لمولاي ابا الفضل العباس "ع"

مطشرة الخوة
شفته بالگوه
بعينه مكسور السهم
هذا مو هوة
••••••••••
ذاك الچبير الرايته اشراع
متطشر وجوه الرمل ضاع
جيت اركض امن الخيمة للماي
فص عينه طايح شفته بالگاع

والسهم واگف وگفة بالعين
إلچان واگف بيها الاحسين
عباس طاح بوجهه عالگاع
غير اليطيح يريد چفين


جثته منثورة .. وچفة مبتورة
ومن كثر ذاك السحگ .. الراية مكسورة
••••••••••••••••
عباس من كترين الاصفاح
شابع طعن من روس الارماح
گلبه الحنين اسهام متروس
ورمحين شگن چبدة من طاح

كضيت ظهرة مثلم اهواي
واشفافة يسبن چنهن اشفاي
باگو اخوي امن ايدي ياناس
عباس مات ابذمة الماي

عينه طفوها .. الريشة كسروها
بعشرة خياله الزلم .. جثته سحگوها
•••••••••••••••••
مو ظهري حته اخيالي مكسور
وزعت دمعي لردته انذور
عباس ظهري وظهري ذبحوه
وظليت وحدي لضيم عاشور


اليا خوية طلعت بيها نيران
عطشان بس ما گلي عطشان
اسهامة الچثيرة مضيعه الاوداع
وسفة السهام تفرگ الاخوان

يصرخ اعذرني .. صعبه تشبگني
لا تموت امن البچي .. من تودعني
•••••••••••••••
بچفوفي اوخر حدره الاتراب
مفتوح راسه ايلچمة الاصواب
حطيت راسه بحظني بس طاح
ذاك الصلب من النزف ذاب

وعيونه ذيچ الحلوه ياناس
بالدم طفن وشلون تنباس
الله يعثرك كون يا ماي
ماخذ چبير الخيمة عباس

كاتب احچاية .. خوية عالراية
مگطع وصاير وذر .. ذاك الاهواية
•••••••••••••••
گلبي انشلع من بست الاجفوف
متروس ظهري وهسه مكشوف
هو اليضيع وجه عباس
لا ينهض ولا يگدر ايشوف

الطف انترس ياخوية شمات
الما عنده اخو تكتله الحرامات
حتى الهوه اتشمت بالاحسين
موت اخوي وهو ما مات

من وصل موته .. حظني تابوته
مضيعه مو بس بالشكل .. ضيعت صوته
•••••••••••••••••••••••
امحدب رجعت وسيفي عكاز
مثل اليرد امن امه جنّاز
يا مايله الدنيا اويه الاحسين
ما ظله واحد من الاعزاز

زينب تعاي وگابليني
مات ابن ابوچ اگبال عيني
طيحي الخيم عباسكم مات
وگلالي زينب لا تجيني

يحچي بس عنچ.. مستحي منچ
جرحه ما يگطع نزف .. لو سمع ونچ
•••••••••••••••••
علي هادي الخزعلي

#محرم_الحرام


رنة نواقيس الحذر .. من النجم طالع گمر
شايف نهر يمشي لنهر.. گمر گمر
========
بسم رب الخيّم بسمل .. فر مهرة ولوه الجامة
طلع يضوي بحيث اتشوف،، بيضة انگلبت الشامة
بعدة ايودع وما جاي ... وتوة امرتب اللامة
اخر واحد امن الجيش .. رعشن ايدة واجدامة

إمعدل او يمشي نسق .. يمشي ويرتل بالفلق
من الحسد مو من خطر .. گمر گمر
===========
اقصد بالنجم يا ناس .. كل خيمة امن المخيّم
وطلع منهن گمر بي ماي،،على ارياگ العطش غيّم
فارس حيدري وفرّاس .. ابشيلة امة يتحزّم
بترانيمه الحروبية .. گام ابزودة يترنّم

بالراية ايدة امبخرة .. كظاها كظة گنطرة
والراية خاچية ظهر .. گمر گمر
=============
ابثنيّات العطش والموت… طلعت سكنة بالجربة
زمزم ليش ماموجود ... وخيمة زينب الكعبة
النهر متروس كلة اثگال .. وروس بروس مترتبة
حنطة لو ترش عالروس .. ما طاحت ولا حبة

شافاهم وهز رگبته .. بس راد يسحب جربته
شردوا رعب سطر سطر .. گمر گمر
===============
سيد شارته اتشوّر .... وابو فاضل عبد صالح
الطايح من خزرته ايگول،طلعت امن الحرب رابح
چفتهم چفتت الكردوس ،،من يچفت عله الطايح
العرف والمو عرف صاحوا .. توجع ضربة المالح

والوگفوا ابجيّتْ البطل .. بيهم انحسبوا عالنخل
جردهم احساس البشر .. گمر گمر
=============
ارتجل والحومة صنتت صوت، وبس البيرغ ايكبّر
سد الطف ابو فاضل .... وابن امة البعد يعبر
اليريد ايعرف بُعد الگوم .. يظل سنتين بس يشبر
جهامة وبخت هيبه وحيد ... زلمة امعتبر اتعتبُر

اختاض السبع گص الرگب
سيفة الهوة وهمة الگصب
داعيله گلب امة العبر .. گمر گمر
============
گطع حتى الضوة اعليهم.... مو بس گاطع ارگبهم
من گد الرجيف الگوم .. ما ثبتت شواربهم
يفل گام ابگفة انگابة ... بزغ وجهه ويشع طبهم
شَطُب حرف الخطأ عباس .. حالف الة يشطبهم

وكّر عله القادة الصگر .. والحرب مجموعة شعر
وعباس چان اسبك شطَر .. گمر گمر
=============
علي هادي الخزعلي