اشتياق مولاي المحسن ع لمولاتي زينب ع :


بظهر ابوي وبالي يمج جانت بنفسي اشوفج
وجنت اعدهن ساعه ساعه حتى اجي واغفه بجفوفج
وحق ضلع امي يزينب آنه ما مخلوق اعوفج

مسافر.... بس وغلاتج ماردت سفر
مسافر....معوز جنت ياخويه جم شهر
مسافر.... من عشرتج حارمني القدر

گالو كاروك محضرتلي
واسم المحسن مختارتلي
ومنتظرتني ومشتاگتلي

أختاه وداعاً....... أختاه وداعاً
.............................................
يا نوايانه البريئه ويا نواياهم الحنضل
عمري اگصر من حبلهم وردت عمري وياج يطول
شگد ثگيله الباب جانت لجن والله افراگج اثگل

زينب.... يا كلشي إنتي ومحلى هالاسم
زينب.....ياحلم بس ما ضل بعد حلم
زينب..... ابگد حنانج خويه منلجم

سهرانه انتي هواي اعليهن
تعبتج وادري تحبيهن
ضمي اهدومي الخيطتيهن

أختاه وداعاً........ أختاه وداعاً
.............................................
ياطموحي الماتحقق وبيتنه البي كلشي شاره
ردت يم الحسن اگعد يوم يشعل بيده ناره
وردت يم احسين ابجي من تفر ذيج الحياره

رايح.....بس كلبي يمكم باقي كل وكت
رايح....... وامنيتي تعتبروني ما رحت
رايح......من بيت احلى ايامي بي عشت

رگضه الموت وبيه اتعثر
ودمي اباب العتبه اطشر
ما مقسومه وياكم أكبر

أختاه وداعاً....... أختاه وداعاً
.............................................
أرد اعيشن ليله وحده خاطر احجيلج البيه
نعصرت وگدما حنينه ضلت اتعاين عليه
ودنگت عالدم تلمه الله يا گلب الزجيه

طاحت.... ازغيره وعليها بيّن الكبر
طاحت..... سولفت فضه وماحجه العمر
طاحت.... وكل هذا ضلت مني تعتذر

باجر يم الله آنه الشاهد
امي الما أذت كل واحد
واحد عاصرها بدم بارد

أختاه وداعاً....... أختاه وداعاً

أحمد ماجد الكلابي

كل عام وعشگهم ميثمي اللون
وسنت غربه جديده عاليحبون
فرهه الدنيا للما شالـوا أســرار
ووحشه عالجرحهم بير مدفون
تسـد فجّة حـزن وحـدتهم الآه
ويسامر ليلهم بس دمع العيون
أميـر إگلـوبهم ماعـرفته الناس
والعافوه يكاون وحده ضد كون
الدنيا الغرّبت وجـه ألله عالگاع
وجـه بيها عـرف هيهات يلگـون
سلام اعله الوحيد المات مهضوم
اعله مود أهل الامروّه واليغارون
اليحب عطشان يكره عشرة الماي
شيسوي اليحب اخيام واضعـون