ليلة ام البنين ع
ميمر
.
.
.

 
 
 
ام الوفه .. والعاطفه .. يسمـوها بحـر المعرفه
يانـــاس وام الــعباس حيـــره شنسـولف بيها

***

حيره شنجيب من السـوالف شنحط
ام عباس هاي الحچي موش اتسفط
كــون الــثگــال نلگـــط الهـــا تلــكط
بيرغ يرف ..ام الكلف.. ذل صارمه سبعين الف
والعـــدها مثـــل الـــعبـاس ياميــمر ايـوفـــيها

***

ياميــمر اليوصل فضــلها ويندل
ام الوفه البــيها الــوفه مــاوشل
غـزلت زلم ماغــزل مـنها المـغزل
لاخلصو .. لاخلبصو .. ودمهم لخوهم رخصو
طــف كربله مــن الروس تـرسو تـرس واديها

***

طف كربله يسولف عليـها هوايه
امربيه زلم بس شنهو من تربايه
واحـدهم اگبـــاله البـــحر كشايه
لاينطلس .. لاينــدرس .. بالعسكر يخمس خمس
ميمـــنة جيــش اهـل الشـــام عالميــسره يبديها

***

ربت زلم والزلم مــو يـاهو الچــان
خزرات واحدهــم اتطـيح الفرسان
التاخذ علي بلاشك تخلف شجعان
بــأم الكمر .. تحله الصور .. ام الذي يسبي النهر
تســـتاهل ام العبــاس يهـــل الـــرحم نـطـــريها

***

وتستاهل وتستاهل وتستاهل
ام الـذي بكـــربله رد الــــعايل
ام ابــوفاضل والنـعم بالـكافل
راعي العلم ..قاسم قسم ..يفدي الخيم واهل الخيم
موصيـته هيــچ ام عبـــاس وگالتلــه يبــني احميها

***

كربله كلــها بكيفـــكـم وانتـــو الكيف
كــعو العساكر بالحـــرب كــع بلـسـيف
عيشو الزلم جيثيوم يخنگ مـو طيف
كون الـوره .. تلزم سره .. بلا مغتسل للمقبره
الگــدام حصت العــباس صمصامه الــيمشيها

***

مرة الابو للوالد مـــن تنـطــي الزاد
عجبه شكبرها وتعتبــر بنـت اجواد
ماشايف ام لابن الرجل تفـدي أولاد
ومتروعه .. ومصدعه .. لحـسين مو للاربعه
ماشايف ولا ماشـوف أي مــرة أبو اتـجاريها
***
حيدر تركي الكربلائي
 

أنا أتشارك 'ميمر ام البنين' معك

گعده .. ليلة ام البنين
.
.
.

باچر ابيوم القيامه تعلمون
يــوم لايــنـفعُ مــالً وبنون
نـعـم إلا من آتــى بحــب الحسيــن
علمــتــنه هــالـــدرس ام البــنيـــن
واليخدمه فاطمه اتسويه ملك
***

عالم الخدمه الجليله التتسم بيها القصيده
مبتدأها مرءه طيـبه فاهمه وحره ورشيده
علمتنه ننـطي كلشي لجل الحسـين بعقيده
الخادم وجــوباً بل يجــب .. لحسين لمــن ينتـسب
ايعوف انتمائه الكل حزب .. حزب الحسين اليفيده

الخدمه اولها انتمائك للشهيد
واول الخـدم ابو فـاضل اكيد
فايز ابهـــذا الحچي العــنده يـقيـن
علمـــتــنه هـالــــدرس ام الـــبنــين
واليخدمه فاطمه تسويه ملك

***

الخدمه هــنياله يوادم كـــل شــخص بيها تبـَحر
معرفـه ايــريدلها تــشبه معــرفة سيــدنــا قمــبر
الراد يكــبر كــون يــزغر من يمر طاري ابو الاكبر
المــاقــــلد ام الاربــعـــه .. وبالـــخدمه دور منــفعه
ايضل عايش ابهالقوقعه .. وحجمه يم الزهره يزغر

والتواضــع يرفــع الــخادم مقـام
انياله كــل واحد رضه عنه الامام
المهم نرضي احسين ابو گلب الحنين
علمــتنـــــه هــالــــدرس ام الــبنـــين
واليخدمه فاطمه تسويه ملك

***

الخادم الصــح كون يبذل بالفعل مو فقط كلمه
كون مثل ام البنين الينطي من ينطي ابو اليمه
الخدمه لو من چعب گلبك هيه لو لتگول خدمه
مـــن كربله اتعــلم درس .. وعــباس من دوره اقتبــس
ظل صــير لتمثل الشمس .. خـاف تچوي حسين جسمه

يامن الخدمه اصنعـت منك امير
كون ماتنسه الــبقه فوگ الهجير
ناكـــر المعــروف يــعني ابلايه دين
علمـــتنــه هالــدرس ام البـــنـــــين
واليخدمه فاطمه اتسوي ملك

***

الرايد ايقلدله مرجع يبحـث اعله الاعلميه
الرايد ايقلدله خادم تره مو صعبه القضيه
للخدم ام البــنين اتكــون هيــه المـرجعيه
قلدها يالخادم صدگ .. توصل مراحل بالعشگ
بطاري المخيم تحترگ .. من يمر طاري السبيه
كون بين الناس انته اشـما تكون
فايز اليعمي على احسين العيون
والبچــاله عـــنـــدَ ذي العرشِ مكين
علمـــتــــنه هــالـــدرس ام البــــنين
واليخدمه فاطمه تسوي ملك

***

عيش ايامك ولكن عيش بنـفـاس المواكب
واليدليك اعله دمعه صيرله مثــل الگـرايب
واخذ من حزن العفيفه الطاهره ام الاطايب
وانحب نحيب الثـــاكله .. وخدك بدمـــعك بـــلله
لجـــل الذبيح ابكـــربله .. الظل ثــلاثه عالترايب
عيـــش ايامـــك كـــأنـــك بالـــطـــــفوف
وشوفت جسم احسينك اتگطعه السيوف
مو كئيب الناس گول الهم حزين
علــــمتــنه هالــدرس ام البـــنين
واليخدمه فاطمه اتسوي ملك
***
حيدر تركي الكربلائي
 
 

أنا أتشارك 'يوم لاينفع مال وبنون' معك

شوط كربلائي
.
.
.

شلي ابروحي ياروحي .. اخذها الروح الك فدوه
الدنيه ابلا ضوه اعيونك .. صـدگ كلشي ماتسوه

_____

وحـگ الاربعـه الراحو .. وحگ الجوه العـصابه
الـيوم الماشـوفك بــيه .. چــن ابگــلبي عطــابه
السوالف چيف مو وياك .. احسهن چنهن اذيابه
أمــاني كــلــه بعيــونك
واعيشن كلفه من دونك
تــرد وتشـوفـني كـــونك
علـگم عيشتي ابليك .. يامـَن عشرتك حــلوه

_______

انــه ام الــبــنيـن انــه .. وبيه اشسوت الفرگه
ذايب حتى فص عيني .. چيف ابچيلك ابحرگه
گلبي انگطعت اعـروگه .. وبيــه مابــقــت ورگه
المدمع مولح اخدودي
هجرك مـن كسر عودي
وذبلت عـگبـك اورودي
امـك ذابـله اخــلافك .. وبيــها مابقـــت قــوه

_______

طفـيني احـتــرگ گــلــبي .. عليك الزهره طفيني
اعيوني الشوفتك عطشت .. واگلها هسه يرويني
لاغيـــمــه الاجـــت مــــنك .. ولا واحــد يــدلـيني
يمتـه تمـطر اعـليه
وتـغــرگــني حــنيه
صدگنــي تــرد بــيه
روحي اوداعتك يحسين .. لا ماتحـــمل البـــلـوه

______

گلبـي ابـدربك امعـلگ .. ارحـم گلـبي بالــرده
سـهم الـفركه صـوبني .. الچبدي لاحه وتعده
روحي بغيبتك يحسين .. مثـل المـاي الِــتبده
لابيـــــهــم يـــلـمــوني
ولابيــــهــم يــخـــلوني
بچيت وطاحت اعيوني
والمثــلي يبــو اليــمه .. صارت دمعــته سـلوه

______

بعيد وضاعت اخبارك .. ابگلبي الغيبتك جمره
ييــمه ابـكربــله هســه .. بـس لامـرمي عالغبره
انجرح گلبي لمن گتلك .. جـرح دلالك اشـكبره
فــال الله ولا فـالي
تردلي بلكي يالغالي
ذاب اعــليــك دلالي
گلب امك يبعد امك .. مـايتــحــمل القــسوه

_______

اشيطن انه كل ساعه .. وانشد يبني ياهو الچان
حيل افركهن اچفوفي .. لحـد مــايطـلع الـدخــان
واشم ريحة خدر زينب .. تشــب بـذيـالـها النيران
لايـمـــــي واطـفــيــها
وعالشاطي اليحاميها
تتنـــخه ابـــأهــالــيها
وفـوگ الـگاع اهـاليها .. ومحـد يسـمع النخــوه

_____
تمت والحمد لله في ٢٥ / ٢/ ٢٠١٨
حيدر تركي الكربلائي

 
ليلة ام البنين(ع)
.
.
.
 
خدمة حسين الحنين     رحـــمتاً للعــــالمين
الحمدلله عالــخدامه
علـمتنه ام البنين

*

علمــتنه وگالــت ام اربـــع كـــواكب
الخدمة لا مومستحبه الخدمة واجب
الـخادم تغبــــــــطه ملائـــكة السماء
انيـــاله اليـــخلص حـيـاتـه بالمواكب
 
باجر الخـــادم يصير     اهــناكه بالجنة امير
فايز اليـرضي امامه
علمــتنه ام البنين
 
*
  
علمتنه السيده الـــــــحره الـــجليله
احنه غير حسين ماعـــــدنه وسيله
الينطي لاينطيـــله صــم الصم قليل
الينطي للعطـشان خل يترس شليله
 
واليبــــــالغ بالعطاء    تحفظه سيدة النساء
بالحشر ياخذ وسامه
علمــتنه ام البـنين

*

علمتنه الــــخدمة مــو اله مــقابل
وگالت النه اتعلمــــو مـن الاوائــل
حمزة الزغــــير كبر عنـد الحسين
چـي تعلم خدمــــته من ابوفاضل
 
والي راد يــــوفقه الله     يـقتدي بعـبود غفـله
وينجح بيــــوم القيامه
علـــمتنه ام البنين

*

علمتنه الخدمه مو بس المــــدامع
الخدمه لازم يمتزج بيها التواضع
شگد لعد متواضــــع  ام البـــــنين
ابد ماگالت نطــيت اربع مـــراجع
 
بالـخـــــدامه مستحيل     يجي مثــل ام الكفيل
اليخدم يعيش بكرامه
علمــــتنه ام الــبنين
 
*

علمتنه خط ابو اليمــــه نقــــــدسه
وگالت النه هالدرب مـو مال ونسه
الينتميله كــــون شـــايل كربـــــلاء
بير زمزم لو بـچــــه لازم يـــترسه
 
ابـداخـــله كون الخيام    ويحترگ لجل الامام
نبجي لحسين وخـيامه
علــــــمتنه ام البنين

*

علــــمتنه الـــخادمه الدنــــيا زغـــــيره
وبيها بس خـدمة ابو اليـــــمه چبيــــره
الراد حظه يـــزيد ويـــــوفقه الحـــسين
يعوف كلشي وينتــمي الهـــاي العشيره
 
الخدمه جوهرها انـتماء    الانـــتمــاء الكربلاء
وللمحبـــه هالـــــــعلامه
علـــــمتنه ام البنين
 
*

علمتنه الدنيا نار بلايه خـــــــدمه
وماكو نعمه غير بس حسين نعمه
اليركب بهالقـافله ورايد يطــــــيح
گبل مايوگــــع ابو الاكـــبر يلـزمه
 
العنده برض الطف اساس     مايطــخ للدنيا راس
الخله ابو اليمه غرامه
علمــــتنه ام البنين

*

علمتـــــــنه الـــــماله اول مــاله تالي
الغالي بس حسين غـــيره ماكو غالي
البشر من يــــصير خــــادم للحــسين
حتى لو موراسه عالي يصــــير عالي
 
اليخدم حسين الكريم    هذا ذو حظن عظيم
وما يحس دوم بندامه
علمتنه ام البــنين
*
حيدر تركي الكربلائي

أنا أتشارك 'رحمتا للعالمين' معك

قصيدة ام البنين
 
من ايفيض بيـه الشوگ .. وين ادموعي اوديها
ويثرب من عگب عيناك ..  طــف ثاني اسويها
 
***
 
يملحت يثرب امن اتروح .. تبقى ابلا ملح يثرب
وعـين ام البنـين عــليك .. گد شط العرب تسچب
الكحله الوادم امن العين .. يمــه بكــربلـه تســلب
 
والـِبالي ييــمــه هـــناك .. خاف يـصــير تاليــها
من تروح / من تروح / نــاري بيــش اطيفيـــها
 
***
مرورت هجرك بريجــي .. يالمـوطبعك امروره
الـمتعوده تصـــبح بيــك .. مـن تنــوح معذوره
وتضل متسمره اعيوني .. ييمــه عله القاروره
 
الغبره البــيها يولـــيدي .. دوه لعــيوني اخليها
من تروح / من تروح / نــاري بيـــش اطـفيها
 
***
 
امشاهگ ساعة فراگك .. مــثل امشاهگ الغرگان
الكشايه علــيه اتصــير .. حــسره ياچــبير الشان
شلون الكربله امن اتروح .. يلحـــگ بيـه ياسفان
 
والبفرگـــاك من اتضــيع ..  ياســـفان يلگـــيــها
من تــروح / مــن تروح / ناري ابيـــش اطفيها
 
***
 
يمه الينـجرح مـــرات .. هم ايطيبن اجروحه
والما فارگ وبي روح .. تبـــقى سالمـه روحه
لچـن ام البنيــن عليـك .. راح تصير مذبوحه
 
اليفارك مثل ابو اليمه .. روحه وشيضل بيها
من تروح / من تروح / ناري بيــش اطفيها
 
***
 
لون عــندي ولد سبعــين .. وفوگاهم بعـــد سبعه
اذا فـــدوه الـك يرحـــون .. مـا ابچيــلــهم دمــعه
يالروحــتك توجـع حــيل .. صعبه اتحمل الوجعه
 
من هالروحه گلبي يلوب .. هــاي الروحه خـليها
من تــروح / من تــروح /  ناري بــيش اطــفيها
 
***
 
امن اسمع سـالفة عاشور .. اتألـــم يــــبـو الاكــبر
واحس اضلوع البصدري .. مــدري شبيـها تتكسر
الدمع مو چنه لون الماي .. ليش يصير لونه احمر
 
طاري كربـــله يحســين .. روحي يبـني يسـبيها
من تــروح / من تــروح / ناري بــيش اطفيــها
 
***
 
وحق شيلة خدر زينب .. وحق اعمامتك والجود
وي ماتــرتحـل انتــه .. هدومي تصير رأساً سود
من اتروح هـــالروحه .. ادريـــبك بــــعد مــتعود
 
وره ماترتحل يبــني .. اخــدودي عـليك ادميها
من تروح / من تروح / نـــاري بيــش اطفــيها
***
حيدر تركي الكربلائي

أنا أتشارك 'من ايفيض بيه الشوك' معك

مامتت بالطف شهيده .. ويه الحسيـن وعظيده
وام وهـــب هنيالها
مـن سكـــت دلالها
حسين چان اگبالها
شهيده
………… ..

ام البنـــين انــه الــــذي .. ماوفــت ومطــــلوبه
امقصره بكثر ماي النهر .. ويه ابن اعــز محبوبه
شخلاني للطف مارحت .. اشعـطلني عن ادروبه
چــا هســـه انه بــكربله .. لومـــيته لــو  مسلوبه
 
ابنادم اشگد ماعاش هم يطبگ العين
وهنياله كلمن مـات وبعيـونه الحسين
التغفه عينه بعين امامه .. حصته بس السلامه
المــثلي جان امالها
مـن سكــــت دلالها
حسين جان اكبالها

شهيده

…… ..

يـوم اويمر ابكــل بــشر .. فوگ التراب اخدوده
والعوده اخـضر هم يجي .. يوم ويصوفر عوده
لو رايحه ويه الــگــمر .. چاطايحه اويه ازنوده
ياناس هنـيال ام وهب .. وهيـه بگبر محسوده
 
انيال ام وهب ياناس وشگد قدرها
يكفيـــها يم احسين صــــاير گبرها
تره حتى ام عيسى مريم .. ابمنزلة ام وهب تحلم
كــــــربله تـــحلالها
من سكـــــت دلالها
حسين جان اكبالها

 شهيده
…… ..

صح ام وهب واحـد نطت .. لحسين يــوم العاشر
تاجرت بالطف من صدگ .. وعرفت اشلون اتاجر
انطيت اربعه بس ماصرت .. ياوسف بالطف ناصر
لا لاحني ســؤوط الشمر.. ولاسحگ صدري للحافر
 
انياله الثلث تيام ضل عالوطيه
يم جسم ابو السجاد بالغاظريه
 
موتتي يمه ردتها .. امنيه وماحصلتها
والدنـــت اجـــــالها
من ســـكــت دلالها
حسين جان اكبالها

شهيده
…… .

لورايحــه الطـف كــربله .. اولاهالحچي ايعذبني
چا هاده مــثل ام وهب .. بعــامـود خيمــة ابني
الموت اعله الوساده ابد .. لاوالله مايــعجــــبني
وچيه عايشه ابمنزل علي .. هالحومه ماترهبني
 
خافن سهم مسمـوم يوگع بالــُفاد
گدام ابو السجاد اوگــف درع غاد
صوبو گلب المصاحف .. بعد شتفيد السوالف
الأتقنـــت اعـــمالها
مـن ســكــت دلالها
حسين جان اكبالها

شهيده
………

اشمحلاها بالطف لومتت .. وحسين ابني اگبالي
چا گلبـــي هـــسه بيـه ثلج .. مـو من جمر دلالي
محتـــرگه مـن دون البشر .. چيه ضاله ابلاغالي
ابأخر رمـــق مـــن العـــمر .. ماواحـــد اتعــــنالي
 
حسراتي ماتنـــگـــال مخنوگه بيه
مشتاگه اشوف احسين والد رقيه
 
هواي اله مشتاگه اني .. الهالسبب شوفوني اعاني
الماتت ويبــــرالها
من ســــكت دلالها
احسين جان اكبالها

شهيده

حيدر تركي الكربلائي
 
 

ليلة ام البنين
قصيدة الگعده
.
.
.


وينه / وينه ينشدوني الناس روح الزجيه
         وحــچاية الماموجـود كــلفه عــليه
وين الله ويرد احسين
  امـــــن الـــغـــاضـريه

***

اهـــنا يالتنـشــدون عـــني اهـــنا يــهـل اللهُ اكـــبر
هـــاي انـه ام البـــنيــن الــفاگــده نــور أبـــو الأكبر
احچاية الوينــه احسهــا نابتـه ابخـــاصرتي خنجر

خانگــن ي يانــاس الحــچي .. وماخله شــي بيه البچي
خطوه امشي خطوه انتچي .. وحيلي چن حيلي تطشر
 
رايح / رايح واحــس الــدلال موگــد جـمر صار
          من كــل كتر من كل صوب بيه تلهب نار
يامن تسألوني امنين
امن الغاضريه
 
***
 
الناس هــا  يم البــنين اتــناشد ودمـعي اسيــله
ما اجه حسين أبو الــيمه غــيبته صـارت طويله
حيره مدري شلون اجاوب وچفة احزاني ثجيله

لا بيه أوصــل كــربله .. ولا بيــه هجره اتحمله
البابه رحت اتــوسـله .. وغيره ماعندي وسيله
 
ابابه / ابابه چفيت الدمعات من شوفي غيم
          مشــتاگ گلبــي لحسين والــبالمخيم
بدلالي تسعر نارين
 امن الغاضريه
 
***
 
اربعــه مابيـــهم اســئل كــل سـؤالي حـــسين وينه
حسين روحي حسين گلبي حسين عقلي أبوسكينه
حســـين بـــس لا عالتــراب بكـــربلاء امگـطـــعينه

دلالي احســـنه انشـــلع .. عالـراح للطف مارجع
بس لا أبــو اليمــه وگع ..  وثــوبه غاد امسلبينه
 
وادم / وادم يــگولون اهناك مـــاعـدها رحمه
         بالخيل خاف ايهشمون صدر أبو اليمه
مو عجبه اذا تعمه العين
امن الغاضريه
 
***
 
كربلـه تــفزز اجــروحي بــيه مــن ايــمــر ذكــرها
وصار حزن ام البنين اضعـــاف اكـــثر من عمرها
الشافنــي ميگـول عـدله انــفاسـي بالـكوه اجرها

ماخذ ضوه عيوني ورحل ..وفراگه بالشوف اشعمل
ماي العــمه بعيـــني نـزل .. غيبة احسين اشكبراها
 
عيني / عيــني لونـها متشـوف نعمة وليها
         معميه احسبها اليوم وماشوف بيها
والبيه هسه وبعدين
امن الغاضريه
 
***
 
بلكي أبو اليــمه يردلي بخير وبصحه وسلامه
الســـاتر الله شو تأخـــر بلله گلــولي اشعلامه
خاف بالطف أبو اليمه احترگت اهناكه خيامه

وزينب بلا كافـل بقـت .. وشمعة كفالتها طفت
ولمن تگلولـي انســبت .. تذبح اعيوني الندامه
 
وياهم / وياهم شجاني ياناس مارحت اني
          ضليت اتاني ومكسور گلبي واعاني
مهظومه ام الطيبين
امن الغاضريه
***
حيدر تركي الكربلائي

أنا أتشارك 'وينه گعده ام البنين' معك

مولد سيدة النساء
.
.
.

يازهراء ..  انـتي شمـسنه الـطالعه
يازهراء ..  يارحـمة الله الـواسـعه
يافاطمه
______
رحمه  .نعمه  . انتي  . صرتي  . يافـاطمه مـن نـور
ابدع  . اجمع  . نوره  . بصوره . ماموجوده بالحور
سبحان الله / صاحت ارضنه والسمه
سبحان الله / سبحانه خـالق فاطـمه

يازهراء ..  باريـنه نـورچ صــانعه
يازهراء ..  يارحمــة الله الواسعه
يافاطمه

_______

صحــنه . حــبنه . الفاطـم . لازم . كـلها اتـعرفه هالناس
نكتب . هالحب .اسمه . ورسمه . ابماي الورد والياس
والله والله /  يافاطمه وهذا قسم
والله والله / الغـيرچ فلا گلنه نعم

يازهراء .. والــي يـضد انقــاطعه
يازهراء .. يارحـمة الله الـواسـعه
يافاطمه

______

الله . خــله . اســمچ . رســـمچ . بــي قرآن وايات
كوثر . جوهر . ظاهر . طـــاهر . بكتــاب الكرامات
قرأن قرآن / يافاطــمه وكــلچ سوَر
قرآن قرآن / والماقره بشخصچ كفر

يازهراء .. الـباري كتابـچ واضـعه
يازهراء .. يارحـمة الله الـواسـعه
يافاطمه
______

استبرق . اشرق . لامع . ساطع . هذا النــور محلاه
الوالــد . ساجد . ينظر .  يشكر . مـن فـرحـــته لله
فرحان فرحان / شايل بديه جنة عدن
فرحان فرحان / من حقه گلبه ماسكن

يازهراء .. وچـفوف رافـع بالدعه
يازهراء .. يارحـمة الله الـواسـعه
يافاطمه
______

الجنه . النــه . نزلت . وصلت . رحـــمة رب الاربـاب
فرحه . نفحه . منجه . بهجـه . بيــها الفرح ما خاب
ويانه فرحان / يافاطـمه روح القــدس
ويانه فرحان / نـور الكواكب والشمس

يازهراء .. انتي الانـوار السـاطعه
يازهراء .. يارحـمة الله الـواسـعه
يافاطمه
______

نفـرح . نصدح . انـور . ازهـر . وجــهچ يم الحسين
واحنه . صحنه . ونقره . زهره . شعشع نور السنين
ماشاء الله / بالجنه لا ما نفـترض
ماشاء الله / والجنه نزلت للأرض

يازهراء .. للخير صـرتي الجامعه
يازهراء .. يارحـمة الله الـواسـعه
يافاطمه
______
تمت والحمد لله
حيدر تركي الكربلائي