على أد ما تشتري خواطر على أد ما تتباع❌
على أد ما تشتري خواطر على أد ما ربنا ينجيك✅

#خواطر_قد_تصل

مش كل حاجة تتقال يتردّ عليها بالكلام

#خواطر_قد_تصل

علّموا ولادكم ان التسامح صفة جميلة لكن علموهم ان التسامح بيكون وانت قوي مش مغلوب على أمرك

#خواطر_قد_تصل

تعرف ان مشكلتنا في الدنيا دي القلق من بكرة
الخوف احسن نغلط او نقع او نفشل
الشك في ان اللي حوالينا بيدعمونا بدون شروط
دايمًا خايفين من نظرة اللي حوالينا لو غلطنا
دايمًا قلقانين نكون النسخة الوحشة من أهلنا
دايمًا حاسّين اننا بنجري زي الأحصنة في السباق بننهج وخايفين يكون حظنا نتقلب على وشّنا قبل نهايته
احنا محتاجين دعم مستمر من أي حد بيحبنا
احنا محتاجين دايمًا اللي يقولّنا مجهودنا كفاية
احنا مديونين أوي للناس دي

#خواطر_قد_تصل

كل واحد حواليك هيبان على حقيقته قدامك ، بس ما تستعجلش الحكم

#خواطر_قد_تصل

ما ينفعش في أي علاقة تعمل تلات حاجات
١- تتعشّم بزيادة
٢- تثق بهبل
٣- ترجع بعد ما اتخلّوا عنك

#خواطر_قد_تصل

زي ما الصحبة الطيبة بتخلي النفس مفتوحة
برضه الصحبة السيئة بتغمّ النفس

#خواطر_قد_تصل

في رابط مشترك في تحوّل الحال في اكتر من حد حوالينا
حد كان كويس بقى وحش
حد كان معاه فلوس اتزنق
حد كان معاه بيت واتحرم منه
العين حق.. العين حق
اللهم إنا نعوذ بك من شرّ عينٍ لا تقول (تبارك الله) حين ترى النعمة على غيرها

#خواطر_قد_تصل

اسمع منّي
١- ابني نفسك متستناش حد يزقك.
٢- عادي تقابلنا صعوبات وانكسارات ، دي دنيا و لازم نستحملها.
٣- اما بنتعب لازم نقف شوية ونعد النعم اللي بالفعل معانا.
٤- المنافسة مش شريفة في الأغلب ، و لازم نتعود على عكس كده.
٥- نساعد الناس تمام، نعطّل نفسنا مش تمام.
٦- الناس مش بتشكر (في الغالب) ، خلى نيّتك ربنا.
٧- اعمل حساب المفاجأة طالما في تلميحات او احساس بالخيانة.
٨- الموجة العالية ممكن تغرقنا لو مش عاملين حسابها لكن الموجة اللي شايفينها مهما كانت عالية ممكن نتخطاها او ننزل لما تعدي.
٩- مش من الذكاء المواجهة بغباء، الصمت والحيلة عشان الحق يرجع.
١٠- بلاش نعيش نظرية المؤامرة لانها كده كده موجودة، والضحية طول ما هو عارف انه ضحية هيتّاكل.
#خواطر_قد_تصل

ربنا ممكن يغيّر حالك من حال إلى حال في لحظة
ممكن تكون إنسان غير موفّق فربنا يكرمك ويكتب لك النجاح.
ممكن تكون مش محبوب وسط اللي حواليك فربّنا يكرمك بصحبة تانية ترد الروح.
ممكن تكون بتعافر ومش عارف توصل فربنا فجأة يسخّر لك الطريق وكل اللي فيه عشان يساعدوك.
ممكن تكون على أد حالك فربّنا يفتح عليك أبواب رزق عمرك ما حلمت بيها.
اُصْدُق مع الله يفتح لك كل الأبواب المغلقة ويغيّر حالك من حال المحاولة إلى حال الوصول.
#خواطر_قد_تصل

وانت بتبدأ عامك الدراسي اوعد نفسك تتغيّر للأفضل
١- ما تضيعش وقت
٢- ما تصاحبش حد وحش
٣- خد بالك من اولويات مستقبلك
٤- نبطّل علاقات حرام
٥- ننوي نتعلم عشان ربنا أمرنا بالعلم
٦- ارفع رأس أهلك
٧- مفيش اكتئاب ولا احباط ولا يأس
٨- اغلط بس اجري صلّح غلطك
٩- ركّز اوي مين بيحبك واوعاك تخذله
١٠- الدنيا منافسة واللي بيجتهد ربنا بيجعله فيها نصيب
فاوعد نفسك تتغير عشانك انت ، عشان نفسك قبل اي حد تاني
#خواطر_قد_تصل

من نعم ربنا عليك يكون جنبك واحد كويس شايفك وبيساعدك ومش سايبك لأفكارك السيئة
لا تُنْسى

رحت بدري شوية النهارده قبل عيادة قصر العيني
بقالي كتير اوي ما دخلتش كافيتريا أعضاء هيئة التدريس
من سنين طويلة
كنا مسميينها كافيتيريا عم مصطفى على اسم الراجل الطيب اللي كان بيقدملنا الحاجات السخنة والساندوتشات .. ربنا يرحمه ويغفر له.
الواحد كل ما بيدخل ناحية المدرجات وناحية سكشن الاناتومي وسكشن الفسيولوجي بتجيله حالة غريبة من الاستنكار.
العمر عدّى .. بسرعة اوي.. فعلًا..
كنت قاعد هنا بذاكر وكنت قاعد هنا متضايق بعد امتحان وكنت قاعد هناك مع أصحابي .
الدنيا بتجري يا جماعة خدوا بالكم..
مفيش حاجة في الدنيا تستاهل الحزن والكمد والوحدة.
بكلمكم من مستقبلكم.. اشتغل بجد.. اختار صُحبة حلوة.. اوعى دينك يضيع منك.
#خواطر_قد_تصل

الشغف عكس الانضباط تمامًا
الشغف يخليك تعمل اللي انت بتحبه بس
الانضباط يخليك تعمل اللي انت مش بتحبه بنفس القدر من المسؤولية زي ما تكون بتحبه
الشغف لا يصنع نجاحًا بل يصنع سعادة مؤقتة
الانضباط يصنع النجاح ويصنع بعده السعادة المستمرة
#خواطر_قد_تصل

ماتنساش:
قُلْ إِنَّ الْفَضْلَ بِيَدِ اللَّهِ يُؤْتِيهِ مَن يَشَاءُ
وما تنساش:
وَلَقَدْ مَنَنَّا عَلَيْكَ مَرَّةً أُخْرَىٰ
وماتنساش:
وَرَحْمَتِي وَسِعَتْ كُلَّ شَيْءٍ
وماتنساش:
فَرِحِينَ بِمَا آتَاهُمُ اللَّهُ مِنْ فَضْلِهِ
وماتنساش أخيرًا:
وَلَٰكِنَّ أَكْثَرَ النَّاسِ لَا يَشْكُرُونَ

فأرجوك خليك من القلّة الشاكرة لنعم الله وما أكثر هذه النعم.
#خواطر_قد_تصل

الانسان بيحب الشخص السوي
تسأله عن حاجة يديك نصيحة بدون مقابل
ما يحبش يلف ويدور
ناس بتسميه طيب وناس بتسميه أهبل
لكن رب الناس قال (هل جزاء الإحسان إلّا الإحسان)
وسيدنا محمد قال (من فرّج عن أخيه المؤمن كربة من كرب الدنيا فرج الله عنه كربة من كرب يوم القيامة)
الشخص السوي اللي بيدّي ويساعد من غير تفكير دا نعمة من نعم ربنا لو في طريقك حافظ عليه
#خواطر_قد_تصل

في بداية العام الدراسي الجديد حط الحاجات قصاد عينيك ونفذها:
١- انت مش هتعمل معجزات يعني متوقع جدًا البدايات الضعيفة وشوية شوية تشد.
٢- انت مش مُلزم تقول لأي حد انت ذاكرت ايه وما ذاكرتش ايه ولو حد سألك عادي ما تردش! عادي والله.
٣- لو قدرت تساعد زمايلك ساعد بس من غير ما تضيع وقتك ، ايوة التيسير عالاخرين حلو بس مش بيتضمن التعسير على نفسك.
٤- ابعد ابعد ابعد عن شلة السوء. انت عارفهم بس بتغفّل نفسك.
٥- الشللية حلوة بس الاختلاط وحش وقلنا مش حلال طالما مفيش ضرورة.
٦- وقتك مهم ومفيش يوم يعدّي من غير مذاكرة.
٧- انت وعلمك وعملك كلهم في سبيل الله، يا رب تفهم.
٨- مش كل حاجة تتذاكر أحيانًا في كلام مش مهم ومش بييجي في الامتحانات ، المقصود ذاكر بذكاء.
٩- عامل العمّال بنظافة قلب دول مش أقل منك عند الله.
١٠- اوعى تنسى: احتسب كل عملك لله.
#خواطر_قد_تصل

ايه الحلو في طب رغم كل السوء اللي حوالينا:
١-هتعيش عمرك في بركة وخير مهما قرشك كان قليل.. اوعى تيأس.
٢-هتعيش قريب من احساس الوجع والالم وده هيخليك متواضع وعارف قيمتك ادام ارادة ربنا.. اوعى تتكبر.
٣-هتعيش بدعوة او نظرة سعادة او كلمة شكر من مريض هيفضل هوا وعيلته بيدعولك طول عمرك.. اوعى تنساهم.
٤-هتعيش رغم التعب مرتاح الضمير انك عملت كل اللي في ايديك عشان عيانك، متتخيلش ده هيحسسك اد ايه براحة الضمير..اوعى تبيع ضميرك.
٥-هتعيش حياتك فرحان انك فاهم يعني ايه جسد ربنا خلقه وائتمنك عليه..اوعى تضيع الأمانة.
٦-هتعيش فاهم ان العيان انسان بس حظه وقعه في ايدك لكن رحمة ربنا هتشملك وتشمله اذا اهتميت بيه.. انت ولا حاجة من غير توفيق الله.
٧-هتعيش حياتك عارف انك اذا راعيت ابن حد ربنا هيراعي ابنك واذا راعيت ابوه او امه او اخواته ربنا هيراعي أهلك عشان نيتك..الدنيا دوّارة.
٨-هتعيش تقول الحمد لله على كل نعمه وده لوحده ذكر وشكر وعبادة..الشكر يزيد النعم.
٩-هتعيش تعلم وتتعلم ويفضل مخك ينضف وقلبك يتطهر وروحك تعلي..وفوق كل ذي علمٍ عليم.
١٠- من غير كذب ورغم كل التعب ، أنا بحب طب وفخور بيه وفخور بكل حد لسه عالطريق.
#خواطر_قد_تصل

اللي داخل اولى يقرأ كلامي:
كلمة السر في سنة اولى تلات حاجات لازم تعملهم
الاولى: اوعاك تضيع وقتك لأن الوقت ضيق جدًا بالنسبة لكمية المناهج للأسف.
التانية: اوعاك تفتكر انك لازم تفهم كل حاجة ، دي معلومة غلط، لازم تفهم حاجات وتحفظ حاجات وتشوف ايه الأهم بتذاكره باهتمام اكبر والمتكرر في الامتحانات تذاكره جدًا ودا هتعرفه من زمايلك الاكبر.
التالتة بقى: اوعاك تفتكر نفسك اشطر الناس لانك هتلقى شكل جديد من المذاكرة ومرهِق على فكرة واحلى حاجة انك تقدّر من دلوقت ان الكلية مش راحة ولا حاجة يعني ادّي لكل حاجة مقامها بدل ما تلاقي نفسك زعلان اخر السنة.
واوعاك تنسى: أعطِ نفسك حقها دون عناد او تكبّر بحجة انك شاطر كده كده.
#خواطر_قد_تصل

واعلم أن الله ما وضعك في مكانك إلا بتكليف واعلم انه ما كلّف إلّا وأعان.
بطّل شكوى وصياح بلا فائدة واشتغل على نفسك وافهم انك مسؤول وافهم انك لازم تحب اللي بتعمله عشان في يوم من الايام تعمل اللي بتحبّه.
وافهم انك لازم تستحمل عشان مفيش حصاد إلا لو تعبت وزرعت صح.
الله هو من يسّر والله هو من يعين.
#خواطر_قد_تصل