ناسس دايشين😇

الحرب دي بعد تنتهي حتكون أغلب العلاقات الأسرية والإجتماعية صفر كبير 💔
الحرب ما غيرت الناس لكن كشفت كلام كان مخفي في العلاقات الزوجية والأسرية وحتى علاقات القرابة القريبة 💔والبعيدة .. أظهرت حقيقة ما في النفوس وكل إنسان كشف ما كان يخفيه .. وكل شخص أسقط قناعه تجاه الآخر .
الحرب أظهرت الكان بيحسدك بالضرا والكان مخاويك في العلن ومعاديك في الخفاء والكان بيتظاهر بالكرم أو بالمحبة وجواه غل ناحيتك .
الحرب أظهرت الجبان من الشهم .. كشفت الرجل الحقيقي من شبه الرجل .. الحرب أظهرت حقيقة علاقات وهل كان في ود واحترام حقيقي ولا كان كله زيف وتمثيل .
الحرب يا اخوانا مزقت نسيج الأسرة السودانية وعلاقات القرابة والصداقة وكل زول هسي قاعد يتحلف للتاني (بكرة الحرب تقيف وحتشوفوا مننا وش عمركم ما شفتوه) .
قلة قليلة من ظهر أنهم ذهب حقيقي 💛والغالبية طلعوا حديد مصدي .
يمكن ربنا جاب الحرب دي عشان نعرف حقيقة بعضنا 😴.. وهل نحن بالفعل مجتمع حقيقي متماسك ولا كلها كانت (خيوط عنكبوت إنهارت مع أول هزة أرضية وزلزال إجتماعي ).
الحرب فيها جزء بسيط خير (لو كان للحروب إيجابيات) فهو إنه الناس عرفت صليحها من عدوها وبعد الحرب الناس حتبتدي تبني علاقاتها من جديد ذي ما حتعيد بناء بيوتها وحياتها من نقطة الصفر .
بس للأسف علاقات كتيرة جدا إنهدمت تماما وغالبا ، إنها من المستحيل حترجع تاني . حاجات كتيرة انكسرت في نفوس الناس وجروح كتيرة صعب جدا إنها تندمل تاني بالساهل .
ربنا ينهي الحرب وذي ما حنبني بيوتنا كسودانيين ... ربنا يسهل لينا ونعيد بناء علاقات جديدة متينة مبنية على أساس المحبة والإخلاص الحقيقي وليس بينها علاقات مصالح ولا استهبال ولا انتهازية .
يا ريت ولو جزء من الناس تكون اتعلمت .. أخدت دروس وعرفت إنه الدنيا دي في لحظة ممكن تنقلب عليك وتخسرك كل شي .. في اللحظة دي حيفضل ليك كنزك الحقيقي وهو أحباءك وأهلك وأصدقاءك الحقيقيين .. لو لقيت إنه كل ديل أو اغلبهم طلعوا (مواسير ساي) .. تتعلم تبني علاقات جديدة قوية .. اساسها الحب والمساندة والإهتمام .
والحمدلله على كل حال 💛🌻

445 viewsAreej Mohammed, 18:09