Master Mind Group

መጎዳትን ሲሸሽ የኖረ ሰው ጸጸት

906 views03:08

መጎዳትን ሲሸሽ የኖረ ሰው ጸጸት

“ከጓደኞቼ ጋር ግንኙነቴን በጠበኩት ኖሮ!”

(“የሕይወት ጸጸቶች” ከተሰኘው የዶ/ር ኢዮብ መጽሐፍ የተወሰደ)

ብሮኒ በምትሰራበት በዚህ አዛውንት የመጨረሻቸውን ምእራፍ በሚያሳልፉበት ማረፊ ቦታ የምታየው የአንዳንድ ሰራተኞች ሁኔታ ቢያበሳጫትም እርሷ ግን ለአዛውንቱ ያላትን ርህራሄ ከመግለጽ ወደኋላ አትልም ነበር፡፡ በዚያ ቦታ የሚሰሩት አንዳንድ ሰራተኞች ብሮኒ ለአዛውንቶቹ የምታሳየው ርህራሄ አይመቻቸውም፡፡ በዚያ ስፍራ ያላቸው የስራ ዘመን ለእነሱ ገንዘብ የማግኛና “የተሻለ” ስራ እስኪያገኙ ድረስ መቆያ ነው፡፡ የብሮኒ አመለካከት ግን ከዚህ ለየት ያለ እንደሆነ ግልጽ ነው፡፡

አንድ ቀን በርኒ የተሰኘ አንድ አዛውንት ለመመገብ ተቀምጦ ነበር፡፡ እርሱ የፈለገው የምግብ ምርጫ ዶሮ ሆኖ ሳለ ያገለገለችው ሴት ግን ያቀረበችለት የበግ ስጋ ነበርና ብሮኒ ምግቡን ከእርሱ ፊት በማንሳት ሁኔታውን በማሳሰብ ልታስቀይርለት ሄደች፡፡ አስተናጋጇ፣ “የተሰጠውን አርፎ ይበላል” በማለት በክፉ መለሰችላት፡፡ “የጠየቀውን ከዶሮ የተሰራ ምግብ መስጠት እየቻልን ለምን ያንን አናደርግለትም” በማለት ብሮኒ ጥያቄዋን ደግማ ብታቀርብም “የቀረበለትን የበግ ስጋ ካልበላው በረሃብ መሞት ይችላል” የሚል መራራ ድምጽ የተቀላቀለበት መልስ ተሰጣት፡፡ ብሮኒ የዚህችን ጨካኝ ሴት ባህሪይ ባትቀበለውም በዚህ ደካማ አመለካከት ተጽእኖ ውስጥ በመሆኗ ግን አዘነችላት፡፡ ወዲያውኑ አንዲት ተወዳጅ ሰራተኛ ቀረብ ብላ፣ “ብሮኒ፣ ስለዚህች ሴት ብዙ አትጨነቂ፣ ባህሪዋ እንደዚህ ስለሆነ ተያት” በማለት አረጋጋቻት፡፡

ብሮኒ ዘወር ብላ ስትሄድ ዶሪስ የተሰኘችው እድሜዋ በጣም የገፋ ሴት ልክ ወደ አንድ ጉዳይ የመሄጃው ሰዓት እንደደረሰበት ሰው ሮዝ ቀለም ያለውን ቀሚሷን ለብሳ ተቀምጣለች፡፡ ብሮኒ ራሷን በማስተዋወቅ ቀረብ ስትላት ዶሪስ ፈገግ ብላ ፊቷን አዞረችባት፡፡ ብሮኒ የዶሪስን ሁኔታ ተመልክታ ሰላም መሆኗን ስትጠይቃት፣ ዶሪስ በድንገት እምባዋን መቆጣጠር አልቻለችም፡፡ ብሮኒ አጠገቧ በመቀመጥ እጇን ያዘቻት፡፡ ዶሪስ በፍጥነት እምባዋን ማፍሰስ በማቆም ከብሮኒ ጋር መወያየት ጀመሩ፡፡

ዶሪስ ለብሮኒ ራሷን ከፈት በማድረግ፣ “እዚህ ቦታ ከመጣሁ ጀምሮ ብቸኝነት ሊገድለኝ ነው … ለካስ ብቸኝነት ሰውን ሊገድለው ይችላል፡፡ አንዳንድ ጊዜ ሰው እንዲነካኝና ቅርበቱን እንዲገልጽልኝ እራባለሁ” አለቻት፡፡ ለካስ ብሮኒ እጇን ያዝ በማድረጓ ምክንያት ነው ያንን የናፈቃትን በሰው የመነካት ሁኔታ ስላገኘች ዶሪስ እምባዋን መቆጣጠር ያልቻለችው፡፡

ብሮኒ ዶሪስን ለማወቅ ያላት ፍላጎት ስለጨመረ እንድታወራት መንገድን ስላመቻቸችላት ዶሪስ መናገር ቀጠለች፣ “ከሁሉም በላይ የሚናፍቁኝ ጓደኞቼ ናቸው፡፡ አንዳንዶቹ በሕይወት የሉም፡፡ አንዳንዶቹ ደግሞ አሁን እኔ ባለሁበት አይነት ሁኔታ ነው ያሉት፡፡ ሌሎቹ ደግሞ የት እንዳሉም አላውቅም፡፡ የት እንዳሉ ባውቅ ደስ ይለኝ ነበር፡፡ ጓደኞችሽ ሁል ጊዜ ከአንቺ ጋር እንዲቆዩ ትመኛለሽ፡፡ ሕይወት ግን ይቀጥልና የሚያውቅሽ፣ የሚገነዘብሽና ስለታሪክሽ መረጃ ያለው ሰው አጠገብሽ እስከማይቀር ድረስ ብቸኛ ሆነሽ ራስሽን ታገኚዋለሽ፡፡”

ብሮኒ የዶሪስን ጸጸት በመጠኑም ቢሆን ለማርገብ ስትል በሕይወት የሚገኙትን የዶሪስን ጓደኞቿ ለማግኘት ሙከራ የማድረግ ፍላጎት እንዳላት ከገለጸችላት በኋላ በመጠኑም ቢሆን ተሳክቶላታል፡፡ ከአንዳንዶቹ ጋር በደብዳቤና በስልክም ጭምር እንዲገናኙ ለማድረግም በቅታለች፡፡

ብሮኒ የዶሪስን ሁኔታ በቅርብ ካጠናች በኋላ ግንዛቤዋን ስትሰበስበው፣ የዶሪስ አመጣጥ ብዙ ሰዎች የሚያልፉበት የተሳሳተ የግምት ጎዳና ነው፡፡ ዶሪስ የኖረችው ኑሮ “የሩቅ ወዳጅነት” በሚል ፍልስፍና ይነዳ የነበረ ሕይወት ነው፡፡ ይህንን አመለካከቷን ስትገልጠው እንዲህ ትላለች፣ “ሰዎችን በሩቁ ባቆየሃቸው ቁጥር በሰዎች ምክንያት የሚመጣብህንም ጉዳትና ቁስል እንዲሁ በሩቁ ታቆየዋለህ፡፡ ማንም ሰው ካልቀረበህ፣ ማንም ሰው ሊጎዳህ አይችልም፡፡ ስለዚህ፣ በተቻለህ መጠን ከጓደኞችህ ጋር ያለህን ግንኙነት በሩቁ አድርገው፡፡”

የዚህ አመለካከት መጨረሻው ብቸኝነት ነው፡፡ በብዙ ሰዎች መካከል በአንድ ቤት እየኖርክ እንኳን የብቸኝነት ስሜት ሊጫጫንህ ይችላል፡፡ በአካባቢህ የሚገኙ ሰዎች ቁጥር ምንም ያህል ብዙ ቢሆን፣ የውስጥህን የሚገነዘብ ሰው ከሌለና እስከነማንነትህ የሚቀበልህ ሰው ካላገኘህ ብቸኝነት ከነችግሩ ይከተልሃል፡፡

ብሮኒ የዶሪስን ሁኔታ በሚገባ ተገንዝባዋለች፡፡ ዶሪስ ጓደኛን ከመቅረብ ሊመጣ ይችላል ብላ ካሰበችው የመጎዳት ሁኔታ ራሷን ለመጠበቅ ስትል እድሜዋን በሙሉ በገለልተኝነት ያሳለፈች ሴት ነበረች፡፡ በመጨረሻ ግን ለረጅም አመታት ይዛ የቆየችው የገለልተኛነት አመለካከት ወስዶ ያደረሳትን ስፍራ አልወደደችውም፡፡ ጸጸቷ እዚህ ጋር ነው፡፡ “ከጓደኞቼ ጋር ግንኙነቴን በጠበኩት ኖሮ! ብጎዳም እንኳን ጓደኞቼ ማንነቴን እንዲያውቁኝ በፈቀድኩኝ ኖሮ! ግንኙነቴን የጠበቀና ግልጽነት የተሞላው አድርጌው በሆነ ኖሮ!”

ለእነዚህ በእድሜአቸው መጨረሻ ላይ በጸጸት ውስት ለሚገኙ ሰዎች ብሮኒ የነበራት ርህራሄ ይህ ነው አይባልም፡፡ አንዱን ጸጸት ሰምታ ሳትጨርስ የሌላውን ትሰማለች፡፡ አሁን ደግሞ ይህኛው ለብዙዎች አረጋውያን የህሊና ሸክም የሆነው ጸጸት ገጠማት፡- “ከጓደኞቼ ጋር ግንኙነቴን በጠበኩት ኖሮ!” ከዚህ የተዛባ አመለካከት የተነሳ መጎዳትን ፍርሃት ከጓደኞቻቸው ጋር ያላቸውን ግንኙነት በሩቅ በሩቁ የሚያደርጉ ሰዎች ከዚያ ለባሰና ለከፋ ጉዳት ራሳቸውን ያዘጋጁታል፡፡

ጊዜው ካለፈብህ በኋላ እዳትጸጸት ከጓደኞችህ ጋር ያለህን ግንኙነት አታባክነው!

ይቀጥላል . . .

1.1K views03:08