بسمه تعالى
1037_القاسم بن الحسن ع. 2..جديد ٢٠٢٤
=============================
يا قاسمَ الشَباب.. ما أعظمَ المُصاب
في حومةِ النزال
يحلو لكَ القتال
==============================
القاسم بعمره و شبابه.. قدوة صاير للشباب
ياخذ الرخصة و يحارب.. اشتبكت بجسمه الحِراب
حسين ابو اليمّة يسِأله.. و ينتظر منه الجواب
چن عسَل طعم الشهادة.. ايوجّه ال عمّه الخطاب
حين ابتدى الهجوم
بدرٌ على النجوم
قد جَندَلَ الرجال... ١
===========================++
يضرب بسيفه العساكر.. ماضي بيمينه الحُسام
لا رعب جاس العزيمة.. وجهه چن بدر التَمام
يحرس حسين و عياله.. و يحمي ثايات الخيام
عارف بزغره و سنينه.. شگد مقامات الإمام
ضربٌ على الأنوف
قد بعثَرَ الأُلوف
في قوةِ الجبال... ٢
==============++++===========
قاتل بقوة و بسالة.. لابس احرام الوصول
يهزم اجموع العساكر.. صاعقة بيوم اليصول
من گرب حين الشهادة.. و الورد صابه الذبول
من وگف وسط الحريبة..و ما دهَش فكره الذهول
في شِسعِهِ انقطاع
ما همّهُ الرعاع
في شَدّةِ النِعال... ٣
==============================
طايح السيف اعله راسه.. من هُوَه لذاك الصعيد
ناده يا عمّاهُ وينك.. من وگع دامي و شهيد
و اسرَع حسين اعتناله.. و انهزم جيش الَعبيد
و احتضن جاسم يويلي.. و البَچي ايصير الشديد
لمّا علَا البُكاء
في حضرةِ الدماء
دمعٌ بهِ سؤال... ٤
==================+++========
جابه لخيام العقيلة.. و گعدت بكتره و تنوح
رمله نادت يا حبيبي.. شو خضاب من الجروح
حضّرِت حوفة زفافك.. غفلة من عيني تروح
يا ورد روحي و رِباهه.. يا عطر نحرك يفوح
لا أحملُ الفراق
ما أصعَب العناق
صبرٌ لهُ ابتِهال... ٥
=============================
سيد حيدر العوادي
بابل الشوملي
٢٠٢٤/٧/١٤

بسمه تعالى
1038_حضرة علي الأكبر ع.. جديد ٢٠٢٤
$$$$$$$$$$$$$$$$$$$$$$$$$$$$
يا علي الأكبر تنيت.. دوّرت عنك لگيت
بس رسومك بالخيال
يا علي لاُمك تعال
$$$$$$$$$$$$$$$$$$$$$$$$$$$$$
يا علي الأكبر تنيتك.. لامك اتعود و ترد
روحي و اگليبي بغيابك.. يبني ممرودة مرِد
من ونين الليل روحي.. عاشت بوادي البعد
تاخذ بروحي المسافة.. و جيش المعاتب يهِد
يا علي الاكبر مشيت
حسرة اوداعك بچيت
و انكسر ظهر المُحال... ١
$$$$$$$$$$$$$$$$$$$$$$$***$$$
يا علي الأكبر ليالي.. عيني تربي و تنتظر
بالسهر عمر التمنّي.. و يا سهَر ليل الصبُر
يا فجر وجهك يغالي.. ايروّي روحي من يطُر
غايب بلهفة حنيني.. و لا بزغ نورك فجر
يا علي الأكبر دعيت
ال ربي بالمدمع شكيت
بعيني شوغات ابتهال... ٢
=######$$$$$$$$$$$$$$$$$$$$$$$$
يا علي الأكبر حسافة.. اعيوني يعميهه السهر
ماتت احلام انتظاري.. بعَتمة ما تعرف نظَر
يا شبابك ويلي طايح.. يا دمه اوريدك نهَر
روحي غابت بالأماني.. و مُستَحيل المُستَقَر
يا علي الأكبر بديت
غربة بالدنيه انتهيت
و ساري باكتاري احتمال... ٣
$$$$$$$$$$$$$$$$$$$$$$$$$$$$
يا علي الأكبر منيتك.. حانت و گلبي انلچَم
و الدمع مو ماي صاير.. من دمومك دمعي دم
شراح اسولف عن عذابي.. و عن تفاصيل الألم
خيمة احلامي احرگوهه.. احترگت بوسط الخيم
يا حياتي بلا حياتي.. صارت بعيني عدَم
يا علي الأكبر رضيت
صورة من ماضينه ريت
و اختصر بيهه المَقال... ٤
$$$$$$$$$$$$$$$$$$$$$$$$$$$$
يا علي الأكبر جبينك.. يمطر ادموم و ضوه
و انه بغيابك حزينة.. و ريتي محتاجة الهوَه
لو صحت من الهظيمة.. امنين اجتني نينوه
ما بعد يحصل لقاءك.. و لا بعد نگعد سوه
يا علي الأكبر هويت
من المُهر و انه نعيت
و انگطع ورد الجمال... ٥
&&&&&&&&&&&&&&&&&&&&&&&&
سيد حيدر العوادي
بابل الشوملي
٢٠٢٤/٧/١٤

بسمه تعالى
1039_علي الاكبر ع.. ٣..جديد ٢٠٢٤
&&&&&&&&&&&&&&&&&&&&&&&&&&&&
حرگة الفاگد ولَد.. حسرة اعتاب و عهد
ويلي يا شوغات ليله
ما تشوف النوم ليله
&&&&&&&&&&&&&&&&&&&&&&&&&
حرگة الفگدت ولَدهه.. و هالولَد عدهه الوحيد
حرگة يا مَصعب وصفهه.. شلون جمرة البالوريد
تنچوي الروح ب سَناهه.. و گلبي ماهو من الحديد
ذايب بجمرة غيابك.. هَم تعاود من جديد؟
غيبة اوداعك جرح
يذبح الخاطر ذبِح
بلوعة الليل الطويلة... ١
&&&&&&&&&&&&&&&&&&&&&&&&&
يا علي الأكبر ذكرتك.. من شفت لمّة شباب
و انت ما موجود يمهم.. امسافر بوادي الغياب
و العمر بجفاك صحرة.. و عمري من بعدك يَباب
صورة من وجهك تلالي.. و ريحة من عطر الثياب
ميت بروحي الحلِم
حيلي بعدك ينهدِم
هجرك الما بيه حيله... ٢
&&&&&&&&&&&&&&&&&&&&&&&&&&&
گالَوا (العَبدي) اعتنالك.. شلّت ايمينه العبِد
ضربة الموت اعله راسك.. و انگطع هرش الورِد
ليله تنتظرك تعاود.. و هيه تعرف ما ترِد
بس وهَم بيهه ايتِلاوَح.. عدهه خوف من البُعِد
بُعدَك اونين و جمر
بيهه محروگ الصبر
دمعي ما يخلَص مَسيله.... ٣
&&&&&&&&&&&&&&&&&&&&&&&&&
لابس احرام الشهادة.. و لايگ اعليك الحَمار
سلسبيل ايسيل دمك.. مشرق بوجهك نهار
گاصد ال جنة عدَنهه.. و نصرة حسين الشعار
ما تعوف حسين وحده.. و تحمي خيمات الزغار
بعينك ارسوم الألم
بيهه صورة من الخيَم
و المسافات الطويلة... ٤
&&&&&&&&&&&&&&&&_&&&&&&&&
من مشت بينه النعايِم.. گاصد من الكوفه شام
دورت عنك لگيتك.. عالترُب نورك ينام
شگد صحت يبني و ندبتك.. سكتة من مات الكلام
و انه عالناگة الهزيلة.. و روحي تبعثلك سلام
بعيني دمعة امجرّحة
بيهه ماي و مَسبَحة
ال روحي و اقريت العَديلة... ٥
&&&&&&&&&&&&&&&&&&&&&&&&&&
سيد حيدر العوادي
بابل الشوملي
٢٠٢٤/٧/١٥

بسمه تعالى
1040_الطفل الرضيع ع.. جديد ٢٠٢٤
قصائد للرضيع في التعليقات
=====================+=================
ويلي يا موت الزغار.. بعينك ايموت النهار
لو ورد يشكي الذبول
فكرك ايصيبه الذهول
=========================+====
ويلي يا موت الطفل يوجع يناس
جمرة بوريد الگلب حزّ المَواس
زهرة اخدود العمر و الريحة ياس
مرمي مگطوع النحر ما عنده راس
جابوا الروس برماح
وجهه چن وجه الصباح
منظر ايحَير العقول... ١
===============================
ماكو بگدارك رمح راسك زغير
گصبة جابوهه العده و گوّة تِصير
تمشي جدام الظعن طول المَسير
و انه عيني اتعاينك منّ الأخير
من مشت بينه الظعون
ال راسك اتصد العيون
يا گمر حان الأُفول... ٢
================================
يبني تانيتك عمر و اطلب رباي
يالچنت مثل الگمر تضوي بسِماي
ما ردت يبني شردت بس گطرة ماي
ويلي مگطوع النحر تاليهه جاي
ويلي من سهم الممات
جاني من نهر الفُرات
روحي راحت بالوصول.... ٣
==============================
يبني يالواحد رحت وادي الغياب
ظلت اتناطر بچي و نوح الرباب
ما ترد روحي بعطر هاي الثياب
جرحك الماضي نفَذ آه يالمُصاب
حرملة اشعنده اعتناك
بالسهم يوم ال رماك
بخاطرك شنهو ال يِجول... ٤
=================+=+=================++=
ويلي يا ذبح الطفل فعلاً حَرام
لا هوه المر و حرَف مَسره السهام
و الطفل كون بمَهَد ناعم يِنام
وجنة بصبغهه الورد لون الحَمام
الوجنة حنّتهه الدماء
ويلي ويلي ال كربلاء
نسأل منَ الله القَبول... ٥
===============================
سيد حيدر العوادي
بابل الشوملي
٢٠٢٤/٧/١٥

بسمه تعالى
1041_عاشوراء الشهادة.. جديد ٢٠٢٤
======================++++==========
على موسى بنَ عمران.. سلامٌ حيثما كان
ما كانت نجاته بيوم عاشور
ينحب بدمعة ونينه الهاي النحور
===============================
سلام الله اعله موسى.. يا نبيَّ الله الكَليم
عنده من ربنه الكرامة.. مُرسل و هادي و كريم
و احنه نؤمن بالنبوّة.. و (صدَقَ اللهُ العظيم)
موسى هَم سالت دموعه.. و حزنه عاشور الأليم
دمع بعيونه سچاب
يون ونّة منِ المصاب
سمع باسمه و قضيته بجانب الطور... ١
==========+=+==================+++
لو شفت هاي الرواية.. تروَه ب اكتاب البحار
و الجزء منهه اربعينه.. اربعة اتلاگي القرار
(البحار ج ٤٤)
من سأل عنّ الظليمة.. و تنذبح بيهه الزغار
غربة من حال اليتامة.. و خيمته المحروگة نار
غريب و ما إلَه اَعوان
بخيامه ايشوف نيران
و خيول اعله المخيم گامت اتدور... ٢
===========================++
كلمن ايقيم احتفاله.. بعاشر امحرّم حَقود
لا عقل عنده و مشاعر.. بحقده مجتاز الحدود
الما يرف گلبه و ضميره.. ال گطعة انحور الورود
باچر ايقابل نبينه.. اجدامه و ايدينه الشهود
قيامة بيوم الِحساب
بيساره ايكون الِكتاب
لا يطب جنة عدَن ميشاهد الحور... ٣
=============+++++==========
العايف ادموم المناحر.. ايسوّي من عنده احتفال
ما يحس حالة رسوله.. و لا يصَل فحوىَ الكمال
مو غريبة انصار اُمَيّة.. و لا هُم اولاد الحلال
من أثر يوم السقيفة.. و يم رسول الله الجِدال
طردهم ساعة الموت
بجواره و رفعوا الصوت
هيه هاي بكل زمان اتناصر الجور... ٤
================+++============
أهَل بيت الرسالة.. شافَوا بعاشر خيام
تحترگ تلهب عليهم.. شردت ايتام الإمام
اليعرف الدين و حدوده.. يعرف الصاير حرام
بت رسول الله العقيلة.. تنسبي ال دار اللئام
دموع من الهظم سيل
بعد ما بيهه حيل
عدهه كم طفلة و طفل خاطرهه مكسور.... ٥
================================+++
سيد حيدر العوادي
بابل الشوملي
٢٠٢٤/٧/١٦

بسمه تعالى
1042_الأمام الحسين ع.. جديد ٢٠٢٤
============================
امداوره الجيش.. ماله حد
هوه حسين ليش.. ماله احد
و العساكر.. سدّت اعيون الشمس
و العساكر.. تطلب الثار منَ امِس
=========================+====
حلقة صارت.. كلهه دارت
بين سيف و بين خنجر
غُبرك ثارت.. النجمة غارت
و انگطع لحسين منحر
غارت الغُبرة الكثيفة
و هجمت الخيل المُخيفة
و كلمن بچفّينه سيفه
و الجسم صاير مضيفه
استقبل اسهام.. شگد عدد
نزف الالام.. ماله عَد
و المشاعر.. ماتت بموت النَفِس.... ١
================================
العين ناحت.. دمعة طاحت
سولفت شوغات زينب
صوبه راحت.. سكتة صاحت
صيحة ذابحهه التعب
صارت بونّتهه صيحة
بيهه رغبتهه الجريحة
عسكر اليرفض نصيحة
يسحگ اجساد الذبيحة
شفته مذبوح.. بس جسد
طلعت الروح.. و ابتَعَد
و الخواطر.. كسرة من بيهه يِحِس... ٢
=================+=================
حسين نايم.. مات صايم
ماي ما هيّاله يشرب
گلبي هايم.. و نوحي دايم
لو مسير النوگ غرّب
ناگة عَجفة و قدّموهه
طفلة طفلة ايصَعّدوهه
و البچَت سوط اضربوهه
اتعلگت يَم راس ابوهه
صوت الايتام.. من ارتفَع
كوفة و الشام.. ال ما سمع
و المحاجر.. تنزف و تروي بهَمِس.... ٣
=============+++============
حسين شفته.. اجروح شفته
چلمة اموادعنه تنزف
حسين عفته.. ما عرفته
و الرسوم اوداع تكشف
من مشت بينه الهوازل
و الظعن ما يمّه كافل
و الشمر يحدي القوافل
خوفي لَ اتميل المحامل
توگع اطفال.. بالفلَه
شلّت الحال.. كربله
و اليسافر.. يعثر بحزنه الشَرِس... ٤
==============================
اتلوج دمعة.. اتموت شمعة
و ليل حسراتك تكوّر
من يسِمعه.. اگليبي ينعه
و لهفة الملهوف تسعر
لهفة بيهه ال كربلاءك
شالت امنازَف دماءك
لسه باسماعي نداءك
حرگة امعاتبنه حاءك
سين و الياء.. فاجعة
نونك ارزاء.. مشرعة
و المقابِر.. سلبَت اخضاب العرِس... ٥
=================================
سيد حيدر العوادي
بابل الشوملي
٢٠٢٤/٧/١٧

بسمه تعالى
1043_السبي و الشام... جديد ٢٠٢٤
=======================+======
سكتت اصوات الصهيل.. نايم حسين و قتيل
ماتت الضجة و هِدَت
و رحلة الغربة ابتدَت
========================++++==
رفعَوا الراس برمح قبل الغروب
و لبست احرام الصبر زينب وجوب
من كسر ظهر الزمن حزن القلوب
كونه من صَلد الجبل لازم يذوب
كل گلب يحمل شعور
لو نظر حال النحور
الفاجعة الگشرة السِدَت.... ١
=====================================
اعليهه زينب بالعشه ايصير الهجوم
اجيوش شرسة اتقدمت بيهه الهموم
جيش و اخيول و زلِم گامت تحوم
تسلب اخيام و خدر ستره النجوم
اتقدّمت كلهه الجيوش
كلمن اينوش ال يِنوش
و عدهه چبدة اتمَرّدَت... ٢
==============================
نزلَت بليل الدمع وادي البلاء
هذي چثّة امگطّعة و تنزف رثاء
مدري إلمَن؟!... بيهه عزة و كبرياء
ماكو راس امچفّنة اتراب و دماء
ريحة المنحر تفوح
بيهه لمحة من الجروح
بكتره مهظومة اگعِدَت... ٣
==============================
شلونه يحسين السهم طلّعته؟. لاه؟
بطّل اونينه و خدَر جمدت دماه؟
لو بعد نزف الدمه و حزنه و شَجاه؟
امنين اجيبن لَه الدوه و ضايع دواه
شلونه جرحك يالحبيب
وينه ثوبك؟. شو سليب؟
تنعه عن حاله انشِدَت.... ٤
==============================
من طلع فجر اهدعَش حان الوداع
كل عتاب بهالوضع رايح ضياع
كافل المحمل جسد مابي ذراع
و راسه من فوگ الرمح ينزف شُعاع
مقصد المسبيّة شام
و انذبح نحر الكلام
سارت النوگ و حِدَت... ٥
==================+=+++++=====
سيد حيدر العوادي
بابل الشوملي
٢٠٢٤/٧/١٨

بسمه تعالى
1044_حضرة الكفالة ع... جديد ٢٠٢٤
===============================
انتَ كفّالي و كَفاني.. و انتَ كفّال الأماني
كلشي خلّيته اعله جودك
و المهم عندي وجودك
==============================
إنتَ كفّال الأماني.. و رشحة اشعاع الضوه
و انت معروف بوفاءك.. بيهه تشهد نينوه
صفنت الدنيه اعله چفّك.. و احترگ ساري الهوه
و النفَس مابي مشاعر.. گلبي من جمره انچوَه
ماشي بافكاري و خيالي
واگفة ارسومك حِيالي
ماكو برسومك زنودك... ١
==============+++++===========
من العمَد نوحي و دموعي.. املوّنة بفيض الدمه
للماي ما هَمنه ضمانه.. ال شوفتك هَمنه الضمَه
للسمه الحمرة منَ اعاين.. تنحب ال حالي السمه
فاطمة اتوَصّيك أُمّك.. و اني ضَنوة فاطمة
عندك ال عودك وصية
كلهه چانت خويه بيه
و حانت اوصيتَه عودك... ٢
===============(===============
يا نهَر طافح محَنّة.. و جفّت اجروف النهر
مشرعة دمعي ال غيابك.. تچوي شريان النحر
بخاطري ال طولك خواطر.. بيهه خاطر للخَطر
و الليالي اشگد ليالي.. انثِلمَت بموت الگمَر
وحشة مالومة الليالي
و انكسر ظهر احتِمالي
منهو يمسافر يِعودك... ٣
==============================
غربة الما عدهه والي.. غربة الفگدت وَلَد
جرحي ما يخمد سعيره.. ايهيّج الامه العَمَد
ذاهت الروح بحزنهه.. و صبري غادَر و ابتعَد
اقنت ادعيلي بصلاتي.. و رددت قل هو الأحَد
من قريت بصَمتي آية
و احتِمِل قرب النهاية
و بانت ازنودك شهودك.... ٤
==============(======================
لهفة المفگود اخوهه.. اغتالِته اسيوف الأجل
حنّت ال منبع حنانك.. و الهوه بريتي ثِگل
امجندَل بحومة فَخارك.. بكترك اهداف و جَدَل
چن وَهَم عدهم رحيلك.. حيدر اليوم ارتحَل
من رجع خاير جَمَلهم
اجتمعوا بصفحتهه كلهم
و سطّرِت صفحة خلودك... ٥
==================================
سيد حيدر العوادي
بابل الشوملي
٢٠٢٤/٧/١٩

بسمه تعالى
1045_حضرة أبي الفضل ع.. جديد ٢٠٢٤
==============================
ما قاصد الماي.. خل نفتهم هاي
شگد سهل قول الكلام
بس صعب فَهم المَقام
==============================+=
دور ابو فاضل فقط (جيبنّه ماي)
مو صحيح اليعتقد بس هيه هاي
دور ابو فاضل علم عالي بسماي
دور ابو فاضل حرس واگف وراي
من يبرَه الِظعون
يتحوّل اعيون
بكل كتر يفترهه گام... ١
==============================
أمر ابو اليِمّة صدَر لازم يطيع
گلّه تگصد للنهر ترجع سريع
آني منطيك الأمر تسگي الرضيع
و إنت لو عني رحت ناسك تضيع
لو تمشي عباس
من تهجم الناس
و تحترگ تالي الخيام... ٢
================================
ازيارة الصادق فضل بيهه اختصار
نافذ الكافل بصيرة و گلبه حار
شايل ايمانه الصلِب ماخذ قرار
(إنّي أُحامي أبَداً) شايل شعار
يحرس حِمَى الدين
ما يترك حسين
و من وگف يحمي الإمام... ٣
==============================
ثلاثة ايّمة الشرّعوا بوس الچفوف
اچفوف ابو فاضل صدگ تقره و تشوف
و اُمّه مدرسة الوفَه اتدور و تطوف
اتعلمت يبني الدرس يوم الطفوف
زودك جبل زود
من تنطي الِ زنود
ال زينب اتشيل اهتمام... ٤
==============================
من شُمَر ماي النهر عافه و نساه
يضرب الكافل مثَل صبره و رضاه
(الحُجّة) من عندي أهم و اشرب وراه
و باچر بجنة عدَن يصبح جزاه
فوگ الترب طاح
و بالمَحشر اجناح
و طاير بدار السلام... ٥
===================================
سيد حيدر العوادي
بابل الشوملي
٢٠٢٤/٧/١٩

بسمه تعالى
1046_دفن الأجساد الزكية.. جديد ٢٠٢٤
==============================
دفَنته شلون يا عمّة.. نشَف لو ما نشَف دمّه
دفَنته شلون
جروحه اعيون....
تتنازف
=============================
إجاهه و غُبرة بهدومه و عليهه اتراب
عليهه اهموم مجموعة و هظم و امصاب
تنِشده بدمعة حيرانة و سؤال اعتاب
عجيبة شو غبت عني و خيالك غاب
أناشد يالولي عنك
جوابات انتظر منك
بگلب محزون...
تتعرّف... ١
===============================
يعاين و الدمع ساجم يصب نهران
مشيت ال كربله و گلبي صبَح حيران
لبويه و عصبِته و گومه صرِت دفّان
تراب اعله النحر ذاري و يصير اكفان
دفنته و ما جبت راسه
نزيف المنحر احساسه
حزن مكنون....
يتراجف.... ٢
===============================
يعمّة بدمعة امعاتب حزن و انخاك
دفنته شلون يا عمة الگلب و انطاك
اريد اتسولف الحالة اشحصَل و ارجاك
دفنت الوالد ال وحدك منو الوياك
الجسد متكَسّرة اعظامه
اخاف ايهيجَن الامه
جسد مرهون...
بارض الطف... ٣
===============================
بحصيرة بكل كتر طاحت و الِمهه اردود
و اعاين عالجسد عاري و صدر مَمرود
دفنته اوليده عبد الله و رجيته ايهود
و رحت للشاطي بعيوني شفت عامود
اليمين بصفحة و اليسرة
العلم و الراية ال بكتره
الجمر چانون...
و لگيت الچف.... ٤
==============================
يويلي و زينب اتنادي بگلب محتار
دفنته و ما چنت يَمّه و تدير اعبار
و لا يبرد جمر روحي و سعير النار
لمَن ما يظهر المهدي و ينول الثار
بوكتهه ايثور فَقّاره
و يصول و ياخذ بثاره
الخلَگ يدرون...
تتكشّف... ٥
==============================
سيد حيدر العوادي
بابل الشوملي
٢٠٢٤/٧/١٩

بسمه تعالى
1047_ثورة الآمر بالمعروف و النهي عن المنكر... جديد ٢٠٢٤
================================
ما يتكرر.. فكر المَنحر
مقصوده احكام الدين
شما نتغيّر.. صوت و مَشعَر
لازم نرجع يَم حسين
================+++=============
حسين ثورة.. بيهه فكرة
و بيهه عَبرة.. و بيهه تأصيل الشريعة
حسين مبدأ.. ما يتجزّء
و من يتجرّء.. ايغيّر الدين و يبيعه
حسين ثورة معرفة
بيهه المباديء هادِفة
و الكذب هيّه اتكشّفَه
بمهجِته الحَرّة الگطيعة
ما تتوصّف.. دم تتنازَف
رايه و جود و چفّين... ١
===============================
حسين غايه.. من البداية
للنهاية.. و هوه مصباح و سفينة
ايصب دمايه.. و شال رايه
و هذا رايه.. يمتثل منهج نبينه
حسين منبع للكرم
ضحّه باصحاب الشيَم
احترگت بعاشر خيَم
و زينب اتسافر حزينة
دمعة زينب.. بيهه امعاتب
دمع امعاتب يچوي العين... ٢
==============================
حسين سَجدة.. و يدعي وحده
ماكو عنده.. بس حرم تبچي و يتامه
و صار عَهده.. ايصَلّي وِرده
الدين بَعده.. تثبت احكامه و مقامه
لازم اتراقب صلاتك
كل عباداتك نجاتك
من قبل ساعة مماتك
تقره ما معنى الأمامة
حسين رادك.. ايكون زادَك
تقوى اتحاول تفهم زين... ٣
===================================
حسين دمعة.. و نور شمعة
ايثور يسعه.. ايصون غايات الرسالة
ميتين ربعه.. و نسوان تنعه
و مشغول سَمعه.. و ناظره بصوت ابتهاله
ثورة انسان و شرف
بيهه مضمون الهدف
بنص عساكرهم هِتَف
صلّه و كبّر.. و الكون احمر
و داعِية ال ربّ الجَلالة
=================================
حسين خالد.. فكره شاهد
ماكو واحد.. مثله بالدنيه بكبرهه
من يعاهد.. كان زاهد
قاري عابد.. ثورة ما يبرَد جمرهه
منهه تتعلم درِس
و تمشي بانوار الشمس
و لا بد بگلبك تِحِس
بزينب و غربة يسُرهه
زينب ترحل.. تقره المقتل
محّد يسأل لا تبچين... ٥
===============================
سيد حيدر العوادي
بابل الشوملي
٢٠٢٤/٧/٢١

بسمه تعالى
1048_السيدة ام الخدر و العنفوان الحيدري.. جديد ٢٠٢٤
=================================
كيد كيدك.. ما يفيدك
تخلص ايامك عدَد
جمعك الظالم بدَد
============================
زينب بمجلس اُمية.. وگفت بهيبة و شُموخ
من قره اشعاره و تغنّه.. و يهتف بذيچ الشيوخ
ليتَ أشياخي شهود
في بدر ألهم وجود
ماكو جنات الخلود
و لاكو نار و لا وَقود
مات ظالم.. ليش ناقِم
بعرشه متبختِر گعد... ١
================================
يضرب بسوطه الثنايه.. ويلي يا جمر السياط
بالَغ بحقده و فجوره.. في حضيض الأنحطاط
ظالم و حاقد يزيد
يحكم بنار و حديد
ياخذ بثاره يريد
قاصد ال گطع الوريد
عاش حاسد.. مات حاقد
حتى ما عنده وَلَد.... ٢
==============================
زينب اتشوف الجسارة.. و جمهرة العالَم سكوت
صاحت بصوت الشجاعة.. و ما خمَد من عدهه صوت
انتَ لو مسلم بقيت
بجدي و حسين اهتديت
ظالم بيوم اعتديت
تنده اشياخك دعيت
دير بالك.. شوف حالك
بيدك احبال المَسَد.... ٣
================================
سدّت احلوگ العقيلة.. و شالت الثورة ب ثَبات
ما نزل يمهم دمعهه.. و تحرس ايتام و بنات
يشهد ال زينبهه شام
كشفت استار الظلام
صاعقة بفَصل الكلام
اتربّت ب حِجر الإمام
صوت صاحت.. اركان طاحت
و حتى ظالمهه ارتَعَد... ٤
===============================
زينب ال شالت رساله.. و وضّحَت خافي الأمور
ما ظهر ضعف ب عَزِمهه.. و تخفي شوغات النحور
راعت ايتام و عليل
اتعاين ال صوب الكفيل
بدرب الِ وداع الطويل
هذا قربانك قليل
اتنوح سكتة.. اتروح يمته
و يجتمع راس و جسَد.... ٥
=============================
سيد حيدر العوادي
بابل الشوملي
٢٠٢٤/٧/٢٢

بسمه تعالى
1049_السيدة زينب ع.. جديد ٢٠٢٤
================================
أيتام شردَت بالبراري.. و جمرة تچوي اجدامهه
من بعَد ذَبحة وليهه.. اشتعلَت بنار اخيامهه
بغيابك گلبي اتحيّر
بغيابك گلبي اتحيّر
===============================
اعيونهه اتعاين دربكم.. و انترس خيل الدرب
يا گلب يحمل مصابي.. و صاير اوصال الگلب
دمعة العين بغيابك.. شوغة امعاتب تصُب
و الحزن حومَر جفِنهه.. و تنعه موت احلامهه....... ١
================================
ويلي من دمعة رقية.. التنزل بخدهه الحمُر
ما حمَل صبري بونيني.. انهدمَت اركان الصبر
روحي من لهفة حزنهه.. اتلاوَح بعيني الگبر
اتگطّعت مثلك حياتي.. و لا ضريح ال لامهه.... ٢
==============================
شفتك امگطع رِمِية.. و سالت ادموم النحَر
اتوجّهَت صوب الشريعة.. و گلبي طايح عالنهر
گوم يا عباس لينه.. امحاوط العيلة الخطَر
تصرخ بنوح اليتامه.. و تشكي جور ايامهه... ٣
===============================
حرگة المنحر چوَتني.. و ما طفت نار الضمَه
بيهه من حسرة رحيلك.. غربة و امنازَف دمه
بيني ما بينك أماني.. و تروي لوعة فاطمة
من بچت كسرة ضلعهه.. و هذا صوت الامهه... ٤
===============================
كل وكت يحسين انادي.. و غافي بالصوت الهَمِس
عالترب نايم لگيتك.. بجسمك اثار الشمِس
امگطع بسيف النواصب.. تطلب الثار من امِس
هنده و اجعيدة و حقدهن.. تاخذ بثار اعمامهه... ٥
===============+============
جسمك اتوذّر وصاله.. بكل كتر حافر فرس
ذاهت الروح و نظرته.. عالصدر جوشَن جلَس
يگطع بنحرك شماتة.. و تشهگ شلون النِفَس
و انه من بعدك سبية... كوفة هاي و شامهه.. ٦
=============================
سيد حيدر العوادي
بابل الشوملي
٢٠٢٤/٧/٢٣

بسمه تعالى
1050_الامام الحسين ع.. جديد ٢٠٢٤
=============================+=++
نحره يشخب دمه.. يشكي حرّ الضمه
ما يطيب اصوابه
سهمه يوم انرِمَه.. تبچي عين السمَه
ال جمرِته اللّهابة
===============================
عينه تنظر للسمه بنظرة حنين
من تصّوب بالسهم چبده الحسين
اتعلّق بروح القدُس مات الونين
ما رضخ لاهل الظلالة و يستكين
غربة تمطر ألم
بيهه ماي و سهم
عينه يمّ اطنابَه.... ١
==============================
اتقوّس بحسرة الظهر من فوگه مال
و ارتچه بحضن السرِج من دمه سال
يرفع بچفه الدمه ال ربّ الجَلال
حتى ترضاني فَ خُذ بالدمعة گال
جاري دمّ النحر
بعينه صورة گمر
بكل حنين اجوابه... ٢
===============================
زينب ب ركن الخيام تنعه و تطوف
زمزم ادموع الجفن ما بي جروف
تعتب و عتبة حزن متروسة خوف
خافت حسين انذبح رادت تشوف
مروة بيهه الحزن
الكعبة تنعه و تون
من وصل سلّابه... ٣
=====================++++====
ما ترك سيف و حجر نبلة و رماح
كلهه تشمرهه العده و الغالي طاح
زينب بلهفة الگلب باللوعة صاح
صرخة وحدة ما هَِده و لا يستراح
طفلة رادت تجي
و من نداهه الشَجي
كل جرح و اسبابه... ٤
=============================
گلبي يا لوعة احتمَل عاشر هموم
بي تفاصيل الذبح تروي الدموم
بي مَهازيل و يسُر يخفي الرسوم
خيله غارت بالحقد فوگ الجسوم
ويلي حافر فرَس
بصدره داس و رُفَس
اچفانه صار اترابه... ٥
==============================+
سيد حيدر العوادي
بابل الشوملي
٢٠٢٤/٧/٢٤

بسمه تعالى
1051_محد عرف زينب.. جديد ٢٠٢٤
===============================
ما عرف زينب هاي زينب.. الا بالشام
من گامت بمجلس أمية.. و تفرض احكام
و من يسولف عالعباه
باچر امحاسَب وراه
===========+++==============
من وگع عزهه و ذَراهه.. و صارت اچفانه التراب
صبرت الحزة العقيلة.. اتحمّلَت عظم المصاب
ما نظر واحد دمعهه.. و لا فهَم معنى العتاب
شالت افكار الشجاعة.. ماكو ظل عدهه ارتياب
من علي الشالت وقاره و هيبة بالكون
ما نظر واحد دمعهه بجفن العيون
و الفَضَه المظلم سماه... ١
==================+++========
ما عرفه واحد ش اسِمهه.. بعزة من حيدر وَقار
جمعت ايتام الرسالة.. و لا شهد بيهه انكسار
شبت النار بخيمهه.. وصلت و دارتهه نار
تحرس ايتام الرسالة.. و جمعت اطفال الزغار
ترعه الاطفال اليتامه اتباري الِعليل
اتسكّت اصوات البواچي و نوح الِعويل
لو تنادي ارقية آه... ٢
===========+=++=========++++
حسين ابو اليِمّة بوصية.. ايوَصّي زينب لا تنوح
باچر انودعچ ضحايه.. و ظعنچ اميَسّر يروح
لبسي جلباب اعله صبرچ.. و اخفي شوغات الجروح
الباري حاميكم يزينب.. و عندي باليحصل وضوح
بالچ بنوح المصيبة و خَمش الِخدود
و ( لا تَشُقّي اعليه جيباً) و انطي العهود
الباري قُربانه و رضاه... ٣
=========++++===============+==
وصلَت ال جسمه بحزنهه و گعدت اهناك
شبچَت اچفوف الأماني اعله الجسد ذاك
ربي من عدنه تقبّل نطلب ارضاك
حسين ابو اليمة ال جلالك يقصد انطاك
ماكو خنصر يمهه شافت گامت اتدور
و مسحَت اترايب المصيبة بهاي الِنحور
لاجلك الامه و ضماه... ٤
============================++++=
هذي زينب من عرفهه بهيبة ارجال
تحرس الساجد تباري اجموع الَاطفال
بمجلس ايزيد العقيلة بصوت زلزال
هزّت اعروش و كراسي و طاحت اجبال
اهناكه سألَوا عن شخصهه بمجلس ايزيد
و شافته بسوط الشماتة ايجيس الِ وريد
و بالطشت سالت دماه... ٥
=================================
سيد حيدر العوادي
بابل الشوملي
٢٠٢٤/٧/٢٥

بسمه تعالى
1052_شوغات زينب ع.. جديد ٢٠٢٤
==========================++===
حرگة النحر.. و رحلة السفر
خلن بگلبي جمرتين
و اشتكي الجمرات لحسين
===============================
حرگة المنحر رزِية.. جابت اوياهه المِنِية
بيهه حزن الغاضرية.. و هَم خَواته
من يِحِل وكت المِسِية.. كلهه تتلايم عليه
دمعة امعاتب رقية.. و الشماتة
و الدموع ادموم تجري
و الصبر ما شاف صبري
أكبر منَ ايام عمري
و ادري يالمذبوح تدري
لوعتي الجمر
تحرگ الصبر
و الدمع شوغات بالعين... ١
==========++++===========
حرگة المنحر مناحة.. و بالسفر ماكو استراحة
گلبي باحزانه و جِراحه.. يشتكيلك
هبت العاشر رِياحة.. و انكسر بالطف جناحه
و الطفوف اتصير ساحة.. و هذا ليلك
و الجرح ما عاف عيني
امگالَب ال بينك لَبيني
و انتظر باكن تجيني
و يهدأ اعتابي و أنيني
جمري ما برَد
و الدمع شهَد
و الونين ايصيح ب اونين... ٢
===================+===========
روحي بعدك عذبوهه.. بسوط المنازَع چووهه
راحت و ما رجّعوهه.. من غيابك
زينب اختك چتّفوهه.. البلدة الظالم خذوهه
اتشمّتوا بيهه و ولوهه.. يا عتابك
ما نفع حزني و عتابي
و دمعي من جفن البيابي
يا مصاب بگد مصابي
و ما رجع منك جوابي
خايف الضوه
و خنگة الهوه
بيهه من عاشور لونين... ٣
==============================
لون الاَسود من سناهه.. و لون الَاحمر من دماهه
و انت يا ريحانه طه.. اشلون اعوفك
روحي و اغيابك طواهه.. عيني و المدمع چواهه
و انت مَطلَبهه و رجاهه.. و ما أشوفك
ما خطَر هذا بخيالي
و الشمر واگف حِيالي
بحقده شدّدهِن حبالي
و انه زينب لا يُبالي
شدشد الحبل
ما ترك طفل
و سَلسَل السجاد بعدين... ٤
====================================
حرگة المنحر مسافة.. بيهه لوعات ارتجافة
و درب الموادع مَخافة.. و اني بيهه
كل طفل نشفت شفافه.. حافي و ايهرول حسافة
و ضربة السوط بچتافه.. يِتّقيهه
يِتّقي الضربة بچفوفه
امچتفة و بعيونه خوفة
كون ابو فاضل يشوفه
ما يتِركه و لا يعوفه
ضربة العَمَد
و ما رجع بعد
اعله النهر مگطوع چفّين... ٥
================================
سيد حيدر العوادي
بابل الشوملي
٢٠٢٤/٧/٢٥

بسمه تعالى
1053_السيدة شريفة ع.. جديد ٢٠٢٤
=================================
حومة عاشر بعاشور.. حسرات و دمع و انحور
================================
ما چان الحسن موجود.. بس شبل الحسن حاضر
قاسم يهجم اعله الجيش.. و ما خلّه الولي حاير
طاهر من برز معلوم.. قاسم من نسل طاهر
شال و معتمد سيفه
و گام ايكاون بكيفه
يعرف بعد تكليفه
كل راس بكتر طاير
و اعيون الغريب اعليه.. ظلت بالمعارة اتدور.. ١
===============================
و اولاد الحسن كلهم.. راحوا بالذبح قربان
وياهم شريفة هناك.. اتعالج كل جرح لهفان
ماتت بالدرب للشام.. و عدهه بكل گلب برهان
العليل اليمهه يتشافه
الواحد لو مرض شافه
بكتر مرقدهه يتعافه
و يشفه البالمرض خلصان
مرقدهه البشر يمه.. كلساعة التجي و اتزور... ٢
================================
شريفة بكل وكت معلوم.. گبرهه و شايل الشارة
تموج الوادم بكل صوب.. شافت بيهه شنياره
كل واحد جمرته اتهيج.. يمهه تنخمد ناره
على اعتاب الشرف عدهه
هدايا ال مَن يعاهدهه
بس اتزور مرقدهه
و عندك علم باخباره
عدهه من الكرم آيات.. بمرقدهه المَلَك و الحور.. ٣
======================+=========
من زود الحسن عدهه.. كرم ما تختفي اعلومه
چانت حاضِرة بعاشور.. حسين من اقترب يومه
اتعالج كل جرح نزّاف.. تلفي اتنشف ادمومه
و ما زالت لحد الآن
يمهه الواحد الحيران
لو چان البشر تعبان
يمهه ايروحن اهمومه
من نسل الكرم و الجود.. بيت البالكرم معمور... ٤
=================================
شريفة و يا نعِم من گال.. مقامات شكثر تشهد
كرامات و عطاء و طيب.. تلاگي اهناكه بالمرقد
بس نيتك صحيحة اتكون.. گلبك بالگبر يبرد
يا الگاصد لعدهه اتشوف
عدهه من الكرم معروف
و اگلوب العليهه اتطوف
تجيهه بشوگ تتردد
تلگه بكل كتر زخّات.. خيرات و سحايب نور... ٥
===============================≠
ذوله اهل الكرم معروف.. عدهم و الكرم عادة
شريفة بكل زمن موجود.. طبيب و مرقد اعيادة
أهَل بيت النبي المختار. دنيه و آخرة السادة
وسيلة الحاجة مقضية
بس تقصد العلوية
صادق كونك النِيّة
ياخذ گلبك امراده
تتوجّه عليهه اتكون.. راجي بگلبك المَجمور... ٦
=================================
سيد حيدر العوادي
بابل الشوملي
٢٠٢٤/٧/٢٦

بسمه تعالى
1054_الحسين العظيم ع.. جديد ٢٠٢٤
===============================
مقعدُ صدقٍ ينتظر.. عندَ مَليكٍ مُقتَدر
نفسه چانت مُطمَئنة
يعرف بتاليهه جنّة
===============================
أيتها النفس المُطمَئنّة.. جاءت بنصّ الكتاب
راضيةو مرضية رجعي.. من ذكر هذا الخطاب
فادخُلي في عبادي و جنتي.. من بعد عظم المصاب
و هذا من شاهد كلامه.. حسين يلگاهه الجواب
ضحّه للباري ب نَحَر
الجنة هيه المُستَقَر
بس رضا الخالق تمَنّه... ١
===============================
حسين ابو اليمّة بجهاده.. ينتهج نهج الرسول
ما يجامل لاجل دينه.. و حق علي و أمه البتول
حتى لو ينگطع نحره.. و تسحگ بصدره الخيول
ناهي عن منكر يشوفه.. آمراً بالحق يصول
حتى لو تجري الدمَه
ال يرضَه جبّار السمه
لو أخذ ما راد منه... ٢
=============================
وصه زينب بالوصية.. و لا تشُقّين الجيوب
إصبِري صبراً جميلاً.. و الصبر أصبح وجوب
تحترگ زينب خيامچ.. كلهه ساعات الغروب
عالرمح راسي ايتِعَلّه.. ال حاله دلّالچ يذوب
غربة بدروب السفر
و ما يجي اوياچ الگمر
كلكم اتروحون عنه... ٣
==============================
حجة و القاهه بخطابه.. وضح بصوته الكلام
تطلبوني بقَتيلٍ لو شرايع.. غيّرتهه بهذا المقام
لو تطلبوني بجراحه.. عدكم بگلب الإمام
بُغضاً اتصيح و عنادأ.. ال حيدر بشهر الحرام
نطلب ال ثار ا بّدر
عدنه ثارات شكثر
و صارت الثارات سُنة... ٤
========================++====
سُنة سَنّوهه بحقدهم.. ضد علي و طه الأمين
اخذوا ثارات هندة.. و عتبة ما دام السنين
سَنّوا بمنهج ظلمهم.. هذا ذبح الطاهرين
و لسه ما زالت حربهم.. شرسة ضد المؤمنين
(عادش) ال جانه بحقِد
و الله بارك بالحشد
بدمه المنازَف تحنّه... ٥
===============================
سيد حيدر العوادي
بابل الشوملي
٢٠٢٤/٧/٢٦

بسمه تعالى
1055_السيدة رقية ع.. جديد ٢٠٢٤
===============================
هذي نظرات الوداع بعينهه.. بينك اهات العتاب و بينهه
عاين ال بنتك رقية
اتگربت منهه المنية
=============================
نظرة اوداعك حزينة.. و لاحت بعين اليتِم
و اني يوم انظر عليهه.. بروحي مذبوح الحلِم
روحي طاحت بين ايديه.. و يثگل اعليه الهِدِم
اتطشرت كلهه اليتامه.. و منهو لايتامك يِلِم
نزفت اوداع و أماني اجروحهه
و تعبت بكثر انتظارك روحهه
تنعه كل صبح و مسية..... ١
=========================+=++=
گعدت من النومة ويلي.. اتريدك بصوت و عتب
و اني تعبانة بغيابك.. روحي ماذيهه التعب
عمة وين حسين اريده.. اغيابه ليش بيا سبب
بدمعي و ادموع الفواطم.. عاشر اجديد انكتب
كتب اهات الونين ادموعهه
و جمرة امنازَف توج بضلوعهه
تبچي و اتعاين عليه... ٢
===========================٪٪٪
من سمع خصمك بچيهه.. و صوتهه الخايف وصل
گالوا اطفال بحزنهه.. تنوح يوم اللي سأل
ودوا راسه ايگول ليهه.. شلون دلّالي احتمَل
ما يهيد اعليك گلبي.. و ردت اهَوده و ما قِبَل
حسرة تجتاح الضمير اگبالهه
ونة تاخذني و تردني ال حالهه
دمعة بيهه و غاضرية... ٣
================++++==========
شالَوا المنديل عنه.. و راسك بذاك الطشت
شبگته و ناحت تگله.. شلون من بعدك عشت
فارگتني بلا وداعك.. غفلة للموت اغبَشِت
و الونين بروحي صاحي.. و فكري من فگدك يِشِت
ماكو توديع بوداع اوداعنه
جرحي يوصفلك ونين اوجاعنه
و الجمر چويات بيه... ٤
=============================
شبگت الراس و تناشغ.. ساعة لن مات النفَس
ماتت ارقية ادفنتهه.. بروحي جمرات و قَبَس
و النِفس نار اعله ريتي.. و بيهه شوغات انحبَس
و اشعر العالَم منايه.. و موت كل صوب انترَس
لسه نظرات العتاب بعينهه
بليلي يلفيني بجفاك اونينهه
و عَتبي يا حامي الحمية... ٥
===============+++++===========
سيد حيدر العوادي
بابل الشوملي
٢٠٢٤/٨/١٠

بسمه تعالى
1056__زيارة الأربعين.. جديد ٢٠٢٤
===============================
أربعينك نوح و آلام.. أربعينك غربة ايتام
مو سفر حالة سعادة
بي مسافات و شهادة
=============================
من تزور حسين يوم الأربعين
لازم بعين البصيرة من اليقين
اتشاهد حسين و تنادب يا حُسين
و تشعر بحال اليتامه من الونين
من الزيارة اتنال مَبغاك
تاخذ السبحة اهناك وياك
و دربك اذكار و عبادة.. ١
======================+++====
من تزور حسين تلگاهه الخيام
بس بقايا ارماد و اجناح الحمام
من اليتامه اتنوح و ايموت الكلام
و لا تناظر عينك بنظرة حرام
لاكو غيبة هناك مفروض
اترتل بقرآن محفوظ
تشكر اتنال الزيادة... ٢
=========================+====
من تزور حسين تلگه النادبات
زينب اتنادي بحزنهه النايبات
تسمع اونين الحزانه امسافرات
يشكن اگيود ال سبيهه بلا حياة
بكل مسافة اتشوف نيران
يحترگ من عدهه صيوان
اتراب لحسين الوسادة.. ٣
================+++=========
باربعين حسين لا تگضيهه بس نوم
من يصير الليل فرضك لو حضر گوم
خلّي بعيونك ظاهرة و هاي الهموم
اتشاهد بعينك كراماتك تدوم
هذا سعيَك بي جزاء
توفي من حق الدماء
عصمة الدين القيادة... ٤
=========================================
باربعين حسين رحلة من الألم كون
بيهه كل خير الكرامة اتقِرهه العيون
حسين للباري الوسيلة و خيره مضمون
حسين ما يترك حبيبه حسين مامون
أربعين حسين تذكار
بي كرم معروف و ايثار
يكرم حسين الوِفادة.. ٥
========================================
سيد حيدر العوادي
بابل الشوملي
٢٠٢٤/٨/٢١