tgoop.com/hxzeu1/69377
Last Update:
هيبة العباس بالطف هيبه
الخوش زلمه ام البنين اتجيبه
**
وصته ام عباس بالطف وصته
موش ماي جنود يترس جربته
حيهم العباس صاح اعله اخوته
وكلهم ايركضون اجو يم خيمته
يله كلهم للحرب وربعتنه خل نطب
امنه رضعتنه الوفه والطيبه
الخوش زلمه ام البنين اتجيبه
*
هجمو امن اربع جهات اعليها
وماتت اتشوف الزلم رجليها
ابو فاضل كام هوس بيها
وصاح اله امن الوجود امحيها
عالنهر هجمو سوه وضاع عالجيش الهوه
ذوله معروفين وكت النيبه
الخوش زلمه ام البنين اتجيبه
****
هجمو وكاع الحرب حركوها
والجفافي اعله الضهر شدوها
الخيل تشرد للنجف خلوها
وكربله انجوم الضهر راووها
يا علي اشلون اربعه هجموا عله المشرعه
الجيش فر وخربطو ترتيبه
الخوش زلمه ام البنين اتجيبه
**
والنعم عز الله منهم والنعم
والزلم لو هيج لو ماكو زلم
حاصروها والعزم شال العزم
وكلهم العباس لازم ننتقم
اليوم يوم المرجله امنين تشرد كربله
فرحه عدنه وهيه عدها امصيبه
الخوش زلمه ام البنين اتجيبه
**
اتوكلو وسيوفهم تكطر دمه
وضل عجاج الخيل يصعد للسمه
كلبو الدنيه ولد حامي الحمه
وينه وينه اليوم طب للموزمه
جابو الروس واجو وبالمخيم هوسو
وابو فاضل جيش تارس جيبه
الخوش زلمه ام البنين تجيبه
****
ذوله اقوه اكلوبهم من الحديد
يا رعيد وجان عباس الرعيد
عالكنايص بس ابو فاضل يصيد
الزلم طفها واخذ من عدها اليريد
نزل هوه وخوته وبيده تخفك رايته
حلفو بزينب وذيج الشيبه
الخوش زلمه ام البنين تجيبه
***
تمت
تحسين الخفاجي
@HxzEU1
#قناه_نشر_القصائد_المنبريه
BY الناشر مصطفى المياحي🎤
Share with your friend now:
tgoop.com/hxzeu1/69377