БЕШ ЙИЛЛИК САМАРАЛИ ФАОЛИЯТ ЯКУНИ
Наманган давлат университети ректори Собитхон Турғунов жамоа билан хайрлашди

Наманган давлат университети ректори, педагогика фанлари доктори, профессор Собитхон Турғуновнинг салкам қирқ йиллик умри таълим тизими ривожи йўлида сарфланди. Устоз шу кунгача ниҳоятда масъулиятли лавозимларда самарали фаолият олиб борди. Унинг икки бор Ўзбекистон Республикаси Олий Мажлиси Қонунчилик палатаси депутати, Аграр, сув хўжалиги масалалари ва экология қўмитаси аъзоси ҳамда Фан, таълим, маданият ва спорт масалалари қўмитаси аъзоси, Қори Ниёзий номидаги Ўзбекистон Педагогика фанлари илмий тадқиқот институти директори, Наманган вилояти халқ таълими бошқармаси бошлиғи, Ўзбекистон Республикаси Президентининг Наманган вилоятидаги Халқ қабулхонаси мудири, Халқ таълими вазирининг биринчи ўринбосари ҳамда Мактабгача таълим вазирининг биринчи ўринбосари сифатида иш олиб боргани устознинг юксак дунёқараш, билим, касбий ва ҳаётий тажриба ҳамда бошқарувчилик салоҳиятидан далолат беради.

Собитхон Тошпўлатович 2020 йилда Наманган давлат университети ректори этиб тайинланди. Ўтган вақт ичида университетда ўн йилларга татигулик ижобий ўзгаришлар юз берди. Олий таълим муассасасининг нуфузи ва рейтинг кўрсаткичлари республикада сезиларли равишда юқорилади. 60 ортиқ хорижий давлатларнинг таниқли олий таълим муассасалари билан мустаҳкам ҳамкорлик алоқалари ўрнатилди. Халқ хўжалиги учун зарур бўлган ўнлаб янги йўналишлар очилди. Бу халқни ниҳоятда қувонтирди. Талабалар қамрови ҳам кескин ошди. Университетда бир неча янги ўқув аудиториялари, талабалар турар жойи бинолари янгидан қад ростлади. Замонавий лаборатория комплекслари барпо этилди ва сўнгги русумдаги асбоб-ускуналар билан жиҳозланди. Талабалар учун яратилган шароитлар, замонавий таълим технологияларининг жорий этилиши, янги факультет ва марказларнинг фаолияти, хорижий ҳамкорликнинг кучайиши – буларнинг барчаси ректор раҳбарлигида амалга оширилган самарали ишлар сирасидандир.

Қолаверса, университет ҳудудида янги ўқув бинолари, лабораториялар, кутубхоналар ва спорт иншоотлари фойдаланишга топширилди. Илмий-тадқиқотлар сони ортди, халқаро лойиҳаларда иштирок этиш даражаси сезиларли даражада кенгайди. Талабалар ютуқлари ҳам минтақавий ва халқаро миқёсда эътироф этилди.
Мамнуният билан таъкидлашимиз мумкинки, Собитхон Турғунов катта бир жамоага ҳар жиҳатдан ўрнак бўлиб, талабчанлик, ўз ўрнида эътибор ва меҳр кўрсатиб раҳбарлик қилди. Кўплаб илм-фан ривожига улкан ҳисса қўшаётган шогирдларни етиштирди.

Бугун Наманган давлат университети жамоаси профессор Собитхон Турғунов билан хайрлашди. Тадбирда сўз олган университет раҳбарияти, профессор-ўқитувчилар ўтган беш йил ичида олий таълим даргоҳида амалга оширилган улкан бунёдкорликлар, эришилган ютуқлар ва ижобий ўзгаришлар ҳақида илиқ ва самимий фикрларни билдирдилар. Барча Собитхон Тошпўлатовичнинг университет ривожи йўлида олиб борган сидқидил фаолиятини чуқур ҳурмат билан эътироф этди.
Ўз навбатида, устоз ҳам жамоага чуқур миннатдорлик билдирди. Университетдаги фаолиятини «бир жамоа бўлиб, елкама-елка ишланган, баракали ва сабрга тўла беш йиллик» деб атади. Ютуқлар бутун жамоанинг фидокорона меҳнати эвазига қўлга киритилганини алоҳида таъкидлади.

Шундан сўнг профессор Собитхон Турғуновга университет жамоаси номидан тўн кийдирилди. Жамоа вакиллари устоз билан хайрлашар эканлар, унинг инсоний фазилатлари, ишга масъулиятли ёндашуви ва одил бошқарувчилик қобилияти уларни доим жонкуярлик билан фаолият юритишга ундашини айтиб ўтдилар. «Ҳаммаси учун барчангизга раҳмат!» – дея якунлади сўзини профессор Собитхон Турғунов.
Бугунги кун - жамоага раҳбарликнинг якуни. Аммо бу ниҳоя ўзидан ўчмас ва ёрқин из қолдирган фаолиятдир.

Собитхон Турғуновни, таъбир жоиз бўлса, отахон университет ҳаётида ўзига хос тараққиёт даврини яратган, унинг мустаҳкам пойдеворини қура олган устоз сифатида жамоа учун ҳамиша қадрли бўлиб қолаверади!

⌛ Наманган давлат университети
«Пресс клуб»

➡️Каналга обуна бўлинг
😀 https://www.tgoop.com/namdupressklub