
وهاد لحالو كفيل يكون أكبر تهديد لأي سلطة فاسدة

#دخيل

يقول سينيكا: “لُذ بذاتك”
مو هروب، بل عودة

رجعتك لحالك مو ضعف، هي أحياناً أصدق أنواع الشجاعة
مو كل عزلة وحدة، ومو كل سكوت هروب
في مرات، لما الدني بتصير صاخبة ومتلخبطة، ما بيبقى ملجأ أهدى من روحك

“لُذ بذاتك” وارجع للشي الوحيد اللي فيك تلاقي فيه السلام بدون إذن
يعني طمّن قلبك من جوّاه، مو من تصفيق الناس ولا من رضاهن

الذات مو سجن، الذات وطن، والوحدة بكتير احيان دوا
وإذا ما عرفنا نعيش فيهن، كل البلاد رح نحس فيها بالغربة
اعتزل ما يؤذيك ولُذ بذاتك ❤️

#دخيل

مو كل جواب سريع هو جواب عميق

بزمن فيه ChatGPT والذكاء الصناعي، صار فينا نعرف أي شي بثواني، بس المعرفة الحقيقية مو بالوصول للجواب، بل بالطريق اللي منمشيه لنوصلّو

السؤال يلي بيتعبك، يلي بتدوّر عليه بين كتب وبالنقاشات وأفكار متضاربة، هاد بيزرع فيك عقل نقدي ووعي متين
أما الجواب السهل، فهو بيشبه وجبة سريعة، بيشبعك للحظة، بس ما بيغذيك

سهولة معرفة الإجابات عن الاسئلة بسبب تطور التقنية لا تصنع مثقفين بل تعمم السطحية

السطحية ما دخلت من قلة المعلومات، بل من قلة التعب على المعلومة
وكل ما سهلت التقنية الوصول، صار لازم نختار:
بدنا نكون مستهلكين للأجوبة؟
ولا بناة لعقول قادرة تفهم السؤال قبل ما تركض لتلاقي الجواب وتكتفي؟

#دخيل

تخيلو، الاتحاد الأوروبي اللي بعيد عننا الاف الكيلومترات، بيعرف مين ارتكب انتهاكات بالساحل السوري
والحكومة الموقرة عنا بتحتاج نص سنة لمعرفة الحقائق وملابسات الجريمة (بصوت أبو نادر سيدي)

+ صمت تام من لجنة استقصاء الحقائق
ولا حدا بيعرف وين صارو بالتحقيق وما طلع ولا بيان ولا في شي على الإعلام الرسمي والإعلام الموالي

الشفافية قاب قوسين أو ادنى 🥰

#دخيل

الجنون من ألمانيا إلى إدلب

مجموعة من المجانين في ادلب يصرخون الله وأكبر ضد مجموعة الصوت الفزاعة الفاجرة في صالة تقام بها الحفلات الماجنة

هاد الي عم يصوّر طقّو عروقو، تقول البفلات قاتلينلو إمو حتى عم يصرخ بهالطريقة المجنونة 💅🏻

#دخيل

استقالة محافظ السويداء مصطفى البكور… إشارات وتداعيات

استقالة البكور –إن تأكدت رسمياً– ما بتجي بمعزل عن التصعيد الأخير بمحافظة السويداء، واللي بلغ ذروته باقتحام مبنى المحافظة من قبل مجموعة مسلحة وتوجيه الإهانات للحاكم الإداري

السؤال مو بس ليش استقال، بل: لمين بتخدم هالخطوة؟
هل هي استجابة لضغط شعبي من المجتمع المحلي لعدم قدرتو على حماية هيبة الدولة؟
ولا هي بالأساس ضوء أخضر من السلطة المركزية حتى تخلق شرعية لتدخلها بالمشهد الدرزي المنفلت نسبياً عن قبضتها؟

المشكلة مو بالبكور شخصياً، بل بالسياق العام:
• فشل السلطة المركزية بخلق علاقة ثقة مع السويداء
• إصرار بعض الجهات ضمن النظام على شيطنة أي استقلال محلي، حتى لو كان نابع من حاجة مجتمعية فعلية للحماية والتنظيم
• وأخيراً، محاولات قوننة التدخل باسم “فرض القانون” بعد كل حادثة فوضى

اليوم، السلطة عندها فرصة تمشي بطريقين:
1. يا أما بتستغل استقالة البكور لتفرض وصاية أمنية على المحافظة، وتدفع الأمور لمواجهة مع الفصائل
2. أو بتسمع صوت الناس، وبتبلش عملية تفاوض جدية تخلق شراكة حقيقية بإدارة المنطقة، تعترف بخصوصيتها وتدعم استقلاليتها النسبية ضمن الدولة

السويداء ما عم تطلب الانفصال، بل عم تطلب كرامة وأمن
وكل استغلال لهالمشهد لتحقيق مكاسب سياسية ضيقة، رح يدفع البلد كلو التمن 🙂

#دخيل

"المرأة لا هيبة لها ومكانها المنزل".. وزير العدل السوري مظـ،هر الويـ،س يثير الجدل بمنشوراته المحذوفة ومؤلفاته الإقصائية.. إليك التفاصيل!


#ولكن
#دخيل

| متداول |

بعد الهجوم على حفلة محمد الشيخ في إدلب - سرمدا، جهاز الأمن العام يقبض على جميع الأفراد الذين شاركوا في تكسير الصالة.

@Syria_N_D_bot

#S_N_D

ابن خلدون قال:
“أول أسباب سقوط الدول هو: التفريط بالعدل”

كان عم يحكي من قلب تجربتو كمؤرخ عاصر فترات انهيار وقيام دول، خصوصاً بالمغرب والأندلس

اللي قصدو هون، إنو العدل هو العمود الفقري لأي دولة
مو بس عدل القضاء، بل عدل التوزيع، وعدل الحُكم، وعدل الفرص بين الناس

بكلام تاني:
• لما الحاكم بيصير يفضل جماعتو أو طيف معين على حساب باقي الناس، بيتخلخل النسيج الوطني
• لما بتصير المحسوبيات أقوى من الكفاءة، بيفقد الناس ثقتهم بالدولة
• لما الظلم يصير أداة لضبط الأمن، بيولد نقمة بدل ما يولد طاعة

فالتفريط بالعدل، ولو كان بسيط بالبداية، بيخلق فجوات بالتقادم
وهدول الفجوات بيعبّيهن الظلم، والفساد، والحقد، وبس يعبّو كتير، الدولة بتنهار من جوا، حتى لو شكلها لسا قوي من برا

ابن خلدون فهم هالشي قبل مئات السنين، بس لليوم لسا في أنظمة ما بتتعلم غير بالطريقة الصعبة، احم احم احم 🤫

#دخيل