"الناس تتزاحم على شرب الأنهار
‏وأنا مكفيني عن الناس . . بيري

‏ماني لكل مضيّع دياره.. ديار
‏وماهو ضروري كلٍ يذوق خيري

-‏أنا فدا اللي ينتظرني على نار
‏إن غبت عنّه ما يعوّضه غيري - "

“القلوب يريبها طول الجفا ،،، والليل دوبه
‏يتهادى عطره الحسّاس وأحظى بإهتمامه

‏كل وجهٍ قد طويت اوراق ماضيه بصعوبه
‏تحمل الانسام بالغ شوقه ووافر سلامه :(

‏وين ابهرب والثواني واقفه شبه مغصوبه
‏عدّني يا ليل شرهاتك واعديك الملامة

‏-الضمير الحي ما تسكن من اللهفة حروبه
‏تربكه حتى نسانيس الهواء مدري علامه-

‏من ترك لي صورةٍ فالبال ماهيب محجوبة
‏يتشجر في زوايا القلب وده واحترامه

‏من تخيّر دربك المهجور عن باقي دروبه
‏لاقيٍ بعيونك الثنتين مضياف وكرامه

‏لا تلومه لو تشوف الصمت ذنبٍ من ذنوبه
‏وش يقول اللي يشوف إحساسه اكبر من كلامه

‏واحدٍ مهما تضيق بعينه الارض الرحوبه
‏ما يبين في عيون الناس ضعفه وانهزامه”

"أستحيت من المشاريه ومعاتب جفاك
‏وأقتنعت إن الغلا مايجي عرض وطلب

‏قلت أصدّ بـ كل حبي وتعظيمة غلاك
‏قبل أصدّ بـ قلب عايف وحالٍ منقلب"

"لا اختلَط في طويل الليل بارد نسيمه
‏زاولَت كل ضيقة صدر فيني عمَلها

‏مرّت اوّل رياح تهبّ عمري عظيمه
‏من كبر حاجةٍ في نفسي و كبر املْها

‏يا رفيق اُمنيات العمر . . و لّا نعيمه
‏بادلَتني بعدْك المُغريَات . . بمللها

‏كل ضحكة بعدك تمرّ وجهي سقيمه
‏ما امّنت نفسي الوجله و داوَت عللها

‏لا لفَحني الحنين اذكر خيالك و اهيْمه
‏و رحت آمرّ السنين الفايته و ارتحِلْها

‏ما خلَى البال و الصورة لا زالت مقيْمه
‏لو خلَت واسعات الدار من صوت اهلْها

‏صعبه آردّ‏ الايام القلال القديمه !
‏و عنْك الاصعب آلدّ البال و آسج و الهى "

‏"بالي اللي كل ليله ، والطواري تستبيحه
‏لين اعاف النوم ، واسهر ليلتي ، واجفى الوساده

‏عنْك ياكم انصحوني مير ماطعت النصيحه
‏قالوا : انسه ، قلت : مامن عزم ولا من إراده

‏وش ينسّيني عبق ماضي لياليك المليحه
‏مستحيل انسى ، لوْ النسيان لـ الانسان عاده

‏من نسى مَلامحك ياجعل ما ربي يبيحه
‏ومن سلا عن جرحك الله لا يذكّرْه الشهاده"

"أحس دار الزمان وغيّر أسلوبي
حتى أقرب الناس خلّيته وخلاني

أن جيت برضاي وإلا رحت مغصوبي
الحين ما كل شي يهزّ وجداني

يمكن كبرت أو نسيت العام مطلوبي
يمكن تغافلني الحلم وتعداني

والدمعة اللي تروح وتلتفت صوبي
تركتها فالضلوع وصرت وحداني

يا جروح الأيام ما ملّيتي دروبي
خليني أرتاح لو مرّه على شاني!"

‏"على سبيل الصبح ،، ماشفتوا أحباب!
‏كانوا هنا بين النظر والمشاعر

‏عهدي بهم في جمرة اشواقي : أطياب
‏راحوا مثل كلمه ، وظلّيت .. شااااعر"

"احب اطول مع الغيمه مشاويري
‏واحب ريح الهوى و السيل له خنه

‏و احس لون السما يشبه تباشيري
‏و يشبه قدر ربي اللي ما اعرف عنه

‏ يا جعلني مثل لونه في نظر غيري
‏و الطيّب ظنون يا جعلي على ظنه

‏رب المطر لا تحاسبني بتقصيري
‏حاسبني برحمتك لين أدخل الجنه

يا الله سحابة بخت تروي مقاديري
‏الين وجهي يوصف في ضّحْك سنه

‏و أعيش نفسي عزيزه في كنف خيري
‏اكبر من الحاجه و اكرم من المنه"

"تيبّس طارف أشجار الكلام وما قدرت اجيك
‏حداني عنك تأنيب الضمير و دافع مروّه

‏تناسيتك رغم هذي السنين وقلت لك ناسيك
‏وأنا اللي مات في برد الكرامه ما شعم ضوّه ."

‏" يا كم مرّ سبت مْن التحرِّي ، وعوّد سبت
‏لكنّ الوعد لا من عتق مشرقه دارك

‏أنا اللي سقيتك من بياض الوجيه ، وغبت
‏ولا جيت ليل ، ولا أقتطفتك من أسوارك

‏متى ما أعتراك الشكّ في ما مضى ، وأرتبت ؛
‏أنا أقرب من مْزوحك ، و ضحكات زوّارك "

" خَلّ الندم عنْك، ماينفع كثير الندم
‏مادام لك عين يقوى جفنها للمنام

‏عن لا تميل الدروب ولاتزل القدِم
‏ماني مناظر وراي ووجهتي للأمام

‏إن رحت عنّك بدون أسباب لاتنصدم
-‏عندي سبب وقتها.. لكن ماعندي كلام -"

‏"معي قلب لا هبّت عليه الهبوب يحنّ
‏يا ويل القلوب القاسية من عذاب الله"

"‏دمعي عليك استكثره لا ذرفتك
‏انا لـ نفسي شرهتي و اعتذاري

‏ندمت يوم انك خطا واقترفتك
‏إِلين خليت الفراق -اختياري -

‏ما عادك بعيني مثل ما عرفتك
‏مثلك مثل غيرك ، حضور وطواري"

"فدى ضحكةٍ غابت وصبري بعدها طال
‏ما خلت بـ جوفي غير غصّه وتنهيده
‏
‏خذته الليالي والليالي طويلة بال
‏لا قفّت لها في شي ما ظنّي تعيده

هو اللي غيابه مرّ ومفارقه قتّال
‏وهو اللي تبي تفنى عظامي وأنا أريده"

" تحت الثرى وجه صارت رجعته مستحيل
غابت معه كل ضحكة كنت معتادها "

" والله ما أنساك لو ينسى الحمام الهديل
حتى توافيك روحي عند ميعادها "

"‏زعلني الوقت والظاهر نسيت ارضا ،
‏مدري الصبر غلطتي والاّ الوفا عيبي ؟
‏
‏محتاج قلبٍ يطلّعني من الفوضى ،
‏يشعل بصيص الامل .. ويعيد ترتيبي "

" قبل توثّق كبار ظنوني عراها
ما فيه حالٍ يمر العمر يؤسف له

لي مدةٍ من ليال الشِعر و غناها
قبل لا يضنيني الاهمال و اسرف له

و قبل لا تلفظ ورقة الخيبه اسماها
بياع الاوهام و النمّام و السفله

نفسي لو ان الشعر يرضى من رضاها
يا مرحبا بالرضى اللي ما اتكلف له

لو ان في بعض الافكار اتحاشها
اخاف لا يتّقد جرحي على القفله

يا جعل ليله تكبّرني .. معاناها
فدا من العمر ضحكاتي و انا طفله

ترکت رغباتي الحلوة لـ مجراها
عسى ما تأكل فوادي وتْحسّف له

من ضرّ روحي سنين الود ينساها
لا يتقي من غضبْي و لا أتحلف له

لكن نفسي من يشوّه نواياها
يروح منها الرجى يائس و هي جفله

يعيش في عيني الصادق لو ابكاها
لين يتحلفني من الشكّ و احلف له

طبيعتي في العلاقات اتحاماها
اللي أحبه ... ربيع العمر ياقف له

مشاعري اللي تصبّ بنارها ماها
يا لو على روحي أن جت بتّكاتف له

اعزّ داره و دارٍ سافر و جاها
و أعادي عداه و أقف و اتطرّف له

خسارتي فيه ماني بـ اتحرّاها
- غير الله يعوضه فيني و آسف له -

تذبل من البعد روحٍ قربي احياها
في حزةٍ صورة الذكرى تخطّف له

يا من لـ بنتٍ صفَت على مسمّاها !
عيّا لا يلقى وفاها قلب منصف له . "

‏" سيّد البال .. ما لك في مثانيه جرّه
‏عقب ما كان لك مجهام فجر و مساري

‏أنت لك عام ما فكرت ليله تمره
‏و أنا لي عام ما عندي من الشعر طاري

‏يا حبيبي و أنا ليه أنتظر و أتشره
‏دام ما أنته مقدّر شرهتي و إنتظاري

‏أطلب الله و أنا راضي بـ خيره و شره
‏و أتحرّاك لو ما لك وعود و مواري

‏علّ لي حسنةٍ و أعمال خير و مبرّه
‏يكتب الله جزاها جيّتك في جواري

‏و أتباشر بـ صبحٍ جايبك بـ المسرّه
‏و ينزل بـ وجهي الضحك و تشد العباري

‏أيه أحبك و أباهي بك نجوم المجرّه
‏أنا داري لو إنك ما أنت لـ الحين داري

‏الجفا برد — يأخذني على حين غرّه
‏و قلبي يميل من نسناس ليل الطواري

‏لا تخليني لـ جيش الحزن و المضرّه
‏لـ البكى سيفٍ أصقل و لـ همومي شباري

‏خَيّروني و أنا نفسي عصيّه و حره
‏و الخيارات ما حصّلت فيها خياري "