ASOSIY MAQSAD – DOIMIY E’TIBOR, E’TIROF VA KO‘MAK

Namangan viloyatida joylashgan “Hududgaz Namangan” gaz ta’minoti filialida kasaba uyushmasi qo‘mitasining hisobot-saylov konferensiyasi bo‘lib o‘tdi. Unda sohaning mas’ul rahbarlari, kasaba uyushmasi vakillari va mehnat huquqi inspektorlari ishtirok etishdi.

Tadbirda O‘zbekiston energetika, neft-gaz va geologiya xodimlari kasaba uyushmasi Respublika kengashining Bosh mehnat huquq inspektori B.U. Abdullayev, Bosh yuristkonsult I.D. Isoqov, mehnat huquqi inspektori A.A. Imomov, “Hududgazta’minot” AJ birlashgan kasaba uyushma qo‘mitasi raisi Sh.J. Axmedov hamda Namangan viloyati kasaba uyushmalari Federatsiyasi mehnat huquqi inspektori B.A. Rahimberdiyev ishtirok etishdi. Shuningdek, “Hududgaz Namangan” filiali suyultirilgan gaz ta’minoti bo‘yicha direktor o‘rinbosari M.M. Xo‘jayev ham konferensiyaning muhim ishtirokchilaridan biri bo‘ldi.

Yig‘ilish davomida qo‘mita raisi tomonidan hisobot tinglandi va amalga oshirilgan ishlar haqida batafsil ma’lumot berildi. Ishtirokchilar tomonidan ayni paytda filialda kasaba uyushmasi faoliyati yangi bosqichga chiqqanligi alohida ta’kidlandi. Xususan, ish jarayonida vafot etgan xodimlarning oilalari va farzandlari holidan doimiy xabar olinishi, ustozlar va fidoiy xodimlarning munosib e’tirof etilishi, xodimlar farzandlariga bayramlarda sovg‘alar ulashilishi va ularning salomatliklarini tiklash uchun ko‘mak ko‘rsatilayotgani konferensiya ishtirokchilari tomonidan yuqori baholandi.

Konferensiya kun tartibiga ko‘ra, kasaba uyushmasi qo‘mitasining yangi raisi saylovi ham o‘tkazildi. Yashirin ovoz berish natijasiga ko‘ra, Sobirov Abdulbosi Dedamirzayevich filial boshlang‘ich kasaba uyushmasi qo‘mitasi raisi etib saylandi.

Ushbu konferensiya mehnatkashlarning manfaatlarini himoya qilish, ijtimoiy qo‘llab-quvvatlash va ishchi-xodimlarga munosib mehnat sharoitini yaratish yo‘lidagi muhim qadamlardan biri bo‘ldi. “Hududgaz Namangan” rahbariyati hamda kasaba uyushmasi qo‘mitasi kelgusida ham xodimlarning huquq va manfaatlarini himoya qilishga, ularning ijtimoiy farovonligini oshirishga doimiy e’tibor qaratishini ta’kidladi.

“Hududgaz Namangan” gaz ta’minoti filiali matbuot xizmati

@hududgaz_namangan

OGOH BO‘LING!

Hurmatli Chortoq tumani "A. Navoiy" MFY aholisi va iste’molchilari!

2025-yil 22-fevral kuni soat 15:00 da A. Navoiy MFY hududida o‘rta bosimli gaz quvuriga maxsus yuk avtomashinasi urilishi natijasida gaz sizib chiqish holati yuzaga keldi.

Shu sababli:
✅ 1120 ta xonadon
✅ 4 ta yirik iste’molchi
tabiiy gaz ta’minotidan vaqtincha uzildi.

Ayni vaqtda tuman gaz bo‘limining avariya-tiklash brigadasi tomonidan ta’mirlash ishlari olib borilmoqda. Ishlar yakunlangandan so‘ng iste’molchilar ogohlantirilgan holda gaz ta’minoti qayta tiklanadi.

‼️ Ehtiyot bo‘lishingizni, gaz uskunalaridan foydalanish qoidalariga rioya qilishingizni so‘raymiz!

“Hududgaz Namangan” gaz ta’minoti filiali matbuot xizmati

@hududgaz_namangan

#Munosabat

Ijtimoiy tarmoqlarda "Boburshoh ko‘chasi, 4-uyda yashovchi fuqarolardan murojaat!" sarlavhasi ostida e’lon qilingan murojaat yuzasidan "Hududgaz Namangan" gaz ta’minoti filiali tomonidan o‘rganish o‘tkazildi.

O‘rganish natijasida ma’lum bo‘ldiki, Namangan shahri, Boburshoh ko‘chasida joylashgan ko‘p qavatli uylarda gaz tarmog‘ini qurish va ta’mirlash ishlari hali to‘liq yakunlanmagan. Shuningdek, Namangan shahar gaz ta’minoti bo‘limi tomonidan muammolar bartaraf etildi.

Ayni vaqtda 4-uydagi barcha xonadonlarda gaz ta’minoti tiklangan. Shu bilan birga, gaz tarmoqlarini ta’mirlash ishlari davom etmoqda.

Fuqarolarga keltirilgan noqulayliklar uchun uzr so‘raymiz!

“Hududgaz Namangan” gaz ta’minoti filiali matbuot xizmati

@hududgaz_namangan