مامُون الخدِر .. سالِم صيواني
وبماي النظَر .. دارَتني اخواني
ماضي ومَيعود
راح اويه الجُود
وحسين الغالي
**

تمُر الذكرى بالخاطِر
وتِهيّج صفنة اظنوني
وٱحِس لسعة ألَم بيها
مثل سوط العَلى امتوني
انجِمع بالروح .. حَنين ونوح
وامل مذبوح .. بالطف خلّيته
وزَرع لسنين .. جنِيته اونين
أصد لا وين .. محروگ الگيته
ياتعبي المُضه .. ذِكرك أذّاني
مامُون الخدِر .. سالم صيواني
**
صوَاوين البخَت كلها
صُفت جمره ورماد اسود
وحلم ردّتها مثل اول
صُبح من السراب ابعَد
صهيل اخيول .. عليّه اتجُول
بهذاك الچُول .. تسحگ اطفالي
يماضي الطِيب .. حرام اتغيب
ويجي التعذيب .. يگصِي بأحوالي
وبنص الغرُب ..
أوگف خلّاني
مامُون الخدِر ..
سالم صيواني
**
توِن ذاكِرتي موجوعه
بأثَر دخنة سِمه ايامي
بيها الخنگه شَهگة خوف
وتترِس نفسي الضامي
بنهار وليل .. تهِد الحيل
بحوافر خيل .. يندَاس احساسي
الضوَه البالعين .. مشه اويه حسين
ودمع لِونين .. بالمَحجر جاسي
ومِن راعي الخدر ..
طارِش ماجاني
مامُون الخدِر ..
سالم صيواني
**
الشمس شالَت رمح باشِط
يسدّد سِنـّـه عالهَامه
ومِلح بالهيمه چنه السيف
يبضِّع جرحي بالامه
وحبل بالإيد .. يحِز لوريد
وشِماته العيد .. عدهُم بالعاشر
حضِن لاخوان .. صُبح دخان
واجَل ماحان .. يجبُرلي الخاطر
واسموم التِرب ..
غيرت ألواني
مامُون الخدِر ..
سالم صيواني
**
أنا الحُرمه الچبيرة سِن
يجرُّوني بحبل صَعبه
أناشد والتِفت واسأل
وعلى مَد البصر غُربه
واجه السلّاب .. يدَور اتعاب
ذبح الاحباب .. ترچيه وخاتَم
خذه وماجاز .. عليّه اجتاز
وشِتم لعزاز .. ياسوء ابنادم
انواع الغِصص ..
بالطف راواني
مامُون الخدِر ..
سالم صيواني

==============
لقمان بدران

بسمِ الله نبدِيها
والدمعات نجرِيها
بالآهات نحيِيها
أيام الحُسين
**


على اضفافك وِگفنه اگلُوب عطشانه
يَـنَبع اليسگي دِنيه ورُوحه ظَمآنه
نتزَاوَد على الخِدمه ٱلله خلّانه
وكل واحد وِگف يخدِم يگول آنه
أفدي حسين بعيوني
وعَبِد عباس سمّوني
عاشگ لاتلوموني
أيام الحُسين
**
الفخَر لمّن نِرُوح ونُوگف بخَيمه
نخدِم واحنا كِلمن يلگه تَقيِـيمه
مِن مَالِك أمُرنا العالي تعظِيمه
أوّل ثاني ثالث والبَـذِل قِـيمَه
الرتبه الباري ينطِينه
اشما نِـبذِل يعلِّـينه
بهـاي ايّام غالِـينه
أيام الحُسين
**
مِشَت بِينه الليالي ورَدّت الخدمه
واجَت نعمه وحَكيم اليِشكر النعمه
سَفينه للنجاة حسين أبو اليمّه
ورُبَح كِلمن رِكب بيها وكِتَب إسمه
فاز بأُولى وبأُخرى
يحظَى بدِنيِته بنَظره
مِن الطاهره الزهره
أيام الحُسين
**
عرَفنه حسين عُون المُضطَرِ ايطلبَه
عرَفنه الرَاحه مِن هم التعَب گِربه
ومَلاذ آمِن يظل بظرُوفنه الصعبه
وطن حُبنه الچبير وفَرگِته الغُربه
مالِك كل مشاعرنا
نخدِم عِنده من صِرنا
واحلى ايام لِتمُـرنا
أيام الحُسين
**
التَعب عِدنا بخِيامك عِيشة التَرفه
ولهيب المُوگَد ايبَرِّد لظَى اللّـهفه
الخِدَم يلگه الفرج من مُعضله الكَلفه
ومريض اليِخدم بيوم الطبُگ يشفه
حسين الشَرَّفه الباري
آنا اختَرته باصرَاري
وِجهه وقِبله لانظاري
أيام الحسين

==========
لقمان بدران

بعِيد الماي .. صعُب طارِيْه
جِبتله ادموع .. أريد أروِيْه
طلَع مذبوح .. نَفس مابي
ياعَذابي
يامُصابي

**
صحرَه وشمس ماتنچِهب والمَي شحيح
وحتى الطيور البالسِمه امن الحر تطِيح
شلون الّي نايم عالرمل والدم يسِيح
ومن يطلُب الماي اليرِد حَد الصَفيح
على الشِفّه العطش راسم
تفاصيل التعب كلها
يمِل منّه العدو واهوَه
لسانه الدعوه مامَلها
يشِع بالنور .. ودِمه امغـطِّيه
جِبتله ادموع .. أريد أروِيه
**
هذا الّي متوَسِّد جمُر والقَدره هان
راسه بحضِن جدّه النبي بذَاك الزمان
هَز مهدَه فطرِس يطلُب امن الله الأمان
ريحانه نزلَت عالأرض من الجِنان
على ظهر الأرض مامِن
مثله انلَاگي ٱبن مُرسل
وملَايك الله بالعَلياء
كلها بإسمه تتوَسَّل
البشَر ياحيف .. تِجُور اعلِيه
جِبتله ادموع .. رِدت أروِيه
**
جابَت رِياح الفاجعه اصوات الوِنين
واعرَفته صوته وميَّزت نَبرة حُسين
بنِص السِموم آنا ارجَفت رجفة حَنين
وگبل الجِدم طار الگلب يطلُب مُعين
يرِد عني وعن الظامي
عدو انشال الرحَم منه
وجزاء الفِعله آنا اوياه
نحضرَه ونضمِن الجنه
وعلى السَوَّاه .. عَفو انجَازِيه
جِبتله ادموع .. أريد أروِيه
**
محتاره لمَّن مارِحت عِند الحبيب
يمكن أرِد عنّه العطش واصبَح طبيب
ولگليبه لموَجِّر ظِمه وجرحه الخَضيب
ماعِندي ماي امن اوصَلَه وأطفي اللهيب
ساقي العايله استَشهد
وشَح بَعده العَذب عِدنا
وصُبح مثل الحلم أمره
ومن اوجُوده أيَّسنه
عَجيبه الماي .. حلِم نلگِيه
جِبتله ادموع .. أريد أروِيه
**
زَخ الدمع بِيهِ الأمل عندي امن اجيت
حِيلة عَجِز لكن گلت لله ونِخيت
ربي ٱردَ ابرِّد جَمرِته العنده اعتِنيت
ولمّن وصَلته اتفاجَأِت آنه وبجيت
لگيته امَّدد ودامي
ولِچمَت صَفنِته اجروحي
وعرفته امفارِگ الدنيه
عَليه من اشمَرت روحي
ودموعي اهنا .. اذرَفتها اعلِيه
جِبتله ادموع .. أريد أروِيه

==========
لقمان بدران

https://www.tgoop.com/lukmanbdran1970

(ملمع)

لِسَيدِّي وَلائي   
لا يَنقَضي عَزائي
حَتى ظهُور القَائم
***
                              
إنته ماتِحتَاج مِن عِندي المِحبّه
وشنهي حَاجَاته الذي البَاري يحِبّه
آنا مِن أَهوَاك أرفَع نَـفسِـي رتبَه
وامشي وَاثِق للمَعالي وگاعي صَلبه
أُمسِي منَ الأكَابر   
وأكسَبُ المَفاخر
بِـدءاً بلَا اِنتهاءِ       
لِسيدِّي وَلائي  
*** 
بمَجلس حسين الذي هَيَّمني عِشگه
ربِّي إلهِمني البَچي وإرزِقني شَهگه
اوَّفِـق الچَفـين لِـمرِادَف الدَگّـه
حَته اُوگف بالحَشر وضلُوعي زَرگه
مُوَاسياً عَقـيله   
سَارَت على الهَزيله
بالضَرب والعَـناءِ     
لِسيدِّي وَلائي
***                                       
إنته تَاج الرَاس بي مِرتفِـع سُوگي
والعَشيره الّي يرِف بِيرَغها فُوگي
لَافِـتة حبّي اِكتَبتها بـدَم عِرُوگي
حسين حِزبي وكتلِتي وتيّار شُوگي
لصَاحبِ السِياده   
شَوقٌ منَ الوِلاده
يَجري معَ الدماءِ      
لِسيدِّي وَلائي  
                  ***                                       
دَرُب تَوفيقي ونَجاحي شلُون اَضَيعَه
وحَالي يلفِـيلَه الفقر ويسُوء وَضعه
وانَه ابجيب حسين اَمِد چَفي واطَلعه
امحَمِّل بخَيرَات تِملي السِـمه السَبعه
ذا واهبُ العَطايا      
وشَافعُ البَرايا
دَوماً لهُ ثَـنائي          
لِسيدِّي وَلائي  
                  ***                                       
فَضل منـَّك تقـبَـل امقَصِّر يجيلَك
ويلفظ اسمَك وبگلُب مُذنب يشيلَك
ولأن نُور الله وسَبيل الحَق سَبيلك
كُون أتوَضّه ابدِمَاي امنَ اعتِنيلك
تدُوسُني الحُوافر  
جسماً كَيومِ عاشِر
مَثلكَ في العَـراءِ      
لِسيدِّي ولائي
                                           ***
لليَـقـين البَاقي بسـنِين الخَديعَـه
حُجّة اَلله النَازِح  ابدِنيَـه الوِسِيعه
نِقسِم بطَبرِة عَلي وضَلع الوِديعَـه
عَزَه حسين انبِيع كلشي ومانبيعَه
سَنُكمل المَسيره    
للحظَـة ِالأخيرَه
ثأراً  لـكربلاءِ       
لِسيدِّي وَلائي

-----------------------------
لقمان بدران

البس سوادك
2024

أداء ..
حيدر الخليفي
غازي الساعدي
نائل المياحي

الشاعر ..
لقمان البدران

الحان ..
نائل المياحي
توزيع ..
احمد البياتي

الهندسة الصوتية ..
امجد كريم
تصوير ..
حمزة علي

مونتاج ..
محمد جواد
مخطوطة ..
احمد مؤيد
مصغرة ..
اشرف مهدي

تم التسجيل في استوديو خيام للإنتاج الإسلامي

تم التصوير في مقر
هيئة جراحات الطف
حسينية فاطمة الزهراء عليها السلام

تنسيق
السيد زين العابدين

https://youtu.be/oVZUB4ilgf0?si=pdFYeI3nNgd1UW-N

لا تِنسُوني  ..  لا تِنسُوني     
بكِل شربَة ماي اتذَكرُوني
**

لا تِنسـُوني بيوم العاشر
من نَاديت ومامِن نَاصر
طايح بين الجيش الكافر
حاير بس انظر بعيُونـي
**

ياشيعه آنه احسين الدَامي
المَحّد شايـِل مثل آلامـي
آنه المذبـوح  آنه الظامي
مِن وِرِد المـَشرَب مِنعُوني
**

ﮔالوا إرضَه ابحُكم الوالي
لـُو نـِفنـِي الأوّل والتـالي
ﮔلـْت آنه الحِيد المَـيبالي
وماأقبل بـالذل تـِدرُوني
**

خاطبتِ الجيش بهالحَمله
لو أﮔضي آنه ابأبشع قـَتلَه
المِثلي لا مَـيبَايع  مِثلـه
ولو مـيّة  وذرَه اتوذرُوني
**

ماي ابذِل  ماأشرَب منّـه
وماضُوﮔن بـَردَه وأتهَـنّه
بَاچر اسلَافــِي البالجنّه
من حُوض الكوثر يسـﮔونيِ
…………………                                                     
               لقمان بدران

عباس إذا ينعَد بٱلِف فارس
كلّش قليل ومن وُصَف قصّر
والصُولِته من يگدر اينافس
المِنها انگلب ماي الفرات احمر
**

شايل فرِق عن البَقيه ..
فرق واضح جَلي
وكل الخلگ بارض الوطيه ..
وَحَگ حيدر علي
اهمه الثَرى واهوه الثُريه ..
ابمَقامه المِعتلي
مامِن مَثيل ويشبَه الكافل
حتى البدر وَسط السمه بنوره
متزَاود اوياه واسمع الحاصِل
نحّاه أخو زينب واخَذ دوره
**
امجَرِّد حسامه لِبشَفُـرته ..
علامة زِلـزله
يرهِب إجاها فوگه رايه ..
شريعة كربلا
يرجف جرُفها شاهِدوها ..
وبدَت تتوسَّله
ها يالكفيل ادخِليك ارحمني
واخذ التريده امن العَذب واقبَل
تتراجف اجروفي يخُو الحره
من خوفي واترَاده إذا تزعل
**
چن موسى بس عصَّاته سيفه .. بالاعجاز انوِصف
طب للفرات بكل رهَاوه ..
نزل بيده وغرَف
ماي وقِصد بس ايتِحدَّه ..
العِرف والماعِرف
دگ جِدمه ذاك اوركَّـز الرايه
ومد چفه والماي العذب كضّه
شنهي العطش أذّن أذان الله
وراد الكفيل بمايه يتوضّه
**
هذا الأصيل الحرب فـنَّه ..
أمير المَشرعه
بخيمة عَفافه هايه إخته ..
العقيله امودِّعه
وغَفلة ثواني ماتمرَّه ..
وظروفه التِمنعه
ضمها ابعِيونه وطبّگ ارموشه
عن لا تمُرها النسمه واتمِسها
عنده ابغلاة اروَيحته وأكثر
وي نفسه تمشي الكافل ايحِسها

**
شامخ نزل والكل ينـفِّذ ..
إذا صدّر أمر
الحُور بجماله وبصفاته ..
تشُوفه وتنسِحر
بحر القوافي وبحضوره ..
وِگف يلقي الشعر
ياصاحب الرايه ٱنعِم واكرِم
باسمك يمالِك وگفة الكَلفه
وياواحد ادهُور البشر كلها
لو مَر وفاءك ترجَح الچَـفه

===========
لقمان بدران

من قديمي الذي أعتز به كثيراً ⬇️

يَايزيد الطاغيه إسمَعني زين
آنه زينب بت أمير المؤمنين
                          * *

آنه زينب بت مُحمّد والكِتاب
يَايزيد ومنّي إسمَع هالخِطاب
إبشِر ابيوم الحَشر باسوَء حسَاب
وبعَـذاب النّار مِن الخالِدين
                           * *
إسعَه سَعيَك دَام بِيدَك قوّتَك
وكِيد كِيدك وافتِخِر بِبطَانتك
والله ماتِمحي ذِكِرنَه ابفِعلتك
ورَغم أَنفك دوم إحنه الفائِزين
                           * * 
يايزيد أيّامَك السُّوده عَدد
وجَمعَك الـملعون مَيظل للأَبد
واحنَه مَنصُورين مِن واحِد أحَد
واليِمُر بينه عِبَر للعالَمين
                           * *
رَغم سَبي العايله وسَلب الأمان
ورَغم كالأسرَى تِفُرنَه ابكل مكان
لا تظن بينه على الخالق هَوان
ولا تظن عندَك كَرامة صَالحين
                          * *
عَجب كلّ العَجب مِن هذا الجرَه
إبن خَير الخلق دِنيه وآخره
أَخَس خَلق الله يـﮔطَع مَنحرَه
وايدَه تـِﮔطر مِن دِماء المؤمنين
                          * *
وَكِت خَلّه حُرّه مثلي اتخَاطِبَك
وتِدخل ابمَجلس غَدر واتراقِبك
تِضرب اثنَايه الحُسين ابعُودِتك
وتِهتف بأشيَاخ بَدر الكافِرين

………………                                    لقمان البدران                                                                                                                                      

‏مقطع صوتي من Lukman

حَـﮔهه لو تطبِـﮒ سِمَاها اعليها       
كربله وسيل الدِمَه ايغطّيها
وعلي الأكبر وابو فاضل بيها
***

علي الأكبر وَي ابو فاضل سِوَه
السَاعِد ابشدّه على السّيف التِوه
عالفَوارس حَرّموا حتّه الهـوَه
هيّه شَـهـﮔـه والـﮔبر تاليها
***
مِشوا ﮔبل اجدَامهُم يمشي الرعب
والهُم بهاليوم بس يحلَه الضَرب
المَيمنه اعلى المَيسره انـﮔلـبَت ﮔلب
احتَار سَافلها ابأمر عَاليها
***
الخيل صَارت للرِكَبهه اتكَـلِّمه
إشرِد بروحَك تَراها الحَاطِمه
شلون ماينزِل غضب رب السمه
واللّيُوث اتعَاهِـدَت تفنِـيها
***
صوره رِسمَوا للشجاعه امعَدّله
علي الأكبر يرفَع الفارِس إلَه
وابو فاضل بالحُسام ايجَندِلَه
اوّذَر هاي الـﮔـاع يُوصَل ليها
***
وﮔف مَلك الموت بالطف مبتِسم
وكِتب فوﮒ الغيم : أمر ومنحِسِم
الاكبر وعمَّه الفوَراس والزلم
وكلها دون ابمَرتبه انخلِّيها
                ………………..                            
                                     
 لقمان البدران

هوسَات
""""""
أَسَد عنّه گِلِت واستَغفرِت ياناس
الاسَد شِنهي الاسَد وانجِيبه يَم عباس
مِن طَب عَالرِگب ماشِفنه ثابِت رَاس
(ويوم اتخـُوصَر عالحَد
قَبّط دفتر مَلْك الموت)
***
فِزَع فَزعَة عَلي وللعَسكَر اتعَـنـَّه
وبالمُوته اِنكِـتَب كِلمَن ﮔـرَب منَّه
حَيّرها العـقُول ابضَربته وفـَنـَّه
(الفارِس أصبَح يرجِف
مِن رَاسَه الرجلِين الخيل)
***
بالتاريخ مُـر وشُوفه عَنَّه اشگال
فارِس شُوفه يرعِب والغضَب چتَّال
نَگلَة جِدمَه سَوَّت بالأرِض زِلزال
(مَحَّد شَايف مِثلَه
رَايه البيدَه اتلـُوح الغَيم)
***
الفرَات ابدَم طُفَح واحمَر گِلَب مَـيَّه
حَصِد يحصِد صُبح مِيّه بأثَر مِـيَّه
گبْل السِيف صُوته ايجيب الِـمنِيّه
(اوحَـﮒ مِن شَال السَبعَه
اليوم الـﮔاع اترسهَه ادمُوم)
***
مِن حَيدر عَلي استَاذه أخَذ شَمرَه
شَجاعه وغِيرَه شَايل حُر واِبن حُرَّه
عَمِيد الجيش نيشَانه الزِهَـه اِبصَدره
(احسِين امعَـلگه بإيدَه
وكَافِل زينب ﮔلَّه اتصِير)

================
لقمان بدران

ودعوني من بعد

الرادود حسن الخفاجي
كلمات : لقمان البدران
النرويج / موكب غريب فاطمة ع
مؤسسة الامام المهدي عج

صاح صُوت الحزن من ﮔلبي الوَجيع                     
الروح الَك فدوَه يعبد الله الرّضيع
      *** 
             
يَبني ياشمعة حياتي ومُهجتي
واخِر اولادي يسَلوة وِحدتـي
بيك فجعَتني يرَاحل دِنيتـي
وبين اديّه اليوم اشوفنّك صَريع
الروح الك فدوَه يعبد الله الرّضيع
       ***         
صاح صوت الفاجعه وغطّه الفَضه
وبالجَوانح تستِعر نار الغَضه
وِصله من چَبدي بديّه مرَضرضه
وﮔلبي بين احضاني شِريانه ﮔطيع
الروح الك فدوَه يعبد الله الرّضيع
       ***         
عفيه ﮔلبي وطفلي باحضاني انعِدَم
وبين اديّه ايلُوج وبنحره السهم
الأُمَّه مافطمَتـَّه بالنبله انـفطم
وعلى شَربة ماي من عندي يضيع
الروح الك فدوَه يعبد الله الرّضيع
        ***       
صاح صوت الحزن من ﮔلبي الجَريح
اعلَيّه بيتي انهَار يبني يالذبيح
ومن دِمه الدمعات بمصَابك تـطيح
وضاﮒ بيّه اليوم هالكون الوَسيع
الروح الك فدوَه يعبد الله الرّضيع
       ***         
إلَك ألله يبني يحكُم بالـعدل
ويشهَد اعلى افعال هالجَمع النذل
ما سِـلم هاليوم شايب لا طفل
ولا مَره ولاشاب والمشهد مـُريع
الروح الك فدوَه يعبد الله الرّضيع
       ***         
يبني يانـور النَواظر والبصر
روح قابِل جدّك بـدم ِّ النحر
وﮔلّه ابـوي حسين بَعدي بالأثر
ونجتِمع كل احنه يم رب ٍ سميع
الروح الك فدوَه يعبد الله الرّضيع

              ============

لقمان بدران

              

ودَاعة الله ياحُسين      
ودَاعة الله ياحُسين
**

وداعة الله وَدِّعيته       
واندَبت ربّ البريـّه
ماتخـِيب اظنون ﮔلبي       
وانهـِضم بالغاضريه
وداعة الله ياحسين
**
سَلَّمِـت بيدك يربّي      
وِصلَه من ﭼـَبد الزﭼيه
حسين ريحانـة محمد      
وابن حمّاي الحميه
وداعة الله ياحسين      
**
ﮔلي من يِسرج جَوادي      
نـَاوي أنزل للثـِنيه
وانه أسمع مايـﮔول      
وأنحب وأفرِك بآدَيه
وداعة الله ياحسين      
**
عَفيه ﮔلبي وماأظنه    
يصبر ابهَـاي الرزيـّه
بيدي سَرج الموت جِبته      
اوحضَّرِت خيل المنيّه
وداعة الله ياحسين      
**
أفدي كل عمري لخوي      
ومُهجتي التِصبَح هديه
لَون تـِتعدّه اعلى خير     
ولـَون سالم رَد اليّه
وداعة الله ياحسين      
**
خويه أتمنى عِميت       
ولا شفت دارك خليّه
ورَيت خَام الـﭼفن لَفني        
ﮔـبل لا شُوفك رميّه
وداعة الله ياحسين      
**
خويه حلّـفتك بـبُوي       
وجدّي مَرسول البريـّه
من نـِويت اتروح عني       
ما ﮔـِلت زينب خطيه
وداعة الله ياحسين  
**
لو رحِت ترحل يخويه      
الفرحه وايامي الهَنيّه
اتوَدِّع الـﮕمره حياتي      
وتـِنزل الظـَلمه عليـّـه
وداعة الله ياحسين

              ===========

لقمان بدران

( ملمع )

سَارَت برِجلٍ نَازِفَة
من كل شئٍ خَائفة
مابَين أشرَار الوَرَى
ضَاعَت كَقِرطٍ في الثَرى
                                       
***

شلون ماشِفت الجِرَه البِتّك رُقيّه
ورَاسَك ايرَاقِب تَفاصِيل الرزيّه
تركِض بلا رَاي بـارض الغاضريّه
ومِن مَكان الگِـيد تصرَخ آ يَـدَيه
ماجِئتَ لِي ياوَالِدي
دَمِّي تجَارَى من يَدِي
إِلحَق بهَا يامَن تَـرَى 
ضَاعَت كَقرط ٍ في الثَرى
                                        ***
اللّعبَت اعلَى امتُونَك اتلَاعِبها لِسيَاط
والجِلدَها البِي تَرافَه اتخَيـِّط اخيَاط
مِن اخُوها الذِكرى عِدها بَاقي لِگمَاط
جَرَّه من چَفها الدَعي وبي رَبَّطه اربَاط
ذَا يَنتَشي بضَربها
وذا بقـُبح ٍ سَـبَّها
وذَاك  بالسَلبِ اِجتَرَى
ضَاعَت كَقرط ٍ في الثَرى
                                        ***
العَين حَمرَه امغُورِگه وذَابِل جِفنها
الدَمع والدخّـان ضَـيّع كل حِسنها
نِگـعَت اثيَاب العَـلِيها ابدَم اِذِنهـا
اتفـَـزَّز المَيتين ياصَـيحَة حِـزنها
حَنَّت وأَنّت مَن لَها
إِرأَف بهَا يـارَبَّـها
فالهَولُ فيها قد جرَى
ضَاعَت كَقرط ٍ في الثَرى
                                         ***
المِشَت بدرُوب الوَرد تمشِي اعلى  جَمره
وبَدَل بُوسَاتك صُفت عالوَجنه سَطره
وحَگ اضلوعك الدَاستها من الخيل عَشره
الطِفل لُو شَاف العَليها ايشِيب شَعره
شَمسٌ وجُرحٌ غَـائرٌ
يُـتمٌ ودَربٌ عَـاثرٌ
لِجلدِها الرِجسُ انبَرَى
ضَاعَت كَقرط ٍ في الثَرى
                                           ***
أثَـر چَويَـات اوِّنـين ودَخنَـة النَـار
ورَجفه بگلِيب التَرافه اتوَضِّح الصَار
دَارَت اعلِيها الخِيُول ابيِمنَه وايسَار
تشگُف السُوط ابچِفُوف امفَطّره ازغَار
عُصفورةٌ بينَ اللّظى
والحَامي عَنها قد مَضى
مَن ذا بِـبلوَاها دَرَى
ضَاعَت كَقرط ٍ في الثَرى

              ----------------------------------------- 
لقمان  البدران

                       
https://www.tgoop.com/lukmanbdran1970

أملانِ مذخُوران
فيهِم تباشيرُ المُنى
وعدٌ بهِ لو حَان
فرجُ السماءِ لأرضِنا
في بيتِ مقدِسها غدَا
يتلُو الصلاةَ مُردِّدا
مهديُّنا
مهديُّنا
عيسى بنُ مريمَ خلفَهُ
**

صرَخاتُ وجدٍ تملأُ الكونَ الوسيع
من صدرِ محزُونٍ ومن قلبٍ وَجيع
ووحوشُ غلٍّ أنشَبت اظفارَها
في الخلقِ والمَرأى غدا قاسٍ مُريع
هذي الشعوبُ على المدَى
ماضٍ وحاضرُها غدا
جُرحٌ توَاصلَ نزفُهُ
عيسى بنُ مريمَ خلفَهُ
**
حدَثٌ جليلٌ قادمٌ وبه الخلَاص
من منظرِ الحربِ ومن صوتِ الرصاص
ومنَ المجاعاتِ التي تطوِي الورَى
والعنصريات بما تحوِي انتِقاص
خمسٌ هيَ الحَتمُ إذا
جائت سيَنزاحُ الأذى
والكلُّ ينسى خوفَهُ
عيسى بنُ مريمَ خلفَهُ
**

رزقٌ لمريمَ خّصَّ من ربِّ السماء
وُهِبَت غلاماً زاكياً باليُمنِ جاء
ولفاطمٍ ربُّ البرايا رزقُـها
مهديُّها الزاكي وريثُ الأنبياء
من أمهاتٍ زانَها
ربي وشرَّفَ شانَها
جاءا وفيهِم لُطفُهُ
عيسى بنُ مريمَ خلفَهُ
**
علَمانِ في كفَّيهِما غصنُ السلام
وبحُكمِ عدلٍ دائمٍ يسمُو الوِئام
هذا ابنُ طه بعدَهُ عيسى اليسُوع
جاءا لرَأبِ الصدعِ في دُنيا الخِصام
تمضي العذاباتُ متى
عيسى ومهديٌّ أتى
والكلُّ يرنُو طرفُهُ
عيسى بنُ مريمَ خلفَهُ

===========
لقمان البدران

https://www.tgoop.com/lukmanbdran1970