Mendan ko'p moliyaviy maslahatlar so'rab turishadi. Masalan, qanday aksiyalar olish, qaysi moliyaviy instrumentlarga sarmoya qilish… Bunday maslahatlar berishdan men o'zimni doimo tiyib turaman.

Lekin, bugun bir maslahat bermasam bo’lmaydi. Ya’ni, teskarisi - nima qilmaslik haqida ogohlantirmoqchiman.

Kriptovalyutalar, turli tokenlar, tangalarga sarmoya qilishdan o’zingizni saqlashni tavsiya etaman.

Pul nuqtai nazardan ham, vaqt nuqtai nazardan ham.

Tushunaman, FOMO ko’pchilikda bo’ladi. Lekin, irratsional bozorda ratsional bo’la turish cho’ntakka ham, ruhiy salomatlikka ham foydali. Ayniqsa hozirga, ijtimoiy tarmoqlarda inflyuenerlarning odamlar e'tibori va hissiyotlari bilan o'ynashib ularni bir narsaga ishontira olish imkoniyatlari oshgan zamonda. Va, ayniqsa Amerika Qo'shma Shtatlarining prezidenti shunday narsalarga aralashib, prezidentlik inauguratsiyasidan ikki kun oldin o'z mem-tangasini chiqarib turganda. Zamonamizning eng ochiqcha moliyaviy firibgarligi ko'z oldimizda mujassam bo'lmoqda desam ko'p adashmagan bo'laman.

@uzbekonomics

Xitoyliklar "DeepSeek" deb nomlangan sun'iy inellekt modelini ommaga oshkor qildi. Bu yangilik Amerikaning shu sohada non topib yurgan kompaniyalari va jamoatchiligi orasida katta shov-shuv va vahimalarga sabba bo'ldi.

Boisi - "OpenAI" kabi kompaniyalar milliardlab dollar va yillar sarflab yaratgan LLMni (Large Language Model) Xitoy kompaniyasi sanoqli oylar ichida va bor-yo'g'i 6 million dollar bilan qura olgan.

Modelning qudrati benchmarklarda "OpenAI"ning eng so'nggi "o1" modeli bilan deyarli teng, hatto ba'zi yo'nalishlarda ustun.

Bu ham yetmaganidek, model "Open source" sifatida taqdim etildi, ya'ni omma va boshqa kompaniyalar undan bepul foydalanishi mumkin.

Yangilik AQSh fond bozorini ostin-ustun qilmoqda. Ayni daqiqalarda "NVIDIA" kompaniyasi aksiyasi 17 foizga tushib ketdi. Sun'iy intellekt bilan ishlayotgan boshqa kompaniyalarda ham shu ahvol.

Ko'pchilikning boshini qotirayotgan eng katta savol shu: Xitoyliklar bunaqa modelni 5-6 million bilan yarata olsa, biz milliardlab dollar sarflashimiz qanchalik o'zini oqlaydi?

Xitoy sun'iy intellekt sohasida AQShga yetib olmasin deb, Vashington "NVIDIA"ning eng kuchli chiplarini Xitoyga eksport qilishni taqiqlagan edi. Ammo bu ish bermagani yaqqol ko'zga tashlanmoqda.

Xitoyliklar nafaqat bu taqiqlardan omon chiqa oldi, balki sun'iy intellekt sohasidagi kashfiyotlarda Amerikadan endi hatto o'zib ketishi ham mumkin.

@bmamadiev