قدس الله سره من وحي الحروف
كعبة الطف عابس بنص السيوف

ــــــــــــــــــ
لون وجه اسمر لچن اخلاقه بيض
كالاناء من الرجوله وبي يفيض
بحبه شعبي لكن بعشگه قريض
بالعشگ مجنون وبحبه مريض


ما رجف قلبه وتراجع من الوف
كعبة الطف عابس بنص السيوف

ــــــــــــــــــ

إذن الحب اللهي اعله الحشود
وثوب سجاده انفرش بأرض الخلود
كبر الدم وانثى وحان السجود
هذا فرض الاختبار اعله الوجود


كتبت تاريخ البقاء من الطفوف
كعبة الطف عابس بنص السيوف

ــــــــــــــــــ

عبد اسود لكن يحبه الحسين
قصته بالطف تنكتب فوك الجبين
شذره صار بكربله بمحبس حنين
قلبه نورس عابس من العاشكين


شيبة وطيور النوارس بي تطوف
كعبة الطف عابس بنص السيوف

ــــــــــــــــــ

وصل من گد العشك حد الجنون
وكال روحي فدوه لحسين وتهون
الماي خابط ما نصف ذيج العيون
ولونه اسود بس ثبت هوه اصفى لون


عمية الألوان وبقى الأسود يشوف
كعبة الطف عابس بنص السيوف

ــــــــــــــــــ

يوم تسليم الجوارح والشعور
تركع لاصغر حجر ذيج القصور
ينمو ما كان لأجل رب النحور
وانتهى عصر الظلم واهل الفجور


هذا يوم البي خلص عصر الخسوف
كعبة الطف عابس بنص السيوف

ــــــــــــــــــ

طاح بالطف بس وصل حد النجوم
وذكره خالد وي الحسين ويدوم
باع نفسه لربه من حان الهجوم
وصارت الروح بجنان الحب تحوم


هاي فردوس العشك بين الجفوف
كعبة الطف عابس بنص السيوف

ــــــــــــــــــ

الشاعر زين العابدين الشمري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

باكيَتُ النحرْ
قصتهه قصه هالعجيبه === باكيَتُ النحرْ
ام البنين ام المصيبه === باكيَتُ النحرْ
سموهه بسماء الغريبه === باكيَتُ النحرْ

وصل بيهه العشك حال === تبجي حسين بالبال
دمع ماعدهه ابد ضال == على العين

العزيز الزهره كل يوم == تموت ابضيج الاهموم
جفنهه وتعب النوم == بحچي الوين

عضيمه ام البنين هواي === ما ناحت على ارباهه
من افراك ابو الاكبر == صفت يوميه مبچاهه
تكعد وين ماكو امچان == يمه حسين كالاهه

بسم احسين == عاشت
وبس بحسين == ناحت
ابخلك الليل == تنشد
امك شوك == فاضت

حنينه وتكعد اعله الباب
تتـنطـر يـرد حـسـيـن واحــمــوله
واجاهه اليبشر اعليهه
ابرساله من علي السجاد محموله

===========================

النص الثاني

لمّا دخل بشر إلى المدينة ناعياً الحسين (عليه ‌السلام) وخرج الرجال والنساء وخرجت من جملتهن أم البنين، فلما سمعت بقتل الحسين (عليه ‌السلام) خرّت مغشياً عليها،

انغمه اعليهه وطفل چان == عزيز ابين الاحضان
يوجهه چنه قرأن === عالحسين

ناحت والطفل راح === من اجفوفهه وطاح
كضت حيل الاصفاح == عالحسين

بقت محتاره واشتبجي == وين اليسوه طاح ابخيل
من عبد الله حد عباس == حد حسين تعبت حيل
صريخ الثاكله صرخت==يحاجيهه ودمعهه ايسيل

كال الخيل == جزعت
كال الروس== فحطت
سألت وين == روحي
كال حسين == وأغمت

بعد ما بيهه حته اتكوم
من كلهه اعله صدر ابنج صعد حافر
يباجر من تشوفينه
يعـمي اعـيونج ابراسه الـرمـح باجر


===========================
النص الثالث
.
فلما أفاقت أم البنين (عليها ‌السلام) من غشيتها سألت عن الحوراء زينب فأخبروها بذلك، واذا بالباب تطرق
فقالت فضة: من بالباب فانّ سيدتي زينب لا تريد أحداً يدخل عليها إلّا من فقدت لها عزيزاً في كربلاء.
فقالت أم البنين


انا المفجوعه برباي == وام الما شرب ماي
عطش واروه اهواي == بالخيول

ابنحر ثكلوني وارماح == وكلبي امن الوجع صاح
ابصدر النعمه ذباح == والتجول

عليه الخيل والوادم== دارت وانكطع دربه
سكت وايباوع اعله اهله == حسين ولا نبض كلبه
اكثر من الف لطعنات == ابعزيزي چهبت الغربه

فوك الضيم == طلعن
عشره اخيول == ركضن
موش هواي == هنه
بس هواي == سحكن


بعد هاذه الحجي فظه
عـرفـتـيـني مـنو لـو گـلـج ام عبـاس
انه الكلبه خذه كلبي
وصرت ام المصيبه الشيبتلي الراس


===========================
النص الرابع

فقالت فضة: لقد صدقت سيدتي في ظنها وإنّك - والله - كما تقولين، أم المصيبة العظمى والفاجعة الكبرى، ثم فتحت لها الباب واعتنقت الحوراء
وقالت وهيه باكيه …

عضم الله كلبچ == خذو وين اليحبچ
البقه ابعمري اعله عمرج == يأام عون

أحجيلي اعله ضنواج == خو ما قصر اوياج
ابجفه زينب افداچ == والعيون

گالت فدوه يالعباس == ما قصر ولا ذره
بس يمه الكسر ضهري == احسين انكسر ضهره
يشيله الصدره وايضمه==ويطيح اشويه من صدره

شاله وطاح == منه
رد وكال == عنه
فدوه كوم == خويه
حسينك مات == چنه

كل اشويه ضل يحجي
شلون ارجع يبو فاظل دكوم وياي
ما تسمع بعد عطشان
تروه ابشوفتك سكنه يسيد الماي

===========================
النص الخامس

وبعد أن كفكفت أم البنين دموعها تأملت في وجه
الحوراء وأختنقت بعبرتها وقالت سيدتي يا زينب
أراكِ وقد ضَعُفَ واصفرّ وجهكِ وأسرع الشيب
برأسكِ فسكتت الحوراء قليلاً وقالت ….

حكهه ورحي شيبت == ياهي المثلي ركضت
مره اجبيره وتعثرت == بالجروح

السبي تعبني هوه == ومشيهه الناكه بلوه
كل اشويه خطوه == متت نوح

مالي ومال الشام === اطبه ابهزله متعوبه
وماكو بالمدينه ادروب == ما فروني بدروبه
يمه بجال ابو فاظل == جانت روحي مهيوبه

وهسه بسوك == تالي
ضعت وضاع == حالي
شحجي وراح == خدري
وهم متروس == بالي


اباب الساعه مو ساعه
وعلي ساعات وكفوني اعله ضهر النوك
التكتل موش اخير الناس
اليطب ايشوفني يمه اعله وجه السوك

===========================
سجاد ابراهيم الكعبي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

القصيدة ( شور)
.....


شوغة منيه وصوغة عرس .. بالخيم
حلمي الرسمته بعيوني أمس .. أنهدم
بعمر الشباب اتغيب الشمس .. وأنصِدم

مبارك ينور عيوني.. والدمعه شربت لوني.. عگبك صفالي التعب
بدر الهواشم اشوفه.. تغازل هوه الله زلوفه.. تتركني يمه شعجب

نزاح الضلام ابطلعته
گدامي لابس لامته
لوحة جمال بكشخته .. منه النجم غار

خوفي عليه أمن الحسد
يشبه بدر ليلي الولد
بهل الطلعه چن حان الوعد .. بجفوفه بتار

*
لاتنطي فرصه يمر الهوى .. ونفترگ
لجروحي يبني انته الدوه .. ياعشگ
من العطش گلبي انچوه .. ومحترگ

ليل اسود اعله رموشي .وإني الحزن ملبوسي. تعبني ليل الهجر
حر الشمس برسومك . مو وكته جاسم نومك. بهجرك عذاب شكثر

عريس گاصد حومته
بين ألف صارم زفته
مهر الزفاف برگبته .. ويزفه الموت
صينية الغالي متلت
من دمه والدنيه انطفت
بالخيمه عمته هلهلت .. بنبرة حزن صوت


*

لزفتك أضوي العشره شمع .. يالولد
ويه الهلاهل سال الدمع .. عالوعد
حني الهلال احنيله الضلع .. للأبد

نباگ الفرح من داري. صار الحزن خطاري. كلشي أنتهه بغيبتك
ماأگدر اني بدونك. طفهم يغير لونك. بدم النحر حنتك

جنك بياض بشيبتي
بوجهك اشوفن دنيتي
بالدمعه تمت قصتي .. جاسم بعد راح
كل حُب يحليه الدمع
گلبي بغيابك ينشلع
زهرة شبابك تنگطع .. لاتحسب أرتاح

*
حنه وصواني خيل اوحرب .. تجتمع
يل فگدك اصعب من الصعب .. والدمع
نجمه بسماك وهيمه الدرب .. ياشمع

ضاع الأمل يوليدي. حلمي أزفك بيدي . احلامي صارت وهم
جاسم شبابك وينه. للمذبح مقدمينه. بعدك سكوتي ألم

مطشر مثل نجم السمه
من هامته يسيل الدمه
سماعيل كبشه يقدمه .. وإني ابني مطعون
بجروحه متوضي الرمح
مايحمل وليدي الجرح
وي دنيتي مالي صلح .. مشيبات الجفون

*
عدمن عفتني وحيده بكربله .. للغرب
بهاي الطفوف اصرخ لاهله ... ونسلب
چم دوب أضل يبني أمعلعله .. ونضرب

للحومه من زفيته. جسمك وذر خليته. نحرك يحصده الذبح
مالي عرف بالديره. أمك تضل ابحيره. يلچمني طاري الصبح

التمت شفت خيل العده
ويه المنايه موعده
فوگ الورد مات النده .. شمسوي ياماي
هوه الگلب لمن يحب
يتجرع انواع التعب
خليني اروح بهل درب .. وجروحي هواي

*

علي محسن الفرطوسي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

اشما يمر عاشور شهره اتذكرينه
اهوايه خدام ابمجالس ضيعينه
اهل السواد ابعاشور       مسكنهم ابين اگبور
١
كلما يمر شهر الحزن  يلچمنه شهره
الفاگد حنين امن الهظم مكسور ضهره
ألچان بالمجلس  يون  لو ناعي يقره
فارغ مجانه ومجلسه وتارسنه حسره

اتراب غطه ذيج الاوجوه الحنينه
اهوايه خدام ابمجالس ضيعينه

ماتطفي ناره المكسور      مسكنهم ابين اگبور
٢
جانو اهلنه من يهل شهر المصيبه
وابلا شعور الحب علي تسمع نحيبه
ياگلبي والحدر الترب شنهي اليجيبه
الورد  ينطم  ابلحد  هاي  العجيبه

فارگونه واحنه عالفرگه شبدينه
اهوايه خدام ابمجالس ضيعينه
دنيانه بالزين اتدور      مسكنهم ابين اگبور
٣
بالمجلس الشد اللطم شدو حزمهم
ومن گبل ما تدخل اله تسمع لطمهم
هاي السنه عدهم لطم خاف بلحدهم
سكنو  گبر  بس مادرو يكتل فگدهم

چلمة الخادم عالمشو تطلع حزينه
اهوايه  خدام  ابمجالس ضيعينه
نار الفگد بينه تفور        مسكنهم ابين اگبور
٤
يحسين تدري ابمجلسك فاكد بچيهم
الناحو عليك  ابكل سنه  عنوه اعتنيهم
نورك يغطي اهل اللحد لمن تجيهم
مسلوب  هدمك سيدي شتظل عليهم


نثر جسمك سيدي بالطف رهينه
اهوايه خدام ابمجالس ضيعينه
ليش بحوافر منثور       مسكنهم ابين اگبور
٥
تدري هاي ابيوتهم مهجوره چنهه
وحشه يامولاي من بعد السكنهه
لو خبر عن العليله اتفل حزنهه
احبابهم من الدمع يبطل جفنهه

اشما ذكرنه ايامهم نحنه وبجينه
اهوايه خدام ابمجالس ضيعينه

ظلمه الديار ابلا نور       مسكنهم ابين اگبور

خادم اهل البيت الشاعر علي الزرگاني
8/6/2025
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

(( #والعصرِ ))             #محرم_1447
……………………………………………………………

قرآنٌ يقسمُ و العصرِ  (ي)
إنَّ الانسانَ لفي خسرِ  (ي)
إلّا مَن هُم كلُ الفخرِ   (ي)  .. خدام احسين

…………………………………………………………


تجاره الخدمه وي حسين . تربح ابد ما تخسر
تبيع الدمعه گد گطره . وينطونك نهر كوثر
اليلطم صدره عالمنحور . يدخل ملك للمعشر
واليلبسله ثوب اسود . يصير استبرق الاخضر

كل اقرايه . من تحضرها . و اتهل العين
قصر امذهب . تاخذ غادي . من ام حسين

و لمسحِ الدمعِ على الخدِ  (ي)
يزهرُ كـفٌ لكَ بالـوردِ    (ي)
نالوا فعلاً كلَ المجدِ    (ي)  .. خدام احسين

……………………………………………………………


قال المصطفى وكل عين .تبچي بيوم القـ يامه
إلا عين تجري اشطوط . عل شچ الرمح هامه
باجر كل بشر مرعوب . گلبه ايطيح جدامه
ويدخل ببتسامه حسين . و يلگط لگط خدّامه

ويگللهم . اهلا بيكم . انتم عيناي
وشكد تحله . الجنه الخضره . وانتم وياي

رؤياكمُ قد صارت فَرَحا
فنسيتُ الحافرَ و الذبّحا
مرحى و لكم كلُ المرحى .. خدام احسين

……………………………………………………………


مو چلمة لسان و روح . الخادم مرتبه كُبره
نوح امنيته ينزل گون .  ويخسف بالعزا صدره
وابراهيم ينعه يريد . عل طم الرمل نحره
موسى و رغبته رادود . بنص بيت القدس يقره

و عيسى ايخاطب . مريم امه . ريت ترجعين
عمرج يخلص . مو بالمقدس . بتعزية حسين

يعقوبٌ ذا يصرخُ ويلاه
لحسينٍ و أبيضّت عيناه
يدعو احفظُهم يا الله .. خدام احسين

……………………………………………………………


الشعائر حافظه المذهب . الخادم يعتبر جندي
اليطلم چنه لازم قوس . اسهام وللعدو يودي
باجر عازه مال ارجال . و حرب المنتظر تبدي
اكيد امن الذي يلطمون . يشكّل عسكره المهدي

موش اتصفّط . واقع هذا . وذيچ الايام
الحارب داعش . وانطوا دمهم . همه الخدام

من عباسٍ عزمُ الخادم
بطلٌ كالاكبرِ و القاسم
يحيا سورُ الدينِ الدائم .. خدام احسين

……………………………………………………………


الف عين لأجل فد عين .  تكرم مَثل گالاها
الله وچي يحب حسين . كل الخدم حبّاها
الجنه و ملك بسم حسين . ورث للخدم خلّاها
وچي انطوا ثواب الماي . انهار اللبن خلقاها

و الله يگلهم . اهلا اهلا . يهل الدمعات
تكريم الكم . مو بس جنه . كل الجنات

فهنا الخادمُ كالسلطانِ (ي)
في رَوحٍ دامَ و ريحانِ (ي)
طوبى يا قومَ العطشانِ (ي)  .. خدام احسين

……………………………………………………………



شكبرها قيمة الخدام . لسيد جاسم اتفكر
مات و إله ابصحن حسين . گبر امجهز امحضّر
وعبد الزهره و المقتل . من صوته الصخر ينطر
و حمزه و مو صغير اسمه . جبل ظل يكبر و يكبر

بس يخواني . مو بالساهل . وصلت هالناس
حسين وياهم . عايش نسمه . وسط الانفاس

كانت خدمتُهم بالفطره
لم يسعوا من أجلِ الشهره
من نارِ الطفِ بهِم جمره .. خدام أحسين

……………………………………………………………
✍️ ( سيد خضر الزاملي )

قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4