السلام على ولي الله ووصي رسوله

السلام على يعسوب الدين

علي ياروح الله .. علي ياسر الله
—————-
انت تمشي ابلا حمايه مو لأن قلة حرص
ايحط حمايه اباب بيته بس الي يحس بالنقص
انت ماي بوكت حته الگصه تنباع ابرخص
انت ما عدك مقرب واليتيم اقرب شخص

ياعلي المثلك حماياته وراه
ولو مشه بشارع يدنگله الضوه

وانت وحدك تمشي ربك بالشهود
وما مشه بظهرك گبل حتى الهوه

ياهو مثلك يفطر ابيت الفقير
ايوكله بيده وظل يفلسله النوه

هالتواضع محلاه .. علي يا سر الله
—————
الدنيا وگفتلك زليخة وانت يوسفها الچبير
وبيتك البلكوفه هذا لكل ملك ذمه وضمير
ياهو شد ابطنه صخره وخشنه ايده ومو حرير
وهذا يا مسؤول يرضه ايمشي ابنه اويه الفقير

وهسه مسؤول الشعب لازم ثگيل
وولده ما يمشون وي باقي البشر

وكله حراس وخدم حسب الاصول
وشبعو بروس الشعب نوم وسفر

وانت ولدك تفتر اعله المسلمين
اعيونه متغيره الحسن من السهر

وانت تطلع وياه .. علي يا سر الله
———————-
انت ربيت التواضع نخله وتربي الرطب
وانت قتّال التكبر وانت قتال العرب
بكل حرب سيفك محنّك وشكثر دم انطلب
اليكتب الزهره اعله سيفه ما اظن يوم انغلب

انت من گد الضمير البيك چان
نومة اعيونك تحس بيها انتقاص

بالحرب ما كترت اهلك ، چبير
الكل تقاتل لا عوام ولا خواص

وانت ما لابس درع ضد السهام
وهسه سيارة حمد ضد الرصاص

ماكو مثلك بالجاه .. علي يا سر الله
———————-
معركة احّد خيانة والطمع چان الخلل
وهسه چم خالد نشوفه التف علينه امن الجبل
و بطمع لم الغنايم ينتصر خلو هبل
وچم زبير وطلحه ضدك هسه مو بس بالجمل

ياعلي المدولك چفوف السلام
تلگه حرحارات اديهم مجرمه

الناكثين اتلاگوا اويه المارقين
ورادو يطيحون عرشك بالدمه

وانت سليت الحسن مو ذو الفقار
وميثم التمار سوه المحكمه

هيجي صاحب حياه .. علي يا سر الله
——————
ثوبك الينشگ ترگعه طلگت دنيا العبيد
وذاكه لو لثگه اعله ثوبه امن الغرب يطلب جديد
نوّمت ولدك بغرفه قصر يلمع ما تريد
بهالوكت عاش السياسي ياعلي ومات الشهيد

عايش اعله برودة الگاع وعظيم
وغيرك اقصور وڤلل ومكدره

بهالزمان الما مسيس ما يعيش
روحك تحزبها لو ترجع وره

اعله السياسه نريد ياحيدر هرير
حتى تمشي الناس مثل المسطرة

والله عدلك عشناه .. علي يا سر الله
———————
علي هادي الخزعلي

اسألكم الدعاء خدام الحسين "ع"❤️🙏🏻

لخدمة سيد الشهداء ابا عبد الله الحسين "ع"

ياهلا بضعنك يغالي وهلا بكل القافله
طلَعَ الضعنُ عَلينا امن المدينه لكربله
خطواته الكلهن تنباس.. ضعنك بي بخت العباس
———————-
هلا تنگل هلا بگد المسافات
رمل خطواتكم يتسوه تربة

الگاع الكم گفض شنسوي بالگاع
اهل البيت انتم واحنه غربة

هلا بكل الاجه امن احسين لحسين
الخادم فتح بيته وفتح گلبة

اهلا ياخيرات الله .. يمشرفنه بعبدالله
احسين انفاسك تتصلى
اگلوب الوادم كلها بيوتك .. ياراعي الديرة

اتكتر يحسين اتكتر … احنه النتعبلك نگدر
نبني اخيامك مو بالبر
الما يبنيلك خيمة ابيته .. ماراضع غيرة

حط رحالك واحنه نطلع نبني لضعونك خيم
كل سواد ابيوت اهلنه انثوبه لقماش العلم
كل خدامك رفعة راس .. ضعنك بي بخت العباس
———————
هلا يابو علي و ارحب يعباس
هلا بقاسمكم وبنفاس الاكبر

مواكب كون نترس درب الاعراگ
وعله كله الضعن بالماي نفتر

هوادجكم خشب والخشبه الاتطيح
نلم هذا الخشب ونصنعه منبر

گاع الطف من گبل اسنين .. مكتوبه بأسمك يحسين
عوف الگاع اگعد بالعين
انصب خيماتك عالغيمة .. خاف يعطشونك

بنص الضوضاء انت الراي.. يم كل مشمس انت فياي
انت الما تحتاج الماي
الماي الذليته بشفتك .. مات اعله اعيونك

مايك ايغرگ الصحاري وجوه كل خيمه انفرش
وجي يمن بروحه عفته الماي طلگته بعطش
هو العافك عنده احساس ..ضعنك بي بخت العباس
————————
خدامك كفو وكلهم معازيب
واحدهم فتح بيته وشليله

نوج تنورنه ونذبحلك الماي
بزرنه نذبحه يمك هم قليله

يمولاي اسمحلنه انلاگي الانصار
امهات الخدم تتلگه العقيله

نوّخ نوگك وتهنه .. خل نشتم بيك الجنّة
الخادم يخدم يتمنه
هاي الخدمه ابخت الزهره .. وربك محروسه

يالما تتوفه اديونك.. هاي الوادم يردونك
خل نترس بير اعيونك
اشيطلع دم ذريته اللازم .. رملك ويبوسه

موتت الخادم بروده وعيشة الخادم جمر
و الدقيقه البيها خدمه تسوه ثلثين العمر
تسوه الدنيا وما تنقاس.. ضعنك بي بخت العباس
——————-
نزرع كربله بماي وبساتين
لو ندري العطش يمك يعاند

بوب ابيوتنه نسويها كاروك
ينام ابنك رغد وامچانه بارد

واخيام المواكب يم الاخيام
ننصبها وندگها بوتد واحد

غيرة وجاست خدامك ..إزرعنه اباب اخيامك
خل نتبرك بجدامك
ونوزع ماي اعله اضعونك.. من بطن الغيمه

تحرس خيماتك وادم … واحدهم رتبة خادم
ونجيب شموع القاسم
وللقاسم ما نشعل شمعه.. نشعله الخيمه

ونحرس اعيون الكفاله نبله خافن تعبره
ذوله خدامك نشامه وناس كلها معتبره
بنسمه اعيونك ماتنجاس .. ضعنك بي بخت العباس
————————
فطره وهيج نتجرأ يالحسين
نگلك خل نعزبك يا دخيلك

بس احنه بشر ما نخدم انموت
الهلا يحسين نحچيها بسبيلك

مو طب العرب محتاجه وايطيب
الهلا وكل الهلا اتطيب عليلك

يمعلمنه امن انعزب .. ما نتعب بس انتعب
من المغرب للمغرب
كون بلون المغرب جنها .. اعيونه السهرانه

انت التختار اليسوه .. كون يموت اعله الخوه
احنه الراحولك فدوه
احنه بكلشي تحسه يغثك .. عابس تلگانه

ياهلا بريحة محمد احنه يثرب بالفله
(طلع الضعن علينا امن المدينه لكربله)
نقرالك يم كل الناس .. ضعنك بي بخت العباس
————————-
علي هادي الخزعلي

لمولاي الاكبر عليه السلام

اليشبه جدي حيرني ..مثل الزهرة كاسرني
يعني اليوم من ايدي .. افگد جدي ووليدي
اليشبه جدّي حيرني
_____
هوه انه فاگد زلمة
وجهه اطعم امن النسمة .. چنه القنوت
كسر الظهر عالغالي
ظل يطلع اعله اخيالي .. مو راح اموت

هزيته بيدي وماحچة ومايفتح العين
يمه انحنيت وصيّحوا چا مات الاحسين

اول مرة هاي ابني .. لاگامالي لا حَبني
لگيته امطشر ونايم..عله ابني اتهوس الوادم
اليشبه جدي حيرني
____
غير ابني إسمة الأكبر
من السحگ صار اصغر .. ذاك الچبير

كلش ثگيلة اعليه
لميته بالخاچيه .. مامش حصير

حاولت ارد ذاك الشكل لميته ما صار
صار اسمر ابني امن الشمس ماچنه جمّار

يوادم كون ما رايح .. لگيته اشگد عَلَيْ صايح
يگلي عدل امتوني .. واصل دمّي لعيوني
اليشبه جدي حيرني
———————
عافيتي مو بس ابني
بس من صدگ تعّبني .. تارسني شيب

اسگيني ماي ايگلي
وگّف اديه ورجلي .. وگفة غريب

كلشي وگف يم جثته بس شيبي بي روح
كلشي انسد بجسمي احس بس دمعي مفتوح

طايح والادب مثلة .. من شافاني لم رجلة
لم بس وحدة بحرورة .. يمكن ذيچة مكسورة
اليشبه جدي حيرني
____
الربيته بيهن ذني
شالنٍّه ما شالنّي .. يم الخيام

بوساتي بي ممسوحة
من عدها طلعت روحة .. ومن السهام

الله والاحد صيّحت مات ابني يا ناس
چا ميّت بصفة لچن گومني عباس

هديتي المحبس البيدة.. لگيته امطيحة بالبيدة
قطع صار ابني وامهّشم .. حته المحبس امثلّم
اليشبه جدي حيرني
____
شوفولي حيل ايشيلة
داعيكم ابلا حيلة .. كل حيلي راح

الاكبر ثگيل بعلمة
بس ابني ثگّل جسمة .. ثگل الرماح

دگ ايده عالگاع وشهگ مو مرّة مرات
يبرد الميت بس علي شو يچوي من مات

كثر ما گطعّوا جثته .. الرمح ما ثابت وشلته
دريت بروحة مختنگة .. ما بادلني بالشبگة
اليشبه جدي حيرني
——————-
علي هادي الخزعلي

لمولاي الاكبر ع

موتك .. موتك .. كاسر طول الحسين
عمرك .. عمرك .. ماجازي الثلاثين
يالاكبر .. يالاكبر
======
يالبعدك شاب ... يا نسمة صبح
ما لايگ بيك ... لون الطف ذبح
يحلى الشبان .. غصنك عطشان
نحرك مو ماي ..فك ريجه برمح

يأكبر ولدي بس امكبّر اجروحي
فكدتك صاحبي وابني واخو لروحي

شوفة .. شوفة .. ظهري صاير اثنين
عمرك .. عمرك .. ما جازي الثلاثين
يالاكبر .. يالاكبر
===========
چم شهگة موت ... علي نفسي شهگ
فر گلبي وجيت ... يمك واحترَگ
من طحت اعليك ... رفسن رجليك
بيك انشديت .. شباچ وعلگ

متت بيدي وغمضت اعيونك بأيدي
متت والشيب شد عزمة بمواليدي

دمك .. دمك .. مجموعة قرآئين
عمرك .. عمرك ..ما جازي الثلاثين
يالاكبر .. يالاكبر
============
كشخة مذبوح ... بيك اشگد شفت
طيحة مصدوم .. عله جسمك طحت
صدرك ياليل .. مسحوگ بخيل
جيتك مكسور .. ابچي وفرعت

يأول ورگة طاحت من غصن بيتي
بعد يا نسمة اقنّعها وتطب ريتي

شمسي .. شمسي .. خنگتها الروازين
عمرك ..… عمرك .. ما جازي الثلاثين
يالاكبر .. يالاكبر
===========
ياغالي السوم .. وترابك ذهب
جازيك اللوم ... ما راضي بعتب
شفتك مسلوب .. جايبلك ثوب
ضامي ومتعوب .. واتنگط تعب

اجيتك يوسف اليعكوب يتعنه
بالطف صارت الركضة الابو لأبنه

يبني .. يبني .. بقسمة ربنه راضين
عمرك .. عمرك .. ما جازي الثلاثين
يالاكبر .. يالاكبر
===========
عمرك بالآه ... جمعته صعب
خمسة وعشرين ... سويته گلب
طالع محتام .. طلعات اسهام
فوكك طشيت .. اسم الله اعله الدرب

يالتطلبني شربة ماي اطلبك حيل
اشوية ولاحگك ما ابقة حد الليل

اشوية اشوية .. هم تلگانه ماشين
عمرك.. عمرك .. ما جازي الثلاثين
يالاكبر .. يالاكبر
============
لجسمك خليت.. حظني وما گعد
امگطع تگطيع .. واشبيدي بعد
اللهِ ايكون .. ابعون المحزون
التوه اعله الگاع .. عايفلة ولد

ال الله يرحمة تشلع ضلع بضلوعة
البگة بيا راس هاي الروس مگطوعة

ادري .. ادري .. اخوتي گبلي ميتين
عمرك .. عمرك .. ما جازي الثلاثين
==========
#علي هادي الخزعلي

مولاتي رملة تخاطب مولاي القاسم ع

آنه امك
ياكسرتي .. مو بوستي ..ذبحة برگبتك
يالظلن بنفسك .. فاتحتك وعرسك
____
يالقبلتي براسك .. ليش الرمح باسك
شمعك حرگ ياسك ..متت.. عفت .. حناني

بس يمي روحك خوش ترتاح
شو جابتك رجلك للرماح
گطعوا رگبتك والعرس راح
وانه انگطع من گلبي سبّاح


بالخيمة
شفت الذبح..راس برمح..واغمة اعله عيني
دم تارس احروفك .. مو حنة بچفوفك
____
وديتك امگدر .. رد طولك امطشر
ابصدرك حچي امكسر .. رعب .. گلب .. حبيبك

شبگة وداعك تشلع اضلوع
صار العرس تابوت الاشموع
انه ادري راسك ليش مگطوع
الدنيا تگطع كلشي مرفوع

وبصدرك
نام السحگ.. يالمختنگ .. من الحوافر
يالصبعك امحنّة .. بعنادي سحگنّة
___
المن يسحگونك .. اهلك يريدونك
دم كحّل اعيونك .. حچي .. وبچي… خنگني

يمقلّم ويعيونك اوساع
دمك ترس چف ايدي والگاع
الهلهوله بالطف صارت انواع
للزفة وحدة ووحدة بوداع

محلاتك
نحرك ترف .. ليش النزف .. نشّز حلاتك
اعيونك تضحكني .. بس هسه بجتني
____
طولك ولا يطلع .. بچفوفي يتبرگع
يالشفتك امگطّع .. نحر .. وذر .. شلمك

موتتك وحدة و موتتي اثنين
بس انه ميته اعليك مرتين
جاسم يلب افّادي والعين
بچيتني وبچيت الاحسين

بعيوني
مات الشمع .. بس الدمع .. دگ خيمة بية
يالخيمتي اعيونك .. جيب اليعوضونك
______
طيحت اليلولَن .. وشلت اليشوفن
وجروحك يطوفن .. جرح ..ذبح .. يغيّرك

تعبت ادية وتعبتني
يمك طحت ما گومتني
امطشر لگيتك موتتني
لم روحك افرشها اعله متني

ياتعبي
وتعب الصبة .. وسهر الربة .. اتبده اعله گلبك
گد مادعيت الله .. تعبت الاسم الله
————-
يالعرسك ابهيمة ..نشعلّك الخيمة
شمعك طفة بضيمة .. طفة ..وغفة ..اعله رمشي

ابني انحسد وبعينه مجيوس
والدنيا تحسد كلشي متروس
يالثوبك ابيض ليش مديوس
لون البياض اندار ع الروس

سلمتك
بيد الرمح .. يالما تصح .. بالجنّة اشوفك
راح امشي عالناگة .. يم الله نتلاگة
__
علي هادي الخزعلي

خادم متوفي يتكلم ..

رجّعني يارب وافتح العين
يگضي العزه وموتني بعدين
متعود الطم گبري مخنوگ
زلمة انه احب ابچي اعله الاحسين
______
عالمگبرة ابعيده المجالس
واليمي موته وماكو حرگة
تعرفني ربعي بطاري الاحسين
متعود اعله الثوب اشگة

بالنص احب كلش وگفتي
وهسه اللحد خانگ حرگتي

متعلم امن اجزع عالاخيام
ايشيلوني ربعي ودمعتي الثام
بس هسه شالوني اعله تابوت
و ماادري گبري ابصفمن ووين
~~~
اقرولي حته اتنفس اهناك
خنگة خرابة المغربية
فوگ الوجه ما ريد كافور
حطولي طين امن العزيّة

شفت التراب الفوگ گبري
والتل ذكرته ومال ظهري

حطوا اعله گبري احجار الاكبار
حسين اعله صدرة ارماح واحجار
ذمة برگبته اليشعل ابخور
ابدخانه اشم حرگة صوواين
~~~
بطعم الدمع يلگوني فرحان
لواسمع ابمجلسنة باچر

متره وربع شتكفي للچان
يركض اذا يسمع حوافر

امن الممكن اكسر گبري واطلع
من أسمع اليذبح تربّع

لحّد يرش فوگ الگبر ماي
خافن حرگتي تزعل اوياي
العطّش حبيبي الكاسر اگلوب
ايأثر عليه وذكرة مو زين
~~~~~
بس عاليهّفي الجمرة ترتاح
هفولي لاتبرد جمرتي

ايهفيلي چنة اليلطم الشور
وبلطمته ايحرّك حرگتي

اتطلعني من لحدي المصيبة
امن اسمع قصيدة(مو غريبة)

يومية اگوم افتر عالگبور
هلبت گبر بي عشرة عاشور
عدكم سبية وزلمة مذبوح
صحت اشكثر بس كلها ميتين
~~
چفنوني بثياب العزة السود
قانوني هذا و مو وصية

ذكرني بحبال السبيات
من الچفن چتف ادية

العاشر يمرني ويا ندامة
عندي الچفن بس عوزي قامة

وبروحي حسرة اتنشّف الماي
صعبه تچتّف رجل مشّاي
آنه الابيْت ابّيتي زوّار
لكن متت وامچاني شبرين
~~~~
علي هادي الخزعلي