#الليله_الأولى. شور

لنستجدي الدموع لتليين قلوبنا المذنبه لمصائبكم سادتي
.
.
نصيحة طالب دموع..الك تذخرها عازه
اليذخر عمره بالنوح..يبينله احتيازه
خاطر ساعة الموت..علي يشيل الجنازه

كلشي مل منه اويه جرحك عيش ويه الدمعه روح
خاطر تحس بالعطاشه خاوي خشنات الجروح
و انت نايم و انت صاحي لا يحدك اي مكان
تخيل الغرفه خرابه اعله الخرايب بيها نوح

إخلق دنيا للنوح..إستوطن بيها دمعات
ربي جروح الضعون..إسگي جروحك آهات
عينك ماهي للنوم..راويها المعانات
.
.
.
هبائاً ليش الايام..تگول عليها ياحيف
استغل عمرك للجروح..استغل ابنومك الطيف
باچر تصفگ ايديك..عمرك ماهو بالكيف

انت مأمور بدموعك ماكو مهرب للونين
اليلمس بگلبه ضعنهم لا يضل يگول وين
هنه ما يدرن يعيشن لو يموتن بالطريق
انت لم جرحك و سافر  موت بعيون الحسين

لم دمعاتك امتاع..و احرز عينك شموع
تخلص من بچي الليل..و تفز مصباحك دموع
المابي لوعه لحسين..خارج قوس موضوع
.
.
.
سافر للتجاعيد..العلى درب السبايه
إعطش للنساوين..العطشن ع العبايه
حسّب تصعد ارماح..سفر ليل و منايه

سافر و گاود جروحك بس وجودك ما يفيد
من هواك لعالم الطف يصل منك خنصر ايد
حاول اتجمع قواك و للضعن توصل چفوف
لو شفت خلصت انفاسك صيح للتوقيت عيد

حاول مره و اثنين..بكلك توصل الهن
فرصه و خايف تزول..ما تلحگ ضعنهن
عاد اوصلهن خيام..ترد تجمع شملهن
.
.
.
قيس اوياي الايام..بين الراحه و النوم
فشله گبال الحسين..ما باچيلك بيوم
هنه انحرمن النوح..انت بشنهو محروم

وزع اوقات المصيبه و الجرح رايد هيام
يعني وكت المغربيه عيش عازتها الخيام
و الضهر إصهر بروحك جرها دمعات العيون
و الصبح إنعه لضعنهن ضعن ائمه بلا امام

وزع روحك جروح..سبيل دموعك تصير
حسينك وزّع اطفال..بشنو تعوضهم تحير
إعصر عينك و شوف..بيها من البچي بير
.
.
.
انصحك و انصح الروح..حُسين و افهم انته
مو شرط البچي صياح..الشمع مبچاه سكته
بس للظهره مكسور..و مات ب هَم عَبرته

صيح ضج إگلب الدنيا حسين واگع ع التراب
حسين مسلوبه ثيابه و الشمر لابس ثياب
جاي تتخيل المنظر زينب بنص الالوف
عيش جرحك جمره بالطف ما يطفيك السراب

على الماشافن اخيام..على الفگدن عشيره
كون نسد الابصار..و تحكمنه البصيره
صَعدة زينب ابنوگ..تسدها يا شعيره
.
.
حسين الحمّامي

..............لحن القصيده 👇🏻..............

#الليلة_الثانية_شور

لا مجال للتفكير مع المعشوق
.
.
العقول الداركه تدرك كلامي
الگلوب الهايمه تعذر هيامي
و اليحبك يصرخ ويايه إمامي..بس انت الصدگ

جرحك يخليني اجرحه فوگ ضيمه
جمرتك لاحتني احس بگلبي خيمه
ما تلمني الدنيا بس تلمني هيمه..و اتأدب عشگ

بس انت..التسوه كلمة تسوه..حسين
بس انت..الما احبك گوه..حسين
بس انت..الماعايز تگوه..حسين
بس انت

من بعدك..كل عمري..ضياع
لتهدني..ما اهوه..الوداع
احرزني..بعيونك..شعاع
إحرزني..
_
اليحبك كون يحرز روحه دمعه
بوحشة العاشر يكرس نفسه شمعه
بنكسار اختك يعاونها اعله رِكعه..بدرب السبي

بلايه ميضحي اليحبك مايحبك
المايضحيلك بروحه لا يكتبك
مو مهم اعجب الوادم بس اعجبك..حارز عِبي

بس انت..فقط انت بروحي..حسين
بس انت..ابو صرت لنوحي..حسين
بس انت..الفززاها جروحي..حسين
بس انت

لامسني..بحساسك..بديك
خليني..اتمحرگ..عليك
العندي..من خيرك..اليك
من خيرك..
_
ما اريدك راحه تعبني بطريقك
ضلمة الوادم اقارنها بِ بريقك؟
هذا مبخوت وعلي الصاير صديقك..ثابت عهد

شما تتعبني يجيلك گلبي ضامي
يا حبيبي و يا صديقي و يا إمامي
اشهدُ أنك تسمع كل كلامي..بأسمك مدد

بس انت..الما تحبلي الشينه..حسين
بس انت..التركض اعله الزينه..حسين
بس انت..التلملم بينه..حسين
بس انت

شادهني..مغرگني..بجمالك
ما واصل..اي واحد..كمالك
يا محلاته..امن ايهل..هلالك
يا محلاته
_
لا تهدني مروتك الهديته ضاع
لا سمه تلفيني بعدك لا الگاع
هيبة القبطان مبخوته بشراع..يشراع البشر

اني احب الي يحبك من بعيد
شما ازورك يبدي حُبك من جديد
و بس اليحبك يضل عمره سعيد..يالحبك نهر

بس انت..الاسجد آنه ابابه..حسين
بس انت..الابوس اعتابه..حسين
بس انت..المايطشر احبابه..حسين
بس انت

الما حبك..كل دينه..حرام
الماعاشگ..ضِل خيمة..إمام
ما يعرف..كل معنى..الغرام
مايعرف..
_
المايعيشك جرح ليعيشك دوه
الماهوه بعينك حبيبي ما هوه
المايحبك هوه و الميت سوه..بنفس اللحد

انه اريدك و اشتري مراضات گلبك
الخيل مو شرّايه ضلت بس تگلبك
ها احبك خاف احبنك و اتعبك..وتايب ارد

بس انت..الترضه باليرجعلك..حسين
بس انت..محد اليوصلّك..حسين
بس انت..بلايه شوف اندلك..حسين
بس انت

سهرني..بمسامر..محاچي
مااذكر..گدامك..تراچي
امليني..شوغات..و بواچي
امليني
.
.
.
.
.
حسين الحمّامي

..............لحن القصيدة👇🏻.............

#الليلة_الثانية
.
.
ابدي بسم الله الرحمن الرحيم..هلا ابزرة حيدره
هلا بمعزب الطاير و اليحوم..خير زادك مَكثره
شنهي حاتم و ابو حاتم يا كريم..املزم الوادم سره
تعزب و تسمع كفو بنص المضيف..الكفو من الله تره

صيته..اصفه من نيته..والكرم بيته
بالصداره اسم الحسن تعداده

بوكته..الطاف بيت الله..وما شفاه الله
بسفرته الياكل ينول امراده

الياكل زادك...عمره يطول
.
.
.
هلا يمعزب اليضيفك تحط لير..بزاد امك فاطمه
سفره ما تفرش تگصّر بالمضيف..تفرش غيوم السمه
لو خِفَت مجمر دلالك ما تحير..تخزره و يرد بي حِمه
انت ما مسبوج سابج بالمضيف..اول بكل غانمه

ضيفك..يشبع بشوفك..كِثرة ضيوفك
ما تهمك كونك تضيف السلف

حاتم..كون ضافالك..يصفن بجالك
جا تبره امن العزوبيه و حلف

الموگد وج..چي تخزر بي
.
.
.
يبو النار الدلت التايه عليك..انت للتايه وطن
تصب روحك لليضيفك ياكريم..ما تصبله بالصحن
بوكتك ايتام اليگلهم ياهو ابوك..يگلهم انه ابن الحسن
الغانمات ولا طرف الهن تدير..هنه يم بابك يجن

زوده..من علي زوده..مشيم عجوده
شيّم اهل البيت من اكرامه

مسنع..لا ولا يخنع..بالحرب انزع
علي براسه ليش يلبس لامه

تدلي النار..اعله الفانوس
.
.
.
هلا بزودك بالحرايب يا ثگيل..يالگطعت المعبره
مات جيل و عاش جيل و ما نساك..بالمعارك قسوره
امتوب النسوان ما تحبل اولاد..امنهد يوم الگنطره
انت مو طماع بس سيفك يريد..ما يصد غير الثره

سيفه..لو زعل بيده..يسوي اليريده
ماتضل روس اعله چتف القاده

يرجز..انه ابن احمد..بالحرب أحّد
آنه ابوهم وانه عم الساده

عم الساده..نتشيم بي
.
.
.
نفرض بعاشور چنت اويه الحسين..ثنينكم ع الحومه
انت يسره و هوه يمنه جا نكول..گضه الطف بيومه
زينب بهودجها ما تلمس الگاع..ولا ترد مهمومه
غاب چم ساعه ورجع شبّع السيف..وجاب بيده علومه

فارس..ما يصح مثله..يا دخيل اهله
للحرايب همه اهلها و ناسها

الشافه..بنص حرب شافه..ما لگه اچتافه
الحسن بسمه الزهره ترفع راسها

هد و الخيل..تهد ويا
.
.
.
.
.
حسين الحمّامي

.................لحن القصيده👇🏻...............

بليله و يوم..دارت دنيتي عليه
بليله و يوم..ذيچ الهيبه ماهيه
بليله و يوم..من زينب لمسبيه..بليله و يوم

من طحت طيحو اسمي وي خيمنه
الچانت تدللهن ايدي بيدي اچتفهن حرمنه
مابقه تذكار من ذيچ المهابه كلها راحت
چانو يهابوني لو رفرف على راسي علمنه

استوحدوني..وليه ولوني
ما عندي والي..وحدي لگوني

خويه الهضيمه..ماعندي خيمه
طاحت خيمنه..و لمتنه هيمه
.
.
.
شي عجيب..تنسه بروحك مدلل
شي عجيب..عفت الهيبه فوگ التل
شي عجيب..اذا حبل اليسر ينفل..شي عجيب

بكثر ما صاحو سبيه اسمي نسيته
النام ليله بالخرابه ينسه شي چان اسمه بيته
الغربه من يجزيني اخوي هواي تهضم
ولو هوه حسين بالطف هم جزيته

شيردلي خدري..ماريده عمري
رايي آنه بيدي..بس هسه مدري

امشي سبيه..مو هاشميه
من بت نبيهم..للخارجيه
.
.
.
مستغربات..چان خيالنه بسدنه
مستغربات..هسه الناس شافتنه
مستغربات..حگهم رايه ماعدنه..مستغربات

عشنه ايام بقلق خوف و مخاطر
ننام بس انحسب لـ لوعات باچر
الهوى گمنه نخاف منه يجوز شامت
يا وكت نهتم و چان الگمر حاضر

گضولي حيلي..ما نمته ليلي
من ابچي سكته..حسره الـ يويلي

حسره بچينه..حبال ب ادينه
المايسوه صاير..زلمه علينه
.
.
.
گمت التفت..جانت كل اخوتي عندي
گمت التفت..بس آنه و عباتي وحدي
گمت التفت..بهل لحظه غربتي تبدي..كمت التفت

چنت لو اخاف احتمي بسد العشيره
هسه بس اطفال عندي شلون حيره
وسفه تغفه عيونكم يهل الحموله
و العشاير اخذت النسوه اليسيره

چا وين اخوتي..تسمعونه صوتي
لو تلفي رايه..لو يلفي موتي

ياخويه افزع..من گبرك إطلع
صاحوني بسمي..ياخويه اسمع
.
.
.
.
.
حسين الحمّامي

السيده زينب صلوات الله عليها
شاكيةً عند قبر جدها رسول الله بعد رجوعها الى المدينه
.
.
اجيتك ناگعه بدمعي
عفت كلشي و اجيت انعه

يا جدي شريد احچي
المصيبه اكبر من الدمعه

المصيبه ودعت كلشي
خدري و اسمي مودعه

صار اسمي غريبه و لو
زينب صحت ما اسمعه

نسوني اسمي الچان فخر الهواشم
شو هسه اطب ديوان و ابن امي نايم
.
.
.
ابچي و زين بيه دموع
نشف گلبي على وليدك

تمنيتك عدل و تشوف
من طاح وبقه يريدك

انلوه سرجه و يريتك غاد
و تعدله و تمد ايدك

بقه وحده و ولا فزاع
عگب عينك ولو حيدك

ما صارت بفد يوم ابن امي و يضيع
بصفي و ادور عليه بين المصاريع
.
.
.
اسألك رايده اعرف هاي
و افور بالحچي دمك

شصار بگلبك اعله حسين
عطشان و حلف بسمك

بشفه مفطره اتلگاك
لو مروي من اجه يمك

مااضنه بحصير انشال
لميته بعباة امك

من ناده يا جداه فت چبدتي الماي
محد فزعله و صار لشفافه رواي
.
.
.
خذونه صياح يا جدي
من السوگ للديوان

ما بيهم شريف الگال
الرسول الله تره النسوان

التهضمني اليطگني يگول
اسمك لو قره الآذان

يا جدي الحچي ايفشل
و مشونه اعله كل لسان

بيا جرم اسحگ نار شمسويه روحي
چي بت علي يردون يتعاله نوحي
.
.
.
اجيتك شاچيه اعله الماي
خنگول البشر كراه

من شاف الحسين يلوع
ما هم و رواها اشفاه

عوف حسين عبدالله
ليش اتروه من ادماه

راد الماي بس سهمه
غفله بمنحره اتلگاه

مالت الدنيا وياي ميله شكبرها
للزلم للنسوان گومك حربها
.
.
.
.
.
حسين الحمّامي

لمحنه بطرف ادينه
حنان انصب علينه
بولادتنا اكتشفنا..رعاية فاطمة

اغيثينا و اغاثت
شمس بالعتمه صارت
اثارينا رضعنا..رعاية فاطمة

ما انسه امي من تدعي بالـ إيماء
عينچ على ابني يا يمه يا زهراء

هسه انكشف سر عندي بهضم
الزهره بعظمها چانت لي أُم
تلبيلي كلشي و ما انحرم..حنان

چانت تلمني بفيها بصبايه
محترگه بس تلفني بعبايه
من زغري اسمها بحلگي طهارة روح

ربتني وانه بصغري بديها
غذتني انوح و الطم عليها
امي و عليها ما ارخص الها جروح
.
.
.
فتحت عيون اديه
لگيت الزهره بيه
انزرع بيه عطفها..برعاية فاطمة

خذت دمعي البچيته
صبح لاسمي هويته
بچيت اول حرفها..برعاية فاطمة

دمعي الجريته للزهره خضّر آه
ما تطفه ناري و لسه اسمع الويلاه

شيطفي ناري الزهره تأن
و لسه بإذنها چلمة و إن
شلون اهنه و امي بدار الحزن..تنوح

ربتني دمعة عيني لضلعها
حگ كون أوفّي طيحة دمعها
و طيحة دمعها ما تنسد بدمعات

الطم و انوح و ما اوفي گطره
بعين الزچيه من چفه سطره
ثار الزچيه ما ينسد بـ ثارات
.
.
.
وعيت بـ فَي اسمها
هوى و بريتي اشمها
و جبت كل هذا عمري..برعاية فاطمة

احتوتني من ضياعي
صرت للغربه ساعي
و اون و دمعي يجري..برعاية فاطمة

ربتلي امي..شگد عدها حب و احساس!!
شگد بيها رقه يعجزله كل مقياس

دارت حنان بچفي و كبر
و بگلبي چفها زارع اثر
بگدها حنان و حب انتثر..عجيب

ما انسه فضل الزهره و اشكره
و شموفي الها كل حيلي گطره
هاي العظيمه التنطي بلا معيار

ترستلي عيني حب و عواطف
ميحدها باب و هاي السوالف
تنطي التحبه و بكيفه هو يختار
.
.
.
بداياتي بحزنها
نبع دمعاتي منها
كبر عودي بفضلها..برعاية فاطمة

النهايه اطلبها منها
ارد ثاري اويه ابنها
عشت عمري لجلها..برعاية فاطمة

من عمري لحضه و لهسه حلمي الثار
ع الشجره اشوفه و بـ إيدي مشعل نار

و يبرد غليل المحسن عسن
و تجر نفسها ام الحسن
بالي طويل يملل زمن..لهيب

ما ابرد و لا تاخذني رقه
جثمانه انبشه و بيدي اشنقه
لثار الزچيه ما ارحم الاسماء

شلون ارحم الما يرحمله بضعه
من چفنه اجره و بيدي اطلعه
و اصرخ ابشري يا يمه يا زهراء
.
.
.
.
.
حسين الحمّامي

عن عالم الخدمه انشرع البابين
كلشي بي اصل و الخدمه اصلها منين
من ام البنين اصل البچي و النوح
يَ ام حسين علمينه نحب حسين

غلط من گالت الناس..الحب بالزلم ينقاس
مره و خلفت عباس..رحم طاهر

منو العنده وفه و دين..زلم طيحتي لحسين
و ما رفلچ طرف عين..بصبح عاشر

علمينه..شلون نخدم بالگلب مو باللسان
علمينه..ها يباب الله و رحمته و الحنان
علمينه..الماكان شيء بنظرتچ شو صار كان
علمينه
.
.
.
ما عدنه گلب لحسين يوسعله
هيه المشكله ب ارواحنه العله
العايش بالظلام يخاف يلمح نور
بس نورچ لمحته و حلمي اوصله

نور ابكل الاكتار..بزغ ب اربعة اقمار
بزغرهم لاكن اكبار..على حبه

التجيبينه تصحيحن..نذر لتراب الحسين
رضعتيهم وفه و دين..مره امعزبه

اعديني..غيره ما تبرد على ارماد الخيام
اعديني..شلون اصيرن خادم بگد المقام
اعديني..بوجه ابيض رايد اتلگه الامام
اعديني
.
.
.
يا ام الخدم و ام الوفه و عباس
اتفضلي علينه چملينه وفه ونوماس
مو ناس التحب غير الحسين حسين
خلينه نحب خنصير مثل الناس

امطري علينه نوماس..حب رضعينه و احساس
مثل تربات عباس..ربه نريده

اذا عباس ذب ايد..كون نذب مواعيد
العبد لولاكم اوحيد..منو يفيده

ممنونچ..ابقه طول الدهر اسجدلچ شكر
ممنونچ..كون يم حسين ندنه شبر
ممنونچ..كون يخلص بچي و شوغات العمر
ممنونچ
.
.
.
يتبدل الخادم لو وصل يمچ
يالبدلتي لجل حسين حتى اسمچ
ابدل گلبي رايد گلبي تعبني
بس لحسين رايد گلب من عندچ

گلب ما يعرف ايخون..امن الگلوب ال بالضعون
سمار الخدمه من جون..برجاء طالب

انتظارچ كون انوله..مره و عندچ رجوله
انتظرتي اهل الحموله..بدمع ساچب

دليني..اعمى گلبي و بيدچ تگودي اريد
دليني..گصيره ايدي و غاية احلامي بعيد
دليني..منچ اتعلم امتانات الطريد
.
.
.
كل تسهيل امر صار الچ مفتاحه
و الچ افضال كلمن ضاج بنياحه
من طشيتي ولدچ حدر رجل حسين
علمتينه حب حسين مو راحه

الحب للناس تعلوم..و حب حسين مختوم
بجبين اصيار ابن يوم..سره بدمه

اليريد الله يحبه..و ما يجزيله طلبه
ينوي نذر گلبه..لابو اليمه

هنيالي..من اصل هالناس مختاريني
هنيالي..اليمته ذنبي يحول بينه و بيني
هنيالي..يمته افرغ داخلي لحسيني
.
.
.
.
.
حسين الحمّامي

بدمعة مواسي لحظرتك
يابو الرضا بمصيبتك..انعه مواسي للرضا

راجي القرب من دمعتي
و انت ادره مني بحالتي..تعرف الحاظر و المضا

اجيت بدمعي وداي..انوح ويه الينوحون
بدمعتي ما الي راي..برحمتك دمع العيون
بگلبي حچايه مولاي..خلصني إمن الشلون
السجن هم ماكو بي ماي..و متت ضامي ويه الضعون؟

يابو الرضا احزانك فرض..صوت الارض..نحيب
الـ بالمهد ينعه مصيبتك..و لغربتك..يشيب
.
.
.
يا دمعه تكفي و يا الم
حزنك مثل طيحة علم..من چلچل الظلام

گيدك اثر خله ب اديك
و بسجن ما فزعو عليك..چن حرگة الخيام

بدمع باقي من الطفوف..اهل و انحب و اجيلك
تصد لگيدك تشوف..بي ذكرى لعليلك
مگيد ينعه مچتوف..ما يبرد غليلك
الدمعه بعينك تطوف..دمع سايل سبيلك

ما ينگطع كت الدمع..للمنفجع..حرام
بالسجن بس مو بالفله..و لا كربله..و خيام
.
.
.
ما ينعقل هذا الامر
نعشك يضل اعله الجسر..بلا نايحه تنوح

محد نشد عن غربتك
المفروض تحضر شيعتك..هذا اكبر الجروح

ردت ما يعبر اي شي..لجدك بي مواسات
گلت خل يبقه نعشي..لان جدي بغرب مات
و سجنك قارنت بي..الفواطم بالخرابات
كلشي حسين كلشي..تنسه حسين هيهات

عشت لاجل هذا الحلم..و نلت الاسم..غريب
شاركت جدك بالغرب..صوت الگلب..نحيب
.
.
.
شگال الرضا بصوت الدمع
جرح الدمع ما ينسمع..جرح النزف يهون

مو حاله حالتكم هلي
من اول علي لآخر علي..سم و ذبح سجون

هلي ما بيكم الراح..و اهل گبال عينه
محد ع الجسر صاح..الكاظم خل نعينه
و بالطف مامش نياح..وينه الناح وينه
حتى الضعن من لاح..منو الواسه الضعينه

آه يالرضا شتنعه شتصب..كلهم غرب..ضياع
شي بالسَم و شي بالذبح..بگلبك جرح..وداع
.
.
.
.
.
حسين الحمّامي

الله راد يبين اعجازه و قدرته..خلق حيدر كمثال
اربعين الشبه ما وصلو لاصبعه..صاغه چف رب الجلال
اينجي من بر من بحر بس صيح بسمه..كسر قانون المحال
يجاوب السائل قبل لا تطخ شفته..وقبل لا يحچي السؤال

ابو الدنيا..قبل آدم بألف آدم هوه ابو
ابو الدنيا..المايحبه ينشد الجابه منو
ابو الدنيا..هوه طعم الاهلاً بحلگ البدو

قدرت الله علي..سيفه البي يزامط علي
لا مثيل لعلي..حيدر هوه وحده علي
الله خصه علي..منه نسل طه علي
.
.
.
ايسير العالم بطارف عين وحده..تخيل عيونه الثنين
دعه لالله و الله ما ردله دعائه..نزّل بچفه الحسين
منولد من قبل هذا الكون كله..ما تحد عمره السنين
معتنق حبه و سجودي على اعتابه..حبه احلى و انقه دين

عشگ حيدر..دين ابناء الحلال من الزغر
عشگ حيدر..بدورة عيونه عكس وجه البدر
عشگ حيدر..يگضي سكته ابلا نظر عينه العمر

عشگ الله علي..حگي من اعشگه علي
الله باعث علي..دين و حبه نعمه علي
همومي بي تنجلي..اذا ناده گلبي علي
.
.
.
الدين چف و حيدره واضح وجوده..خاتم امحلي الچفوف
اوضح امن الشمس تنصيب الله حيدر..عمه بعينه المايشوف
النبي لمن شال چفه هواي زعلو..كسر بيها شگد انوف
علي ناعم وكت المسامح و لكن..خشن من تحچي السيوف

علي باقي..بكل نفس شيعي تشوف انفاسه
علي باقي..مات بس رد بشكل عباسه
علي باقي..حيدر بحيدر يصح مقياسه

علي باقي علي..مضوي گلبي اسمه علي
من اصيحن علي..تخشع روحي كلمة علي
الله صوته علي..تخيل محله صوته علي
.
.
.
برحلة المعراج الله حچه بصوته..ما لگه لصوته مثيل
يعني هم بصوته الله حچه لمن..كلمه موسى بدليل
لو نبدل علي يحتاجلنه حيدر..لان بس هوه بديل
مو غلو افضاله هاي و من اسولف..ما اصل حد القليل

فضل حيدر..ع الانس و الجان و البر والبحر
فضل حيدر..انعم الله عليه جابلنه الگمر
فضل حيدر..بفضله ساعة مولدي بذكره طهر

امي نادت علي..جابت واحد يحب علي
بشده صاحت علي..بذكره سهله صارت علي
يله صيحو علي..اطهر اسم اسمه علي
.
.
.
عاش و چفوفه لغيره و مات ينطي..بمرقده يلوذ الفقير
و المناير جوه رجله و افطنلها..ميت و زهده چبير
الامير يموت بس يعيش ذكره..اذاً بس هوه امير
امرگع هدومه ولكن لبس عقله..من علم الله حرير

هوه اميري..و العن العادوه و نكروا بيعته
هوه اميري..مات بس ضل بگلب كل شيعته
هوه اميري..من تضيگ نلوذ لسه بحظرته

هوه اميري علي..يبغض گلبي غيره علي
ما اشارك علي..اموقف گلبي بس لعلي
ديني دينه علي..اشهد أن اميري علي
.
.
.
.
.
حسين الحمّامي

لكربله..يا عين تبخل بالبچي..الصار ميوصفه حچي
زلمه اعله اخته ينتچي..بكربله

كربله..دار اليحب النايحه..اعظم و اكبر فاتحه
يبچون و الكل فارحه..بكربله

بلايه احساس..تعز دمعه لحسين الناس..و ما عز عليها العباس..ما جازوا اعظم احسان
كون الدين..ترد عين لليوهب عين..و شتوفي بس گلي حسين..و بالصحره ركظ نسوان

شنهي البچي شنهي اللطم
ما نوفي شوغات الهظم
حرمه امن اخيها تنحرم..شتسوالي

شيسدها كسرة كافلي
و شيردها امري ادللي
بهزله ابدل محملي..من تالي
.
.
.
لكربله..غمها العيون المابچت..غمها الجدام المامشت
اخت الحسين امن اوچبت..كربله
بكربله..نزلت بعز كافل شهم..ماچانت بكلشي تهم
طلعت سبيه تنشتم..بكربله

حسين انطاك..شتريد گلك وياك..زلمه بدمعتك سواك..و بالدمعه تبخل چا ليش
بحافر خيل..كونك تدگ صدرك حيل..و دمعاتك اتنگع الليل..متفيد كلمة بعديش

حزم عيونك للدمع
إفزع اجه وكت الفزع
شوغتك خلي تنسمع..لحسينك

من ينفتح طاري السبي
انثر دموعك ع العبي
صرخة بأمي و ابي..ترد دينك
.
.
.
بكربله..طاحتلك خيام و علم..و عبدالله فك ريجه بسهم
و حسين بدالك خيم..بكربله
لكربله..لازم تطيح و تنفجع..و من اللطم تكسر ضلع
خل صرخة الآه تنسمع..كربله

بذاك الليل..هدت على الخيمه الخيل..و النار بايتامه تعيل..و ما صح عليهم فزاع
ضج و نوح..انزعها بالآه الروح..حسين اعله مودك مطروح..عريان نايم ع الگاع

ما توفي حلفان العطش
و لا هظمته ليل اهدعش
من ضل بلا غسل و نعش..بالهيمه

شتوافي طبره لو الف
من ضل ينازع بالنزف
و ضل شاربه بهضمه يرف..ع الخيمه
.
.
.
بكربله..ابدي حياتك منكسر..و اختمها لوعه اعله الخدر
تعايشها من رد المهر..بكربله
بكربله..مهيوب اذكره من طلع..و ملوي السرج لمن رجع
معناها ابو الاكبر وگع..بكربله

شضل بالحيل..و حسين انصه من الخيل..ماتگضي إله بيا ويل..هالليله ما تگضي بخير
لمن طاح..و شيعو راسه اعله رماح..گلت الخدر هسا راح..و الضعن للغربه يسير

ايست من شفت الذبح
و ما نمت چن راسي برمح
من الصبح حد الصبح..سهرانه

الي يريد توصل عبرته
و تنقبل حرگة شوغته
يتبره خل من دمعته..ويانه
.
.
.
.
.
حسين الحمّامي

يااااعلي
اخوالوفه
🎤 ملا ذوالفقار الكعبي
✍🏻 حسين الحمامي
الذاكر ؛ محمدالعكيلي
مضيف قمر بني هاشم سلام الله عليه
اللهم عجل لوليك الفرج👐

بطيت هواي وكتك جزه وكته
تجيني كون من حسين عفته
يموتي اني ميته بلايه ماموت
من راسه بدين الشمر شفته

تجيني بوكت صاح حسين عطشان
بوكت ركضة زلم ركضن النسوان
بوكت سرجوا الخيل الاعوجيه
و ابني امي سووا جسمه ميدان

يا موت
شفت المينشاف..حسيني بلا راس..و بعازة چتاف
يا موت
احچي اويه الازلام..موسده الخرابه..و بليلي مانام
__________________________________
كون الموت صاير عنده غيره
من صارت التهضم و الچبيره
يجيني بوكت ملتمين نسوان
و تجي كل مَره تاخذها عشيره

انام اعله الهزيله گعده ياناس
اصيح من الالم و الصوت ينجاس
بس ثنين لو لافين ارتاح
لو لافيني موتي لو العباس

يا موت
عگبيش ياموت..من طلع اسمي..من سمعوا الصوت
يا موت
شتسوالي طولي..ينشاف بالسوگ..و ناس انضرولي
___________________________________
يموتي منين تاخذ گلي روحي
مثل حسين مثخونه بجروحي
زراگ السوط عابر فوگ راسي
غير المايريد يگوله نوحي

من المفروض ما تلفيني بالبيت
تلفيني بوكت ديوان طبيت
بوكت وگفت العفه بنص سكاره
شتفهم هالسكاره كون ونيت

يا موت
تبهذلت زينب..مو هذا گدري..من الهوى اتعب
يا موت
تعبان صوتي..تعبان جسمي..استعجل يموتي
______________________________
الموت اهون ولا طبتنه للشام
ال للشام ارحلت محكومه بعدام
الخرابه بصف قصر متروس انذال
گلي الي تنام شتحلم احلام

المطگوگه بحجر تحلم بالحجار
المچويه تشب بحلامها النار
التفگد رضيع تشوف كاروك
العطشانه لهسا تحلم ابيار

يا موت
زين اني شحلم..١٨ فارس..ماباقي بس دم
يا موت
ضيّعت عباس..بالله اشيكفي..لطمي على الراس
________________________________
عگب الي حچيته رد يموتي
انه ميته امنهد فارگت اخوتي
متت من الضعن طب بيه للسوگ
و من سمعوا اهالي الشام صوتي

التركب هزله ما محتاجه عزريل
الشالت ضعن تگدر روحها تشيل
شلت كل المعانات اعله الاچتاف
حمل ماشالته ضهور الحماميل

يا موت
شلت المعانات..حمل اليتيمات..حمل السبيات
يا موت
راح اني ارتاح..بس وسفه انشال..جنازه بلا صياح
.
.
.
.
.
حسين الحمّامي

شمصبرچ اعله الشام و الشام
مابي التغفه عيونه و تنام
لسا ب اذني اطبول دمام
و ما يصح بيها الشام هادود

حسين الحمامي

بدمعة مواسي لحظرتك
يابو الرضا بمصيبتك..انعه مواسي للرضا

راجي القرب من دمعتي
و انت ادره مني بحالتي..تعرف الحاظر و المضا

اجيت بدمعي وداي..انوح ويه الينوحون
بدمعتي ما الي راي..برحمتك دمع العيون
بگلبي حچايه مولاي..خلصني إمن الشلون
السجن هم ماكو بي ماي..و متت ضامي ويه الضعون؟

يابو الرضا احزانك فرض..صوت الارض..نحيب
الـ بالمهد ينعه مصيبتك..و لغربتك..يشيب
.
.
.
يا دمعه تكفي و يا الم
حزنك مثل طيحة علم..من چلچل الظلام

گيدك اثر خله ب اديك
و بسجن ما فزعو عليك..چن حرگة الخيام

بدمع باقي من الطفوف..اهل و انحب و اجيلك
تصد لگيدك تشوف..بي ذكرى لعليلك
مگيد ينعه مچتوف..ما يبرد غليلك
الدمعه بعينك تطوف..دمع سايل سبيلك

ما ينگطع كت الدمع..للمنفجع..حرام
بالسجن بس مو بالفله..و لا كربله..و خيام
.
.
.
ما ينعقل هذا الامر
نعشك يضل اعله الجسر..بلا نايحه تنوح

محد نشد عن غربتك
المفروض تحضر شيعتك..هذا اكبر الجروح

ردت ما يعبر اي شي..لجدك بي مواسات
گلت خل يبقه نعشي..لان جدي بغرب مات
و سجنك قارنت بي..الفواطم بالخرابات
كلشي حسين كلشي..تنسه حسين هيهات

عشت لاجل هذا الحلم..و نلت الاسم..غريب
شاركت جدك بالغرب..صوت الگلب..نحيب
.
.
.
شگال الرضا بصوت الدمع
جرح الدمع ما ينسمع..جرح النزف يهون

مو حاله حالتكم هلي
من اول علي لآخر علي..سم و ذبح سجون

هلي ما بيكم الراح..و اهله گبال عينه
محد ع الجسر صاح..الكاظم خل نعينه
و بالطف مامش نياح..وينه الناح وينه
حتى الضعن من لاح..منو الواسه الضعينه

آه يالرضا شتنعه شتصب..كلهم غرب..ضياع
شي بالسَم و شي بالذبح..بگلبك جرح..وداع
.
.
.
.
.
حسين الحمّامي