عزاؤنا الوحيد أنها دُنيا فانية .

الموضوع مو بوجود شخص أو أثنين بحياتك ولا حتى الف ، الأنسان يحتاج ولو شخص واحد بس يكون مُريح وواضح ، شخص واحد يكون داعم معنوي بدون تعقيد وحجج مالها داعي لكل فعل يصير ، الأنسان ميحتاج أزيد من أنه ميخاف من اللي وياه أنه يروح ويختفي فجأة ، الموضوع مو أحتياج بگد ما هو وسيلة أطمئنان ، أحد وجوده يطمئن ويكمل الطريق مو يوگع ويه مطبات الحياة اللي متخلص ، القرب سهل الفكره باللي يگدر يحافظ عليه ، ويقرب المسافات أكثر ويه الوقت مو العكس.

...

هو صح أكو من يلفت نظره الشكل ، ومن يلفت نظره اللبس ، ومن يلفت نظره الثقافه ، بس الشيء الوحيد اللي يلفت نظر أي أحد ويخلي يسكت وما يعرف شنو يرد هي التربيه ، المتربي اللي يعتذر لو أخطئ بحقك ، لو شافك زعلان ومحاب تحجي يحاول يخفف عنك من غير ما يجبرك تحجي شيء محاب أنه تحجي ، اللي يدعيلك دعوه حلوه بعد يوم متعب وطويل ويبتسم بوجهك ، اللي ممكن تشوفه بس دقيقتين باليوم ويغير مودك ويخليك فرحان ، اللي يتجاهل سخافة العالم ويصمم أن يحافظ على التربيه اللي باقيه جواه ، ويتعامل بيها ويه الناس من غير ميگول " مو أحنه بزمن مينفع بي الذوق والأخلاق ".

‏تجذبني المراوغة اللغوية بشكل كارثي

وأرزقني بمن يهتم ب أسمي عند صلاتهِ
داعياً لي دونَ علمي يالله .

المحب لايمل تذكر ذالك جيداً .

لكل أنسان تركيبته الخاصه وأحتياجاته ، ماينفع كل الناس يتخلون بميزان واحد ، أكو ناس ميعرفون يتعاملون غير بلغة الأرواح ، لغة الأحساس ، لغة الحب ، هذي تركيبتهم ، الناس هذي الخساره بالنسبه ألهم مو فلوس ولا ماديات ولا عمر ولا وقت ، الخساره بالنسبه ألهم هي روح تستنزف ، مبادئ وقيم ، رحمه ومشاعر ، الناس هذي دائماً تشعر بالذنب لو عملت شيء خطأ ، الناس هذي يخافون يكونون ظالمين لو مجرد أخذوا حقوقهم ، الناس هذي غاليين جداً وتقدر تشتريهم بس بكلمه صادقه ، الناس هذي ماعدها لف و دوران ، الناس هذي حتى توصل لمرحلة أنها تصرخ وتگول كافي تكون روحها أنطفت ، الناس هذي ما ينفع تشوفهم بعينك وأنما محتاجين قلبك اللي يشوفهم ، وبصيره تُدرك بيها روعة جمالهم وقيمة حضورهم ونعمة وجودهم ، أحترام الفروقات بلغات التفكير والأحتياجات والأحساس بين البشر هو واجب أنساني ، وعلى قول الكاتب أحمد خالد توفيق : أن خاطبكم أحدهم بالعاطفة فلا تعجزوه بالمنطق فدعوا للأرواح متنفسها.

الأنسان بطبيعته يحب اللي يقدره ، ودائماً الشخص اللي يشعر بأنه مُقدر من اللي گدامه حيبذل كل مجهوده حتى يرضي ، واحد من مفاتيح الدخول لقلب الأنسان هو التقدير ، كلمه طيبه ونظرة حنيه كفيله أنها تخلي اللي گدامك ينطيك عيونه ، فلهذا التقدير يفرق هوايه ، گول لصديقك بأنه قادر يحقق حلمه ويوصل للي يريده ، گولي لصديقتج أنها حلوه وصداقتها ما تقدر بثمن ، گول لزوجتك بأن أكلها طيب وأهتمامها بيك وبأولادها يُدرس ، گولي لزوجج بأنه أنتي مقدره تعبه وشايفه مجهوده عظيم حتى ميقصر على بيته ، گولوا كلام حلو لبعضكم وقدروا ظروف بعضكم ، الحياة راح تكون أحلى لمن أطبطبون على بعضكم.

.

لن تجد في الناس كاملاً،
فأبحث فيهم عمن لا يؤذيك نقصهُ.