📚 የኛ_ግጥም 📚

አጃኢብ

እስቲ ልፈልገው ያንን ጉብል ጀግና
ከሼህ ሁሴን ሀገር ከወሎ መዲና
አጃኢብ ነው አቦ መገን ከዛ ማዶ
ጥርሶቹ ሚያበሩት ልክ እንደ በረዶ
እዩልኝ ያንን ሰው ከቡናው ታዳሚ
ፍቅር ምርቃቱን ከልቡ አዝናሚ
አቤት አመራረቅ ተለይቷል የሱ
እንኳንስ ሙገሳው አያስከፋም ክሱ

ካለሁበት ሀገር ሜዳውን ተሻግሮ
ከተራራው መሃል በፍቅር ተፈጥሮ
ለቀረበው ሁሉ መልሱ መርሃባ
በምኔ ልላቀቅ ከዛ ሰው ሙሃባ
እግሬ ከመንገዱ ከሱ ቀዬ ሲደርስ
ተረታሁኝ እና ቀረሁ ሳልመለስ

ገባው ላጠያይቅ
ባንድ ጊዜ እይታ ስትጠፋ ግዜ
አንተን ሳገኝ ነው ያኔ ነው ደሞዜ
ገባው ሼልፍ ተራ ባይኔ ልፈልግህ
የልቤን ስር ምስጢር ከልቤ ልነግርህ
እሱ ባይሳካ....
ከአራዳው መሃከል ገባው ጭሱ ተራ
አቤት ግርማ ሞገስ ቆሟል ያ ተራራ

ህብራዊ ቀለማት በአንድነት ታጅቦ
በአርሂቡ ቃና በፍቅር ተውቦ
አየሁ ሀገር ሲሆን ጭስ መልኩን ቀይሮ
በደሴ ምድር ላይ በመልክ ተቀምሮ
እኔ አንተን ስፈልግ.....
ጭሱ ተራ ሆኜ ሀገሬን አየዋት
በሚያምር እርጋታ በስስት ቃኘዋት

በወሎ ምድር ላይ መግባቢያ ፍቅር ነው
ወንድም እህቴዋ የተለመደ ነው
አጃኢብ ነው አቦ መገን ያንተ ነገር
ተመለከትኩ በዓይኔ የመልከኞች አገር
የሚያገኘው ሀጅር አቤት በረከቱ
ፈገግታ ማይጠፋው ሁልጊዜ ከፊቱ
ለይምሰል አያውቅም ሁሉም ነው ካንጀቱ
አቤት መስተንግዶ ጠብ እርግፍ ይለዋል
ምንም ቢወራለት አይበቃም ያንሰዋል

እና ግን አንተ ሰው ....
ምነው ታይተህ ቀረህ
የሰው ቀልብ ሰውረህ
ያየሁትን ቅኔ ምስጢሩን ሳትፈታ
ምርቃት መርቀህ ሳትሰጠኝ ቱፍታ
እንዴት ጠፋህብኝ ስለምን ተጣጣን
መገናኛው ሞልቶ መገናኛ አጣን

አጃኢብ ነው አቦ መልከኛ ወድጄ
ሀገር ላይ ቀረሁ ሁሉን ተላምጄ
አራዳን ተሻግሮ ከፒያሳ መሃል
አንተን በመጠበቅ ልቤ ቆሞልሃል
ምነው ብትከሰት መልስ ብትሰጠኝ
ላለሁበት ነገር መፍትሄ ብትሆነኝ
ከሼህ ሁሴን ፎቅ ስር ቆሚያለሁኝ እኔ
አንተን በመፈለግ ሲንከራተት አይኔ
ከወዲያ ሲያማትር ወዲህ ሲመለሰው
ላገኘው አልቻልኩም ያሸነፈኝን ሰው
ገባሁ ልፈልግህ ከሰኞ ገበያ
ጠጠር ሚጣልበት የለም መተያያ

አጃኢብ ነው አቦ መገን የወሎ ሰው
ያረፈውን ልቤን ድንገት ቀሰቀሰው
እዛም ስትጠፋ አቅጣጫ ቀየርኩኝ
ከዳውዶ ሰፈር ትገኝ አንደሆነ ብዬ ጠረጠርኩኝ
ከዛም አልተገኘህ ......
መናፈሻ ሰፈር ታይተህ ነበር አሉ
በአርሂብ አስገባኝ ወሎዬው በቃሉ

ቅዳሜ ገበያ ከተማሪ ቤቱ
ትገኛለህ ሲሉኝ ሄድኩኝ በጠዋቱ
በማለዳው ውበት አምሮበታል ጦሳ
በዝምታ አርምሞ ቆሟል እንደ አንበሳ
የዘመናት ውበት
አንድ አይነት ማንነት
በቆመ ድንጋይ ላይ ተመለከትኩ ህይወት
በእለተ ዕረቡ.....
ሮቢት ወጣሁኝ ብዬ ልፈልግህ
ስለመልክህ ምስጢር ደግሞም ልጠይቅህ

አጃኢብ ነው አቦ መገን አንተየዋ
ሀያ መርሃባ ብለህ ብታስገባኝ ብትሰጠኝ ሀለዋ
ተመኘሁኝ እኔ....
በቃልህ ልታሰር በስምህ ልጠራ
ሚስትህ ብታደርገኝ ብንሆን በጋራ
በፍቅር ሀገር ላይ ፍቅር ብንጨምር
በመዋደድ ዜማ ባንድነት ብንዘምር
ተመኘሁኝ እኔ ይሄን ሁሉ ክብር

ስንቱን አካልዬ ከዳር እስከ ዳሩ
የሱ መገኛ ግን ነበር ከመንበሩ
ከቧንቧ ውሃ ሰፈር እስከነ ውበቱ
አየሁት ያንን ሰው ተገኘው ከፊቱ
አርሂቡ ማለት ልማዱ ነውና
መርሃባ ሲለኝ ተቀላቀልኩና
ልቤን ሳልቀበል ምላሹን ሰጥቼ
ከወሎ መልከኛ ገባሁኝ ቀርቼ

አራዳ፣ፒያሳ፣ሰኞገበያ፣ዳውዶ፣ሮቢት፣ቅዳሜ ገበያ፣ቧንቧ ውሃ፣መናፈሻ
የደሴ ሰፈሮች ናቸው።

✍ቤተልሔም ሰለሞን

12.0K viewsسمير ايمي, 16:37