وانت هم داوي گلبك من كسرته حتى تكدر تخط بعدين قصة حب تخلص مع العمر .♥️

اعرف ناس هواي تأذت بأسم الحب بطرق بشعة ، واعرف شكد صعبة انُ الانسان يرجع يلملم شتات گلبه بعد خيبة جبيرة ويحاول يرجع لحياته ومايخلي هالكسرة تفَقد هالگلب ايمانه ..

بس ماكو شي يحصل عبثاً وراح تحصل على الحكمة وراء هالكسرة من تتعايش وي حزنك وتبجيه وتشيل غشاوته من على عيونك وتحاول تخفف من ثقل وزنه بكل الطرق الممكنة ، ومن تبطل تشوفه على أنه معاناة صارت بس حتى تأذيك وتوكفك بمكانك لفترة من الزمن ..
كلشي مرتب وبمكانه الصحيح وراح يفهم هالگلب المكسور حكمته وراح يلكه دواه وحيجدد ايمانه ويرجع يحب ويعرف قدر الحُب الينطي واليستحق يستقبلة وحيخط قصته الخاصة الي راح يرويها لاحفادة من يكبر ويكون شاكر لكل الكسرات الي هيئته حتى يكون شخص افضل ويستحق خيار افضل . ♥️

" وَيَشْفِ صُدُورَ قَوْمٍ مُؤْمِنِين "

مَرة سمعت محاضرة للشعراوي جان يحجي بيها عن الابتلاء وكال شيء جان بما معنى " لا تشكو ربك للناس ، لا تكول فعل بي كذا وكذا وطالتني المصيبة الفلانية وتأخرت ارزاقي لان انت بهالحالة دتشكو من ربك الي هو مسبب هذا الابتلاء والتأخير لحكمة معينة .. فأذا ابتلى احدكم فليستتر " ♥️

بالغالب احنة صرنا نمشي ونتشكى من رب العالمين بدون منحس ، نجزع من التأخير وينهز ايمان الاغلبية كل ما طالت فترة الابتلاء ونتشرط شلون تكون شكل ارزاقنا وشلون نريد نعيشهن ، وكل هذا وهو ما يعاملنا بصفاتنا البشرية ، ما يعاقبنا على عجلتنا الي نوكف بعدها متفشلين كدامه وهو يراوينا الحكمة من التأني
ميطرد المذنب وميقاطع كلامك حتى وانت مزعله بعد ذنب جبير ، وما يعاملنا مثل منعامل بعض لكن احنة نعامله مثل منعامل بعضنا وقت منحس نفسنا غلطانين ، نتهرب ونتفشل ونستحي عن الاعتذار خوفاً من الرفض .. متناسين انُ هو مايرفض المدبر فكيف حاله مع المقبل ! ♥️

ياجماعة احجو ويا خلو المحادثة بينكم مفتوحة واطلبو منه الرد
(اني افتح القران واكله يارب احجي وياي ، كلي شلون اتصرف ؟ واكعد احجيله الموضوع القاهرني وافتح القران عشوائي واقرا السورة التطلعلي
ياجماعة اقسملكم انُ ماعرف اكمل قراءة من البجي لان الرد يجي مفصل على سؤالي بحيث اكوم واني خفيفة ، ومن الدهشة اضل اردد " من وجدك ماذا فقد ومن فقدك ماذا وجد يا حبيبي ! )♥️♥️♥️♥️

أحب قبعة اول تخرج ألي وضامتها لاطفالي ♥️

تدرون انُ سقر انذكرت بأربع مواضع بالقران والي هي باب من ابواب جهنم ( الله يجيرنا وأياكم من دخولها ) وهنا أهل سقر يحجون سبب دخولهم الها .

تعالو اسولفلكم شي

اخر شغل اشتغلته جنت متفقة وي اصحاب الشغل انُ على كد العطلة فقط اشتغل وبعدها اترك المكان لان يتعارض وي دراستي ، اتذكر وقتها كضيت احلى وأمتع ٤ اشهر
جان اذا يصير سوء فهم ما اتدخل لان اعرف حغادر المكان ، مجنت اشخصن تصرفات احد تجاهي وجنت اشارك بهداية اعياد ميلاد الموظيف الوياي بدون نية ان تنردلي اصلاً .. جنت كل الي اسوي اكمل شغلي واكون على الحياد وعلاقة طيبة وي الكل . ✨
والي صار انُ فعلاً هالاشهر جانت انتقالة حلوة بحياتي ، تعلمت هواي اشياء جديدة و تعرفت على اشخاص جدد وتطورت مهارة التواصل عندي وتعلمت عن منتجات هواي وشلون اكدر انصح الناس بيها وتعلمت التسويق وشلون اراعي اختلاف شخصيات الزبائن بحيث جانو يطلبوني بالاسم وحتى بعد ما تركت المكان ضلو يسئلون عني هم والموظفين . ♥️

هذا كله صار لان متشبثت بشي ، ما تعاملت وي المكان والاشخاص على انهم ابديين وهذا صراحة الي علمني متعة عيش اللحظة بوقتها
بس احنة بالعادة نسوي العكس بالحياة متناسين مغادرتنا منها مانتعامل وياها على انها مكان حنأدي بي دور معين ونغادر منه مهما طالت فترة مكوثنا بي ، فضلينا نمشي ونتعلق بالاشخاص والاماكن ونشخصن تصرفات بعض ونتنافس ونغدر ونشيل الحزن بگلوبنا ونفتر بي وناسين نعيش . ♥️

بس اذا نرجع للواقع تطبيق هالكلام شوي صعب ، شلون مانتعلق واحنة واحدنا اذا عَطل التلفون الي بأيده ينگلب يومه كله . ✨

اتذكر بحثت باليوتيوب عن مفهوم الزهد وشلون الواحد يبلغ هالمرتبة ، فلكيت شخص سائل احد المشايخ " شلون تريدني ازهد بنص عالم اقتصادي عايش على مفهوم انُ تملك ، فصارت قيمتنا بما نملك فشلون اني ما املك شي بنصهم ؟ "
جاوبه الشيخ احلى جواب اسمعه بحياتي " الزهد لا يعني انك لا تملك شيء ، الزهد الحقيقي ان لا يملكك شيء " ♥️♥️♥️♥️♥️♥️♥️♥️♥️♥️♥️

صارلي ايام امشي واردد " الزهد الحقيقي ان لا يملكك شيء يا هاجر "
احنة هنا جايين مو حتى ننملك ، احنة ملك لله اصلاً وهذا جداً كافي
فتعاملي وي الحياة مثل متعاملتي وي الـ ٤ اشهر الكضيتيها بالشغل والي ما جنتي بانية عليها توقعات اصلاً وماشية بيها يوم بيوم وطلعت احلى فترة مثمرة عشتيها بهالسنة كلها ♥️

فأنتوا هم لاتنسون انُ هالحياة بكبرها هي ايام الها نهاية فلا تخلون شي يملكم بيها
وميخالف اذا تناسيتوا هالمفهوم وكعدتو على اطراف الحياة تبجون من التعلق ومن ضغط الحياة وكثرة المسؤوليات ومن الخيبات ، نفضو كل هذا من على اكتافكم وتذكرون انُ هاي لا دارنا ولا ديارنا وراح نلاكي مصيرنا الي ننتظره بعد حين وهذا الي يطمن ♥️

كلما اسمع الاذان احسن كأنو داسمع هالنداء اول مرة ، بحيث امنيتي ادخل كل المساجد والاماكن الي يذكر بيها اسم الله واسمع الاذان هناك ♥️

‏في كل مرة يمسني الضر أتذكر أني تحت ظلّك، أنت الذي لا يعجزك شيء تولني برحمتك ولا تكلني لسواك.. فلا أضل ولا أشقى. ♥️