خيال البوسة بشفافك يلم خوفي


كاظم لاله

گضَت وٱلنّار منهِن ما نسَت عود
بَعَد نَهرَك عَليمَن جاي هادود ؟!

عُمُر مِلح العِتَب ينهَش بالعروگ ..
شبُقى و هسّه اشتهيت تصير حاصود ؟!

ضَبابك ما ترَك لعيوني نيشان ..
يِزِتهَه لعِتبِتَك مِن تعطَش اردود ..

شنو الوازاك تكسر قَفلَه و تفوت ؟!
منو الدَلّاك باب بصَدري مَسدود ؟!

أَنَه ٱلكاتلني مو مَهضوم عَٱلباب
چنت ما أَدري گَبلَك باب موجود

- مصطفى الموسوي