لە مانگی چواردە؛ لە ڕۆژهەڵاتی کوردستان نازدارتری -سۆهەیب عەلی

ئەڵێ: بە ئاسمانەوەی،دوور! ڕاهاتووین کەس بە نێوانمان نەزانێ و لە شەرابێکی حەراما بە قەدەر دارەکان شەوانە دانیشین و بە ساقەت بم و خۆشم بوێیت

بە سڵامەتی گەڵا وەریوەکان؛ ڕژاوی بە ئازارما،دەبێ ئازاری تەنیاییم هەڵگری و بە تەنافی جلەکانتەوە هەڵی خەی… تۆیش ئەگەر ناسنامەکەت پڕە لە خەفەت و ژوورەکەت بۆی هەڵناگیرێ؛ بە کۆڵی منیا بدەی،عاشقتم! بە کۆڵی شەویا بدەی،گریانتم!

دوو پەیکی تر ئاگام لە دونیا نامێنێ و تۆ نەبێ! بە سڵامەتیت! لە ژیانی هەرچی ڕۆژما دڵخۆشیمی

بە سڵامەتی ڕۆیشتنت! مردنیش ناتسڕێتەوە، ناتوێتەوە خوماریم و پەیک بە پەیک گیرۆدەترم ئەکا لێوت. مەستترم ئەکا ڕوانینە قاوەییەکانت… ئەگەرچی ئەمانە شێعر نین؛ ژیانن. ئەژیم بۆت!