اتِعيبان ومتوني رچيچه
وبيه الوجع چمرة بغليجه
عويناتي هاي دلي ذيچه
مگروه مثل إبن الشريجه
ياهوّ مثلي ألضيم ضاگه
وگت الضحك من سنه باگه
توه الفجر بين شفاگه
وشالوني تابوت علِه ناگه
سولفت بيك ونشف ريجي
وطريت جلدي وعفت زيجي
چا هاي عود انته رفيجي
ما جيتني بايام ضيجي
عليمن تجذب بالمراسيل ؟
وتضحك عليه وبالحجي تعيل
عل شيله ضلت باجر نشيل
ما زال صارت بالتواسيل

انه دين النوارس والهدوم البيض
قسة وياي گلبك يا ترف كِله
وياخد الجنت ابوسه
كليلي منين اجيبن طين
من يغلط شحطن بوسته تردله
اشبعك وادري عزة نفسي راح تجوع
اجيتك والكرامة تگود بالفشلة
حي الذلة مامريت بي فد يوم
ابشرك بيت بيت خلافك كمت اندله
الجاسن شفتي بس اسمك ودخان
الشابع من غيابك بالاكل شلة؟!
اليكلي شلونك يدفعني كفارات
وانه شلون حالي وشراح اسولفله
انه شيبة واحطن وين كلها صغار
انه وردة بوكت بي شاخت السلة
بعدني صغير اني شجابني على الشيب
خلصت وكت المراية وميلة الكذلة
همومي من البعد تنشافلك تلة
وگلبي واختلالك والدمع نهرين
بعد عوزلك علم وتصيرلك دولة

ما كلتلي من البداية
الحُبّ ضلالة الشوگ لعنة
حتى لا أكفر وأحبّك
وما كلتلي
عيونك الحلوات ما بيهن قرار
وما كلتلي
الليل شيع كل محطات الضوا
وصارت مكابر
حتى ما تاني القطار
وليش ترسمني شبابيج إنتظار
وتخنگ خيوط الشمس
ويذوب وي روحي الوعد
وليش تصلبني أعله بابك
وأنت تدري الشمس ماتت
ما كلتلي الصبح ما يطلع بعد

بَس وحَگك
باجر يعوفوك كُلهم
وَحدك ترجعلي ذابل
باجر آثار الغرب هوسه على خصرك
اكثر من آثار بابل

ما دامتلي فرحه و لا دمعّتي تروح
مدري شعده وكتي وياي متعاند
صرت حتى من أنام احلامي مو حلوات
لو مكتول افز لو كاتل و شارد
ما حبيت نوم الليل بس مجبور
المن ينطي وجهه الماله كل واحد
غيري بنگره هَـفهه وطلعت شگبان
واني بشط اهفهه وكلشي ماصايد
ازرع خير گالوا تحصد انتَ الخير
زرعتلهم ورد ، بس شوكـْهم حاصد
عفت اليفتهمني وبالندم غطيت
وهويت المايعرف بگلبي وشرايد
كل شيبات صدري احلام مدفونات
انام واگعد مچملهن بواحد
مو زايد على اهلي من الوجع حسيت
لا حسيت روحي على البشر زايد
اذا كل التريده يغيب عن العين
بعد ياجفني اخيطك من تضل كاعد..

باجر من ترد
وتخونك احلامك
ترد تفرش ندم
وافرشلك اسهامك
واتعبك بالعتب
كد ما بروحي اعتاب
كد ما خيبتني
الخاطر امالك .

الليلة مَدري شصار بيه
هيچ فجأه لوحدي گاعد
و اشتهيت تكض اديه
و گمت من فراشي اعاين
وينك انتَ و ما اجيت
و فَجأه كُل شي انطفى بعَيني
بهالدقيقة تذَكريت
چنت ناوي وياي تبقى
أي نوَيت
وللأسف بس ما بُقيت
چان عندي البوم كامل من صوَرّك
گُلت من أفرغ اشُگهن
ما فرغت، أشگگيت؟
چنت ما تدري انه أحبك
و درت وجهَك من درَيت
گتلَك ابقى گبال عيني
و عمَت عيني وما بقيت .

أكبر من أحلامي أشوفك
حيرتي الما يمها حيرة
قانع بكلشي يخصك
و أبد ما محتاج خيرة
خشن گلبي و من عرفتك
بيّن الطبعك حريره
منين ما تندار أحبك
بحر و يحاوط جزيرة
يا طموحاتي الأخيرة
و يا معاناتي الچبيرة
المهم حبني إعلى مودك
وين تلگة انسان مثلي
حبّك بگلبه و ضميره

مشتاكلك والليل وحشة
ودمعتي التنزف ثكيلة
وصوتها من اطيح عالي
وحتى محد يدري بيها ،،
اركض اتلكاها بيدي لمن تمر علبالي
انت وين ؟ وانه نص موعد بدونك
مدري ياهو يسد مكانك
وحشة فراكك جبيرة
بكد عشرتك نار تكبر
تحرك بروحي امنيات
ويعلى دخان الظنون
وطيري مذبوح واحس بي يختنك
كل هذا وانه باقي ادور
بلكت الكالي حلم مامحترك
بلكت الكالي وعد مانفترك
لو جمرة منك حتى اشوفك
واصبر وتنشف دمعتي
وترجع بروحي الحياة
انت موجود بحياتي تروح تبقى
حتى بعيوني من ادور الكه
تارك ذكريات ،،
جفي بعده باقي اثرعزفك عليه

انه وياك واحد يم الاخر ضاع
انهُ وياك غيمه وگاع
لا موعد يلمنه ولا يطشنه وداع .

عيوني تلمع من اشوفك
روحي تلمع من اشوفك
وابدي ارتب بيه كلشي
هيج اوكف
وهيج اباوع
وهيج اگول
وابقى اعيد براسي حچي
شمعنه هسة احساسي صار!
شمعنه اجيلك لو ضجت؟
شمعنه اتحجج اشوفك..
شمعنه يمك دنجت
مدري بيك شضيعت
ومدري بيك شلملمت
والمحك
وابدي انساها السوالف
واصفن بجيتك عليه
توصل انت و
يدفى گلبي
واحضن ايدي بنص اديه

حَبة حَبة
وشذرة شذرة
وگطرة گطرة
وبالرسم طول خلك بيج الأله
صور عيونج موانئ
وبيها عاف الليل نومه وذب غطاه
والشكر ماجان مزروع على كاع
الكاع خصبة للشكر هاي الشفاه
عيوني ما تجذب علية
العسل يم الاشارة جدى منج
كسر گلبج واخذ من خدج حلاة
من بعيد إنتِ جميلة
ومن قريب إنتِ جميلة
والحلو وجهة يبين من كفاه
لأن ملفتة للأنتباه

مِن خسرتَك
صغرت بعينيّ خسارات العمُر
ودرت وَجه عيُوني عنّك
خاف المحَك منكسر ..
شكثُر باچي لخاطرَك كَلي شكثُر؟
وتغلط بحقيّ وأدورلَك عذُر
طولت باليّ إعله كَلبك
ليّش نَبضك يختصُر؟
چِنت أدورك كِلمة بأنقاض الدفاتر
ما ردت مِنك سطر ..
وچِنت اموت كَبال عيّنك حتى أعيّش
چم مُوسيقى تموت إذا غنّى العطُر؟
إنتَ يا أغلى خسارات العمُر ..

أعلمك عَ الرمي وانطيك مني سلاح
وأول ما تجرب بيه ترميني!
اجيتك شارد من الوجع، مرني هواي
ما رايد تهِد بس ردت تحميني
تسلمني بأيديك لغُرفة التعذيب!
توصيهم عليّ وين اليأذيني.

واعتنيِلك
واني ماعندي مَجال
وماتجيني انتَ
ولا حتى بحلم
عندي الك شوگ وحنين وذكريات
كلشي عندي
وانتَ ماعندك علم ..

من صدگ كونك تجينه
نحوي گمرة
وچم نجم صوغة لرجعتك
كون ترجع
نترس البيبان حنة
ونشتل الياس
لضحكتك

أين أنت
الآن يا مَن لم تكن تتركني
رفّةَ جفن إنني أبحث عن وجهك
في كل زهور الحقل

ياحنين وينك أنتَ ؟
شگد بعيد ، الله والاحد
وينك أنته شهل مسافة
شطوولها ؟
يحليو يغيد
گاعد كبالي واحس بيناتنا ميلين
وك تدنه ؟ ومد اديك وخذني ليك
ولا يضل حد
اعصر اجفوفك حراره شوك
عض شفتك تنهّد
ضمني لاحضانك لصدرك
شدني لذراع العشك شد
ابماي حسنك خلي يذوبني الخدر
والروح تصعد
بوسني لكطع النفس حته من إموت
الكيك واشهد

اتعنى لمچاني اللي گعدتة وياك
ما الگاك بس رايد أثر منك !
بلچن چلمة ضلت ما نگلها الريح
الگاها وتجاوب بالنشد عندك
لو دور عطر منك بقى على الگاع
احط نفسي عليه افيش اشمنك
أجدامي من النشد دوخن راس الگاع
يدورون أثر منك بي يتعبنك
عگدة براس فكري گلي احلها شلون؟
أيس لو أضل للموت انطرنك