(( هيمه وحرگ خيمه ))


هيمه وحرگ خيمه ... وهواي الاجروح
من ياوجع ابدي ... خلصانه ياروح
من التل وضيمه ... ومراكض الخيل
من داسن اضلوعه ... وحسيني مذبوح

شفت الخيل .... تسحگ بضلوعك وترد
ياعطشان .... وذبلان ابشفتك الورد
آخ حسين .... مامتوقعه خويه البعد

جرحي من وداعك يكبر
حزني انت يابو الأكبر
الموتي گلبي تبقه اجروحه
يهده صعبه وانت امؤذر
"" "" "" "" "" "" "" "" "" "" "" ""
من طلعت اجدامي ... ريت الاجل حان
ياحيرة الحرمه ... الماعدها خوان
ماترحم الغربه ... من هاشم اضعون
وين الكفل خدري ... وين الگبل چان

زينب ليش .... تبرالي عيون الغرب
جرح حسين .... والعاشر شيب الگلب
وي اجناب .... مسبيه اگطع الدرب

من بعد عيونك صعبه
تحدي ضعني خويه الغربه
فتت العطش دلالي
الماشربته لا ما شربه
"" "" "" "" "" "" "" "" "" "" "" ""
جيت اشتكي الطولك ... لچمات الايام
بس اعثر ابجيتي ... تعبانه الاجدام
اكبر جرح بيه ... الموتني يحسين
من جابو الهزله ... ويسبوني للشام

حسين اشلون .... مسبيه امشي عالهزل
كلها اعيون .... وبچفي اتشاهد الحبل
والشمات .... فرحانه ابدمعتي التهل

هزل ودرب بس لوعات
ويهلي بالغرب صرنه انبات
اتفرهد الضعن يهلي وراح
يدخل ابقصر بس شمات
"" "" "" "" "" "" "" "" "" "" "" ""
ماصدگ اعيوني ... حل وكت الاوداع
وضعن الشرف صاير ... كل ديره ينباع
من طاح ابو فاضل ... ورد محني الحسين
من طاحت الخيمه ... يهلي الخدر ضاع

صار الصار .... بعد الهيبه والخدر
هسه ابنوگ .... وماخوذه يهلي لليسر
من عباس .... تاليها كافل الشمر

من بعد كفيل الايتام
بالخرابه من تالي انام
ياحزن ابد ما ينشاف
ياكبر حزن ضيم الشام
"" "" "" "" "" "" "" "" "" "" "" ""
خادم السلطان
سيد محمد الياسري

(( فاطمة وخير الانام ))


ليـــــش مــن چــلمـة يـبـويه انــحــرم
افـراگــك يخلــيني بــس جلد وعظــم
اليمشي ابوها يخضر ابنـصهه النحيب
وتبــقه مــن تــــسـمع يبـويه تـنهــضم

بـويــه مـــــاشـبـعانه منـك
امنيتي ارد طفله وحضنك
دمعه دمعه تگضي روحي
الفــرگــه آاخ وآاخ مـنـك

بـويـــه بـــعــدك يــمي أنـت
وروحي طلعت من جسدهه
اشـلون لـو غمـــضت عـينك
وفـاطــمه تبــقه الوحـــدهه
الــدنيه شـــنهي ابلا عيونك
ولحــضه ماعيــشن بــعدهه

اتعاتبو مدمع كلام
فاطمة وخير الأنام
"" "" "" "" "" "" "" "" "" "" "" ""
ســولت الــــفاگد دمع عينه يـهـل
وينكسر كسرة غصن من ينســئل
الــفارگ اعزازه يـموت ابــلا ألــم
روحه تطلع بس جسد يبقه عدل

شرد اگـــلك والله حيره
روحتك كسره چــــبيره
صعبه اگول امودع الله
اتيتـم اشــلون الامــيره

باقــــيات إلـمــن اعـيـونـي
اعــمن اعمــن بـــيه لچــمه
انه حـــرمه اشـــــلون بيــه
الفـــــگد ميـــحمـله زلــــمه
كســرة اوداعــك چــــبـيره
ابروحي خلت بويه هضمه

صار الاموادع سلام
فاطمـة وخير الأنام
"" "" "" "" "" "" "" "" "" "" "" ""
ليــش من دون الـــبنات اتـــيتمت
شوگ روحي الچلمة البويه عشت
الورده لو عنهه انگطع ماي الـعذب
اتصوفر وتذبل ونه هـيچي صرت

حالي حال الضيم حالي
امــصوفره وشبه خيالي
الدنـيه من بعــدك يبويه
مـني تاخـذ غـالي غـالي

عيني تشـــــتاگ العيونك
اشلون احلهه وي عيوني
ها يجــوني مايـــجــوني
امنـاطـره أهلي الجفوني
طلعت من الهضم روحي
وشــــيب الملگه ضنوني

وشيفض دمع الغرام
فاطـــمة وخير الأنام
"" "" "" "" "" "" "" "" "" "" "" ""
ريتي متــروسه هــوء وماكو هـــوء
ياهـو غيــــر اعيـــونك يــســير دوء
ضلمه روحي وچانت اعــيونك شمع
من يحــــل يمي الضلام اطگ ضوء

بعد عيــــــنك ماكو راحه
ليلــي ونهــــاري نيــــاحه
اعيوني متروسه سوالف
وگــلبي شابع من جراحه

اعيوني ماغٓمضت بعدك
لا ابلــيلــــي ولا نــــهاري
حـالي بـويه تعــب حالي
صرت چنــي اتراب ذاري
چـــــان دار الــخير داري
هـسه دار الــــحزن داري

اموادعك كسرة حمام
فاطــمة وخيــر الأنام
"" "" "" "" "" "" "" "" "" "" "" ""
خادم السلطان
سيد محمد الياسري

#فزاعيات


حسيت طلعت روحي من شالو گبالي النعش

مــن شـــالو ابوي ونعـشه گــدامــي
طـلعت روحي مني وماتت احلامي
بعــد شتــــفيد اعيش والمن ايامي
بس اجري دمع واللطم على هامي

مفروض اذب اعيوني وياه مايكفي الدمع
"" "" "" "" "" "" "" "" "" "" "" "" "" "" "" ""
شال وخلته بانت على ارسومي
من كثر الدمـوع امبلله اهدومي
يوم اگــــشر رحيله هذا يايومي
لا لذه ابگـعدتي ولا هنه ابنومي

شيلو الجنازه ابهيده ملچوم گلبه من الفگد
"" "" "" "" "" "" "" "" "" "" "" "" "" "" "" ""
شــال وشالت من الروح عافـيتي
وضاگ النـــفس بيه ومايمر ريتي
وياه ادعـي اموت وچانت امنيتي
نعشي ونعشه يطلع من فرد بيتي

اتمنيت وياه موتي والچان ساكن روحي
"" "" "" "" "" "" "" "" "" "" "" "" "" "" "" ""
شال ودمــعتي تچوي بقت خدي
امنين انجيب مثــلك يابعد ولدي
رايح وين ومخليني اضل وحدي
ابهاي الدنـيه غيرك بويه ماعندي

شالت الراحه ابروحتك والضال بيت احزاني
"" "" "" "" "" "" "" "" "" "" "" "" "" "" "" ""
ماتـــنشف دمعتي ولاتجف عيني
الصــخر ينفطر لمن يسمع اونيني
مشيت وياهو بعدك ضل يسليني
يابوي وحــياتي وياضوء اسنيني

ماضل دمع بعيوني ليل ونهار اعليك اون
"" "" "" "" "" "" "" "" "" "" "" "" "" "" "" ""
خادم السلطان
سيد محمد الياسري

(( فاطمة المعصومة ))

مــــن بيـت العــلم
ونور اجمـل رســم
اسمها اشرف اسـم .... معصومه
ورده مـــن الــزغـر
حزن عاشــت عمـر
يعيــن الله الـصبـر .... مضلومه

خلص عمرها ابدمع الــغرايب
عاشت عذاب انواع المصايب
اتحمل گلــبهه اثـگال النوايب .... فاطمة المعصومه

من عشـــر اعــوام والمـدمع بده
من ابوها اسشتهد ابسجن العده
ياگلب يحـــمل عـذاب اللي جره
من زغــــرها من الحنان امجرده

انكتــب == هــذا قـدرها
وعِجب == مــنها صبرها
ولهـــب == يسعر جمرها

"" "" "" "" "" "" "" "" "" "" "" "" "" "" ""
فگـــدت چم اخو
بأثر چف الــــعدو
من اصحاب الغلو .... مكسوره
دمع صــارت تهل
هضم ما ينــحمل
على افراگ الاهل .... مجبوره

عاشت عمـــرها مثل الـسبيه
مو بالحـــبال ابحــزن الرزيه
وتدعي الممات ابكل مغربيه .... فاطمة المعصومه

انسبــت بالغــربه مــو فــوگ الـــهزل
اهواي الاجروح وصعب يـاهو التشل
كلها غــربه اليــا كتــر تــنطي الـوجه
حيره ونگــطعت اســف كل السُـــبل

غــرب == كـــلها تشــاهد
صعب == ماضـلهه واحد
حـرب == همــها يــــعاند

"" "" "" "" "" "" "" "" "" "" "" "" "" "" ""
غريبه ابــــلا وطـن
شكثر عاشت محن
عذاب مـــن الزمـن .... مـــالومه
مثل شمعه انطفت
وكل قصه انـتـهت
لـيـش ابـيا بخــت .... مسمومه

عاشت غريبـــه وبالغربه مـاتت
بس المصايب والحسره شافت
الغــربه تبـــچي الــغربته بـاتت .... فاطمة المعصومه

الورده صارت ذابله مــن الدمع
والگلب من المصايب منـــفجع
ابكسرة الخاطر يمر ليل الهجر
وبالسمه حسرتها ضلت تنسمع

ألــــم == مدمعهه شابع
رسـم == حزن المواجع
هجم == ليل الـــمدامع

"" "" "" "" "" "" "" "" "" "" "" "" "" "" ""
ابگلب يگطر دمه
وحزن كبر السمه
مــاتـت فاطــــمة .... مشتاگه
دمع يچــوي يــدر
وگلب شـابع هجر
صفت مثل الجمر .... حــراگه

حزن الســـنين وفرگـــت ابوها
متعنيه تشـكي الغربه الاخـوها
وهدمو حلمهه الخوه اذبحوها .... فاطمة المعصومه

اتصارع الحسره بقت اخت الرضا
وبدمع يچوي الوجن ليـل المــضا
عاشت اسنين الهجر شوگ وتحن
الينكسر غير اهــله ياهــو يعوضا

انتـهت == قـصـة ألــمها
وجزت == لحضة حلمها
وغدت == تــربه تـلـمـها

"" "" "" "" "" "" "" "" "" "" "" "" "" "" ""
خادم السلطان
سيد محمد الياسري

(( راحت زهرتي ))


راحت .... علي أم الحسن
راحت .... من هؤل المحن
راحت .... العلي ماضل وطن .... ياغربة الروح
عافت .... علي بصعب وضع
عافت .... على اخدوده الدمع
عافت .... جرح نار وضلع .... ومرافگ النوح

سافر الوطن .... ياحيدر
والجدم بقه .... يتعثر
تعرض الصور .... والمنضر ..... ويلاااا يزهراء
وحشه ياعلي .... أيامك
ذبحو الورد .... وحلامك
راحت ام حسن .... گدامك ..... ويلاااا يزهراء

راحت زهرتي وذيچ الليالي
والغربه صارت تبچي اعلى حالي
ابطولي دمعتي واشبه خيالي .... مكسور
عطشانه روحي الشوفت رسمهه
ماهدهه لحضه اشفافي أسمهه
فرگتهه صعبه ويكلف اللمهه .... معذور

فاطمتي .... فاطمتي
"" "" "" "" "" "" "" "" "" "" "" "" "" "" ""
ذكرى .... بقت بس الدمه
ذكرى .... الي من فاطمة
ذكرى .... وحرگ باب السمه .... ورماد بالباب
شمعه .... انطفت بيد الغرب
شمعه .... وصفه ضلمه الدرب
شمعه .... وخذو ومني الگلب .... زهرة ابو اتراب

حنيت الغصن .... حانيني
فاطمة الهجر .... ياذيني
ودمعي بالوجن .... يچويني ..... ويلاااا يزهراء
انه ابو الصبر .... ما أصبر
خاطري اشكثر .... متكَدرّ
والبعد بشر .... مايعذر ..... ويلاااا يزهراء

روحي ادفنتهه ساعة دفنتچ
گلبي يشيب لحضة غربتچ
الموتي تبقه بيه محنتچ .... زهراء
حيره الليالي اشيگضيهه بعدچ
وحشه الحياة المابيهه عطرچ
أتمنى گبري يازهره گترچ .... ويلاااه

فاطمتي .... فاطمتي
"" "" "" "" "" "" "" "" "" "" "" "" "" "" ""
روحي .... كُبر بيهه الجرح
روحي .... الهجر مثل الملح
روحي .... نست لون الصبح .... وتبدل الحال
حالي .... مثل حال الورد
حالي .... اذا جاسه البعد
حالي .... حلم فاطم ترد .... ودموعي همال

فاطمة علي .... ماغمض
بالصور بقه .... متمرض
راحه ماتمر .... بالينبض ..... ويلاااا يزهراء
فاطمة الگلب .... تعبني
يريدچ الجفه .... ذابحني
امناطر الأجل .... شيبني ..... ويلاااا يزهراء

مايبرء جرحي ويسكت نحيبي
الأ ابـلـقـاء السافـر حبيبي
الجرحي بعدچ ياهو طبيبي .... مجروح
ساعة وداعچ ساعة مماتي
بعدچ يفاطم شلي ابحياتي
يمچ مماتي كـل أمنياتي .... ياروح

فاطمتي .... فاطمتي
"" "" "" "" "" "" "" "" "" "" "" "" "" "" ""
تعرض .... كل ليله الصور
تعرض .... وحن وبچي ابقهر
تعرض .... ودمع ترس النضر .... ويسير الموت
ليلي .... يـمـر آاه وألـم
ليلي .... وشوف العتبه دم
ليلي .... ويحل فگدچ سهم .... وتمنى تابوت

عايش ابألـم .... وبحسره
كلفه فرگتچ .... يالزهره
دمعتي الحجر .... اتفطره ..... ويلاااا يزهراء
ورده ياذنب .... مذبوحه
وبكسر ضلع .... مجروحه
حيدرچ ملح .... بجروحه ..... ويلاااا يزهراء

يصعب عليه الفرگه الطويله
گلبي ابوادعچ مايهده ليله
روحي ابغيابچ فاطم عليله .... مالوم
اتمنيته بابچ طبگوه عليه
وتسلم حياتي الزهره الزچيه
افراگچ يفاطم يكلف اذيـه .... مهموم

فاطمتي .... فاطمتي
"" "" "" "" "" "" "" "" "" "" "" "" "" "" ""
خادم السلطان
سيد محمد الياسري

(( شمس الحياة ))


شمس الحياة أنطفت .... والكلشي بعيوني مات
أمه التغمض بعد .... المن يعيش الحياة
مثل السعف ينحني .... كلما تمر ذكريات

رسمهه ....
مافارگ أعيوني وخيالي
وحچاية اليمه اعلى بالي
تراودني بطيوفي وسؤالي

رسمهه ....
من سافر وعافيتي راحت
وحچاية اليا يمه ماتت
والراحه يم العتبه طاحت

كلما يجيني الليل .... يسير حزنهه
أتذكر أمي اشلون .... اغفه ابحضنهه
اليتيتم من ازغير .... ويفارگ أمه
وياها روحه اتموت .... ساعة دفنهه

أماااه ....
انا عزيزكِ الحسين كلميني
"" "" "" "" "" "" "" "" "" "" "" "" "" "" ""
سلوى الصور والدمع .... للفارگ أمه تصير
يادمعة الماله أم .... تنزل تشيب الزغير
ليل اليوادع صعب .... يذلك لؤنك امير

ابفگدهه ....
تتنفس وخنگه تحسهه
حدر الترب روحك نفسهه
دافن هوء الريه وشمسهه

ابفگدهه ....
بعيونك الدنيه ضواها
هندس ومايصلح هواها
تتمنى بس موتك وراها

ماصخ تحس الزاد .... والعيشه مُرء
ويزغر الكون اتشوف .... والدنيه ذره
وحشه تحس البيت .... مابيه ضواها
الأم صعب ياناس .... فرگتهه كسره

أماااه ....
انا عزيزكِ الحسين كلميني
"" "" "" "" "" "" "" "" "" "" "" "" "" "" ""
بير المحنه نشف .... ومات الورد بالوادع
مثل الورد بالعطش .... الفاگد يحس بالضياع
كلما يسير ألـم .... تتفطر اجروحه گاع

تعاشر ....
ليل الثكالى والنواعي
الفارگ أمه ليله واعي
عايش حياته ماله داعي

تعاشر ....
دمعاتك ومو أنت أنت
مثل النعش تگضيهه سكته
تحرگ بلد گلبك حسرته

يتغير من الـ آه .... الأمه فاگد
وتحرگه نار الشوگ .... مثل الكواغد
ناحل هدم وعضام .... كلمن يشوفه
ينعه نهاره ادموع .... اوليله گاعد

أماااه ....
انا عزيزكِ الحسين كلميني
"" "" "" "" "" "" "" "" "" "" "" "" "" "" ""
صوت أمه ليفارگه .... يتذكره ابكل مكان
شمعه يذوبه البُعد .... ويتمنى لحضه الحنان
بعيونه تعرض صور .... أمه وهذاك الأمان

حضنهه ....
يتذكره وذيچ المحنه
والعشره وهنانه گعدنه
الماترد مابيهه ضنه
حضنهه ....
وحچاية اليمه الحنينه
يتذكر وتگصر سنينه
ينطي العمر لوصح بدينه

ليش النحب مَيدوم .... ويدوم ألمنه
نتمنى بعده الموت .... شلنه ابعمرنه
ليش العمر نگضيهه .... حسره وبواچي
ابصف گبره نتمناه .... ينحط گبرنه

أماااه ....
انا عزيزكِ الحسين كلميني
"" "" "" "" "" "" "" "" "" "" "" "" "" "" ""
بعيونه كلمن فگد .... أمه يموت الصبح
وليل الهجر والصور .... بجروحه حفنت ملح
من الزغر للممات .... مايبرء بِيه الجرح

حچيهه ....
يغفه ويفز تارس خياله
وحال الهضم والضيم حاله
فارگ حضن أمه ودلاله

حچيهه ....
يسير على باله وجروحه
ومن الهضم ماتبقه روحه
الميت گعد ليسمعه نوحه

صورتهه وسط الروح .... ترسم أذيه
وتخنگه من الشوگ .... كل مغربيه
ماعيش أبد ماشوف .... بالدنيه راحه
خليتي حفنه اجروح .... يايمه بيه

أماااه ....
انا عزيزكِ الحسين كلميني
"" "" "" "" "" "" "" "" "" "" "" "" "" "" ""
سيد محمد الياسري
محمد مسلم الأسدي