وصل بينه الظعن لهنا .. لديره تحب بواچينه
وكض بينه العطش والخوف ... وي ما إلها طبينه
وعلى قيد انتظار الموت ..فرشنه احنه وگعدنه بجول
ضلمه وبس صفير الريح ..نسمعه وخافت اسكينه

ديره غربه .. وكلشي غربه
وناس غربه وخوف جاس اضعونه
مو بعيده ..نموت بيها
ومو بعيده اعلــــــيهم يذبحونه

من هسه والغربه بدت وحسين كض اصفاحه
من اول وصوله لكربله او روحه ما مرتاحـــه
يدري بنواياهم عطــش وبناســــهم ذبــــاحه

➖➖➖
ألولي اعله بنات حسين .. واگلهن خلي عدجن حيل
واتعـــب يلا انومهــن .. ويفززهن صهيل الخيل
واصيح اسم الله لتخافن .. ردّن نامن اسـم الله
نامن ماكو باجـــر نوم .. نامن حتى لو نص ليل

عمّـه نامن .. ولا تفـزّن
فراش زين الليله عــدنا وخيمه
اخيمنه باجر   .. يحرگوهن
وعالترابه تگــعــدن بنص هيمه

ماكو دلال بكــــــــربله التـّـــدلل ايطگونها
وباجر عبينه من الركض تسمل ويگلب لونها
وباجر ابوجن ينذبح والدنيا مدري شلونها

➖➖
عيني الليلة ما غمْضت ..غربتي الليله شغلتني
اشوف حسين مامرتاح .. مـــا رايد يوادعني
صاحالي ورحت يَـمّه  ..وكلي احجايه مو حلوه
گلي بهالمجان نموت .. هنا والخـيل تسحگني

گال صدري ..وگتله كافي
حسين كافي بداعة الله وداعتي
ورد حجالي.. عن خيامي
وشفته غص من كلمة اتشب خيمتي

ضل يبـجي من گال الخيم  باجر تشب فوگاجن
وشلون بيجن كلي رد لو زلمـــــه اجه وطكاجن
كتله الله ويانـــــه وبجه  وكــلّالي الله وياجـــــن


➖➖

ما ينطونه باجر ماي .. حتى نموت عطشانين
ويِموت بسبته العباس .. ويعطشن بنات حسين
وعبد باجر يفز عطشان .. وهز كاروكه مينــومه
ويغفه اعله السهم مجتول .. ويخر دمه من صوبين

يا غربتي .. ويا حسرتي
باجر اول تالي اضل عطشانه
وانا والله .. عمري كله
يوم  ما اذكر كلـت تعبانــه

تعبانه ما اذكر جنت بس هسه كثره جروحي
وياريت موتي انا كبل ما ينذبـــح  مذبوحي
او قبل لا تكضي هلي يا ريت تكضـي روحي


➖➖➖
تمت والحمدلله
✍️حيدر عبدالله السعيدي

اتمنى اسافر وابتعد
وبعيد اموتن عن هلي
ولا صاحب البيّـه يمر
ولا واحد يحن كلبه إلي

وبلا دفن .. وبلا جفن .. نايم ثلث تيام اضل
حتى افتهم .. معنى الألم .. وبكربله بيك شحصل

يالمنذبح نحرك
اذبحني ضامي ومحترك
ماريد اضل عايش
وانت بحوافر تنسحك
➖➖➖

بايع حياتي ومشتري
أيامك الكلهن ألم
من كلشي رايد ابتعد
واتقرب لباب الخيم

هاك الكلب .. وبكلبي صب .. حزنك الي وخل انهظم
خل انجرح .. خل انذبح .. وخل ينكسر بيه عظم

حتى اشعر بجرحك
جرح السوالف مو جرح
كون انذبح مثلك
حتى اشعر بضيم الذبح

➖➖
احرگ خضاري سيدي
يليبّس اشفافك عطش
واسبيني للخيمه انجوي
واجرحني من ليل اهدعش

ضوكني من .. كلشي حزن .. وخليني مرمى لكل وجع
وخل ختنك. وخل انسحك .. وبصدري يتكسّر ضلع

توجعني الك روحي
ولجرحك يحن الكلب
اترسني بجروحك
واليوجعنك بلغرب
➖➖➖

ما املك ازمام الدمع
من ينذكر طاري الخدر
وتاخذني صفنه لكربله
واذكرها زينب باليسر

اذكر سبي .. وذيج العبي ... المفتوگه من شد الضرب
وتخيّلك .. ما ضل إلك .. حيل وگلب من الغرب

اذكر حزن زينب
وتوجعني روحي وتنكسر
كون اتعب بكدها
وبكدها يجويني الجمر

➖➖➖
تمت والحمدلله
✍️حيدر عبدالله السعيدي

گد ما عنـك ضليت انشد
كلها الوادم عرفت بسْمي
وحتى الموتى البطف تعبت
بكد ما عاثر بيهم جدمي

يمـذبــوح ..يمـذبــوح
➖➖➖

اوّل حلال انت انوخذ..من عدّه حتى اثيابه
واول بشر ميت سحك ..وتفزعله بس سـلابه
وتدَّافع الوادم شفت ..فوگك والاخره بصوبك
الهضماني محّد گوّمك ..كلها تـِجــر ابــثـوبك

ضلّت كلها.. تجر بثوبك
ما بيهم حايوز الطبلَك
فوگك كلها .. تدوس وتعبر
محّد گال اسم الله وشالك
يمـذبــوح ..يمـذبــوح
➖➖➖

ولو أدري ثوبك ينسلب .. وينشگ واحير ابأمرك
چا ضامه اهدوم الحسن .. ومغطيه بيهن صدرك
ولا وصلة اخيام البقت  .. وافرشها جوّه امتونك
ولا بيه اوكف فَي الك .. وشويّـه ابرد اعيونك

حاولت اوكف.. فَي يم راسك
لاجن طولي محدّب خويه
انا ام عون و .. ما عاونتك
اعذر زينب يابـو رقيه

يمـذبــوح ..يمـذبــوح

➖➖➖
وماضلي حيل من الركض ..جسمك لَمَن دورته
يأشرون ذاك انت واجي .. وتطلع جذب موش انته
يضحكون وانا مدوهنه .. فحطو رجلي وگلبي
ومنين ما ادير الوجـــه ..  الكاهم بنص دربي

تدري بموتك .. يشلع كلبي
لخاطر زينب موتك اجله
وتدري بروحي وروحك وحده
شلون تموت وزينب عدله


يمـذبــوح ..يمـذبــوح
➖➖➖
وبسهامك انا اتحيرت .. اكثر من اللي امسلبك
خفت امن اجر منّك سهم .. اولنّـه شالع  گلبك
وجرت الرمح تملخ ضلع .. وبجرته ادري يألمك
وخوفي عليك من الهوا .. يهزله سهم ويلچمك

عطشان انت ..وريجك يابس
ويشربون الماي بگربك
وحتى الما عطـشان اتعمد
يشرب حتى يگطّع گلبك

يمـذبــوح ..يمـذبــوح

➖➖➖
كـتله الشمر بسك ذبح.. وكلنا ابداله اذبحنه
من عدنه اذبح أي شخص .. بس عوف الحسين النه
مو كافي عبدالله انذبح .. ويكلي لا مــو كافي
وغصت عيوني بذبحتك .. ومالت عليك اجتافي

باشط سيفه ..ونحرك ضامي
وذبحك حار وجمره انفاسك
برجلك ترفس .. وتصم ايدك
شفتك من يحز براسك

يمـذبــوح ..يمـذبــوح
➖➖➖
تمت والحمدلله
✍️حيدر عبدالله السعيدي

هذا يا سر ضملي كبرج
حتى اضل محروم منج
سوده يالزهره عليه
خاف اموت وماازورج

هَل محرم وانت هلّت عينك
الليله بس الله يمهدي يعينك
➖➖➖
بيا جرج ابدي واعوفن يا جرح
وانت من كلهن يمهدي تنذبح
من خيم زينب لحد ذاك الرمح

شلون ليله .. يابوصالح
تكضي دمعات وحزن
هذا حالك .. كل محرم
تبجي لم عون وتون

الليله دم عينك تصب لحسينك
الليله بس الله يمهدي يعينك
➖➖➖➖
انا بس سامع بزينب باليسر
وحيل كلبي الها يعصرني عصر
شلون وانت الشام بعيونك يمر

عالروايه .. انا اجزع
والوجع من كل شكل
وانت شايف .. بالحقيقه
زينب يجرها الحبل

والله حكك من يزيد اونينك
الليله بس الله يمهدي يعينك
➖➖➖
اكو حسبه ابالي رايد اسألك
من تمر عالماي شتحس بيه الك
وانت تدري الماي ذابح كل هلك

شكبره جرحك .. وشيطيبه
وشيداوي المنذبح
العمْـته راحت .. فوك هزله
يوكف بكلبه الجرح

والسّلبو عماتك امبجينك
الليله بس الله يمهدي يعينك
➖➖➖
وارد انشدك وارجو منك معذره
شلون شفت حسين كعطو منحره
اوّيـن ودّو يابو صالح خنصره

صدك نايم .. والحوافر
فوكه داسن وعبرن
وصدك سِلْبو .. منه ثوبه
وكل خيامه تفرهدن

شبر جان الموت بينه وبينك
الليله بس الله يمهدي يعينك
➖➖

ارد اعوفن كلشي وامشي لكربله
ويا بو صالح اصرخ بهل معضله
وريت اموت ودمعتي تضل هامله

ريت روحي .. تصير خيمه
ونار تكضيني حرك
حتى افهم .. جوي زينب
وحتى اتألم صدك

وحتى افهم نار المجوينك
الليله بس الله يمهدي يعينك

➖➖➖

تمت والحمدلله
✍️حيدر عبدالله السعيدي

يالشفتي كل اجروح أبو عبدالله
شگدر اگلــج غـــــير گــوّاج الله
صبرج عالحبايب
وحده من العجايب
كواج الله زينب
➖➖➖➖
بيّن اهلاله مُحرّم
وفزّت اجروحچ يزينب
ليله ما تشبها ليله
منها رمش المهدِي شيّب

لهسّه خضره اجروحچ وماظن تطيب
لهسّه بيچ من الطفــوف آثار شيـــب
الليله تلزم باب عينج ذكرى اخوج
وخنصره وذبحه والناس السلبوج

ما خلّه بيچ الطف شكِل ما خلّه
وحبل التعب ماظــن اللوم يفلّه
زينب هالمصايب -- وحده من العجايب
كواج الله زينب
➖➖➖➖
زينب المر اعله عينج
بحلم ما مر على الوادم
وياهو البگدج تدولب
ويا مرَه الشبعت شتايم

صبْر ايوب كلّـه و دمع يعكوب
من اسولف بيه يم امصابج يذوب
بميزان الجروح ادموعج اثكال
وانتي اول مره تجر بيدج احبال


كل شده وتْـهون انا سامع بيها
بس شدتج لليوم ضل طاريها
كل هاي النوايب-- وحده من العجايب
كواج الله زينب
➖➖➖
يعينچ الله اعله مصابچ
يالفگدتيلچ عشيره
موتى كل اهلچ يزينب
هسه هاي شلون حيره

سامع اليفكدله واحد لو اثنين
وانتي فاركتي عشيره بساعتين
وغيمت فوگج تعب يم عون دنياج
وضلت تصب بالمصايب حزن فوكاج

ذبّت حِملها الدنيا فوك اجتافج
من يوم ما عباس بالطّف عافج
اخوتج عالترايب .. وحده من العجايب
كواج الله زينب
➖➖➖➖

ماكو غير الموت زينب
حل الچ من هل المصيبه
مُوتِي خل تشفَـه جروحچ
واشْفِي من كلمة غريـبه


باچر يرد بيچ وكتــچ على الشام
واعله ريحة حـــزنچ الدنـــيا تِنام
وتنتچي امتون التعب زينب عليچ
و خوف باجر ايلزم عيونج واديچ

ما تهيد وتغفه هاي اجروحج
الا يزينب الا تطلع روحج
نومج بالخرايب .. وحده من العجايب
كواج الله زينب
➖➖➖
تمت والحمدلله
الشاعر حيدر عبدالله السعيدي

اتمنى اسافر وابتعد
وبعيد اموتن عن هلي
ولا صاحب البيّـه  يمر
ولا واحد يحن كلبه إلي

وبلا دفن .. وبلا جفن .. نايم ثلث تيام اضل
حتى افتهم .. معنى الألم .. وبكربله بيك شحصل

يالمنذبح نحرك
اذبحني ضامي ومحترك
ماريد اضل عايش
وانت بحوافر تنسحك
➖➖➖

بايع حياتي ومشتري
أيامك الكلهن ألم
من كلشي رايد ابتعد
واتقرب لباب الخيم

هاك الكلب .. وبكلبي صب .. حزنك الي وخل انهظم
خل انجرح .. خل انذبح ..  وخل ينكسر بيه عظم

حتى اشعر بجرحك
جرح السوالف مو جرح
كون انذبح مثلك
حتى اشعر بضيم الذبح

➖➖
احرگ خضاري سيدي
يليبّس اشفافك عطش
واسبيني للخيمه انجوي
واجرحني من ليل اهدعش

ضوكني من .. كلشي حزن .. وخليني مرمى لكل وجع
وخل ختنك. وخل انسحك .. وبصدري يتكسّر ضلع

توجعني الك روحي
ولجرحك يحن الكلب
اترسني بجروحك
واليوجعنك بلغرب
➖➖➖

ما املك ازمام الدمع
من ينذكر طاري الخدر
وتاخذني صفنه لكربله
واذكرها زينب باليسر

اذكر سبي .. وذيج العبي ... المفتوگه من شد الضرب
وتخيّلك .. ما ضل إلك .. حيل وگلب من الغرب

اذكر حزن زينب
وتوجعني روحي وتنكسر
كون اتعب بكدها
وبكدها يجويني الجمر

➖➖➖
تمت والحمدلله
✍️حيدر عبدالله السعيدي

خيعونه خيعون
الـزّارج أم عون
ابجي وره اليرحون إلج
وبحسرتي ضال
وطال البُعد طال
فرْجِيها إلي بداعة هَلِج

مخلصها اودي سلامي اويَ الْيروحون
جا يمته يم عون اجيلج ويْـه اليجون
كل ما يجي اغروب الج تشتاك العيون

مـــولاتي يم عون -- مــولاتي يم عون
------------
اشتاك الج دوم
واتمنى لو يوم
مولاتي ازورنج اجي

بلكي الله الايام
تاخذني عالشّام
واكضيها يم بابج بجي

هنيال هنيال إلج كلمن مشه يزور
بنفس امنياتي ارد كل ما سنه تدور
من هالبُعد حيل ترا انا كلبي مسكور


مـــولاتي يم عون -- مــولاتي يم عون
--------
بغربة انتي يم عون
وامنيتي لو كون
مدفونه هسه بكربله
مابين الحسين
والماله جفين
مرقد إلج حتى اوصله

خايف أموتن قبل لا اوصل الشام
وتدور الايام عكس وتهيج الآلام
وكل أُمنية تموت إلِي وتتبدّه الاحلام

مـــولاتي يم عون -- مــولاتي يم عون
--------
لا يمّج اخوان
لا وادم احنان
وانتي ادره بالشام وهَلَه
مكروه طاريْـه
مسبيه امس بيه
وبطاري سوگه معضله

من الشام والسوك لهسه كلبي مفجوع
وكل ما اشوفن خــرابه اتهل الدموع
وليهسه روحــي عَليــج تصيح وتلوع

مــولاتي يم عون ... مــولاتي يم عون
------
حيدر عبدالله السعيدي

قارِب ذنوبي .. عنّك محبوبي ..  ياخذني بَعيد
وأندم بدايـه .. بس بالنّـهايه .. أذنب من جديد
عُذراً مولاي .. عُذراً مولاي
➖➖➖

شما نويت اعله گربك تعت بيدي الذنوب
وقارب ذنوبي ياخذني عن بابك بَعـيد
هيه غلطه وهجرتك لجَن هسه صَحيت
ورايد امراضة گلبك واجي تسامحني اريد

هيّه غلطة عمري هاي
من مشيت ابمشتهاي
وما شرِت گلبك وشوري الضّيعاني
چنت يمك عندي شان
وجاه عندي وكلشي چان
ورخّصت روحي بعشگ دنيا امداني


بذنوبي ذنّـي .. خايف اتْهدني .. من ايدك واضيع
مولاي اريدك ..  ربيني بيدك .. واحسبني رضيع

➖➖➖
يمته آخر عَفو احجيها من گلب ولسان
ويمته يا دمعة منها و اتوبن يا حُسين
بكلبك اتلمني مولاي واطشر روحي دوم
مو حنين انا وانت عَلي دومك حِنين

هواي گتلك راح اتوب
وما نشَفت  من الذنوب
شما ردت تبنيني اهدّم بيدي روحي
عمر خلّـصته اعتذار
يمته احس بالأنكسار
شما الك انوي اعتدل يعْـوَج طموحي

مو حلوه مني .. لو گلبي خَذني .. وما ردني ليك
كافيني اهجرك .. خايف اخسرك.. واتحسر عليك

➖➖➖
بلغة ندمان اجي احچيلك بواهس رضاك
هذا ذنبي وعلى الله بقت روحي وعليك
منين ما باوع لروحي غلطان  انا اشوف
وهل اجيت ارد اعمّر حياتي آنا اعله اديك


من مَقالب روحي راح
بفَي حنانك  أستـراح
حالي من حال الحمَام اليَم ضريحك
وثوب هجراني الطويل
راح  انزعــه وما أعيـل
وگلبي اگرصه و راح اعلمه ما يجرحك

سامحني مَرّه .. وما راح اكسره .. گلبك يا حُسين
عينك عليه .. يابو رقيه .. وادريبك حِنين

➖➖➖
ولْدي واموالي مولاي سند بس ما يدوم
وانا أحوج إلك منهم بهذا الوجــود
بعالم الدّنيا والموت بدونك انا اضيع
كلشي فاني ورحمتك فلا إلها حِـدود

مالي واهلي والبيوت
مالهم دور من اموت
انت بس انت الـذِي ما تنطي ظهرك
ومن يدفنوني ابْـتراب
وعني تتخلّه الاحباب
هنا اخاف ومالي يابو سكينه غيرك

ماعندي ناصر ..يوگفلي باچر.. بلگبر من افوت
رايد وكفتك .. انا ورحمتك..  يحسين من اموت

➖➖➖
خادم القصيدة
حيدر عبدالله السعيدي

ذاك انت وهذاك الموت
مسافة ديره وچّم بير
يوم وليله وضعونك
توصل كربله وتحير

كل بير التعبره سولف اوياه
ونْشد مايه خل يحجيلك الماي
راح يگلك انت تموت عطشان
وانت بهاي جيتك للعطش جاي