هذا العمر.   فدوه ونذر
اگضي بچي.  اعله ام الخدر
وماريدن احسب بي يوم.     مابي بواچي اعليهه
     ____
بهذا العمر وشما تمر ايامه
وتفكيري واحساس الگلب والهامه
رايد اصير بدفتر اللطامه

گلبي هتف     هذا الهدف
دمعة ولطم.    بيهن شرف
بهذا الشرف اعله هواي.    چيه زينب مواسيهه
      __
كون العمر اگضي مدامع حمره
عاللي مشت مسبيه واهيَ الحره
وكل ليلة زينب ياغريبه اقره

اقره و أون.    واشعر حزن
غربة وطن.     وسوط المتن
بلكت اواسيهه ادموع.   من عيني دمعه ابچيهه
      _
واطلب نذر يصبح بچي كل عمري
محلاهه دمعاتي اعله زينب تجري
كل البخت من ابجي والطم صدري

بدمعي افتخر.     ولطم الصدر
بيهن سند.           لام الصبر
بيهن سند للحوراء.      من الحزن ياذيهه
         ___
مايسوه عمري لو اعيشه براحه
ولوما اخلي اعله العقيله جراحه
طير الفرح البكلبي اكص جناحه

والمنجرح. ليل وصبح
ما ينسى ابد. ينعى الجرح
ايام حزن أهل البيت. الفرحه ما امر بيهه
____
اعله ام الخدر لو ابچي كل اسنيني
ماوافي خطوه من السبي بونيني
ديني البچي اعله ام الخدر كل ديني

هذا الشرع. اصل وفرع
فرض الحزن. صب الدمع
صوم وصلاة العزيات. بفرض البچي تأديهه
__
حبل الوصل لحسين ولكافلهه
لو رايد اوصلهم شرط اوصلهه
ودمعاتي الهه عالجفون اسبلهه

بيهه الوصل. وهي الحبل
ردت الاصل. بيهه الاصل
لو ردت يقبلني حسين. لازم شرط ارضيهه
__
لازم شرط ارضيهه لو ردت حسين
وابقه لاجلهه ابچي ولا اعد اسنين
تستاهل اعمي من الحزن شوف العين

وعيوني الزينب افديهه

___
لازم اخسف هالصدر باللطمات
زينب مشت مسبيه والعلويات
راحن سبايه وصارن المسبيات

المسبيه بحيلي الطم ليهه
__
#حسين_علي_الياسري

گلب زينب دمع وهموم عاشَر
من كثر المصايب يوم عاشر
اذا رايد تواسي حسين عاشِر
دمع وهموم عالراحت سبيه

عظم الله لكم الأجر بذكرى استشهاد مولاتنا جبل الصبر زينب عليها السلام

الشاعر حسين علي الياسري:
يزينب دم على عيني احس بي
وجرح فرگاچ انه بگلبي احس بيه
يخيتي اشچم جرح بيه احسبي
جرح فرگاچ اعظم من اديه

زينب تشكي حالتهه والمهه
تشكي لحيدر الصاير و لامهه
حسين مگطعه جثته ولمهه
علي السجاد من فوگ الوطيه

زينب بعد اهلهه راح املهه
وبين اعداهه مامش راحم الهه
چلمة خويه صاحت راح املهه
شكثر ناديت محد رد عليه

صدگ صوط الشمر بعدي ولاچن
صدگ يضرب ولا يهتم ولا چن
بعد بالي فلا يصفه ولا أچن
إلا اسمع رضت زينب عليه

زينب والحزن بعدك علي حل
ومن بلواي دورلي عله اي حل
اجيت اشكيلك وشأشكي عله اي حال
لگيتك جثه متوسده الوطيه

جيش اعدانه ياخويه علي دار
وحرگوا خيمتي الچانت علي دار
صحت عباس والهاجم علي دار
وجهه ونضرته شمتانه بيه

زينب ماراحت مسبية زينب ماراحت مسبية
#### #####
زينب مااضنهم يسبوهة
راحت واعداهة يهابوهة
ياهو الكايلك ضربوهة
هيهات الگلك محنية زينب كاراحت مسبية
############ '#########
تمشي وهزتهم مشيتهة
هزتهم كالت كلمتهة
كد كيدك واسعى بكولتهة
هزتهم كل ال أُمية زينب ماراحت مسبية
######## ########
زينب بت حيدر معروفة
جن والدهة ونفس حروفة
واعداهة صابتهم خوفة
من خطبت بالمجلس هية زينب ماراحت مسبية
######## #######
زينب معروفة بقوتهة
صح راحت من دون اخوتهة
بس ذلتهم من هيبتهة
من حيدر هيبتهة هيه زينب ما راحت مسبية
######### #########
بت حيدر معروفه تجاهد
اخت حسين ونعم الوالد
راحت وياهم چن قائد
برزت شخصية العلويه زينب ماراحت مسبيه
######## #########
#سيد_حسين_الياسري

رد ضعنهم.      رد ضعنهم
____
من اجه ضعن الغريبه
من سبيهه بلايه والي
دخلت الديره وتنادي
بلايه اخوتي غربه حالي
نادت الديره غريبه
بلا وطنكم يا دلالي

جرح يلچم جرح راجع     
ضعن جرح السليبات
واكبرهن جرح حرمه        
وسط حزن الگلب بات
راحن بالوطن لكن             
اجن ديرة غريبات
رجعن فاگدات حسين.      
بيهن چم نبض مات

الفرگه غربه      العيشه صعبه
بلا غوالي.         بلا رسمهم
حمله مايل.       بلايه كافل
بس غرايب.      رد ضعنهم

رد ضعنهم.      رد ضعنهم.
____
هذا اجه يجرح ضعنهم
الچان ضعن حسين اسمه
صار  ياضعن الغريبه
والغريبه شلون جلمه
تلچم جروح العقيله
والگلب يزداد همه

ضعن باسم الحسين اسمه.
طلع من الوطن راح
رجع فاگد ولي النعمه.  
ويصفج راحه بالراح
رجع لكن فكد رسمه.    
رجع ومحمل جراح
رجع يرسم حزن ثكله.   
كل خطواتهه نياح

ممحي رسمه.    ورايح اسمه
لاهله جايب.       بس حزنهم
حسينه رايح.      وحيله طايح
رد باساره.           رد ضعنهم

رد ضعنهم.       رد ضعنهم
__
رد ولكن غربه جايب
جايب اهله بلا وطنهم
ردوا الديره غريبه
والفگد يرسم حزنهم
مامش حسين واخوته
جايب الغربه ضعنهم

ضعن غربه ودمع جايب.  
اجه وجايبله حسرات
اجه حامل حرم و ايتام. . 
كل خطواته اهات
واجه فاگدله فد طفله.     
ماتت كلهه شوغات
جن يجري نهر عالگاع.      
كل خطواته دمعات

رد رزيه.       بلا رقيه
هذا واحد.     من المهم
يا لچمهم.      یا فگدهم
بالمصايب        رد ضعنهم

رد ضعنهم.          رد ضعنهم
_
وضي حزنك من دمعتك
ياگلب واسيهه زينب
ابچي للراحت اميره
وردت بضعن التسلب
بت علي گالوا سبيه
ياگلب واسيهه وانحب

اجت مكسورة الخاطر
اجت محنيه ام عون
فگدت وگفة العباس
شيوصف حالهه شلون
اجت محنيه متغيره
بوضع يجرح يگولون
مو بالدمعه ياجفني
كون اجريلهه عيون


عالعقيله.       دمعي اسيله
حتى اوالي.     ال الله حبهم
عالغرايب.        ابچي واجب
مو كفائي.          رد ضعنهم
_
ياگلب ابچي الضعنهم
وانحب ولا تجفي حزنك
ابچي للردن سبايه
واصرخ ويتعالى ونك
موجرح واحد يگلبي
جروحك بكل ذره منك

يگلبي وكل نبض تنبض
يلجملك كل نبض حيل
على العاشن سبي وغربه
تضيع منك الحيل
ومو دمعات بعيوني
كون دمومك تسيل
يلچم كل جرح بالآه
وحزنك عاشر الليل

عيش حزنك.    بكلشي منك
للسبايا.             والجرحهم
واسي بيهم     وابچي ليهم
عيش چلمة.       رد ضعنهم
_
#حسين علي الياسري

حسين الياسري:
اجيت بكل حنيني                 ضل يعلى ونيني
        سلام الله على روحك ياموسى
        سلام الله على جروحك ياموسى
          ###############
اجيت ودمعتي تجري             واحزاني ملت صدري
                    اجيت وخلصت صبري
                               اريدك
اجيت بروحي الك لچمه.         ما توصفهه كل چلمه
                      وعيني لگبتك تضمه
                                اريدك
كل ليلة الحزن يبدي              ودمع عايش على خدي
                     وبدربك صبح ردي
                                اريدك
اجيتك والگلب دامي.           وگلبي يسابگ اجدامي
                      لگيتك كلشي باسلامي
                              اريدك

اجيتك گلبي ذايب                شاب وگلبي شايب
        سلام الله على نوحك ياموسى
        سلام الله على جروحك ياموسى
         ################
گاصد گلبي جايبني             منة هواية گربني
                    مرقد شوگ الة مبني
                          بدموعي
رفيقة دربي الك دمعة                مااريدن بعد رجعة
                   يمك اشعل الشمعة
                          بدموعي
جايك كلبي بذنوبة         جايك واسود بثوبة
                  رايد بيك انة توبة
                         بدموعي
احرگ گلبي لمصابك.        وگربني على اعتابك
                     والچمني من اطب بابك
                         بدموعي

رايد منك التوبة                  گلبي محمل ذنوبة
              سلام الله على گلبك ياموسى
              سلام الله على جروحك ياموسى
         #################
امشي ودمعتي اجريهة         وعيوني ابجيهة
                     حاجة عندي يگضيهة
                            امامي
رايد خدمة العترة                 خادم ابقة للزهرة
                   ادعي من بخت قدرة
                           امامي
تگضي الحاجة يالكاظم         عن ذنوبي انة نادم
                     اقبلني الك خادم
                         امامي
باسمك علگت نيتي.             هواك الرايده بريتي
                  باسمك يرتفع صيتي
                        امامي  

خادم فدوة اقبلني              خادم فدوة سجلني
              سلام الله على چفوفك ياموسى
               سلام الله على جروحك ياموسى
                 #############
بگلبي تبقة الك لچمة            بذنوبي چنت اعمة
                   وانت الضي وانة الضلمة
                            طبيبي
گلبي الليلة الك صافي           كون امشيلك و حافي
                     مريض وانت التشافي
                           طبيبي
اجيتك هايم بروحي             يم گبرك علة نوحي
                    ضمدلي بهلا جروحي
                            طبيبي
طبيب الما اله جاره.            وگلب الجايك بناره
                    تشافي گلبه بزياره
                         طبيبي
انت اتطيب المرضى              وبغيرك فلا ارضى
                سلام الله على ضمادك ياموسى
                 سلام الله على روحك  ياموسى
                 #############
اجيتة بگلبي الة نخوة         يگضي حاجتي هوة
                  للمهدي اهدي كل خطوة
                              حبيبي
امشي وعايش احساسي       امشي والفت براسي
                   المهدي وياية بحساسي
                               حبيبي
يمشي الموسى ابن جعفر         وي شيعة علي حيدر
                        ويوگف النة يتنطر
                              حبيبي
اترس گلبي من حبك.              والچمني لچم گلبك
                       وخليني ابقه بس گربك
                              حبيبي

المهدي ويانة ماشانة              يصرخ صوتة ويانة
               سلام الله على على چبدك ياموسى
               سلام الله على جروحك   يا موسى
            ##################
#سيد_حسين_الياسري

باب الحوائج ادري عنك
والخير كله البيه منك
ياسيدي موسى ابن جعفر
        ########
ياسيدي كل حاجه تكضيهه
ولهذا يمك حاجتي احجيهه
روحي التجيك بكلشي ماذيهه
ادريهه ترجع كلشي مابيهه

هذا اعتقادي وما ابدله
والنيه عندي وياك عدله
هاي العقيده وبيهه افخر
ياسيدي موسى ابن جعفر
          #########
ياسيدي ويا مالك احساسي
من خير شخصك باقيه انفاسي
جيفن احبك مرتفع راسي
فضلك عليه هواي ما ناسي

من اختنك واكصد واجيلك
تشرحلي صدري المعتنيلك
صدري بضريحك من تعطر
ياسيدي موسى ابن جعفر
           ########
ياسيدي واتنخه انه بأسمك
وبساعة الشدة اجي يمك
والعاقل الي رايد يفهمك
يالوحة بس ياهو الفهم رسمك

يالوحه مرسومه بنضرتي
يادمعمه مفهومه بعبرتي
ياعشكي لجلك يبقى يكبر
ياسيدي موسى ابن جعفر
       ########
ياسيدي موضوعك شكبره
مو ياهو جاي ويفتهم كدره
كل العلم يمك صبح فكره
قران حكمة غلافك الحضره

ياموسى يا قران ناطق
ياحجة الله اعله الخلائق
اسمك كبر والكون يزغر
ياسيدي موسى ابن جعفر
        #######
يامالك الكون و ياابو الديره
مالكني حبك عايش بخيره
من ادخل بشدة وتضل حيره
اتنخه باسمك مو اسم غيره

ها ياابو طلبه لمن ادعي
لمن احير ويجري دمعي
يامن يجيب الجايه مضطر
ياسيدي موسى ابن جعفر
        ########
ياسيدي ومتنومس بحبي
وبحبي الك يرضى علي ربي
يامالك الروح ونبض كلبي
بفركت ضريحك عيني بس تربي

وهنياله اليموت بحضرتك
ها ياابو طلبه لاحه بختك
تبقه بضريحك روحه تفتر
ياسيدي موسى ابن جعفر
         #########
#بقلم _حسين_علي_الياسري
الحمد لله
تمت بتاريخ  
ليلة ٢٢ رجب ١٤٤١ هجريا
١٨ /٣/ ٢٠٢٠ ميلاديا
المصادف الأربعاء

قصيدة وياك اسافر
مولاتي عليلة الحسين عليه السلام
ترسل احساسها لوالدها عليه السلام
بعد رحيله عن طريق بريد القلب
المكان : منتدى الشعله الثقافي

للمشاهدة عبر اليوتيوب بدقة افضل
على احد الرابطين
https://youtu.be/YLLqH0mBbsg
https://youtu.be/zd2GZC4oNzY

القصيدة :

بيه واهس مال ملگه
وازدحام من المشاعر
وصوت لاچن صوت اخرس
وصوره من كل ذكره حلوه
تملي بعيوني بالنواظر
وهوسة افكار وتشضي
تاخذ بعقلي وتودي
وجيش من كسران خاطر
ودمعة عيوني العزيزه
تسافر اعله خدودي سكته
بدون ما تگطع تذاكر
والخيال الواسع ترسمه صفنتي
وياك اسافر
وزحمه من تخلص صفنتي
الگه اثر يشبه طريقك
دمعي فوگ خدودي حافر
والگه وحشة موت بيه
والگلب مابي يصابر
ها يالمخلي انتضارك يمي يبقه
انه بس لأجل انتضارك كمت اكابر
انه بس لاجل انتضارك عمري باقي
والأمل ترجعلي باچر
هسه لو باقي خيالك
يمي يضوي
چان يم خيالك اكعد ليك اناطر
انه تارسني غيابك
وبخيالك ردت اسامر
ريت ترجع ليت اشوفك
انت وخيالك وريحك
بكل كتر بالبيت داير
وترجع لشوفي نقل حي ومباشر
وكل اداة تفيد في معنى التمني
استخدمتهه البلكي ترجع
الليت الزمك الريت اقبلك
ماليه اوراق الدفاتر
وگلبي گال ارجع واطشلك
للفرح نبضاتي ناذر
هذا حالي شلون حال
مثل غبشة ثكله صاير
مغربية ليل شاعر
وفوضوية حزني تنطق
عن ضجيج بداخلي
اعله عيوني ظاهر
وعيني من كثر الدمع
رسمت ضباب كبال شوفي
وشوفي حاير
والضلام يدور حولي
والحزن وياي ساهر
والوجع البروحي يكتل
چنة هندس ليل عاشر
وصوتي من يصرخ اريدك
محد يسمعه ولكن
هزله دين من الضماير

#حسين_علي_الياسري

ها يرايح عني يدواي وياعلتي
اليوم الم كل ذكرياتك
ارد اگعدهن واعاتب
من غيابك تارسه الدنيا وحدتي
شلون لمن يگبل الليل بغيابك
ياهو اليسدلي وحشته
وچانت عيونك تسد خوفي ووحشتي.
وتدري بعيونك كشختي
وصارت الكشخه بعد مافاركتني
دموع تترسلي وجنتي
يالجنت يمي واريدك
تدري مااحمل فراگك
وادري ماتحمل فرگتي.
وانه بس لعيونك اشكي
وهسه عينك فاركتني
ياهو اليسكت عبرتي
وعلگت صورة رجعتك
الرسمتهه من خيالي.
بالخيال الماتحده
تطول لوتكصر نضرتي
ووسط هاي الفوضويه
يفز ضجيج شچم سؤال
ليش راحت عني جفينك يغالي
وَكلهه حاجه
لحضنة جفوفك دمعتي
وهم اشوفك جايني وجايب ضحكتي
ياوطن روحي وغربتي
ياراحتي السكنت حسرتي

ها يالحنين اترجاك.  بقيلي عطرك ذكره
            ___
بقيلي عطرك ذكره الي بقيلي
مني اخذت البويه شمخليلي
انه العليله وفگدك ايهد حيلي
بقي قميصك يابوي  حيلي يرد بعطره
             ___
حيلي يرد بعطره من اشتمه
تشفيني منك لو تمر بس نسمه
وجهك ضوه وفراگ وجهك عتمه
وجهك اساس الكل نور.    يالعاكس اعله الگمره
            __
يالعاكس اعله الگمره وجهك نوره
نورك اساس الكل ضوه المعموره
بفراگك اقره وماترد چم سوره
بفراگك اقره القرآن.    بالساعه مية مره
              ____
بالساعه مية مره اضل اشتاگك
من انت يمي شلون اجاني فراگك
كل لحضه اموت واحتيي باشواگك
روحي يعت بيهه الشوگ.    يردهه انتضارك جمره
               ___
يردهه انتضارك صفره من گد الشوگ
كل لحضه تتبده بدرب مشيي النوگ
وگلبي احسه بهالدرب کن مسحوگ
تخيل اجيت اسرع ليك.   وطلعت سراب النضره
               _
طلعت سراب النضره وگلبي احتام
رايد يشوفك منكسر كسرة جام
يالتدري بجروح الفگد ما تلتام
شيضمده جرح المشتاگ. والفرگه تچوي جمره
_
#حسين_علي_الياسري

طفله تنادي بحس مبحوح
كلبي وياكم خلي يروح
___
طفله وعالضعن نادت        وحدي لا تعوفوني
ما معترضه بس كلبي.      صاح وياكم اخذوني
كلبي الوحده يتعذب .      نادت يالتسمعوني
بس ما افارك انه حسين.    ويه حسيني خلوني.

صاحت صيحه تطلع الروح
كلبي وياكم خلي يروح
___
نادت ياكلب يحمل.              فركة واحد يحبه
شلون الي يحب حسين.      وبس حسين البكلبه
حنين هواي ابو السجاد.      حنان الماي عالجربه
واليفكد حنان حسين.          يعينه اعله الفكد ربه

الله يعينه يعاشر نوح
كلبي وياكم خلي يروح
___
عن ياجرح اريد احجي.       ما ينعدن جروحي
نادت يال اودعكم.              راحت بالضعن روحي
اضل بلا خواتي شلون.        ياهو اليستمع نوحي
اضل اتخيل انه حسين.       كلي ويانه هم روحي

هذا الرايح ضعن جروح
كلبي وياكم خلي يروح
____
رحتوا وعفتوا طفلتكم.        غريبه وعايشه الحسره
اسمي فاطمة وكلبي.           بي من فاطمة الزهره
ضلعهه بعصره متهشم.      وانه بكلبي جم عصره
من سافر ضعن اهلي.        احس ضلوعي متكسره

طفله وحلمي اصبح مذبوح
كلبي وياكم خلي يروح
____
نادت ياهلي رحتوا.           ما اضن يحتمل صبري
وروحي ورده ذبلانه.           بعدكم ما يضل عطري
شلون بكلبي ياحبابي.        وضايك بالنفس صدري
دلوني اعله حل وارتاح.      بقيت محيره بامري

امشي وياكم ما مسموح
كلبي وياكم خلي يروح
_
يهنيال المشو وياك.             طريقك ماشي للجنه.
يحسين المشه بدربك.         مشه لدرب الله واتعنه
كون كليبي يمشي وراح.     وياكم انه اتمنه
كلب طفله وبقه متانيك.       وشايب صاير بحزنه

من حزنه يصير بكد نوح
كلبي وياكم خلي يروح
__
حسين علي الياسري

ودعتهن حجره حجره ورايح
وليش دمعك يم حجرتي طايح
يعني الي متعود
     ___
ودعت الحِجر كلهه. ودمعاتك تحاملهه
بس يم حجرتي تهلهه. يعني الفرگه اليه
مامنك بعد جيه. يضي عيني وهوه الريه
تروح وتعرف البيه. مااحمل اذيه

عليله انه ودوه العله.....صوتك يترس اسماعي
ماانام إلا اشم عطرك..... من اشمه تهده اوجاعي

تروح وانه يروح بعدك حيلي
بويه منك لو عطر خليلي
بي احس موجود
___
بويه ودعت هالدار. وخلاني الدمع احتار
ليش ويم حجرتي شصار. ودمعوع بحضنهه
بويه الحيره تاذيني. ناوي انت تجافيني
المن باقيه سنيني. ويتغرب وطنهه

والمدمع احس اثبات....ناوي انت تفارگني
قبل لا اسمع انت تروح.... احسن حزني سابگني
بالجفه چوه الحزن دلالي
الغالي يعرف شنهي نيت الغالي
والگلب ممرود
____
لمن شاهدت دمعك. بيهه انه اعرفت وضعك
لازم دمعتي تودعك. وتحضنهه دمعتك
موادع دمعه وي دمعه. وكون الله الذي شوسعه
متضل بي ولا وسعه. تتحمل فرگتك

تضيگ الوسعه بگليبي..... تصبح جن ثقب ابره
وگلبي انه العليله شلون..... يهد حزنه جبل صبره
ابقى يابويه عليله بدارك
شلون اتحمل بعيده اخبارك
العله بيه تزود
_
يامن ودعت كلشي. بعدك بويه من تمشي
يصيرن دمعتي ورمشي. من بعدك رفاگه
عرفته حالي من بَعدك. من غرگ دمع خدك
على صبري نصر بُعدك. ومابعده انتلاگه

من بَعد البُعد اعرف..... مايبقه امل ترجع
واضل بحسرتي وحزني... وعليله وگلبي يتفجع

شلون بويه يصير بعدك حالي
وانت من تروح تشده بالي
بكل اثر مشدود
__
يا حل الشكو حيره. منك طلبتي ازغيره
بس وجهك علي ديره. لمن يسري ضعنك
آخر نضره من عينك. بيهه اتذكر اسنينك
تترس چلمة الوينك. بس بنضره منك

بالتضره الاخيره وداع..... كل ذكره قبل الفراگ
تشرح كل حچي الگلوب..... تترس صفنتي من اشتاگ

بيهه افهم كل حچي البعيونك
وهي التصبرني وانه بدونك.
والصبر مريود
____
#حسين_علي_الياسري

دماعتي طاحن لمن جفاني
بونين..حسين.. عنّي يهاجر
ادريه يطول مابيه اتاني
بجروح...انوح..حزن المشاعر

راح حسين بضعن جروح
بمگفاه گلبي باقي ينوح
صح ما اخذني بضعنه وياه
لاچن دزيت انه الروح

دزيت انه الروح تمشي ويه الضعن
وگليبي كلساع باحزانه انطعن
من راح الحسين دمعاتي تصب
واصوره بالعين. مابد ينسن
__
رايح انيسي وضليت انادي
بنين..سنين.. فدوه الرجعته
ماهمني ولدي فلذة فؤادي
يعود..يزود.. عمره وضحكته

فدوه اتروح اربع اقمار
بس حسين يرد للدار
كلشي افديه بس سالم كون
و بيوم الطف ما يحتار

كلهم فده اتروح. اولادي اله
بس كون الحسين. ميصيبه بله
انه ام البنين. بس فدوه الولد
بس سالم يعود. من طف كربله
____
سالم يردلي امنيتي يرجع
دعيت .. يريت.. يرجعلي سالم
ادعيله وابچيه وعيوني تدمع
بچيت _ نعيت بس ادري لازم

ما يسلم ضعن الماشين
بالطف يوگع ماي العين
بالطف ايصير اللي يصير
وما يرجع سالم الحسين

ما يرجع الراح من هذا السفر
وتغدره الاوغاد. ويخونه الدهر
والاربع اولاد. يفدونه النفس
محني الظهر لين. يفگدله گمر
_
آ ياحسرتي وگلبي بفرگته
جريح ..يصيح .. كل نبضه باسمه
آ يا جراحه وآ يا دمعته
الحبيب..بنحيب....فارگني رسمه

وبگلبي وحسراته شلون
من يحزن وين الگه العون
چان بحزنه يصبره حسين
وهسه فراگه يبچي عيون

يامن يصبر. گلبي بهالجفه
ودمعي انه كل ساع. عالخد انچفه
شينشف الدموع .. والرايح نظر
عيني ونضرته.. معنى العاطفه
_
من الهم دليلي مشتعله ناره
الدليل...ويميل.. كل لحضه حالي
لني ادري ضعنه يرجع باساره
عجيب..غريب. وفاگد غوالي

ضعن البي قائد مهيوب
انه ادري يرجع مصيوب
يرجع فاگد قائد حيد
ويتسمى ضعن المسلوب

ضعن الكلافه..يمشي للأسر
الراح بنسيمه..يغطي كل عطر
راح شحلاته..والقائد كلف
وسفه وحسافه..يرجع منكسر
____
#حسين_علي_الياسري
.

بويه لو تاركلي من ثوبك خليل
يمسح دموعي لون عالخد تسيل
__
بويه لو تاركلي من ثوبك ذخر
لريحتك اشتاگ واشتم بي عطر
قطعه من ثوبك اشمهه وانتظر
خاطر تصبرني لو طال الرحيل
____
گلبي اخذته وياك من عني رحت
وانه راحت روحي لمن ودعت
من بعد فگدك احس روحي متت
بويه گلي شيحمل گليبي العليل
_
بويه وتفارگني ابد ما حسبت
ايجوز تبعد بس ترد انه گلت
بويه دمعاتي اعله فگدك وزعت
ودمعي صار بفرگتك ماي السبيل
__
بويه لمن ودعت عندي شبگه
گلبي بس الهم يغالي رافگه
انه متعوده اعله حضنك اشبگه
وتالي حضنك عافني وحيلي يميل
__
رحت عني وانه اصرخ يا حسين
شلون عفت ابنيتك بهذا الونين
ياحنين وكلشي منك بي حنين
حتى لو عايفني هم فعلك جميل
_
گلبي اخذته وياك يالغالي ومشيت
انه لوداعك حزينه شگد نعيت
بويه اخذني كتلك ادخيله ونخيت
خذت گلبي ماترد انت الدخيل
___
بويه من گلبي اخذته يواسي بيك
وخاطر يخبرني لو شر مر عليك
والله لو اگدر زحف انه اجيك
من اجه بروحي حزن فگدك دليل
__
#حسين_علي_الياسري

يالهواشم    حملوا ضعني.
هذا ضعن اموادع لهاي المدينه
وخلوا ذكرى.    بكلشي بيهه
حتى تذكرهه اذا تشتاگ لينه
ومن دمعكم.    شربوهه
بلكي بيهه تخضر الرحمه اللي بينه
من نودع.      ما نجيهه
ورايحين الديره بس متحن علينه

رايحين الديره ما تعرف حنان
ورايحين الناس ماعدهم امان
ودعوا ضحكات التلاقي الماترد
راح ياخذنه بعد جور الزمان


هذا النداء    يا آل هاشم
لكربلاء.         بلغوا الفواطم
لاهل البغاء.      لا ما نسالم

حان الوداع .        حان الوداع      
___
يالهواشم.        ودعوا كلشي
هذا الوداع الاخير الما يردنه
وهايه آخر.      مره بيهه
نودع الگاع اللي بيهه اندفن جدنه
وراح نمشي.     عنهه غربه
ومانردهه نغرب الديرة لحدنه
راح نگصد.       ناس گالوا
وادعوا حبنه ولكن همه ضدنه

حتى القي الحجه عالگالوا تعال
يالهواشم حضّروا نوگ وجمال
وخل تركب زينب بهذا الضعن
خلوا تركب زينب وباقي العيال

زينب اجت     ولبست حزنهه
بهيده نعت.   .   عاليمشي عنهه
واتعاتبت.           ويه متنهه

حان الوداع.        حان الوداع
    _
خيتي زينب.     هذا هودج
بي يصعدچ كافلچ عالناگه بيده
من تسمه          كافل اخته
هو اللي يكفلچ يزينب انه اريده
ذو الكفاله       وگد مهمته
هو اللي يوافي الكفاله بدم وريده
ومايرجعچ.      من نسافر
من نروح الديرة الموت البعيده

هو راح ايكفلچ بهذا المسير
ومايرد وياچ ومصابچ چبير
هالضعن يرجع بلا اخوه بعد
هالضعن طالع عزيز يرد اسير

هذا المصير.      وهاي المصيبه
وصوت البچي.   يكثر نحيبه
عيلة امير.          ترد غريبه

حان الوداع.       حان الوداع
     __
وكلنه نمشي.    وتبقى مِنّه
ام البنين الوفيه تراعي داري
يمهه تبقى.       العليله
تمسح المدمع لون من عدهه جاري
ويانه دزت.      كل ولدهه
يعني دزت كل بختهه بضعني ساري
وبالكفاله.         هي تكفل
من بقت ويه العليله تضل تباري

راح يتخلد ذكرهه ويه الطفوف
وتنذكر كلما يذكرون الچفوف
هي صح متروح ويانه وتضل
بس گلبهه اعلينه كل لحضه يطوف

تبقى بحزن.      تنطر خبرنه
بليل اليجن.       تسبح بسمنه
وتطبگ جفن.     وتحلم رجعنه
  
حان الوداع.     حان الوداع
      ____
يالعليله.         خل اكلمچ
بويه ماترحين يبنيتي الحبيبه
گلبج انتي.       لا ميحمل
يموت من ايشوف گطره من المصيبه
وانه اعرف.      من نسافر
گلبچ اعله الفرگه مايبرد لهيبه
بس يبنتي.       هذا الافضل
وهذا امر الله وبعد كلمن نصيبه

بويه الفراگ اهون بهذا المصاب
بويه متحملين شوفي اعله التراب
بويه سوط اعدانه  ميحمله متن
عد عليله وماتحملين العذاب

سب وضرب.    ميحمله گلبچ
وماي الشرب.     محد يشربچ
وشام وغرب.      وسوط اليضربچ


حان الوداع.          حان الوداع
___
#حسين_علي_الياسري
تمت بتاريخ
ليلة ٢٩ رجب ١٤٤٢
ليلة يوم الاحد
١٤/٣/٢٠٢١

ماذا تفعلُ الأقدار.  ما في كربلا قد صار
           إني اسألُ الاخبار
               _
عليله انه وتزيد العله من انشد
على ضعن المشوا مابي امل ويرد
اشوفن بس دمع عيني عليه يرد
يگلي الراح مثل الدمعه من اتهد

دُموعي من اجابتني.   لن يبقى سوى حزني
         قلبي صارَ يكوي النار
              ____
أناشد وادري بالاخبار تلچمني
بس الراح مني اهواي ويهمني
دمعه و واگعه امن العين شيلمني
وانه فراگ وجه حسين عذبني

فُراقٌ كيفَ احمِلهُ.   وقلبي لا يؤمِّلُهُ
          سوى ماقد بقى في الدار
               ____
أناشد عالحصل والصار بارض الطف
عيني من القلق عاميهه كثر الرف
كد ماجفني ضل يرف ولا بد خف
وگلبي اللي يدگ بسرعه لو يوگف

ذا خوفي يؤرقُني.     عزيزٌ قد يفارقُني
            ماذا يخفى في الأسرار
             _
اسأل عالقدر شمقدر و وني
لجم گلبي ولا اضنه يفرحني
اعرفت ناوي القدر باحبابي يجرحني
وترد منهم ثكالى وما تلم حزني

ضعنُ العز قد اسرى. فيهِ ترجِعُ أسرى
فيهِ للسبي آثار
__
ليش يرد ضعن اهلي بلا حسيني
اسأل ياقدر متشوفه ابد عيني
اعرفت ناوي القدر بعده شيبقيني
بس جروح والذكرى اللي تاذيني

موتي سوف القاهُ. لاعمراً سابقاهُ
ذا حزني بقى تذكار
_
#حسين _علي _الياسري

ويلاه راحوا هلي. ويلاه راحوا هلي
__
عني المشوا خلوني. مخطوف وجهي ولوني
باقيلي دمع عيوني
يصبر علي. من اذكر الراح
ومانساية ولا لحظة. ضعن المشوا شيعوضة
بعله وفگد متمرضة
وانه شبدي. بس اصفج الراح

بس اصفج بچفي بقه ودموع العيون
ما باقي شي عندي بعد. وبحالتي شلون
وجفوني متروسه دمع. شينشف الجفون

يادمع هد على خدودي من الحزن
ياهو اليرد. ليه اهلي من اون
بعمري يحصد. هالحزن كلما احن

ويلاه. راحوا هلي. ويلاه راحوا هلي
___
بيا حاله صاير حالي. وانه انجرح دلالي
وبس الدمع يبرالي
بغربة صرت. وبعلتي احتار
مدري اعله علتي الحيره. لو عاللي عافوا ديره
هالحيره حيل اچبيره
عله وحزن. بجفوني الزغار

وتضاعفت علتي بحزن. وافراگ واهات
فوگ المرض صار الجفه. التارسني حسبات
مدري الضعن يرجع الي. مدري الضعن فات

وضعي صاير. مثل موت بلا وطن
گلبي حاير. هم يرد ليه الضعن
اليوم باچر. اللحظه جيل من الزمن

ويلاه. راحوا هلي. ويلاه راحوا هلي
____

بضعن اللي راح بنايح. بحسين ابويه رايح
وخلالي دمعي طايح
راح الابو. ماضنه الي يعود
فراگ الابو شخلاني. من حزني ارد لاحزاني
فراگ ابو اليمه اذاني.
وانه شصرت. من الحزن عود

راح الحسين بهالضعن. وفارگهه. الديار
چيفنه ودعني بدمع. وعني الظهر دار
حسيته ما يرجع بعد. وگلبي اشتعل نار

من فرگته صدري باحزانه انچوه
وبشهگته. اشهگ وماحس هوه
وگلبي علته. زادت ومامش دوه

ويلاه راحوا هلي. ويلاه راحوا هلي
_
وبعد الابو شرايحلي. اخواني عمتي واهلي
وعمي وخواتي شضلي
بس الحزن. وقارورة تراب
كالولي ضعن اليطلع. من عنده الاكبر يرجع
ياخذني من المدمع.
ولاهو رجع. لا دز الي كتاب

مو گالوا الاكبر يرد. ياخذني ويروح
ومارد واحس بكلبي انه ملچوم مجروح
گلبي يحس باكبره. عالگاع مطروح

گلبي حس بي. فوگ رمضه وبالفله
عيني تربي. الساتر الله من البله
ادعي ربي. عينك اعله العايله
ويلاه راحوا هلي. ويلاه راحوا هلي
_
بالضعن راح الكافل. المن دونه طولي مايل
الفراگه دمعي هامل.
راح الگمر. اليكحل العين
المدلوله جنت بضيه. وبنوره يعكس ليه
فارگني والضل بيه
ضلمة و اسف. وين الضوه وين

عمي مشه ودمعي يصب. وعيوني تعمه
بعد الگمر صار الضوه. ينشاف ضلمه
ياهو اللي يحتاج الضوه. وعباس يمه

جفني اله رف. شنهو يجري ياتره
ينگطع چف. من احس گابي دره
شنهو اسم طف. وبي يطيح اعله الثره

ويلاه راحوا هلي. ويلاه راحوا هلي
_
#حسين_علي_الياسري

حزنك تِضَّل بي يا ابو صالح
وما اضَنهه تكفيه النوايح
لا مايفض و ضعن الحسين
للشام دون حسين رايح

ضعنه جدك
راح ضعنه ياحسافه بدون جدك
ضعنه جدك
من يمر ذكره تعيش الغربه وحدك
ضعنه جدك
اينزل دموع الهضيمه التچوي خدك


والدمع هاي الليالي. ينزل ومايبقه غالي
شلون يغله والفواطم. فاجدات شگد غوالي

ياحسرتك. يابو صالح.
_
ضعن الحسين لغربه نازح
عاف الوطن بالهيمه طايح
حگك تون وجروحك هواي
وگلبك يضل كل ليله نايح

ياغربتك
نوحك جروح الفواطم ياغربتك
ياغربتك
لمن تسمع چلمة المسبيه عمتك
ياغربتك
دموم تصبح حمره من تجري دمعتك

حسرة دموع الغريبه. وكل حزن طف المصيبه
كلهن بگلبك يعيشن. شلون يتبطل نحيبه

ياحسرتك. يابو صالح
____
چلمة غريبه تشلع الروح
اكبر جرح مابين الجروح
لأجل العقيله المبچه ضعفين
لجرح الغياره حگك تنوح

عالغريبه
تروي كل غيره بدمعتك عالغرببه
عالغرببه
گلبك بكل لحضه يچويك بلهيبه
عالغريبه
يبقه حزنك مابرد جرحك يصيبه
عالغريبه

حزنك مخالط جروحك. تنوح واحزانك تنوحك
تبچي للصارت غريبه. ايعينك الله بضيم روحك

ياحسرتك. يا ابو صالح
___
ياهو اليعينك عالمصايب
وانت بوسط غربه يغايب
ياهو اليصير گبالك دموع
من تبچي للراحن غرايب

ثارك انته
يصبرك بحزن المصايب ثارك انته
ثارك انت
تروي عطشك من يحين الثار وكته
ثارك انته
ثار ربنه من ترده من غربته
ثارك انته

ثارك يبرد جمرتك. من تكض سيفك يمنتك
تصلب الجبتين والحگ. ترده وتسكن حسرتك

ياحسرتك ياابو صالح
_
#حسين_علي_الياسري
#٢٣ محرم الحرام ١٤٤٤ هجريا

واويلاه ياحيدره
__
الليله كلشي منكسر
__
ويلي وشعظم الامر
___
بالصبر ماضل صبر
__
والحزن من كل كتر
__
والدمع ينزل جمر
___
هام حيدر منطبر
__
واويلاه ياحيدره
___
واشعظمهه المعظله
_
ترست ارجاء الفله
_
بالمصاب ومعوله
_
انطبر عقد الوله
_
كلهه حزنانه اله
_
هذا هو اعظم بله
__

واويلاه يحيدره
_
يامصاب الينجلي
_
والحزن واضح جلي
_
انطبر حيدر علي
_
عايف الدنيا الولي
_
بهمنه واجب نبتلي
_
وواجب الدمعه اتهلي
__
واويلاه ياحيدره
____
بهامته السيف النزل
_
يافعل بيه انفعل
_
هدم اركان الأمل
_
انطبر خير العمل
_
حيدر اليهدم جبل
_
باچر انصيح ارتحل
__
واويلاه يحيدره
_
انهدمت اركان الهده
_
بسيف من سيف العده
_
الباطل شلون اعتده
_
على الحق وسيده
_
وطبر راس المائده
_
وسفه هذا اللي سده
__
واويلاه يا حيدره
____
#حسين_علي_الياسري

علي حيدر. علي حيدر
................
ابونه اليوم رايح
وعليه الكون نايح
...............
ينادي بيا مصيبة
فگد حيدر عجيبة
.............
بعد متضل محاچي
تضل بس البواچي
............
بعد حيدر علينه
منو مثله يجيبنه
............
علي طبروله هامه
وصبحنه احنه يتامه
..................
مصيبه شگد چبيرة
هَدم دين واميرة
............
انطبر خير البريه
واجت ليه المنيه
............
بعد ما منه جيه
ونواسي احنه الزچيه
.............
نواسيهه بدمعنه
ونلطم على ضلعنه
.............
ونواسي بفگد حيدر
نواسي ابنه الاكبر
...............
و نعزي حسين ابنه
بذكر اسمه بحزنه
..............
المواساة الچبيرة
لاجل بنته الاسيرة
..............
بزينب ياغرييه
الله شمصيبه
-..............