СапÆ - Telegram Web

СапÆ

«Неужели не оценила достойно?
Нет, видно, не судьба. Бог
Устроит к лучшему.
К о с т а»

🔻Ахæм ныхæстæ Хетæгкаты Къоста ныффыста, кæддæр Гайттаты Раисæйæ цы къам райста, ууыл, æмæ йæ фæстæмæ чызгмæ арвыста. Уый уыдис 1896 азы. Поэт базыдта, Раисæ чындзы кæй ацыд, уый, æмæ йæ фæндтæ йæ хъуыры фæбадтысты.

📄 Къоста уарзта Раисæйы æмæ йæ курынвæнд скодта. Чызг дæр æм куыдфæндыйы цæстæй нæ каст. Фыстæджытæ æрвыстой кæрæдзимæ.

«Дæхи "æгуыдзæг Къоста" цæмæн схуыдтай? Ау, уæдæ хæрзхуымæтæг, Хуыцауы комытæфæй цух, иннæтимæ иу джиппы уагъд уæвын – иудзырдæй, мæхуызæн уæвын – дæ зæрдæмæ фылдæр цæуы? Нæ мæ уырны. Фæлтау, ныр цавæр дæ, ахæм у кæддæриддæр. Фысс мæм, цыддæриддæр кæныс æмæ кæнынмæ хъавыс, уыдæттæ», – афтæ йæм фыста Гайттаты Раисæ.

Къоста йын йæ фыд Иналыхъимæ тынг хæлар уыд. Сæ иумæйаг зонгæ В.Х.-йы йæм барвыста. Уый Къостайæн фехъусын кодта Иналыхъы дзырд:

«Иналыхъ мæм ссыд æмæ мын афтæ загъта: "Мæ чызг Раисæ бирæ хорздзинæдтæ фехъуыста Къостайы тыххæй, стæй йын тынг аргъ кæны, фæлæ йæ нырма никæмæ фæнды мой кæнын"».

Уымæй бирæ рæстæг нæ рацыдаид, афтæ сæм минæвæртæ барвыста афицер Тускъаты Бета. Дыууæ мыггаджы бафидыдтой. Бета ирæдæн йæ иу хай бафыста. Октябры хъуамæ уыдаид чындзæхсæв. Фæлæ Раисæ æгъдæутты сæрты ахызт, æмæ кæд Тускъатимæ фидыд уыдысты, уæддæр чындзы фæцыд, Уæрæсейы цæргæйæ чи баззад, ахæм афицер Георгий Келермæ.

Къоста та Иналыхъмæ фыста:
«Мæ уарзон адæймаджы амондджын скæнынæн æгæр мæгуыр æмæ ницæйаг дæн, Иналыхъ. Афтæ къæйных æмæ рæузонд нæ дæн, цæмæй йын æфсæст цард æмæ æвæлмас амондæй зæрдæтæ æвæрон. Нæ! Мемæ йæ цард баиу кæнын кæй бафæнда, ахæм сылгоймаджы ссарын зын у. Уыимæ хъуамæ æнæмæнг ирон уа».

Раисæ æмæ йæ мой амондджын цард кодтой, фæлæ Келеры 1937 азы æрцахстой æмæ нал æрыздæхт.
Сылгоймаг та йæ амæлæты бонмæ цæстыгагуыйау хъахъхъæдта, Къоста йын йæ къамыл цы фæстаг ныхæстæ ныффыста, уыдон.

#таурӕгъ

⚫️

Дæхи «СапÆ»-йыл бафысс

Please open Telegram to view this post