على رقعة الشطرنج
الجندي الذي تلمسهُ يدك
يشعر انهُ الملك..

بيه لعيونك كلايد .. تترس ادروبك شذر ..
خذني گرداله ... لگذلتك .
ضمني ترجيه لكشختك .
زتني نجمه إهناك .. بزلوف العطر ..
يادفو العنبر لون ليلي ثلج
شبگتك تنزار من دمي يوج
يالحن ... بلَل حجينه .
وغازل إشموع المدينه .
وسامر اولايات صبري وغنه لايامي الخضر..
ياضفيرة عافيه بلون العصر ..
حطني فيّ يرويك لو جاسك تعب
مانه بسمة ماي .. بشفاف العتب
لوحني بنسمة مشيتك .
يا ربيع الله .. إشتهيتك .
تعتني لظلمة عتبتي . وتوكف إبابي فجر ..
ياظفيرة عافيه بلون العصر ..
ياصبح غافي بشناشيل العگد
غني للجمار .... بشفاف البرد
ياحبيبي . لو بدينه .
رهن ماتسكت مرينه .
ألمع برصعات خدك . وأشتري لعمرك عمر ..
ياضفيرة عافيه بلون العصر ..


#سلام_الجبوري

ابمسيّة رب

تلملم كل حچي العذّال عالشرفة

واجيت انتَ ....

و غفه ابروحي نجم سهران ما اعرفه

و توسّلت العذر گاعين ما غسلن حچي الفطرة

اليمد روحه نهر چذاب ما يوصل ولا گطرة

و اليشرب سمار الغير خد محبوبته ايعثره

اليتيه ابدين الولايات إمام اولايته ايحضره

مو فقرة ...

لچن حلوة طواري العوز ...

من يكبر درب عاشگ ، جدم تنورنا ايعبره

وانت او لا خذت عِبرة !

تبدّيت إعله شمس الناس طاسة فيْ !

و صليب اذنوب بيه علّگوا كل ضحكة لبنات الحيْ !

وآنه او كل مطر روحي عثرنا ابرغبة الشفّة

و دوّرنا إعله بوسة صلح تمسح چذبة الشباچ والعفّة

يعطر النوم ، مر بيّه غصن ريتي انذبح بسوالف الرغبة

شممني وسن يا ليل ...

ولو أدري ...

الوجه يطفى اعله باب إحچاية الطِلبة

و لو أدري ...

الشمس تتشظى من اتغيب تنطي لكل گمر شبگة

و لو أدري ...

النهر مرّات يعطش ساعة الملگه

عبد الوهاب الحمداني