tgoop.com/krarmharbalmalki/571
Last Update:
من الشام إجت زينب بس جيتها يا جية
يحسين الإجت وياك هسه تكول مو هيه
غيّرها السبي والسوط ، مايرحمله علويه
ما تعرفها يحسيـن
زينبكم قبل ويـن
بيها اشسوت الشـام
اوگفات الدواوين ...
محـد الها واتنـوح
وبيها معذّبـة الروح
بكل خطــوه تصيح آه
تـون و تفـز الجــروح
خويــه ..... ونتهـا يحسين وبــچت
خويــه ..... محٌد تلگاهـا الأخـت
خويـــه ...أمن الشام زينب شيّبت
**،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
إشكثر عمه وبعد نوصل يبو الباقر تعب حالي
بعد شمرة دمع كَلها يعمه ونوصل الغالي
أوّل مره ذاك حسين ما كام وتعنالي
بعد رحلة عذابات
رد ظعن السبيات
ومن طب كربله بنوح
تلاكه المسبي والمات
نوّخ ظعن الاطياب
يمك يابو المصاب
أوّل مرة يحسين
نشوفك حدرالتراب
خويه،، زينب إجت ويالظعن
خويه،،، وابكربلا دفنت وطن
خويه،،، وإشكد مدامعها بجن
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
إجت بس بطلاع الروح سبيــة وحيــل ما بيها
يعت بيهــا الحزن والشوگ واتون اعله اهاليها
شمرت روحها أمن النوگ ذبتها اعله غاليــها
قبل لتنوّخ النوگ
ذبت روحها بشوگ
ما تانت يالحسين
گلبها عليك محروگ
تكلك كلهن إحذاي
سكينه وزينبك هاي
بس اعذرني يحسين
رُقيـة ما هي وياي
خويه،،، درب الجرح شفته ورحت
خويه،،، أمن الخيمه والحد الطشت
خويه،،، يا ليتني وياكم. متت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
كعدت عالكبر تنعى. ذهيله وما حجت كلمه
ماكالت خرابه وشام خاف حسينها تلجمه
بكلبها إشكد حجي وعالنوك الهزل ماسولفت يمه
إبسبب مايحمل آهات
ماصاحت خرابات
بعد ما عايز جروح
واتكله رقيات
وَلَو شافاهن الراس
سبايا أبين حراس
للطف ردن إنوب
للبالحافر إنداس
خويه،،، هاي هيه وخلصت
خويه،،، زينب عليك إشكد بجت
خويه،،، ردتلك الراس وإجت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
كرار أبو مهدي المالكي
BY كرار أبو مهدي المالكي🙏
Share with your friend now:
tgoop.com/krarmharbalmalki/571