قيل للربيع بن خثيم: ما نراك تعيبُ أحدًا، قال: لستُ عن نفسي راضيًا فأتفرغ لذمِّ الناس.
وأنشد:
"لنَفسِي أبكي لستُ أبكي لغَيرِها
لنفسي في نفسي عن النَّاسِ شَاغِلُ".

شو عم تقرأوا هالفترة؟
إلي زمان ما قرأت واليوم بلشت برواية جديدة، يارب تطلع حلوة 🎈

أكثر كتاب بطوّل وأني عم أقرأه
جاي عبالي أعمل سلسلة عنه بس أخلصو

نُقاط مهمة لازم نحاول نفهمها حتى نقدر نحقق هدف ببالنا بأقل صعوبة ممكنة ✨:

ـ مو لازم دايماً يكون عنا طاقة و شغف لحتى نعمل شي، لو بدنا نستنى ايمتى رح يجيني الشغف حتى أدرس مارح ندرس شي بحياتنا، أحياناً لازم نعمل شي و نحنا مو جاي عبالنا (هي مهارة تُكتسب)

ـ الالتزام بهدف بحتاج صرامة و حزم ذاتي، حاول تتعلم تكون جدّي بالتزامك و انضباطك.

ـ حدد ليش بدك هالهدف أصلاً
ليش بدي أتعلم لغة؟ ليش بدي ألتزم بالرياضة؟ ليش بدي بلش أكل صحي؟

ـ قسّم هدفك الكبير لأجزاء صغيرة..
المخ لما يشوف هدف كبير رح يحس إنو بعيد و صعب و ضخم، قسّم هدفك الكبير لأهداف صغيرة حتى يستوعبها المخ و أنت تكون عارف شو بدك تعمل حتى توصل للهدف الأخير (خطوات).

ـ تعلم فن إدارة الوقت بالطريقة يلي بتناسبك، تذّكر ما في طريقة بتناسب الجميع لكل حدا شخصية و ظروف مختلفة عن الثاني فـ حاول تجرب و تكتشف الطريقة المناسبة إلك.

كثير بسمع عبارات بتبين وكأن الغيبة شي حلو وفكاهي وأساسي بالجلسة مثل
"ما بنعرف نقعد إذا ما حكينا عالعالم"
وصارت شي شائع وعادي بين الناس رغم إنها محرمة تحريم واضح وصريح ومباشر بالقرآن وبالأحاديث ومع هيك الكل بستهين فيها

وأكيد بتلاحظوا يلي دايماً بضل يحكي عالناس ويتناقل أخبارهم وأسرارهم ويذكرهم بالشر إنه إنسان عنده نقص بشخصيته، وبحس بقيمته لما ينتقص من الغير.
لو كنت شخص بتغتاب ومتعود على هالشي، أدعي رب العالمين يحفظ لسانك عن الناس وجاهد نفسك، ولو كنت بتتعرض لمجالس الغيبة بتقدر ترفض الكلام وترد برد صارم يوضح إلهم إنك رافض تشارك معهم بالحديث وتذكرهم إنه الغيبة حرام.
#نصيحة_من_آية 🪄

الفشل هو الاستسلام وعدم المحاولة، "على الأقل حاولت" أفضل من "استسلمت" 💛

لو نبطل نعمم حياتنا وتجربتنا الخاصة على الكل
ونبطل نفكر بـ انانية وفردانية ونستوعب ظروف العالم المختلفة عنا
ونبطل نقول عن مشاكل وظروف العالم كذب ومبالغة بس لأنها ما صارت معنا
بكون أفضل.

صباح الخير ☀️
بدي أشارك معكم هالعبارة يلي بتهدي كل (أفكار القلق والتفكير المبالغ فيه بالمستقبل) الموجودة بعقلي ♥️

الغرور يلي بصيب الإنسان بعد ما بشوف حاله التزم دينياً بخوف أكثر من لما كان إنسان مو ملتزم.
بعرف شخص قمة بالدين والأخلاق فعلاً، حافظ القرآن، بار بأهله، وبتمثل بأخلاق الرسول صلى الله عليه وسلم ومع هيك لما حدا يمدحه برد "غفر الله لي ما لا تعلم" وهو فعلاً هيك، لهيك نخف شوي وما نشد كثير على حالنا لأنه الله قادر بلحظة وحدة يقلبك من الهداية للضلال.

لا تستنى يصير عندك أحدث هاتف
ولا حتى يصير عندك مكتب وطاولة
ولا حتى يصير الجو مناسب
ولا حتى تصير تعرف كل شي
ولا حتى تخلص مشاكلك
ولا حتى يصير عندك أقلام ودفاتر حلوة

أبدأ الآن ولا تستنى الوقت المثالي لأنه مو موجود ✨

اليوم صار قدامي موقف بمكان عام
خلاني أدعي لكل بنت الله بلاها بـ أب لئيم وسيء إنه ربنا يعوضها بشخص يكون فعلاً رجل ويكون حنون معها ويبدلها بكل شعور سيء ودمعة بضحكة وجبر خاطر.

هيك مواقف ما بتروح من بالي، وبفكر فيها كثير وبتأثر منها
يمكن لأنو أهم شي عندي العائلة، وما بقدر أستوعب الإنسان (وخاصة الأنثى) شلون ممكن يحس وهو بعائلة سيئة، معنفة إلك، وما بتحبك، وبتعتبر كسرك وجرحك شي عادي ولو قدام الناس.

بعترف إني زمان ما كنت انتبه وأهتم، ونظري كان بس على نفسي
بس لما صرت أكبر وأختلط بالناس وبطلت نظرتي طفولية للعالم، لاحظت أشياء حواليي بتخوف

أول مرة كانت لما كنت صف سابع، كان في بنت بصفنا يمكن اسمها رؤى وأبوها متوفي وجدها أخذها من أمها لأنو الأم ما عندها القدرة المادية تصرف عليها، ووقتها كان القانون والمحامي ينشرى بألف ليرة على أيام النظام البائد، المهم خلاها تترك المدرسة وزوجها
وكانت ساكنة عطريق المدرسة وكل يوم وقت نكون مروحين تطلع عالشباك تتفرج علينا وكمان للآن ما بنسى نظراتها وابتسامتها وقت تشوفنا
ومن وقتها انتبهت في عالم ثاني البنات عايشين فيه غير عالمي.
في بنات لحد الآن رغم إنهن متعلمات وأعمارهن فوق العشرين نظرتهن محدودة وأنانية وما عندهم علم بأي شي بصير مع غيرهن (أو عندهن بس معتبرات حياتهن هيك بشطارتهن واستحقاقهن مو نعمة من ربنا)، ووقت الفلسفة والتنظير يا لطيف ما أشطرهن!

دايماً شياطين الإنس من (ملحدين، كارهين للإسلام، وحتى متدينين) بحاولوا يزرعوا أفكارهم السامة بعقلي بما يخص المرأة والأنثى وبعدها الشيطان ببلش شغله بالوسوسة
بس بكل مرة الله بنقذني من المتاهات يلي بفوت فيها، وبحط قدامي شي يقنعني إنهم غلط.

مرة قرأت فتوى إنه الرجل غير مُلزم بعلاج زوجته عند المرض، مع إنه كمان من حقه يمنعها من العمل لأنه هو الرجل وهي عليها الطاعة 🌚
طيب، بس المخلوقة تمرض شو تعمل بالضبط؟
وبلش الشيطان يلعب بعقلي وانبسط إنه لقى ثغرة يشككني منها
وهيك حتى ما بتذكر وين قرأت حديث كان معناه: إنو الصحابي عثمان بن عفان ما راح على غزوة (تخيلوا يعني ما راح يجاهد وانعفى) لأنه زوجته كانت مريضة، فـ ضل هو عندها
ما ترك شغله ولا قعدة عادية، لا ترك الجهاد
وما جاب حدا لعندها ولا مجرد دفعلها حق علاج وأدوية، لا هو بذات نفسه اعتنى فيها بمرضها
وبعد ما عرفت لأي درجة عظمة الدين واصلة، كل الوساوس والشكوك اختفت وما عاد حدا قدر يزرع بداخلي أي فكرة من هالنوع.

الموضوع يطول الحديث فيه ومن زمان حابة أحكي عنه لأنه مهم وما حدا بحكي فيه، بس بنكمل بوقت ثاني♥️

نشرت أول منشور بالسلسة الخاصة بالمحاسبة على قناتي الثانية
المهتم يقرأ المنشور ويتفاعل عليه ♥️

https://www.tgoop.com/a1ya7/194

صباح الخير 🌱☀️
شكراً لكل الرسائل يلي وصلت عن موضوع مبارح، انبسطت إنه عجبكم واستفدتوا منه

هالفترة رح بلش بسلسة جديدة وهي الذكاء العاطفي بما إنو عندي ياها مادة هالفصل
متحمسين؟ ♥️

رواية مُريبة بكل تفاصيلها، لكن لا تستطيع إلا إنهائها.
تحكي عن المرأة ذات التنورة البنفسجية المعروفة بأنها غريبة أطوار في الحي الذي تسكنه، ولكن غريبة الأطوار الحقيقية هي المرأة ذات السترة الصفراء، التي أصبحت مهووسة بالمرأة الأخرى وبكل تفاصيل حياتها.
١٤١ صفحة
⭐️٣/٥
#كتاب

هاد اسمه تفاعل كئيب 🫣
وصلوه لـ ٣٠ قلب حتى نزل أول بوست♥️

كيف نعيد توازننا و سلامنا النفسي و العقلي بخطوة واحدة:

دراسة: الأنثى مهما كانت بتملك جمال خارجي بس إذا كانت بالمكان الغلط أو مع الشخص الغلط رح تفقد هالجمال ورح تكون منطفية وباهتة لأن روحها ميتة وبالتالي رح تشوف نفسها مو حلوة وبلا جاذبية، أما الأنثى حتى ذات الملامح العادية (مع إني ما بقتنع إنو في بنت عادية، كلهن جميلات بطريقة ما) بس هي موجودة ببيئة صح ومع الشخص الصح رح تكون متوهجة ولامعة ورح تبين وكأن في هالة حواليها بتخليها مشرقة لأن روحها منتعشة وفيها حَياة.
طبعاً هاي دراسة أني عملتها من شوي وحاسة إنها صحيحة 😔♥️