СВО зонатыгар салгыы айанныы сылдьабыт. Биир дойдулаахтарбытын көрсөн гуманитарнай көмөнү, баһыылкалары туттарабыт. Мирское дэриэбинэҕэ көрсүбүт 3 уолбутуттан 2-тэ ньурбалар, Новозлатопольга 5 саха уолуттан эмиэ 2-тэ ньурбалар. Улуус Сүбэтин бэрэссээдэтэлэ Нюргуяна Михайлова кэргэнэ, тыа хаһаайыстыбатын департаменыгар үлэлии сылдьан СВО-ҕа көҥүл өттүнэн барбыт Леонид Михайловы көрүстүбүт. Новоукраинка таһыгар элбэх сахалар баар байыаннай чаастарын хамандыыра, биир дойдулаахпыт Альберт Чочановтааҕы көрүстүбүт. Байыастарга позицияларыгар тиийэн, Антоновка олохтоохторо, урбаанньыт Титовтар оҕолоро-сиэннэрэ бэйэлэрин матассыыкыларын байыастарга бэлэхтээбиттэрин илдьэн туттардыбыт. Маннык патриоттуу өйдөөх-санаалаах уолаттарга СВО инники кирбиитигэр дойдубутун көмүскүү сылдьар байыастар улахан истиҥ махталларын ыыталлар. Матассыыкыл кимиэхэ тиксэрин уолаттар сэрэбиэйдэһэн быһаарыах буоллулар. СВО-ҕа буойуттарга көмөлөһөр улууспут олохтоохторугар, Дьокуускайга баар биир дойдулаахтарбытыгар улахан махталлаахпыт.

Мариуполь уонна Азовскай икки ардыгар Бердянскай диэн сиргэ икки уолу көрүстүбүт. Запорожскай уобаласка итинэн үлэлээн бүттүбүт. Салгыы Донецкай уобаласка Новоазовскай тирэх пуунугар сырыттыбыт. РФ Аҕа дойдуну көмүскээччилэрин дьиэ кэргэттэрин кэмитиэтин Саха сиринээҕи салаатын салайааччыта Марина Бахилинаны көрүстүбүт. Волновахаҕа Күндээдэ уонна Маар уолаттарын көрүстүбүт. Бу курдук айаннаан Луганскайга, онтон Курскай уобаласка тиийиэхтээхпит. Биир дойдулаахтарбытыгар гуманитарнай көмөнү, баһыылкалары туттарабыт.