- الصراحة و الشفافيّة حاجة صعب ع البلعوط يديرها .

#تفكير_بصوت_عالي :

- تبقى كامت وساكت ع كل السوايا للي ايجنك و بالأخص من القريب لك ، تفكيرك كله إنك اتساير الوضع عشان خاطر اعيون يسون وانت مش عارف لعند امتى اتحمل ، طاقتك الذهنيه والنفسية اقريب تنتهي حرفياً و انت مش عارف بعد السكوت هذ شنو في ، ممكن إنفجار فالقريب والبعيد ؟ .

- ما فيش حد يعرف ايش صايرلك، مافيش حد يعرف الحرب اللي صايرتلك مع حياتك الخاصة ، ايش اللي خلاك ما توثق في حد ، ايش اللي قتل عفويتك، كم كافحت وكم خسرت ،ما فيش حد عارف مَن أنت عشان هك ما دور حد وعيش بجوك .

- ياريت في mute للتفكير متاع الليل .

- يا دار غابو وغبنا ،
لنا زمان عليك ماجوبنا ،
وماعد مقابل فيك مايعجبنا ،
ماجابنا فيت السؤال عليهم ،
الي من نهار ارحلو غاب طربنا ،
وقول يا بعاد الدار ماتكفيهم ،
ان كان ماعليهم بدموع سكبنا ،
يبقي عزا بارد عزانا فيهم.

- ماتتغلاش عليا وتقيس غلاك لان انا شخص خسر هلبا وخاب ظنه في اقرب الناس ليه واضطر يكره أحب احبابه لان سرعة التخلي عندي بتخليك تنصدم انك كنت في حياتي ولا كنت نعرفك ف يوم من الايام.

- ما نحبش نعيش نعيش دور الضحيه ولا نحب ندير الدراما ، خلوني في حالي بس.

- لا الجو و لا الناس تنطاق.

- ‏جبارة خواطر منكسر خاطرنا وإن جانا كدر نبقو اسمُور وحدنا .

- تبقى قاعد لابيك لا عليك ومفيش اي موضوع وفجأه تسمع صوت عقلك الباطني يقولك تذكر زمان لما ........
‏و من هنا تبدأ فقرة جلد الذات ..

- ‏عيونك مازالن هن هن ، اسماح وسود وفيهن حن ؟

- الاكتئاب الي بدون سبب ثاني أسوأ شي فِ حياتي بعد حياتي نفسها .

- وصلت لعُمر عرفت فيه إن ما حد يستحق نحطه فوق راحتي ، وصلت لنقطه معينة بالعُمر نحب فيها نفسي اكثر وهي المُهمة عندي ، تغيرت ڪثيراً لدرجة إن هدوء الأيام وراحتي النفسية هي المطلب الوحيد.

- الواحد حاليا عايش في مرحلة الاكتئاب الوسطية الجميلة اللي هوا انا مكتئب ومتملح بس لو حد كلمني نعطيه انطباع اني كويس ونضحك ونلعب عادي .

- مُش لازم تضيع وقت واجد بيش تحاول تشوف حد زي ما تبي أنت مش زي ما هو بجديات ، ما تتسرعش ببش ترخي هذا الطبيعي لكن في نفس الوقت مش لازم تشرب البحر كله باش تتأكد إنه مالح .

- تخيل ترقد وتوعى تلقى كل حلم تحقق وكل شخص فاقده مزال عايش ؟

- نحَاول نكُون اجتماعي بس واللهِ انتوا ما تنطاقوا بكل .

- ‏أنـا الفًَترة هَـذي مَ عنديش مشـاعر ناحية أي حد ، حاس إن قلبي ودماغي فاضيين ، م فيش إنبهار بأي حاجة ، مش مركز من قاعد في حياتي ومن لا حتى كلامي مع الناس تما صُدفه ، فَ اللي يبي ايدير حاجة ايديرها أنا مش منتظر حاجه من حد و مفيش حاجة حتزعلني ، انا تميت شخص مُسالم نميل للهدوء فقط .

- اطير منك النيه وتخسر مكانتك عندي ، مُجرد ما نَحـس انه مكان معاش قاعد مَكاني.

- ورا العَقل ما كِيفه هناك هدَايه
والشِيره ارضَا والمعَرفه تجريبّ
ولا كل صَاحب رَاي ناخذ رايه
واللِّي انفسَه طيب مُوش كي الغضِيب
والناس عَ المعَادن و الخَطى ورَّايه
واقْلال العقِيده ما لهَم صاحِيب
ورا الضحَك ما يضمنّ صفا النوايا
وقول مرحَبا مرَات مو ترحِيب .