يافاطمه




اشگد گلبي مجمور
الشهرك يعاشور

يالبيك تبدي امصيبتي
وتحضر انه الخدمتي
الشهرك يعاشور
---------------------------------
ياشهر يالكلك حزن*اگلوب من حزنك تون
حالف اذبل كل جفن*وفنيهه روحي
انتضرك ابحلو الصبر*ياشهر وتعادل عمر
كل ليله منك من تمر*اتجدد جروحي

ساعه ساعه انتضر لمن تجيني
مو هدم البس سواد بكل حنيني
انه اليسموني بيامك حسيني
وفضل الانعام لمن تجري عيني

من البس السود
وقره على الجود

منك خذت كل هيبتي
وتحضر انه الخدمتي
الشهرك يعاشور
---------------------------------
صح انته بيامك الم*بس بيك تترقه الخدم
وانه ادري هاي اصل النعم*من تجري العيون
بيك البچي دين انحسب*بيك الاصل ولمستحب
ولدمعه تنزل من سبب * ول الال يدرون

اه ياشهر المصايب بيك عبره
اشگد عضيمه من امامي احضي نضره
من يشوف اشلون انعه اعليهه وقره
ومن اگول اشلون حافر داس صدره

كون انحسب كون
من الي يبچون

ولزهره تنضر دمعتي
وتحضر انه الخدمتي
الشهرك يعاشور
---------------------------------
ياشهر يالكلك دمع*موذله للخادم نفع
وانه ادري بالخدمه ارتفع*لو زاد الونين
امنذكر حبيبي اعله الثره*وبچيله وذكر منحره
ادري الزچيه اتصوره*المجلس للحسين

انه هايم بيك ياشهر الخدامه
انه واحد منسبي وفاگد امامه
هيج من هذه العطف انضر علامه
وبيها باجر افتخر يوم القيامه

امحضرلك ادموع
دمعات مفجوع

ماتبره ناري وحرگتي
وتحضر انه الخدمتي
الشهرك يعاشور
-------------------------
بيك انه من الطم صدر*اعرف معاني هالامر
ياشهر چن يوم الحشر*تبقه انته عنوان
اعيوني تبقه هامله*ضل الحسين ابكربله
وبگلبه نبلة حرمله* ولونه عطشان

بيك يبقه حسين برض العاضريه
امسلبه اهدومه وتدوسه الاعوجيه
وجسمه مكشوف السهام الناصبيه
صار ميدان الحوافر ال اميه

من اذكر الصار
كون اشتعل نار

ولدمع يغلب عبرتي
وتحضر انه الخدمتي
الشهرك يعاشور
---------------------------------
كلشي حملناه ابعتب*بس شغله ياشهر العجب
حره اميره تنتحب*خن سولف ابهاي
من ضاع من عدهه الامل*اشلون اتركته ابلا اهل
ياشهر يمهه تمتثل *وتوزع الماي

انه عتبي اعليك يا شهر النوايب
اشلون تترك زينب ابذيج المصايب
اشلون بيامك تطب ذيج الخرايب
لا عشيره الفزعت الهه لا گرايب

هيجت الضنون
ياشهر محزون

ومن الغريبه غربتي
وتحضر انه الخدمتي
الشهرك يعاشور
---------------------------------
علي سليم الحسناوي

موشح
للحجه المنتضر عليه السلام


وين مايك ياغريب اوطانهه
العين تفرح لو تموت احزانهه
---------------
وين انته ياغريب ابنص هلك
عايش ابنصنه وصعب اوصل الك
ابيا ارض حاطط رحالك يافلك

وهاي روحي امشرعه ذرعانهه
------------------------
يمته واليمته خذت كل العمر
وانه ادري بالعباده ابقه انتضر
لاچن المحتوم رايدله صبر

اشلون لو وشل صبر بيبانهه
---------------------
العجل صارت تسابيح الگلب
وچلمت الياوكت شبعتني غرب
وين ياسچه انتضرهه يادرب

بيك هامت روحي ياسلطانهه
----------------------------
بيك هامت روحي ونته الهه الدوه
يا امل كل روح معتازه الضوه
اشما اسولف بيك اعتازك هوه

روحي بس حبك سره بوجدانهه
----------------------
يا ابن حيدر ومهجة فاطمه
اشوكت صوت الحق نسمعه بالسمه
قد ضهر هاي الروايه المحتمه

دنيا ضاگت وطلبت شجعانهه
-------------------------------
علي سليم الحسناوي

قصيدة العباس عليه السلام

چم خيمه بجودك متعلگه چم اه وليش
صبلنه انفاس امن الجربه وخلينه انعيش

من ترجع تحييهه اضعونك
ميت حتى حسين ابدونك
خلينه انعيش
---------------
الفراغ العفته ياعباس وجفك ما اله سداد
اجيبن حيدر انه امنين ويخليلي الوكت ينعاد
الهضم من خيم اعلينه يعباس اخوو ينراد
اشتقنع حره ع الضلمه وگلبهه اعله الگمر معتاد

المتعوده مثلك كافلهه تقنعهه اشلون
من گالو ميت عباسج هليت اعيون

من ترجع تروينه اعيونك
ميت حته حسين ابدونك
خلينه انعيش
-------------------------
توقف عالم الخوان من خمدت الك انفاس
مصخت چلمت الخوه ياخوه بلا عباس
مرني احساس من ابطيت وعينك مااله مقياس
احس كلشي طفه ابعيني من گالولي جرح الراس

من گالو طايح عالشاطي طحت انه وياك
مرتين اوگف ورجع اوگع من طاري الواك

من طاحن جنحين امتونك
ميت حته حسين ابدونك
خلينه انعيش
----------------------
الثكله اعله الولد معروف وعنهه الناس اليگولون
وانه ثكلة العباس ولفگدك مطرت اعيون
من سور الكفاله چان بسمي الوادم ايحلفون
اشلون ارضيت يالمهيوب على جرح اختك ايشمتون

يالشايل خدري بنص عينك سولفلي بهاي
سهم الجربه صوب گلبي مالاح الماي

وانه ادريبه دهري يخونك
ميت حته حسين ابدونك
خلينه انعيش
-------------------------
النهر لوبي كرم جا كال كافل وخته رايدته
جا لم روحه وسط الجود وتعنه اخيامك بسكته
چا غص ابلاهته الطين وتعرگ گصته وبخته
يدري احنه الحياة البي وطعمه وكل صفه بلذته

احتاجينه مو ماي الشاطي احتاجينه انفاس
ماتروي اعروگه اولا يبره الفاگد عباس

لو بس چلمت خويه اشلونك
ميت حته حسين ابدونك
خلينه انعيش
-----------------------------
اليفگد مثلك ابلا راي يبقه وتخلص اسنينه
يالمشربنه گبل الماي احساسك خويه يروينه
ملوك ابعالمك چنه وعگبك خويه ضلينه
بين امچتف اومالوم وبين انضار حادينه

الفاگد مثلك مو ضهره يصبح مكسور
مكسور حسين ويه اخيامه بلوعت عاشور

تدري وي طبگات اجفونك
ميت حته حسين ابدونك
خلينه انعيش
-------------------------------
علي سليم الحسناوي

السلام عليك يا ابا عبد الله

بين اهلال الذبح*
وبدت ايام الجرح*
ودمك الي ينسفح*ويا دماء
منتضرتك كربله*
تدخللهه بقافله*
جسمك يضل بالفله*ابلا خباء

السلام عليك يا ابا عبد الله
-------------------------------------
قصت اهلاك دمه*
يبو الاكبر مؤلمه*
اضلوعك المتهشمه*بنص الخيول
هذه ايام العطش*
الضمه بچبدك نهش*
وجسمك ابخيل افترش*لمن تجول

السلام عليك يا ابا عبد الله
---------------------------------
هذه ايام الدمع*
بيك جدك ينفجع*
راسك الي ينگطع* اعله الرماح
ياحسين وخنصرك*
ولسهام ومنحرك*
لو اريد اتصورك *بيا جراح

السلام عليك يا ابا عبد الله
----------------------------------
ها يمجروح الخيم*
جسمك الطاح وخذم*
بيك يزداد الالم *لمن تشوف
حرم تركض بالفه*
صوت لطفالك عله*
هالوضع تنضر اله *وكلشي خوف

السلام عليك يا ابا عبد الله
------------------------------------
حسين ياجرح السمه*
اعليك يابن فاطمه*
دمعتي تجري دمه* اوبس انوح
ياجرح بس منعشگ*
گلبي بسمك من يدك*
ابچي بچيي المحترگ*بكل جروح

السلام عليك يا ابا عبد الله
----------------------------
علي سليم الحسناوي

مقدمه للعليله


بويه انشدهه الليالي عني هم لحضه نمت
لا وحگ درب الخذاكم عالدرب اسهر گمت
-----------------------
ها يمالك كلشي بيه
بويه يحسين ارد اسمعه*مره صوتك
انه ادري من وداعك
روحتك مامنهه رده* وبيهه موتك

يالعفت خلفك عليله اتجوت ابنار البعد
اتوشل اعيون اليتاني عالدرب لمن يصد
بويه كفيت السوالف باليرد ولمايرد

لاچن احساسي لچمني بناري خلاني احترگ
ولگلب من يحچي بويه ايسولف اسوالف صدگ
--------------------------------
ليش من اعطش اشوفك
ويعثر الماي اعله ريجي *شنهو صاير
انته ضامي ياحبيبي
ولعطش ذبل رسومك*گلبي حاير

بويه ليش امنذكر اسمك يترس احساسي الضمه
وچن احس الروح مني طلعت الگلب السمه
بعده طولك ذاكه باقي بويه خبر فاطمه

ودري اخبارك رزيه اتگطع ابتوت الگلب
عيني مابطل دمعهه من رحت لسه تصب
-------------------------
بويه خنگه بصدري صارت
گلي صدرك بعده سالم*لو تهشم
تعثر ابجسمك حوافر
ولدمه فاض اعله رمضه* من تخذَم

كل عضو ابجسمي تألم لعوجيه من لفن
من تدوسك ياحبيبي بگلبي احسهن غرزن
مو دمع عيني تصبلك من دمه بويه جرن

هذه مرسالك اجاني امخضب اجناحه بدمه
سولف اسرار المصيبه ولحقيقه المؤلمه
--------------------------------
جفك اليمطر نداوه
بويه گالو خنصر ايدك*منه ضايع
ولجسم تاهت وصاله
اطشرت ويه الحوافر *يامواجع

يالتهت بين الحوافر ومابقه منك اثر
يلي متروك اعله رمله وجسمك امخضبه النحر
امسلبينك حته هدمك عاري متروك اعله بر

ابكربلا جسمك توزع اوضاعت اوصالك اسف
وضلت الحسره ابدليلي اولا دمع عيني نشف

--------------
علي سليم الحسناوي
جديد #محرم_الحرام

نزال للقاسم عليه السلام



طبيهه اسد للحومه*ثجيله اعلومه*غزلهه الزلم
تسعه سنين ايامه*فزع الأمامه*دخلهه الشهم
--------------------------
مثل موت الاحمر عليهم. دخل جاسم ناده
رجفه صارت حتى بحچيهم. هوس اعله القاده

دخل بيهم ناده شبل الحسن بفعاله
بصوته يرجف الحومه بالخيل ولخياله
قسور دخلهه بزوده الموزمه تبراله

ناده اميري حسيني*امامي وديني *اعوفه عجب
يومي انتضرته ابروحي*بصليل اجروحي*تهب اللهب
-----------------------------------
رسم بيهم ملاحم تسولف. ومتلك ميدانه
على الجيش وتسيد حسامه. ويرعب بشجعانه

مثل حيدر شمرته بسيفه يشيخ اعليهه
ارتجز شبل الهواشم خوف ورعب يسگيهه
يسطرهه البطوله خله الخلگ تحچيهه

بيده صوارم هله*ومنو اليوصله*سگاهه خطر
شبل الحسن بالحرب*يحلهه ويضب*يسر النضر
------------------------------
اللبس گلبه اعله درعه يناطر. للمنيه گاصد
عرس عنده الشهاده تفرحه. الموته چن متواعد

خطب بيهم خطبه ابن الحسن تدروني
ابضربتي المن سيفي ولله فلا تنسوني
انه سليل الغيره فنكم اذا اتنكروني

لاچن جفوف الكفر*تطعنه ابغدر *تفايض دمه
طيحت اسد بالفله *وتشوفه المله*ابو الموزمه
-------------------------------
على گاع المصيبه تكوور* ولشباب اتبده
نزف حيله ويه دمه وتشهد*وعطش مارد چبده

بزحمت ضماير ميته متخضب امن اجروحه
يلفض اخير انفاسه وجسمه يفارگ روحه
لوما الغدر ياوسفه اسيوف الاعادي اتلوحه


سطر جميع الجمل *ابرجوله ارتحل*چبير الفعل
خلاهه في كربله*تحير المله*ويحير العقل
------------------------------
علي سليم الحسناوي

#قصيدة_للقاسم_عليه_السلام

جسام



زفيتك يمه بعيني ونطر للتالي
ورسملك صوره وحنه يوليدي الغالي

انتضرك عمر
تطلع يافجر
چاشنهي العذر
بدمعي امخضبه
------------------------------
زفيتك ابعيني *ياشمعت اسنيني
امك انه وحلمي بادي من خيالي
انضر الك زفه*يوليدي متلهفه
نجمك ابعيني طفه وضلمه الليالي

موللذبح يمه الربه ردتك تچيه
من وكتي يحنيلي الضهر تسهر عليه
تاليهه ضاع ابكربله حلمي الاريده
ولحنه صارت من دمه ابخيل اعوجيه

تاليهه ابدمك يمه متحني الحافر
وشموع الزفه ارماحك ولدم متناثر

من ذاك الامر
تطلع يافجر
چاشنهي العذر
بدمعي امخضبه
----------------------------
يوليدي ربيتك*للشيب ضميتك
ولحلم لمن كبر يوليدي مذبوح
چاوين احلامي *شو ميت وضامي
وبدال فرحة عرسك انه امراجفه النوح

كل ام يجسامي بصبر تنطر ابنهه
تحسب لساعات الكبر يوفي اللبنهه
وانه انتضاري بي ذبح للمالي غيره
ونته وشبابك عالارض متبدي منهه

وانه واحلامي وعرسك يوليدي بديره
ولصار وياك وشفته عيشني ابحيره

مذبوح اشكثر
تطلع يافجر
چاشنهي العذر
ابدمعي امخضبه
-----------------------------
اتنفسك يمه*ياكعبة الرحمه
يالبيك ملزومه چنت متنومسه هواي
تنداس بالحافر *بگلب امك اشصاير
ينذبح نحرك ياحبيبي ابعازت الماي

احلام فرحه اتبدلت بالطف ييمه
وبدال حضن امك رمح صدرك يضمه
مخلوط دمك بالرمل بعيوني شفته
جسامي انته اوماتهت عطرك اشمه


مابين السيف اورمحك مابين ادمومك
طعنات الكوم ابجسمك مغيرات ارسومك

مطعون ابغدر
تطلع يافجر
چاشنهي العذر
بدمعي امخضبه
-----------------------------
ياسلوة امالي *گلي اشبقه بحالي
لمن طحت بين العده ومخضب ادموم
من الذبح جاسك*وفوگ الرمح راسك
شيبي عبر حد الجفن وتفايض اهموم

يمه السوالف شيبت من شفتك اتلوح
ناديت ونته اعله الرمح يبني يمذبوح
اتمتيت راسي المنگطع لا اشوفن الصار
احسن ولاعيشن يجسامي اعله الجروح


ولفاگد تبقه ابگلبه لوعات اجروحه
وشيبقه ابگلبه الشاهد روحه المذبوحه

مو گتلي ذخر
تطلع يافجر
چاشنهي العذر
ابدمعي امخضبه
-----------------------------
ياقصت الامي*ونختمت ايامي
جسمك بقه بذاك الفله وانه سبيه
مخنوگه بالعبره*وبناگه متحسره
فوگ الهزل حلمي گضه مچتوفه اديه

حنيت اديه من دمه نحرك يغالي
بدرب السبي عشتك جرح ذيج الليالي
مكفوله چنت بصايتك ياگمرة الروح
هسه جرح سبيي وجرح ذبحك صفالي

ياحلمي الماصح بيدي اولاشفته ابعيني
انته المذبوح او آنه الغربه تسبيني

گلي ابياصبر
تطلع يافجر
چاشنهي العذر
ابدمعي امخضبه
---------------------
علي سليم الحسناوي

ليلة الحادي عشر


شفتك بالطيف. شايل جودك بين اجفوفك
فزيت ابليل. شفت الحداي اوماشوفك

منتضره الفزعت خوه
ياليل الحادي اشسوه
شفتك بالطيف
------------------------
غفيت ابليلة الوحشه اوطيفك مَر على اجفوني
لگيتك واگف اگبالي اوبيدك تمسح امتوني
اسألتني منهو طگ متنج مسحت ارماد بعيوني
گتلك من مشيت انته إلتخافك خويه آذوني

بس صوت الخوف. ولي ايخافك يزمخ بينه
الجلمت كفال. ياخويه اهواي اشتاگينه

يالبسمك جنت اتگوه
ياليل الحادي اشسوى
شفتك بالطيف
-----------------------------------------------------
رد حيل الصبه عباس خويه ابحلمي من شفتك
وبگد العطش بالطف هيجي روحي عاطشتك
ردتك ابهجوم الخيل بس ابلحضه ماردتك
تضهمك لو تشوف اشلون الحاقد من صطر اختك

ماريد الماي. بس كونك ترجع يالهيبه
رتك موجود. ثار العلويات اتجيبه

محتاره ابهاي النسوه
ياليل الحادي اشسوه
شفتك بالطيف
----------------
سولفنه ابهضم عباس اجوز امن العتب وتعب
وگل العيني كفي النوح نضر شبعي امن المرتب
اسألتني عن زراگ الجف شهنو التعبج زينب
گتلك من طحت ع الماي بيه صار الي ايعجب

من طاح الواك. خيل اوگوم الفزعه اعليه
وشگد ناديت. عباس إلحك للعلويه

ماجالك صوت النخوه
ياليل الحادي اشسوه
شفتك بالطيف
--------------------------------
طوارش من گلب محروك الك صوب النهر وديت
العجيبه استغربت منهه اصيحك ونته مارديت
انه ادري ع النهر مطروح اوفگدتك ياعمود البيت
لجن متعوده انه انخاك لذالك كافلي ناديت

اشگد اتمنيت. من ناديتك تفزع ليه
بعدك عباس. اختك سموهه المسبيه

ناديت اومامش رجوه
ياليل الحادي اشسوه
شفتك بالطيف
---------------------------------------------------------
اشد وصعب امر مرني اوجرح گلبي وترسني اهموم
اجيتك للنهر انخاك ابعمد راسك شفت مكسوم
ندهتك يلا رد اختك بحزن روحي وگلب مالوم
وگتلك يلا كض الواك وحمي اختك ولتهه الگوم

مامنك صوت. رديت ابأمري محتاره
يابو الكلفات. انهض سوي لختك جاره

وبنار احزاني اتجوه
ياليل الحادي اشسوه
شفتك بالطيف
-----------------------------------------------------
تمنيته حلمنه ايطول وسولفلك قصص بالصار
وگلك من ركضت اشلون اومن لهبت عباتي ابنار
التخاف اعليهه.من ضلهه صارت مگصد الانضار
مامحسوبه بالحسبان الوكت هيجي علينه اندار

ياماي العين. للتتركني صعبه الغربه
لشام انروح. حرمه اوحدي يصعب دربه

صارت دمعاتي السلوه
ياليل الحادي اشسوه
شفتك بالطيف
-----------------------------------------------------
علي سليم الحسناوي

موشح

هاي زينب يالتريد اخبارهه
عالمهازل طالعه امن اخدارهه
---------------------
الف ياحيف اووسافه اعله الخدر
من بعد عباس رافجهه الشمر
هاي جانت لو هوه منهه يمر

رخصه. ياخذ من گمر اسرارهه
-----------------------
امخدره ومتحاوطه بذيج الشيم
وبو فاضل يمسح اثار الجدم
اشلون زنيب باقيه ابلايه خيم

بليل وحشه وميته كل اقمارهه
----------------------
اشلون طلعت لليسر ومكدره
هاي اخت عباس سبع الگنطره
هاي زينب ياخلك مو اي مره

هاي دنيا اتعجبت بستارهه
---------------------
اشلون بت حيدر تتطر ذاك الدرب
امچتفه وصوبين تنضرهه الغرب
المالمحهه انسان تالي تنضرب

هاي ماچانت تجي ابأفكارهه
----------------------
عاشت ابضل الكفاله امدلله
تطب زينب سوگ هاي المشكله
اشلون تنطي انسان موضع مو اله

ناس ماعرفت شنو مقدارهه
----------------------
من كهف خوانهه دخلت قصر
وياحسافه طبت ابمجلس كفر
بين وادم كل نواياهه الغدر

امگبعه ابهمهه وغرب بكتارهه
-----------------------
علي سليم الحسناوي

#قصيدة_للأمام_الحسن_عليه_السلام


امضيف الكرم زوده *كل جوده* بسمك يالحسن
ادلال الهلا اتعزب* وترحب* مايوم انطفن

يالشابع اضيوفك هله
ولگاصد انته اتدلله
ادلال الهلا اتعزب وترحب مايوم انطفن
----------------------------------
المضيفك*التعنه
يمر احساس مامر اعله باله
تشبعه*درايه
تكرمه وبعده ماحاچي سؤاله

يباب الله اليگصدك تملي وجدانه ابمهابه
على اعروش التواضع منك الياخذ جوابه
سليل الشيمه انته وهالصفه لا مو عحيبه
الكرم الله يمثله ابشخصك وصارت مجابه

يالبيك منقوشه *بعروشه* ياباب الكرم
انته الحسن انته* اوماگلته *معشار النعم

وعطفك منو اليوصل اله
ولگاصد انته اتدلله
ادلال الهلا اتعزب وترحب مايوم انطفن
-----------------------------------
اعله وصفك*احيرن
شسولف بيك ماتگضي السوالف
اعله جودك*وفضائل
يفيض امچانك احساس ومعارف

الكريم الله وتجلت قدرته بهاي الكرامه
يخصك بسمه ونته وثقت معنى الشهامه
الكرم مو بالسوالف بالفعل ونته البديته
الكرم اصل الشجاعه وبيدك احدود الامامه

يالبيك ملزومه *بعلومه* هالكون استند
خصك تره ابأسمه* ولرحمه *الواحد احد

التالي انته او أوله
ولگاصد انته اتدلله
ادلال الهلا اتعزب وترحب مايوم انطفن
-------------------------------
البدايه* النهايه
يحير اليبحر ابشخصك عجيبه
بلا شك *وريبه
يحسك كل شخص انته حبيبه

يكهف الماله ملجئ وخيمت الباري اعله ناسه
يمرسه للحياره الكل گلب لو ضيمه جاسه
يچفك چنه غيمت رحمه ولگيض اعله منضر
الفقير الدنيا ذلته ويمك انته اترفعه راسه

چن داخل الجنه* اليتعنه *يم دارك اجه
يالشيمتك حيدر *امن الكوثر *لو راد السجه

صيتك عبر كل المله
ولگاصد انته اتدلله
ادلال الهلا اتعزب وترحب مايوم انطفن
--------------------------
حسافه *چبيره
المثلك ينغدر ولله هضيمه
ينعمه *اجهلوهه
يرحمة الله ولرحمه عضيمه

يرحمة الله انته الدنيا ملزومه ابدعائك
لحد موتك حبيبي وماخلص ذاكه عطائك
الحسن انته اويوزع ربنا خيره من خلالك
يصيتك سابق ازمان الخلق يضوي ابسمائك

ياسيد الجنه*ابلا منه*تنطي اليوصلك
معطاة كل عمرك*ياصبرك*ياوارث هلك

غير انته ابن عقد الوله
ولگاصد انته اتدلله
ادلال الهلا اتعزب وترحب مايوم انطفن
--------------------------------
جزائك*يمسموم
تقدم الخير شنهو القدمولك
يسموك*يغدروك
چم صورت حقد همه ارسمولك

عمر انته مچانك خلصيته لليسائل
تحسفوو تندفن يم جدك وبانت عواذل
جزاء احسانك الهم بالسهم نعشك تصوب
على امصابك ونين الدنيا چن ونت الثواكل

صابوك في چبدك *چن جدك*صابو بالچبد
چن صابو الزهره*بالعصره*مصيوبه الحمد

كلشي مشه وذكرك عله
ولگاصد انته اتدلله
ادلال الهلا اتعزب وترحب مايوم انطفن
--------------------------
علي سليم الحسناوي

ميمر


احرام نلبس ونروح ونطوف يم اعتابه
-----------------------------------------
موسم الحج ابثورة المشايه
نعلنهه ثورة انعلگلهه الرايه
ياغايه غير حسين مامش غايه

ومن كل مكان انهب ليه الغالي يريد احبابه
------------------------------------------
الخطوه يمه بلف حجه وعمره
بسم الحسين الباري واضع سره
ابيوم اربعينه انواسي بيهه الزهره

ولونه انعليهه ابصوت اه يالسبط ومصابه
------------------------------------------
ياهو الي بعد حسين ياهو القبله
يتسمى كعبه للحرار وقبله
جم گلب ميت هالزياره اتعدله

بيبان عند الرحمن وحسين كل ابوابه
------------------------------------------
خلهه تسولف تنتقد هاي الناس
وحنه ابعقيده انعيش هذه الاحساس
ابيوم المشي ترجع اچفوف العباس

وبيده يلم بالزوار وينسه الجرح وصوابه
--------------------------------------------
درب المشي بي منقبه ولرفعه
وليمشي خطوه وعينه هلت دمعه
الحاجه بعدهي بگلبه هوه يسمعه

ندري الرزق عالنيات وحسين ينطي اجوابه
-------------------------------------------
درب الهيام اوهوه درب التوبه
وكلمن يسولف حاجته المحبوبه
من تنوي تمشي نيتك محسوبه

هيچي الرزق ويه حسين ماينقطع بثوابه
-----------------------------------------
هاي الزياره الخير كله بيهه
ولما خدمهه ماضفر تاليهه
زينب بدتهه وعرف الباديهه

البادي بيهه الحوراء سر العرش وحجابه
---------------
علي سليم الحسناوي

رجوع العقيله زيارة قبر الحسين


اوچبت يم گبره وبچي
وگعدت فوگ التراب
وحضن اترابه وشمه
تحرگ ادموع العذاب
------------------------------------------
من گلب محروگ گتله.*ها يخويه
انه اختك هل اجيت
خويه موهيين عليه.* فراگ وجهك
وعتذر عنك بطيت
تدري امري مو بديه *من تركتك
ميسره عنك مشيت
خويه الصفاد الرگبتي. * هذه حالي
تدري لو تووك دريت ؟

ارد ازيح اهموم گلبي
يمه وحچيله الجره
گتله مشوني اعله منضر
تدري بيه امخدره
-------------------------
گتله من ذبحوك خويه.* خويه اسمع
وصارت الفزعه عليك
انه من التله اسمع. *صوت ضلعك
وشفتك اتلاوح بديك
خويه ذبحك مو نهاية. * إلبدايه
ذبحك اول جرحي بيك
وسندت حيلي اعله صبري.* صرت المن
بيدي كل حيلي وجيك

ابتدت خويه المصيبه
من بعد ذيج الجروح
اسمع الحادي يسولف
للسبي لازم تروح
-------------------------
گتله من يمك خذوني. *كلي حيره
ولحزن اصبح نصيب
حرمه وحدي بنص عساكر. *الحيله قلت
بوجهي نضرات الغريب
هم دريت النوگ هزله.* من خذوني
ولسبي دربه مريب
خويه انه المالمحني. * شوف غربه
اصبح ابنصهم عجيب

كل مصيبه الموت اشوفه
كل امر طف وجرح
ولنوايب دوهنتني
من عگب ذاك الذبح
-------------------------------
خويه درب البي مشينه.* شرد اوصفه
صعبه چلماته وعذاب
خويه تتفرج علينه. * اعيون صلفه
وحنه تربات الحجاب
يحسين حدر ضعنهم.* ذيج ديره
تفرح بهذه المصاب
بهزوه ويأشرون لينه.* منين ذوله
ولدمع جان الجواب

تدري بطراف المدينه
وگفونه لليشوف
وبينه فرحانه العواذل
وسمعت صوت الدفوف
-----------------------------
خويه كل الصار چفه. *وهاي چفه
الشام جرحي الچبير
اتخيل انته بنص فرحهم.* وصوت مغنه
ونته مچتوف واسير
تمنيت موتي يجيني.* ولا اشوفن
بعيني كل هذه اليصير
لاجن المحتوم گدر. * لازم ابقه
بهل حرم منهو اليحير

عالقبر ذبيت همي
وجددت عهد الونين
بالدمع رشيت گبره
مودع الله يالحنين
----------------------
علي سليم الحسناوي

صل الله عليك يارسول الله



مهبط القرأن وسرار السمه
الله ودعهه بمحمد محتمه

هذه فيض الباري جاله
وبي خلاهه الرساله
محتمه
--------------------------
الله انزل كل صفاته وجسداهه
گله يا طه اخذ مني وخذاهه
هالرساله ليك گوم احمل لواهه
ونشِر إسمي بالارض وعلن سماهه

گله اقرأ بسمي اول لفضته
ومن هذاك الغار شاعت قصته

من لِفَض إسم الجلاله
بي خلاهه الرساله
محتمه
-------------------------
اوجده من نور قدسي انطاه علمه
عَلمَه الاسرار كلهه وفاض حلمه
منقذ الانسان طه صار اسمه
يامحمد باعثك للناس رحمه

فضله المعبود من كل البشر
بكل الاديان الاجت اسمه انذكر

رحمة الباري اوصاله
بي خلاهه الرساله
محتمه
-------------------------
راية العدل الايلاهي بيده عَلَْت
والمشيئه اتحققت ولقدره جَلْت
كلشي مخلوق اعله إسمه ابأمر صلت
ولخلگ الماتصلي يعني ضَلَت

نوره من نور الله لمن ينبثق
ايمثل المعبود في هذه الخلق

الله راسمهه خصاله
وبي خلاهه الرساله
محتمه
----------------------------
مصدر التشريع فارض كل سننهه
مرسه لل آيات طه اومؤتمنهه
منهو غيره قاب قوسين اوإذَنهه
الله بس ال طه سناهه وعلنهه

قابه قوسينَ وادنى اشگد عجيب
بس محمد الله گله انته الحبيب

هناك باليجري حچاله
وبي خلاهه الرساله
محتمه
----------------------------
ملتقى كل الرسل في شخصه صارت
وكل علوم الكون يمه ابعلمه حارت
كل مجرات الكواكب لجله دارت
وبالصلاة وذكر اسمه الدنيا سارت

ماخلقت الدنيا لا ارض وسمه
الا لجلك يامحمد كلمه

هذه قول الباري قاله
وبي خلاهه الرساله
محتمه
---------------------------
علي سليم الحسناوي

ياصاحب الزمان


من تجري دموعك تذكر المن ياجرح
عالزهره وضلعهه لو على المات بذبح
---------------------------
انته يالمهدي دموعك من تهل
كلشي مخلوق اعله دمعك ينسأل
ياهو الاصعب حتى ينقاس السهل
ضلع امك فاطمه اوموت الطفل

يالصبحك نوايح ولمسه تكضي دمع
تندب اه يجدي واه ياذاك الضلع
---------------------------
عمرك وجرحك مثل جرف ونهر
اصواب امك فاطمه كسرة ضهر
لو تون لحسين محزوز النحر
الداسته الخيل وبقه ابلايه اثر

مشتركه بجروحك باب وخيام ولوه
ومن تذكر رزيه ابصدرك ايشح الهوه
---------------------------
جرح الاطفال وحرگ ذيج الخيم
وطيحت العباس من طاح العلم
وركضت النسوان مذعوره ابهيم
هنه ذني الخلن ابعينك سهم

من تذرف دموعك امخالط ادموعك دمه
وحزانك چبيره ماتلم ارض اوسمه
---------------------------
يامصيبه الي تزيد محنتك
ويابو صالح ليش حمره دمعتك
هم شفت ضعن السبايه وعمتك
عالمهازل ذيج صارت غربتك

مقروحه جفونك من يجي ابالك امر
تندب اه يزينب اشلون تمشين ابيسر
---------------------------
من اميره زينب اتروح ابيسر
وهاي ترست گلبك اجروح اشكثر
وعله ديران الشماته من تمر
هاي خلت گلبك ايساوي الجمر

يابو الدنيا كلهه وگلبك اتخذم خذم
بس الله اليعينك عالمصايب والالم
---------------------------
علي سليم الحسناوي