tgoop.com/krarmharbalmalki/536
Last Update:
بين الأبو وبين الضنه هاي العزيه
إبوحي الجرح نشتم حرك خيمة سبيه
إدينا أمن الحزن تندل الصفاح
تعال إنوح عالظل فوك الرماح
بويه وينك
بويه وينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
دافي يالكلبك شجي
هل محرم. ما تجي
اعله سطح الدار رايه علكينه
يالجنت بالطف تحس
بالعزا. امحزم. أمس
ابثوابك عالحسين إشكد بجينه
بالأبو جان الولد
عازه ما شايف أبد
وهسه أبعازة إعيونك بقينه
ريتك تجي واتشوف الحنان،، بويه
لحسينك امسوين صيوان ،، بويه
بويه وينك
بويه وينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ما الك بينه وأثر
يالتصب دمعك نهر
وحلات الدمعه بالحب التنافس
جنت من توكف علم
تنطي دافع للخدم
جفك باللطم منطيني واهس
من صرت حد ما متت
جلمه تجرح. ما كلت
ويجرحك لو يمر طاري المحابس
تهضمنا جلمة وين نلكاك،، بويه
ريتك تجي ونتلاكه وياك،، بويه
بويه وينك
بويه وينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
أمن الجرح وحي الدمع
يبني بسمار وضلع
ويبني وياك خيمة حُب دمعنه
إستوحى من حب كربلا
السانك إيرتل هلا
إذا مشايه مروا من سلفنه
ابخيمه كلبك محترك
تشبك الزاير شبك
ضيف حسين محسوب أمن اهلنه
يابو المحنه تريدك الدار ،، بويه
إتلكه الإجوا لحسين خطار،، بويه
بويه وينك
بويه وينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
كلبي جم صفنه ارتكب
باكني ويحدي إبتعب
ياخذني السما اعيونك ضحيه
مو وكتهن غمظن
إعيونك إشكد مابجن
بعد بيهن دمع للغاضريه
من رحت مات الحجي
إعيونك إشتاكن بجي
تعال ويانه إنحب عالسبيه
بعد البجن واضلوعي لكصار،، بويه
بالخدمه الك جم صوره تذكار،،بويه
بويه وينك
بويه وينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
كرار أبو مهدي المالكي
BY كرار أبو مهدي المالكي🙏
Share with your friend now:
tgoop.com/krarmharbalmalki/536