السلام عليكم ورحمة الله وبركاته
أعضاء قناة بــــوح قلمــــي ✍️ الكرام..

منذ أن بدأنا برواية #طريق_إلى_النار الى الآن وهناك تساؤؤلات كثيرة ومنها...

1.. متى تنتهي الرواية
2.. الرواية طويلة وقريبة للخيال
3.. هل الرواية حقيقية

اعزائي سأجيب للمرة الأخيرة عن هذه التساؤؤلات...
انها معاناة لاخوات عراقيات وحال إحدى العوائل العراقية وهي قصة واقعية حقيقية منقولة من ابطالها ولانها معاناة تمتد لسنوات لهذا سميت بالرواية...
اما احداثها التي يراها البعض غير حقيقية فقط لاننا لا نعلم المعاناة التي يعيشها البعض ونقتصر على معاناتنا فقط ولهذا لقلة اطلاعكم على جرائم وكوارث باتت في مجتمعنا بكثرة.
الرواية ما زالت فيها معاناة بعيدة عن الحب فلا تأخذوا الرواية من باب الحب فقط بل هناك ابواب أخرى.
اما باللنسبة الى الرواية نعم فانها طويلة وستستمر لحين اكتمالها...

أخيراً وليس أخراً..
شكراً لكل متابعيني الجميلين ولكل من ساندني بالكلمة والفعل.
دمتم بخير اعزائي..
#نرجــس_صــادق

منقول من الكاتبة.. 🌺🌺

بارت 77....

رواية #طريق_إلى_النار
//بقلم.. نرجــس صــادق //

خالد... أجيت ابالي مره وصدگت جاي
بچيت وشبگة مسودن شبگتك

شبعد عندك حچي وشرايد تگول
تريد تعوفني
وصلت فكرتك

حبيبي أتدلل أدري تريدني انساك
عفواً قصدي تدلل حظرتك

ريم.... عوفوني اختلي بروحي
عوفوني اختلي ويه الكاس
عوفوني
التعب مرات مايحتاج كثرت ناس

ـــــــــــــــــــــــــــــــــــــــــــــــــــــــــــــــ
عباس...
ثاني يوم اخذت كل مستمسكاتها ورحت اني وخالد حتى ارتب سفرها واني بالي كله يمها...اجه ابالي منو الها ووين راح تروح وشلون راح تعيش...فكرت افتح وياها موضوع واقنعها ترجع لاهلها... جنت متأكد ميتقبلونها بعد سوايتها بس قررت اقنعها واشوف..
كملنا اني وخالد وتقرر موعد سفرها بعد اسبوع...رجعنا للبيت وتلكتني سحر وهي تسألني  ...
سحر....شصار عباس
عباس...الخميس موعد سفرج بس سحر عندي موضوع وياج
سحر...شنو الموضوع خوفتني
عباس...إذا سافرتي مو بعيد يدزون ناس وراج ووين ترحين وانتي وحدج
سحر...لعد شاسوي لازم اعتمد على نفسي
عباس... ليش مترجعين لاهلج وتحجيلهم الحقيقة
سحر... لا معناها موتي إذا رجعت لاهلي
عباس... اوف السفر صعب سحر لا عبالج سهل
سحر...اعرف والله بس ماكو حل ثاني
عباس... الله كريم المهم جهزي نفسج اسبوع الجاي تسافرين
سحر...ماشي

شويه ووصيتها متطلع وطلعنا اني وخالد...رحت لشغلي وخالد راح للاستيديو واني رايح لبيت غيث تذكرت بيت ابو محمود معروض للبيع..رحت على بيتهم وجان اكو نسوان اثنين واكفات بالباب بس ما شفتهم لأن مطياتني ضهرهن... شويه وصعدن بسيارة شفت وجه وحدة منهن وضل عقلي يضرب هذي شايفها اني بس،وين ما اعرف...حاولت اتذكرها بكل جهدي لحد ما تذكرت...هذي خالة خالد شفتها بيوم خالد كام بالسلامة...شتسوي هنا وشعدها ويه بيت ابو محمود...معقولة الي ابالي صحيح.
رجعت بسرعة للاستيديو واني مخلي ابالي احجي الي شفته لخالد...وصلت للاستيديو ودخلت وجان اكو ناس يمه...
انتظرت يرحون واني كاعد على نار... نص ساعة وفرغ الاستيديو..اجه خالد كعد يمي وهو يسألني..
خالد...شبيك عباس ليش وجهك اصفر
عباس...اكو شغلة ضربت عقلي وخلتني ما اندل طريقي
خالد...خير ولك شكو
عباس... راح احجيلك بس،ما اريد تضوج بس اكعد وياية خلي نفكر
خالد...تره طلعت روحي احجي
عباس... شفت خالتك يم بيت عيال ريم
خالد... شنووو خالتي شتسوي هناك
حجيت لخالد كولشي وجان عقلي يكولي روحتها هناك الها سبب واحد... باوعت لخالد وكوتله...
عباس... شتتوقع شنو سبب روحتها هناك
خالد... اكيد حتى تأذيني بريم
عباس... شلون يعني تأذيك
خالد... ما اعرف المهم المستهدفة ريم
عباس... بس إذا خربت علاقتها ويه زوجها من صالحك
خالد... انت شتحجي صالح شنو حرام هالشي
عباس... ما افتهمتك شتريد انت
خالد... اريد ريم بس مو هيج انت شبيك
عباس... خوش لعد راح اراقبها واشوف اذا ترجع مرة ثانية
خالد... تمام

ريم...
اليوم طلع وسام واخذ خالو والولد حتى يفصلون أهل البنية واني كل يوم يجيني رقم ورسالة شكل تعودت اتجاهل وما ارد بس طول الوقت لازمة كلبي اخاف وسام يدري مو حبا بوسام بس ما اكدر اخرب حياتي هيج واني عندي اطفال منه...
لحد ما بيومها كاعدة اني والحجية وخالتي وليليان ومنتظرين يرجعون حتى نعرف شصار على الفصل...
كمت اني وليليان وسوينه جاي وكعك ورجعنا واحنه كاعدين نسولف ونضحك... دخلوا وسام وخالو ومبينين ضايجين كولش... كعدوا والحجية سألتهم...
الحجية... هلا يمه خير شبيكم
ابو حسن... أهل البنية قافلين إلا يتزوجها وميرضون بالفصل
الحجية... ياااا شبيهم ذولة شامرين بنتهم هالشمرة شني هي ياخذون الفلوس ويسكتون.
ابو حسن... ميقبلون وتدخلت ناس وهمة قافلين ميتنازلون إلا يتزوجها
الحجية... وهسة شلون يمه
ابو حسن... مو جاي اكوله استر عليها وسد الموضوع
وسام... خالي زواج ما اتزوج لو تنكلب الدنيا
الحجية... يمه وليدي جم شهر وطلكها
وسام... أبد والله ما اتزوجها
ابو حسن... شلون يابوية شتسوي هسة
وسام... خلي يسجنوني مو مشكلة
ابو حسن... شو اسكت انت هي هاي العايزة
الحجية... يمه خلي ياخذها حسين جم شهر ويطلكها
ام حسن... يااا عمة شذنب وليدي
الحجية... ماله ذنب عمه بس جم شهر ويطلكها شبيج
ابو حسن... وينه حسين صيحوليا

اتصل حسن على اخو حسين شويه واجه حسين وهو فرحان ما اعرف شبي... بس حسين جان شاب مرح حيل وروحه حلوة وبس، يضحك وهو يشتغل ويه ابوو... صاحه خالو وراح كعد يم وسام...
ابو حسن... بوية حسين راح اكول حجايتين وانت فكر بيهن
حسين... اي يابه تفضل
ابو حسن... بوية اخيك وسام تعرفه سوه حادث وتأذت بي بنية وهاي البنية رحنا حتى نفصلهم اليوم  ميقبلون بالفصل الا يتزوجها واخيك ميريد يتزوج لان هو عنده مريته وجهاله واخوك حسن هم متزوج بوية اريدك تاخذها انت جم شهر وطلكها بوية بس نفتك من هالسالفة شدكول.

حسين... الصراحة يابه اني اجيت اليوم  اكولك اريد  اتزوج عادي ما عندي مشكلة بس المهم حلوة هههههههههه
ابو حسن.... هههههههههه بوية كاتلاتك الحلوات
الحجية... فلك طرك ابو الحلوات انت اعرفك تتسودن على الحلوات من جنت زعطوط
حسين... شبيج حجية تغارين انتي ههههههه
وسام... هههههههه دكوم لا بارك الله  بيك
حسين... انت تسوي المصايب واني طايح بيها
ابو حسن... بوية راح اخابرهم حتى انطيهم خبر قرارك الاخير هذا.
حسين... يابه كللهم صورة للبنية بدربهم
وسام... حتى يصخمون وجهك هههههههههه
حسين... خايب انت مو دعمتها ما شفتها حلوة لو لا
وسام... هههههههههه اي شفتها جانت سودة وسمينة
حسين... كول والله
وسام.... ههههههههه شبيك وجهك صار اصفر
حسين.... لا الله عليك لا تتشاقة
وسام... لا والله ما شفتها
ضلينه نسولف وخالو خابرهم وانطاهم خبر راح  ناخذ البنية لاخو واتفقوا على يوم نروح نخطبها وحسين مكيف ما توقعته يوافق... يجوز قسمته هذي والبنية لا شايفيها ولا نعرفها بس تعجبنا ليش  اهلها بس يردون يخلصون منها.
جانت الحجية خايفة تطلع بيها شي ويردون يكربسوها براسنا... 
مرت الأيام واحنه منتظرين يجي يوم نروح نخطبها ونتفق على الزواج... لحد ما بيوم الاربعاء العصر.. تحضرنا اني وخالتي والحجية وليليان واخذنا وسام لبيتهم...
وصلنا واحنه نازلين صاحني وسام وهو يكولي...
وسام... حبي ديربالج على نفسج
ريم... تمام

دكينه الباب شويه وطلعتلنا مرة متوسطة بالعمر ومبينة وكحة وهي تعوج بحلكها كالت...
ام جاسم... تفضلوا
الحجية... زاد فضلج عيني
دخلنا جوة وجان بيتهم جبير ومبينين ناس شبعانين.. تلكتنا بنية شابة حلوة  ومرتبة وسمعنا المرة تصيح عليها وتلومها لأن طلعتلنا..
ام جاسم... انتي شطلعج لو كيفتي لأن اجوج خطابة
سارة... لا بس لارا كلتلي كومي فتحي الباب
ام جاسم... امشي طبي جوة ولا تشوفيني وجهج

دخلت البنية وبعد ما طلعت واحنه كاعدين والمرة كاعدة كبالنا وكوة طايقتنا وما نطقت ولا حرف... الحجية ضاجت وطكتها بحجاية...
الحجية... عيني احنه ما جنه نريد يصير هالزواج لأن تعرفين احنه ولد عزة ومستعدين ندفع ملايين بس سمعنا انتم رايدين نسبنا
ام جاسم... والله اني ردت ناخذ الفصل بس ابونا راد يزوجها لأن البنية نايمة على كلبنا.
الحجية... ليش نايمة على كلوبكم مو بنيتكم هي
ام جاسم... لا مو بنتنا بنت حماتي وتعبنا واحنه نصرف عليها ما مجبورين
الحجية... يعني انتي مرت خالها
ام جاسم... اي عيني
الحجية... خوش خلي نشوف البنية حتى نكول لزلمنا ونحدد وقت الخطوبة
ام جاسم... هسة عيني
سارة... سارة تعالي

صاحت البنية وطلعت هي نفسها البنية الي طلعتلنا قبل شويه وجانت حلوة وبريئة ومبينة هادئة... كعدت كبالنا والحجية سألتها..
الحجية... يمه انتي شسمج
سارة... اسمي سارة
الحجية... فدوة اسمج يمه شنو هالجمال
سارة... شكراً
الحجية... احنه موافقين وان شاء الله الاسبوع الجاي نجي نعقد
ام جاسم... الحجي بأيد ابونا عيني
الحجية... اكيد احنه نعرف الاصول وإن شاء الله نتفق على هالشي
شويه واتصلت الحجية على وسام وطلعنا صعدنا والحجية نهدت...
الحجية... الوضع ما عجبني هاي مرت خالها مبينة عرمة
وسام... شكو وليش مرت خالها امها وين
الحجية... البنية يتيمة ومخلينها امانة عند خالها
وسام... خطيه
الحجية... البنية تطب للكلب بس هاي ابد ما ارتاحيتلها مرت خالها
وسام... المهم البنية مو مهم مرت خالها
ام حسن... البنية حتى اني حبيتها
ليليان... اي والله مبينة فقيرة
وسام... وانتي ريم شنو رأيج
ريم... حبابة مبينة
وسام... مثلج قصدج
الحجية... وين اكو مثل ريم
ريم... شكراً حجية

رجعنا للبيت وكعد خالو يسال والحجية تجاوبه لحد ما دخل حسين وهو شافنه اجه يركض وكعد كبال الحجية...
حسين... اي حجية سولفي
الحجية... شسولف
حسين... مرتي المستقبلية حلوة لا
الحجية... صخام بوجهك سالفة ما تتسولف
حسين... لا دكولين جكمة
الحجية... يبيبي حتى اني احلى منها
حسين... اشتعلوا واحد واحد صدك حجية لعد لو اخذج احسن الي
الحجية.... طيح الله حظك شنو اخذج ولك
ام حسن.... ههههههه جذب يمه البنية حلوة ومثل ما يريدها خاطرك
حسين... صدك يمه
ليليان... اي والله تخبل وهادئة وحبابة
حسين.... كوللللليش مبروك الي لعد
ابو حسن... ههههههه اثكل ولك
حسين... مو حلو الثكل يابه... يله هوسن حسوني يا جوكليته حامض حلو باكيته.
الحجية... امداك اي والله ولك ولا جن انت اخيك حسن
حسين... انتي ليش تغارين حجية لا تخافين لكيتلج زلمة بس لا تخلين عينج عليه.
الحجية... خليت العرس الك يالمسودن
الكل يضحك وفرحان بالاجواء إلا اني جان بالي يم محمود وتهديداته وسلام الي ما اعرفه.
ـــــــــــــــــــــــــــــــــــــــــــــــــــــــــــــــ
توقعاتكم للقادم....؟
ام سرى شتسوي بيت محمود...؟

نرجــس صــادق

بارت 78.......

رواية #طريق_إلى_النار
//بقلم.. نرجــس صــادق //

خالد... كون دموع عيني ترجع الراح
حرام ان جان اخلي عيوني ترتاح
لبجيلك بجي ما شايفة احد
واجزنلك حزن لو تعرف شكد
مثل حزن الارض لو مات فلاح


ريم... يا باجر يجيبك والتقي وياك
واشيلنك كلب مابين الضلوع

واذاباجر اجه وماجابك اوياه
اكض باجر واشيلنه من الاسبوع
ـــــــــــــــــــــــــــــــــــــــــــــــــــــــــــــــ
ريم...
الصبح الساعة ب8 صحيت واني تعبانة بعد تنظيف البيت واحنه نتحظر لعرس حسين... كمت واني نعسانة غسلت ورجعت للغرفة كعدت وسام وعلاوي وزنوبة...
رجعت للمطبخ وبديت احظر الريوك شويه واجت خالتي وكعد الكل... خالتي تحسنت علاقتها وياي ورجعت طبيعية...
كملت الريوك وخليته الهم... اجيت ارجع لغرفتي وحسيت بدوخة كولش قوية.. لزمني وسام وهو يسألني...
وسام... شبيج ريم
ريم... ما اعرف دخت وراسي يوجعني
وسام... اخذج للمستشفى
ريم... لا شيسولي المستشفى
ام حسن... ريم يمه مبين من شكلج حامل
الحجية..الله يسمع منج ان شاء الله
ريم... لا مو حامل أكيد
ام حسن... ليش يمه ما تردون طفل
ريم... لا شنسوي بي
وسام... ليش اني اريد طفل
ريم... بس احنه عدنه اطفال شتسوي بي
وسام... اريد بعد بنية
ريم... ميحتاج
وسام... هسة منو يكول انتي حامل
ريم... ان شاء الله مو حامل
عفتهم ورجعت لغرفتي وجانت روحي تلعب وبس اريد استفرغ تاكدت كلام خالتي صح وضليت ادعي أن شآء الله يطلع مو حامل... شويه واجاني وسام وهو مبين ضايج..
وسام... كومي اخذج للمستشفى
ريم... ما اروح
وسام... براحتج
ريم... جيب وياك اختبار حمل
وسام... وإذا طلعتي حامل
ريم... اي شاسوي بعد اتقبله غصبا عليه
وسام... ليش متردين طفل
ريم... ما بيه حيل الحمل يتعب
وسام... ماشي
طلع وهو مطايقني اعرف اخذ كلامي من باب اني ما اريده... بس حتى لو ما اريد خلاص كلشي انتهى وماكو أمل بعد.
خليت راسي على المخدة ورجعت بالذكريات لاخر لقاء بيناتنا... اخر كلمة جانت أحبج...
هم يجي يوم ويصير الي هم يجي يوم ويبطل كلبي ونينه... بعد ساعة رجع وسام وجايب اختبار حمل.. اخذته منه ورحت سويت الاختبار وجانت النتيجة صدمة باللنسبة الي... حامل
طلعت وكولت لليليان وهي رادت تهلهل بس من شافت دمعتي سكتت... باوعتلي واجتي يمي...
ليليان... ريم هذا رزق من الله ليش تبجين
ريم... ما اريده فدوة اريد حل
ليليان... شنو من حل لا تفكرين تذبينه حرام ولج
ريم... لا دكولين لاحد والي يسألج كوليلهم مو حامل
ليليان... ليش ريم حبي شبيج
ريم... حبابة مرة وحدة اريد ارتاح
ليليان... ماشي ما اكول بس، حرام تذبينه
ريم... اخذ حبوب بلكت يوكع
ليليان... ريم حرام عليج
فجاة اجاني صوته...
وسام... ميحتاج تاخذين حبوب اخذج للدكتورة ونزلي
ليليان... لا وسام هي مو هيج قصدها البنية تتعب بالحمل وحقها الحمل يتعب
وسام... لا تبررين الها ليليان الله يخليج اني اعرف شتريد
ليليان... لا تضلمها وسام مو قصدها اصلا هي تريد يكبر أبو الأكبر حتى تسوي طفل.

تقرب يمي واني لحد هذي اللحظة مصدومة وتمنيت لو محاجية... لزمني وباوع بعيوني...
وسام... مشكلتج وياي الطفل ماله ذنب
ريم... ما عندي مشكلة وياك
وسام... هنا وبهاي اللحظة احجي الي رايده كلبج منو واقسم بالله راح اعتقج وراح ينتهي كولشي واختفي من حياتج نهائيا.
ريم... عيب عليك هيج تحاجيني ولو اريد انهيك من حياتي جان من زمان طلعتك.
وسام... تردين تقنعيني بكلامج هذا ريم 4 سنوات متزوجين بس ما شفت الحب بعيونج ولا شفت الاهتمام احجيلي اسبابج شنو.
ريم... ما مضطرة ابررلك ولا احجي المهم ما مقصرة بحقك ولا حارمتك من شي وانت تريد هذا الطفل موو راح يبقى.
اجيت اروح واطلع من المطبخ... لزمني وصاح..
وسام... تعالي وين رايحه
ريم... شتريد
وسام... لمي غراضج
ريم... ليش
وسام... اوديج لاهلج
ريم... ليش
وسام... قررت ننفصل افضل شي بس تجيبين
ريم... ما اريد اتطلك مو بكيفك
وسام... شتردين فهميني ما اتحمل اشوفج كبالي وانتي مو الي
ريم... ليش اني مو مرتك انت شتريد بعد
ليليان... اهدوا شويه وروحو للغرفة وتفاهموا لا تخلون أحد يشوف مشاكلكم
راح وسام واني كعدت بمكاني وبدت دموعي تستسلم... نزلت يمي ليليان وكعدت وهي دكولي...
ليليان... ريم انتي غلطانة
ريم... عادي ليليان هو منو شافني ما كلي انتي غلطانة مراح تحسون بيه ولا راح تفهموني
ليليان... تره وسام من حقه ماكو رجال يسمع مرته تريد تذب ابنه ويبقى ساكت ولج والله لو حسن جان ذبحني.
ريم... الله يخليج لا تزيديها عليه والله تعبت تعبت افهموني
ليليان... كومي حبي كومي ارتاحي وروحي لاهلج حتى ترتاح نفسيتج شويه

ريم... ماشي
كمت ورجعت لغرفتي وجان وسام كاعد على الجرباية... رحت للكنتور واخذت غراضي واخذت غراض زنوبة وسجاد وابو الأكبر وعلاوي... باوعلي وكلي...
وسام... عوفي سجاد وابو الأكبر وعلاوي
ريم... ليش
وسام... ولدي يبقون يمي
ريم...بس اني رايحة لاهلي ارتاح ما اريد اتطلك
وسام... ليش متردين تطلكين
ريم...ما اريد اتطلك
وسام....ماشي نشوف تاليتها وين تصير
اخذت غراضي وغراض جهالي...وكوتله يله وديني...كام واخذني وطلعنا واحنه طالعين علاوي موت نفسه ميرضى يروح كاعد بحضن وسام وميرضى يعوفه.... بعد 3 ساعات وصلنا بغداد وزنوبة بس شافت بغداد كامت تبجي وتريد نرجع... يمكن كلهم ميحبون بغداد بس اني روحي احسها هنا...بعد شويه وصلنا لبيت علاء... نزلنا ودكينا الباب.

علاء...
جنت كاعد بغرفتي وودق نايمة بعد ما رجعت المدارس ودق تعبت حيل وحملها تعبها أكثر لأن دخلت بشهرها وجانت تروح للدوام وترجع هلكانة...
جنت اساعدها بدراستها واحاول اخفف صعوبة المواد عليها...لحد ما بيوم رجعت تعبانة ومترضى تقره ودكول عندي الم بظهري وبطني...خليتها تنام وترتاح ونزلت جوة...
اتصل عليه عباس وكلي بانه خالد يريدني اروح بمكانه...اجيت اطلع وندكت الباب...فتحتها وتفاجئت واني اشوف ريم وزوجها وسام...
دخلتهم جوة وسلمت على زوجها واني متفاجئ وحسيت جيتهم مو خالية...
دخلوا جوة وشوية وترخص وسام وعلاوي يبجي يريد يروح ويا بعدين اخذه وراح....شفت عمتي متحجي ويه ريم وما عرفت السبب شنو...
رجعت صعدت فوك وكعدت ودق...
علاء...حبي كومي اختج هنا وتريد تشوفج
ودق...صدك ريم هنا
علاء...اي والله
ودق...خير خوما بيها شي
علاء....لا ماكو شي اجت زيارة شنو ميصير
ودق...لا عادي بس عبالي بيها شي
نزلت وكعدت يمها وسألتها...
علاء...شلونج ام علاوي
ريم...ههههه هاي شبسرعة صرت ام علاوي
علاء....هاي شنو ما معترفة بابنج شنو
ريم...لا معترفة بس كبرت بسرعة
علاء...هي هاي الدنيا عيني اي شلونج شلونه وسام وياج
ريم...زين
علاء...اعتبريني اخوج احجيلي شبيج
ريم...اسئلك سؤال
علاء...اي تدللين اسألي
ريم... خالد شلونه
علاء....خوية شنو هالسؤال انسي وخلي يولي
ريم....الله يخليك بداعت ابنك
علاء...ريم انتي مرة متزوجة بعد شمنتظرة
ريم...حلفتك بداعت ابنك
علاء....استغفرالله
ريم...فدوة بس جاوبني
علاء... زين وانتي،تدرين بي متزوج
ريم...اي مو مهم المهم هو بخير
علاء... خوية ما يصير هيج انتي،متزوجة والي،جاي تسوينه خيانة
ريم...شسويت فهمني ليش دائماً اني المحكوم عليها
علاء...استغفر الله خوية ما سويتي شي بس فكرتي بغير رجلج
ريم...كلكم تدرون عمري مراح احب رجلي وباقية وياا بسبب الجهال
علاء...اتقي الله خوية وحرام هالحجي
ريم... شكراً الك
علاء...احجي لمصلحتج
ريم...كلكم تعرفون مصلحتي بس،اني ما اعرفها
علاء... الله يبرد كلبج خوية اترخص اني

طلعت من يمها واني روحي مشتعلة نار وما اعرف شاريد لازم ما اخلي خالد يدري ريم هنا...ما اعرف شلون راح تخلص ياربي.


ودق...
اجاني علاء وكلي ريم هنا... كمت بدلت ونزلت جوة دخلت للصالى وجانت ريم كاعدة وحدها... رحت عليها سلمت عليها وكعدت يمها...شويه واجتي ماما وما سلمت على ريم تفاجئت...
كعدت امي وهي تسألني...
ام ستار...يمه شلون صرتي لسه بطنج توجعج
ودق...لا زينة هسة راح الالم
ام ستار...اي يمه هاي الالام الولادة
ودق... ريم انتي شلونج
ريم...الحمدلله
ودق...ولج هذا أبو الأكبر بايدج
ريم...اي وهذا سجاد
ودق...انطيني خلي اكله
ريم...ههههههه اخذي اكيف تخلصيني منه وكح
ودق... ولج صاير نسخة من وسام
ريم...اي هو وسجاد نسخة من ابوهم
ودق....هههههههه فدوة
ام ستار...تعالي زنوبة بيبي تعالي حبيبتي

راحت زنوبة لامي وكعدت بحظنها من زمان زنوبة تحب امي حيل...ضلينه نسولف اني وريم وبعدين كمنا نسوي عشة اني وياها.
ودق... ريم شبيها ماما وياج
ريم... متحجي وياي علمود خالد
ودق... ريم لازم تصالحيها
ريم... مترضى تحجي وياي
ودق... ميخالف اني احاجيها الج
ريم... ماشي
ضلينه نسولف اني وريم وبعد ساعة اجه مهدي وعمتي من الطبيب... كعدنا كلنا بالحديقة ومنتظرين علاء يرجع بعدين اتصلت علي وكلي هو يتأخر..
خلينه عشه وكعد الكل على الأكل وضلت عمتي تسأل بريم على حياتها... لحد ما عمتي كلتلها...
ام علاء... يمه متسويلج طفل ثاني
ريم... هو اني حامل
ودق... صدك ريم انتي حامل
ريم... اي والله
ام علاء... مبروك يمه أن شآء الله دكومين بالسلامة
مهدي... مبروك خوية
ريم... الله يبارك بيكم شكراً
كملنا عشه وكمنا اني وريم نغسل مواعين... شفتها ضايجة حيل..
ودق... شبيج ريم
ريم... ما بيه شي

ودق... لأن حامل
ريم... لا
ودق... اعرفج تره
ريم... كتلج لا
ام ستار... ضايجة ما شافت حبيب الكلب
ريم... انتم ليش هيج تسوون بيه
ام ستار... ما شفت وحدة مثلج ادبسزز ومتخاف الله
ودق... ماما شبيج وياها
ام ستار... انتي اسكتي الثانية
ريم... رحم الله والديج اي اني وحدة مو زينة
ام ستار... والله لو ما عيب من العالم جان عرفت شلون اربيج ادبسزز عبالج ما اعرف شبيج ويه وسام خابرني الولد وكلي شتردين تسوين.
ريم... ها يعني هوة كلج
ام ستار... اي، كلي على سواياتج نسوان ادبسززية يتمعشكن تالي وكت.
ريم... ترديني اكتل روحي وتخلصين مني
ام ستار... ياريت وتطمين عارج وياج
ريم... ماشي هي الروح متعلعلة متعلعلة خليها موتة وحدة
ودق... ولج اسكتي ريم نسيتي الي صار بهبة
ريم... قابل حياتي شلونها حتى اخاف يصير بيه مثل مصار بهبة
ودق... اسكتي وكولي يالله
راحت ماما وبقت ريم تبجي وهي كاعدة بالكاع... كعدت يمها وحضنتها...
ودق... كافي حبيبتي لا تنسين انتي حامل مو زين عليج الدموع
ريم... الله ياخذني ويخلصني ولج اجي هنا حتى ارتاح تالي اموت الف موته
ودق... اسم الله عليج حبيبتي
ريم... جيبيلي موبايلي فدوة... جبت جهازها وانطيتهيا...
اتصلت على وسام...
وسام... الووو
ريم... انت متخاف الله اجيت هنا حتى ارتاح تلحكني وتخابر امي وتحرضها عليه
وسام... اول شي من تحجين وياي لا تصيحين واحترمي نفسج.. ثاني شي مو اني خابرت على امج هي خابرتني وسألتني على سبب جيتج... حجيتلها الي صار وليش خايفة امج تعرف
ريم... مخايفة منك ولا من اي واحد خايفة على ولدي بس واضح الله يجازيك أن شآء الله
وسام... ريم احترمي نفسج
ريم... شتريد مني
وسام... ما اريد شي
سدته بوجها وهي تبجي وتصرخ... باوعتلي وكلتلي...
ريم... اريد رقم خالد
ودق... شتسوين بي
ريم... اريد احجي ويا فدوة
ودق... لا ريم ما اخليج والله ولج حرام
ريم... بس اسمع صوته فدوة
ودق... أبد والله لو اموت ما اخليج
ريم... شكراً ما اريد


عباس....
بعد ما سافرت سحر واني رجعت لبيتي وصالحت والدي وحاولت اقنعه بموضوع ترك الزواج بس جان قافل إلا يزوجني... شكد حاولت وحجه ويا علاء وخالد بس ما قبل... اخر شي قررت اشتري بيت واطلع بي وحدي ولو اموت ما اتزوج...
رحت على محمود واني مقرر اشتري منه البيت... جان بيتهم جبير واني جنت اريد اضرب عصفورين بحجر هم اراقب البيت وهم اشتري...
لحد ما بيوم جنت يم خالد بالاستيديو واجا اتصال... جاوب..
خالد... هلا عمي
ابو سرى... بوية البنية صارلها شهرين يمنه
خالد... اي عمي
ابو سرى... راح ارجعها يمك بوية حتى ما تحس الناس وتضل تشكك
خالد... ماشي عمي خلي ترجع بس ما اريد اشوفها كبالي ولا اسمع صوتها
أبو سرى... الي تريده يجرالك بوية
خالد... ماشي عمي
غلق الاتصال وعرفت هذا ابو زوجته وحجالي شطلب منه... ما ردت يرجعها بس فكرت يرجعها حتى يعرف منها امها شعدها بيت محمود...
عباس... حبي اني راقبتها صار مرتين تجي ووياها بنية
خالد... شلون شكلها البنية
عباس... قصيرة وناعمة وبيضة
خالد... عيونها صفر
عباس... اي
خالد... هاي سرى
عباس... لا دكول هاي مرتك
خالد... اي
عباس... خرب حظي ولك شنو من بنية هاي وبعد كل سوالفها تطلع وتمشي
خالد... معناها السالفة مو سهلة لازم اعرف شجاي يسوون
عباس... اكيد مو سهلة
خالد... تعرف مكان سلام وين
عباس... اي
خالد... خلي واحد يراقبه اكيد هو وياهن
عباس... ماشي

رجعت للبيت واني مخلي ابالي لازم اعرف شنو هدفهن وشجاي يسوون... بالليل واني كاعد يم امي... اجه والدي وكلي...
أبو عباس... اني حجيت ويه خالك
عباس... يابه اني كتلك ما اتزوج
أبو عباس... كلمتي ما تصير اثنين
ام عباس... يمه شبيك ليش ما تريد تتزوج خاف هاي ساحرتك
عباس... دخيلك ربي البنية سافرت ومشت شبيج يمه شنو ساحرتني
أبو عباس... اني ما امشي بكلامك إذا ما تتزوج ما تبقى بالبيت
عباس... ماشي اني طالع
ام عباس... ياااا يمه وين رايح
عباس... انام بالشارع
أبو عباس... يطبك مرض عسى ما تنام ويه الحيوانات
عباس... مشكور يابه
ام عباس... لا يمه فدوه تعال
طلعت وبقت امي تصيح وراية... ما اعرف ليش قافلين إلا اتزوج.. رحت بوجهي للشقة مالتي دخلت وجانت اخر مره نظفتها سحر... كمت نظفتها وكعدت بيها.
ـــــــــــــــــــــــــــــــــــــــــــــــــــــــــــــــ
توقعاتكم للقادم....؟؟
اللغز وين....؟
شنو حل هذا اللغز...؟
ومفتاح القصة وين راح يكون...؟
نرجــس صــادق

بارت 79........

رواية #طريق_إلى_النار
//بقلم.. نرجــس صــادق //
خالد... تغطه النايم بصفهه
تاكدت نايم وگامت
بچت یم صورتي شويه
ومسحت عينها ونامت

ريم... ‏اعلى گد إسمك رسمت الصفنة مرجوحة
ولگيت اسمي طفل فرحان بيك
ويدفع بروحه
ـــــــــــــــــــــــــــــــــــــــــــــــــــــــــــــــــــــــــــــــــ
ريم...
مر اسبوع واني بيت ودق واحس نفسيتي تعبت أكثر من كد ما افكر بخالد واتمنى اشوفه بكل لحظة... قررنا نطلع للسوك اني وودق علمود تجهز لولادتها...
جهزت نفسي وودق همين واخذنا علاء للسوك...ضلينه نفتر اني وودق واخذنا كل الاحتياجات ورجعنا بعد ما ودق اتصلت على علاء...اجه اخذنا واحنه راجعين وكفنا كبال الاستيديو ونزل علاءوكال شويه ويرجع... شفت خالد جان كاعد بالاستيديو أوف والله مشتاقتله...
شويه واجه علاء ورجعنا للبيت بس ضل ابالي خالد ولازم احجي ويا هو كلي مستحيل أحب غيرج معقولة بعد ميريدني... دخلنا للبيت وتلكتنا ماما وام علاء وهنة يسولفن ويه ودق...ترخصت منهن ورحت للغرفة فكرت اروح لخالد للاستيديو...
طلعت وكولت لودق اريد اروح لنور صديقتي... وطلعت بدون متجاوبني حتى.... رحت امشي سريع وتمنيت محد يشوفني واني ادخل للاستيديو...دخلت بدون ما اتاكد إذا جان خالد جوة لو لا...واول ما دخلت صار كبالي وهو كاعد يشتغل على الحاسبة...مرت لحظات واني اباوعله وهو ما منتبه لوجودي...صحت علي،بصوت شبه مسموع...
ـ خالد
رفع راسه وباوعلي بصدمة وهو يحاول يستوعب وجودي كباله...ضل يباوعلي بدون ما ينطق بحرف واحد ضليت منتظرة منه يحجي...
خالد...ريم معقولة انتي كبالي
ريم...اي اني كبالك خالد
كام واجه عليه وهو متلهف وجان يريد يحضني للحظات رجع ليورة وكلي...
خالد...اسف نسيت
ريم...ياريت بقيت ناسي ولا تذكرني
خالد...ريم
ريم... ها
خالد... اتمنى هاللحظات متخلص
ريم...شيصير لو توكف الدنيا ونبقى هيج
خالد...شلونج
ريم... مو زينة
خالد... ليش
ريم... بسببك
خالد...ريم شتسوين هنا
ريم...علمودك
خالد...وكفتج هنا ميصير
ريم... خالد روحي بدونك معلعلة
خالد... روحي ريم الله يخليج روحي ما اريد افقد السيطرة على نفسي
ريم...راح اسألك وجاوبني
خالد... ريم
ريم... خالد جاوبني بصراحة
خالد.... شنوو
ريم... بعدك تحبني
خالد... شدكولين انتي
ريم... نسيتني وتزوجت موو
خالد... انتي تمشين بدمي شلون انساج
ريم...لعد ليش تزوجت
خالد... مجبور بس لا تخافين مستحيل تملك كلبي وحدة غيرج
ريم... ماشي
خالد... روحي ريم وكفتج هنا غلط
ريم... ماشي رايحه
اجيت اطلع وصاح وراي... باوعتله وجنت منتظرة يكولياها...بس اكتفى بالسكوت..طلعت واني احس نفسيتي ارتاحت ومثل الي رجع الأمل بداخلي... رجعت للبيت بسرعة واني طايرة من الفرح.

عباس..
واني كاعد بالكوفي شفت محمود دخل هو وسلام وهنا اني تاكدت ام سرى جاي تخطط حتى تدمر ريم...ضليت اراقبهم من بعيد بس ما أكدر اسمع حجيهم لأن بعيدين عليه... بعد نص ساعة كاموا واني كمت وراهم...طلعت بالسيارة وراهم بسرعة وجان كل الي ابالي هو اعرف وين رايحين...فجاة وكفوا كبال بيت ونزل سلام منه وجانت ام سرى  واكفة بالباب...نصدمت واني اشوف ام سرى انطت فلوس لسلام وجان مبلغ جبير... حاولت استوعب الموقف وبسرعة طلعت بوجهي للاستيديو...
وصلت للاستيديو واني روحي طالعة...نزلت وشفت ريم تطلع من الاستيديو وهي فرحانة...معقولة اليوم يوم الصدمات... انتظرتها تبتعد وبسرعة دخلت جوة وشفت خالد كاعد ومخلي اديه على راسه...
تقربت يمه وهو رفع راسه وباوعلي...وجانت عيونه كلها دموع..
عباس... ريم جانت هنا
خالد...ياريت ما اجت دمرتني
عباس... خالد شنو الي جاي يصير كولشي مجاي افهم
خالد... عباس ريم ربت بداخلي ولحظة وحدة ما أكدر انساها
عباس... هي شتسوي اجت
خالد... ما اعرف
عباس... ماشي خلي احجيلك الي شفته
حجيت كولشي لخالد وهو مثل حالتي نصدم وما كدرنا حتى نعرف شنو سبب علاقة ام سرى بمحمود..
بعد دقايق اجاني اتصال كمت وطلعت بره واني احجي بالموبايل شفت سلام بسيارته واكف كبال الاستيديو ومثل الي مراقب المكان...تفاجئت بس لا شاف ريم من جانت هنا...
رجعت لخالد وكوتله...
خالد... ما اعرف يجوز هسة اجه
عباس... ما اعرف بس حاس اكو شي راح يصير
خالد... انت راقبه وشوفه وين يروح
عباس... ماشي
طلعت من الاستيديو ورحت بوجهي لبيت محمود واتصلت على ناصر حتى يراقبلي سلام.

ريم...
مر اليوم طبيعي بس جنت مرتاحه حيل وما اعرف شنو السبب الي يخليني مرتاحة يمكن شوفة خالد...بالليل جنت كاعدة اني وودق بالصالة وكاعدين الكل ديسولفون...فجاة رن موبايلي برسالة...فتحت الرسالة وجانت صدمة..
الرسالة من وسام وهي صورتي اني وخالد بالاستيديو...ومكتوب وياها...

حبيتج من كل وكلبي بس ما جنت ادري مخلصتها تمعشك ويه حبيب الكلب.
نصدمت وما عرفت شاحجي وشاكول ومنو اخذ الصورة ومنو وصلها...اتصلت علي ميرد ولا يرضى يجاوب..رجعت اتصلت نفس الحالة...فجاة رن موبايل ماما...باوعتلي وفتحت خط..شوية وصاحتني وكامت للغرفة...رحت وراها واني متاكده الي اتصل عليها وسام... دخلت للغرفة وراها وما حسيت غير راشدي سطرني سطر...لزمتني من شعري وهي تصيح...
ام ستار...ادبسزز اليوم اموتج على ايدي ولج اليوم اخلص منج ومن سوالفج
ريم...فهميني شمسويه اني وهي تضربيني
ام ستار...شمسوية موو هاي سواياتج يخابرني رجلج يكلي ما اريدها وباجر اجي اخذ ولدي منها وتوصلها ورقة طلاكها.
ريم... عوفيني موتوني انتم كله بسببكم انتم دفنتوني
ام ستار... نجبي حيوانة وين ستار عنج يطم عارج ادبسزز مو صرتي ام وبراسج حظ بس الك***** تمشي بدمج ادبسزز
ريم... تسوين فضل لو تموتيني وتخلصيني من هاي الدنيا
دفعتني وطلعت واني احس نار ووجرت بصدري اريد احد يطفي ناري...نزلت دموعي وكعدت بالكاع واني اشهك....خليت ايدي على بطني...وتذكرت اني حامل شنو ذنب هالطفل ينولد بلا اب...كمت واخذت موبايل ودق واتصلت على وسام...جاوبني..
ريم... وسام انت تدري اني حامل شنو ذنب الطفل
وسام... باجر جاي اخذ سجاد وابو الأكبر وانطيج علاوي
ريم... اني اريدك تجي انت مو تريد تعرف كولشي تعال وخلي نتواجه مدام ماكو شي مضموم باجر.
وسام...ماشي
سديته منه وقررت لازم احجي ما بقه شي اخسره...خسرت كلشي وصار لازم يعرف بالحقيقة.
ثاني يوم الصبح...جنت كاعدة اني وماما بس...علاء اخذ عائلته وراحوا يزورون ابوهم بالنجف...
شوية وندكت الباب كمت فتحتها وصار وسام بوجهي وهو مبين على وجها التعب...جانت الحجية ويا...دخلوا جوة وماما استقبلتهم...
كعدت كبال وسام وهو ما باوعلي ولا حاول يباوعلي...حجيت...
ريم... انت تريد تعرف كلشي موو
وسام...اي كل الي ضميتي عليه وكل الي ما اعرفه
ريم... انت من اجيت بيوم عقدنا وشفت دموعي سألتني إذا مجبورة او لا ولحد الآن انت تسألني إذا مجبورة...اي اني جنت مجبورة عليك بس عمري ما خنتك ولا حاولت اخونك وتقبلت واقعي وقبلت بيك كزوج واهتميت بيك وما قصرت بحقك...مرات من تكون قريب مني ابجي واضوج مو لأن اكرهك لا انت زوجي والله شاهد عليه ما كرهتك بس ابجي لأن نحرمت من هواي امور جنت اريدها.
وسام...وليش ما كتيلي هذاالكلام من البدايه
ريم.... لأن اعرف راح اخسرك
الحجية... يمه هذا شي خاص بيكم احنه ما نتدخل ولا ادخل بخطية أحد
ام ستار...الي اريده من وسام يفكر صح ولا تفكر بس،بنفسك.
وسام... ريم اني قررت ننفصل
ريم... والطفل الي بطني
وسام...بعد ما تجيبين
ريم... ويتربى بعيد عنك
وسام...انتي الي تردين هالشي
ريم... لا اني ما اريد اتطلك
وسام... اني قررت الطلاك افضل حل
ريم... وسام الله يخليك افهمني ما اكدر اعوف جهالي
الحجية... يمه وسام ابغض الحلال هو الطلاك
وسام...اخذت قراري خلاص
ام ستار...يمه وسام انت بعد ما تريدها ماشي بس خليها علمود جهالها وإذا تريد تتزوج براحتك محد يكلك لا.
وسام...ماشي ترجعين وياي علمود الجهال بس مستحيل اعتبرج زوجة الي من الآن.
ريم...ماشي
وسام... كومي جيبي الولد
ريم... اروح وياك
الحجية...يله يمه كومي وكولي يالله كلشي ينحل بس رجعي لبيتج.
كمت واخذت غراضي وجبت سجاد وانطيته للحجية واني شلت ابو الأكبر ورجعت اني ووسام سوية بس وسام تغير مو نفسه ذاك وسام الي يتمنى رضاي صار انسان ثاني كل همة نفسه وبس حتى الجهال ابتعد عنهم وصار اناني وبعد ميهتم وقاسي حيل.

إيمان...
مر شهر واني مشايفة خالد وحيل مشتاقتله وجنت مقررة اروح الاسبوع الجاي بس اتصل عليه خالد وكلي اجي اني ومصطفى لأن عازمنه...رحنا اني ومصطفى ووصلنا الصبح الساعة ب11...
من ادخل بغداد احس نفسي ارتاح واحس ملكت الدنيا... وصلنا لبيتنا ونزلنا...وطلعتلنا سرى وجان عبالي تغيرت وصارت زينة...بس ذيل الجلب ما ينعدل...
كعدت اني ومصطفى ننتظر خالد يجي...شوية ومصطفى راح على صديقه واني بقيت بالبيت.. صعدت لغرفتي واني اريد ارتاح..
بعد ساعة سمعت صوت خالد برعب وهو يصرخ...نزلت اركض واني مرعوبة لكيت خالد لازم سرى ويسحل بيها من شعرها...ركضت علي وحاولت افكها من ايده جان فاقد كولش وهو يجر بيها ويضرب بالصوندة...وهي،تصرخ بكل صوتها...اسمع صرخاتها ويقشعر جسمي واني اسمع صوت الصوندة وهي تطبع على جسمها...حاولت ابعده عنها بس هو جان فاقد ويصيح...
خالد....ولج ادبسزز تتفقين ويه كو****
سرى... عوفني الله لا يوفقك
خالد... اليوم تموتين على ايدي المرة الاولى جان بيج بخت بس من توصل بيج تأذين ريم ادفنج والله

سرى... الله ينتقم منك انت وكح*****
خالد...نجبي لا تسمعيني صوتج حيوانة
سرى...والله الا ادمرك وادمرها
عرفت سرى مسوية شي لريم واني اشوفه يضرب بيها بوحشية.
ـــــــــــــــــــــــــــــــــــــــــــــــــــــــــــــــ
الرحمة لشهداء الناصرية 💔💔
قررت ما اكتب احتراما للفاجعة الأليمة.. 💔
توقعاتكم للقادم...؟؟
نرجــس صــادق ✍️

بارت 80.....

رواية #طريق_إلى_النار
//بقلم.. نرجــس صــادق //
خالد... شما عندك كرامه وماطخ الراس
على البوم الصور لازم تجي مدنك

ريم... من شفتك تغير موعد النوم
وبديت اسهر واحن واشتاك وبرد

واغار وترجف ايدي وابجي واحتار
واشوفك وارتبك وابنيك ونهد
ـــــــــــــــــــــــــــــــــــــــــــــــــــــــــــــــ
إيمان...
بعد ساعة الكل اجه وجانت خالتي تصيح وتهدد وخالد كوة لازمي عن سرى وهي تغلط وتتوعد...
خالد... إذا بيج حظ لزمي بنتج لا ادفنها والله
ام سرى... تروحلها فدوة الله يكسر اديك أن شآء الله
خالد... والله لو ما اكول عمي كاعد جان ربيتج انتي وبنتج
ام سرى... الله ينتقم منك والله إلا انيمك بالسجن
سرى... علمود حبيبته هيج يضربني الله ينتقم منك
خالد... ولج عبالج ما اعرف بسوالفج شتسوين انتي وامج يومية تروحن لبيت هذا السكط محمود
أم سرى... يا محمود هذا انتي شجاي تحجي
خالد... هذني سوالفج متعبريهن عليه بس الصوج مو بيجن الصوج بزلمجن
فاضل... خالد انت ردت تبقي البنية يمك هسة طلكها واخلص من هالسالفة
خالد... لحظة ما تبقى عندي بعد
ام سرى... حتى علا طلكها فاضل ما يشرفني نسبكم
فاضل... شنو علا مرتي وام جهالي شنو طلكها انتي شجاي تخرطين
ام سرى... اي طلكها
ابو سرى... شبيج انتي شنو يطلك علا مرة عدها جهال ومستقرة ليش يطلكها
ام سرى... بناتي ما يبقن عند هذولة الوحوش
فاضل... علا ما اطلكها
ام سرى... وإذا هي متريدك وتريد تتطلك
فاضل... لا مستحيل هي تحبني
ام سرى... يمه علا تختارين امج لو رجلج
علا... اني اسفة فاضل بس اني ما اريدك
فاضل... شنو مترديني شبيج علا
علا... اي ما اريدك طلكني
فاضل... وجهالنا
علا... همة جهالك همين ما اتحمل مسؤؤليتهم اني
فاضل... معقولة انتي نفسها علا الي عشت وياها قصة حب العشرة مالها حوبة عندج
علا... صح حبيتك بس ما حققتلي السعادة أبد
فاضل... ما توقعت تبيعيني هيج
علا... المهم طلكني
ام سرى... راح اخذ بناتي وخلال يومين اثنينكم تطلكوهن
طلعت خالتي وزوجها واخذت بناتها وياها جنا مقهورين على فاضل الي بس طلعت علا نزلت دمعته... رحت يمه واني احضنه...
إيمان... حبيبي انت لا تنقهر متستاهلك والله ازوجك تاج راسها أن شآء الله
فاضل... مو قصة زواج إيمان تعرفيني احبها وما جنت متوقع تبيعني البارحه هي نايمة بحضني ودكلي احبك معقولة تجذب.
خالد... لو صدك تحبك ما تختار امها وهي تدري امها على خطأ انساها وخلي تولي وتعال اكعد يمي انت وجهالك.
فاضل... الله كريم

كولش نقهرت وجانت مثل الصدمة لفاضل على الي سوته علا بس الحمدلله طلعن على حقيقتهن وعرفناهن... مر اليوم طبيعي ومصطفى اجه وكعد ويه الولد ولليل يله ترخّص وراح وبالكوة خلاني ابقى.
صحيت الصبح على صوت رواء وهي تكعدني والظاهر فاضل حاجيلها كلشي... كعدت وسلمت عليها وكمت انظف البيت وارتبه خطيه اخواني وحدهم بقوا... نظفت البيت ورواء سوت ريوك واللتمينا كلنا على سفرة وحدة.
قررت اسوي للغده الاكلة الي يحبوها اخواني وهي الدولمة... كعدنا اني ورواء وسويناها وحظرنا الغده وجانوا طالعين علمود يطلكون.. شويه ورجعوا وجان خالد فرحان بس فاضل جان ضايج كولش.. اللتمينه كلنا وخلينه الغده وجنت احاول اطلع فاضل من جو الحزن... اجه ابنه علي وكعد بحضنه..
علي... بابا ماما وين راحت
فاضل... حبيبي ماما راحت لبيتها
علي... بعد مترجع
فاضل... اي مترجع
علي... ليش
خالد... حبيبي ماما متريدكم
جان موقف يكطع الكلب وهو فاضل حضن ابنه الي كام يبجي على امه ونزلت دمعته.. باوعت لرواء وهي حجت...
رواء... سودة عليه يحبيبي اخذك وياي انت واختك تلعبون ويه جهالي
علي... اي اروح
فاضل... لا حبيبي اكعد ماكو روحة
علي... حباب بابا
خالد... خلي يرحون ويه عمتهم متقصر وياهم هي
فاضل... ماشي بس هذا الاسبوع
رواء... أن شآء الله خويه اخليهم بعيوني
فاضل... سالمة عيونج خوية


ريم...
بعد ما رجعت من اهلي وسام تغير وصار شخص ثاني وحتى تعامله وياي تغير وجنت احاول اتعامل ويااا بحذر بس هو مثل الي صار يكرهني... وبيوم جنت كاعدة بغرفتي وحسيت بألم قوي بطني كولش...
اجتني رسالة على الموبايل من ودق... كعدت احجي وياها وعرفت منها ولادتها اقتربت وطلبت مني اجي يمها علمود ولادتها... كملت حجي وياها وراحت
شويه واجه وسام كعد على الجرباية واني باوعتله وهو ينزع ملابسه ويتمدد... تجرات وطلبت منه...
ريم... اريد اروح لاهلي
وسام... شتسوين
ريم... ودق قربت ولادتها وتريدني يمها
وسام... ماكو روحه
ريم... ليش
وسام... كلت ماكو يعني ماكو
ريم... ماشي
رجعت كعدت واني اتصفح بموبايلي... رن موبايله وهو نايم باوعتله بعده منايم بس ميجاوب على موبايله.. باوعت لجهازه جان المتصل بأسم سجى... تفاجئت منو هذي ما حسيت غير هو يسحب الموبايل من ايدي ويكولي...

وسام... ليش نصدمتي
ريم... منو سجى
وسام... هههههه ليش يهمج تعرفين
ريم... إذا متحب دكول عادي
وسام... هذي مرتي
ريم... شنوو شنو مرتك
وسام... نصدمتي موو لعد ما فكرتي شراح يصير واني اشوف صورتج ويه حبيبج.
ريم... بس اني ما خنتك
وسام... واني ما خنت تزوجت على سنة الله ورسوله والشرع حللي اربعة
ريم... براحتك الله يسعدك بس انت غدرتني وما كتلي
وسام... ردت اضوكج من نفس الكاس الي شربتيني منه
ريم... شكراً
عفته وطلعت واني حسيت بنفسي رخيصة وشمرت نفسي علي وهو غدرني صدك بهاللحظات كرهته وتمنيت ما صار عندي جهال منه جان ما ابقى عنده لحظة وحده...
مرت الأيام واقترب زواج حسين ووسام بده تعامله وياي يرجع بس هالمرة اني كرهته وكرهت حتى شوفت وجها.


ودق...
الايام تمر وبدت ايامي تقترب واني ميتة خوف وكل يوم اتخربط واروح للمستشفى وبعد اسبوع إذا ما ولدت طبيعي، الدكتورة راح تسويلي عملية...
كل يوم يطلعني علاء نتمشى اني ويا شويه حتى تتسهل ولادتي وكل يوم افز من النوم على الم يكطع بيه تكطيع.. وعلاء جان يسهر وياية رغم يطلع من الصبح للشغل...
وبيوم جنت كاعدة بالحديقة واني حاسة الم خفيف بظهري... شويه وبده الألم يزيد، دخل علاء وشافني اجه يمي يركض وهو يكولي...
علاء... شبيج حبيبتي
ودق... ما اعرف علاء اللحكلي يمكن راح اجيب
علاء... شلون شاسوي هسة
حسيت الألم بده يكطعني وشي سائل نزل عليه صرخت بكل صوتي....
ودق... علاء اللحكلي الطفل طلع
ركض علاء للبيت وطلعت ماما وعمتي وهنة يلبسن بعبيهن... جابتلي ماما حجاب وعباية وعمتي جابت غراض الطفل... شالني علاء وصعدني بالسيارة.. ما حسيت بالوقت شكد مر واني اصرخ من الألم الي بده يكطع بيه... وصلنا وراح علاء جابلي سديه... صعدوني عليها واني حاسه الطفل راح يوكع...
دخلوني لغرفة الولادة وجانت متروسة نسوان وصريخهن يكسر الكلب... خفت وتملكني الخوف واني احاول اهدأ... كعدت على السدية والدكتورة طلعت شوية واجت أول ما باوعتلي كلتلي...
الدكتورة... ماما ساعديني انتي راح تولدين بس كم دفعة يطلع الطفل لا تقلصين علي أبد حتى متخنكينه

نفذت كلام الدكتورة وكمت اطلك بدون توقف بس جان الألم فضيع وكل بنية مرت بهالمرحلة راح تعرف الألم شنو جان... اطلك واصرخ بكل صوتي وماكو لحد ما تعبت بطلت بعد ما اطلك... ما حسيت غير الدكتوره صاحت...
الدكتوره... ولج ماما دفعي راح يختنك
خفت على ابني وجبرت نفسي اقاوم التعب وارجع اطلك... رجعت اطلك ونفس الألم والعذاب... لحد ما حسيته طلع وأخيراً، جنت بس اريد انام وما أكدر اتحرك احس كل جسمي متكسر... اجيت اغمض عيوني ولزمتني الممرضة وهي دكولي..
الممرضة... لا تنامين حبيبتي لازم تبقين كاعده حتى تنظفين نفسج
ودق... والله ميتة تعب فدوه بس ثواني
الممرضة... ههههههه هذا أول طفل الج
ودق... أي
الممرضة... يله نامي نص ساعة واجيج
غمضت عيوني وما حسيت بشي بعدها... ما اعرف شكد مر وقت وكعدتني الممرضه واني احس بألم بطني.. كمت للصحيات غسلت وبدلتلي ملابسي ورجعتني لغرفة بس اني بيها... شوية ودخل علاء وبايده ابنا ودخلت ماما وعمتي... عمتي كامت تهلهل وتطش جكليت وماما تهوس... تقرب يمي علاء وهو يدنك عليه، باسني براسي وبخدي وكلي...
علاء... الحمدلله على سلامتج يروحي
ودق... الله يسلمك حبيبي
علاء... تكطع كلبي واني اسمع صريخج جوة جان كل همي تطلعيلي انتي سالمة
ودق... يروحي انت لا حبيبي هو هذا الم الطلوكة
علاء... أحبج ام موسى
ودق... انطينيا خلي اشوفه
علاء... يشبهني ههههههه
ودق... صدك
انطاني الطفل وجان مثل اللعابة رقيق كلش وصدك جان يشبه علاء رغم صغير مو واضحه ملامحه بس بشرته وخشمه علاء بالضبط... حمدت الله وشكرته الف مرة لان طلع يشبه علاء... اخذته وبسته بخده... أوف وليدي حيل رقيق
اجتي امي وعلمتني شلون ارضعه.. واني جنت خايفة اشيله خاف يوكع مني... اخذته ةرضعته وجان شعور يجنن وانتي شايلة ملاك بحضنج وهو قطعة منج وملكج.
راح علاء حتى يكمل الاجراءات مالت الطفل واختارينه اسم موسى لأن اني احبه هذا الإسم وعلاء هم يحبه.
مرت الساعات وثاني يوم الفجر طلعت من المستشفى واني فرحانه بابني... وصلنا للبيت واني اجيت انزل جان يوكفني مهدي وهو يكولي...
مهدي... اوكفي عيني ام موسى
وكفت واني اباوع لازم طلي جبير وسجينه... خفت من الطلي حيل وحضنت علاء..
علاء... على كيفج بنيتي لا يوكع الطفل منج
تقرب يمي مهدي واني تخبلت
ودق... مهدي لا تتقرب
مهدي... هههههه خرب صرتي أم شكبرج وشكدج تخافين من الطلي
المهم الحمدلله على سلامتج أم موسى
ودق... الله يسلمك فدوه لا تقربه عليه
تقرب يمي شويه وذبحه كبالي وجان الدم يتطاير حسيت معدتي بدت تكلب من هذا المنظر... دخلت جوة واستقبلني خالات علاء وعماته بالهلاهل والهوسات وجان أحلى يوم بحياتي.
ـــــــــــــــــــــــــــــــــــــــــــــــــــــــــــــــ
توقعاتكم للقادم....؟
نرجــس صــادق

بارت 81.......

رواية #طريق_إلى_النار
//بقلم.. نرجــس صــادق //

خالد... علمني ياشباك ما بي الك
دمعه ودعاء وعصرت ايد وحزن

ريم... اعله كل دگة جرس بالميل
ينزف موعد أبگلبي
اشتهيتك والحزن والكاس مو دربي
ـــــــــــــــــــــــــــــــــــــــــــــــــــــــــــــــ
ودق...
بعد ما رجعت للبيت جانت الاجواء فرح والكل مجتمع خالات علاء وعماته وفاطمة وعمامه وخواله وقرر علاء يسوي عزيمة جبيرة كولش ويعزم كل معارفهم واصدقائهم بمناسبة ولادة موسى... من دخلت للبيت لحد الليل موسى ما شفته لأن علاء ميقبل يعوفه لحد ما كلتله عمي يرجع الطفل حتى ينام... جنت اشوف الفرح بعيون الكل وجانت بداخلي سعادة قوية كولش... تمنيت ريم موجودة يمي واطنئن عليها...
اجتمع الكل وعلاء جاب 3 طليان وذبحهم... وزع للجيران والباقي طبخوا...
بعد ما تغدت الناس واكو منهم راحوا واكو بقوا... حسيت بالتعب وكولت لماما راح انام...  شويه وحسيت صياح بالبيت وهوسة... فزيت واني اشوف عمتي تبجي وتصيح...
ام علاء... راح ابني راح يربي ولدي ضاعوا ياربي
كمت واني كل بالي يم علاء وجنت ادعي كون ما اسمعها دكول اسم علاء... تقربت يمها ووكعت وفقدت سيطرتي... زحفت يمها لأن احس رجليه بعد ميشيلني... لزمت اديها وصرخت...
ودق... منو راح احجي عمة منو راح...
ام علاء... ولج يمه بهاء مسوي حادث ابني بين الحياة والموت

هنا تنفست ورجعت روحي مو ما نقهرت على بهاء بس جان كل همي علاء... اجتي ماما وكومتني ورجعتني لمكاني... اني جنت نايمة بالصالة....
بعد ساعة من القلق وعمتي تبجي وخواتها يسكتن بيها وعمات علاء يتحسرن على أبن اخوهن... شويه ودخل مهدي يركض وهو يصرخ...
مهدي... وين فلوس علاء ودق
ودق... بالغرفة بالكنتور بصندوك مقفول
مهدي... وين المفتاح احجي بسرعة
ودق... تلكا بالجرار الثاني
ركض مهدي لغرفتي وجاب الفلوس واجه... وهو اجه يطلع لزمته عمتي وهي تتوسله...
ام علاء... يمه فدوه اروحلك اخذني وياك كلبي راح يوكف فدوة اروحلك يمه اخوك راح يموت واني هنا كاعدة
مهدي... شتسوين رايحة يمه صدك تحجين
ام علاء... يمه فدوه ابوس ايدك
مهدي... امشي يله
اخذها وراح وجان البيت نكلب من فرح الى حزن والكل متوتر وخايفين نسمع خبر موته... صح بهاء عاف اهله وطلع بس يبقى ابنهم والدم عمره مصار مي... اذاني وحاول يخرب علاقتي بعلاء بس نقهرت علي واتمنى يكوم بالسلامة.

بعد ساعتين وجان الكل كاعد ومحد كدر ينام... اجه علاء وهو مبين علي تعبان ودمعته بعينه... تقرب يمي وباس راسي وكلي...
علاء... ليش لسه منايمة حياتي
ودق... منتظرتك شبيك حبيبي ليش مبين تعبان
علاء... ودق اخوي رجله متهشمه يعني كصوها اله
ودق... شنوو يعني كصوا رجله
علاء... اي ومو سهل عليه اشوفه هيج صح نكرني وما رادني بس يبقى اخوي يبقى من دمي.
ودق... المهم يرجع سالم ويبقى عايش مو مهم اي شي
علاء... وين موسى شوفتكم توخر كل تعبي

اخذت موسى وانطيته اله وهو اخذه مني بلهفة وهو يبوس بي ويشم بركبته فجأة فز الطفل وكام يبجي... اخذته منه وكعدت ارضعه.

خالد...
مرت الأيام واني اشوف فاضل شلون تعبان ودائما حزين عرفت بوقتها فاضل يحس مثل احساسي بالضبط... وبيوم من الأيام كعدت الصبح ولكيته هو يسوي ريوك...
خالد... ها ابو علاوي اليوم عليك الريوك
فاضل... اي كلت اجرب اتعلم لأن اثنينه بدون نسوان
خالد... هههههههههه تره حالنه يضحك
فاضل... اي والله يضحك يله الله كريم
خالد... اكلك خلي نشوفلك بت حلال وتزوج واستقر
فاضل... لا خالد ما اكدر اجيب مرت ابو لجهالي أخاف تأذيهم
خالد... كول يالله تره اكو بنات ناس وعالم اكو حبابات
فاضل... ميخالف لابد ما تفرق بينهم وبين جهالها
خالد... شلون يعني تبقى طول عمرك هيج
فاضل... الله كريم اهم شي جهالي ما يتأذون
خالد... ونعم بالله
فاضل... انت ما مفكر تتزوج
خالد... لا خليني هيج ما اريد اضلم بنات النااس وياي
فاضل... اهنيك على حبك لريم ووفائك  صعب بعد بهذا الزمن تلكه هيج حب
خالد... فاضل عندي احساس حبي راح ينتصر بيوم من الأيام
فاضل... أن شآء الله بحق الحسين يبرد كلبك ويرزقك بالسعادة
خالد... ونعم بالله

طلعت للاستيديو.. مر اليوم طبيعي وبعد جهد وتعب طلعت من الاستيديو ورحت للمستشفى لاخو علاء... لأن علاء اخوي وصديقي ولازم اوكفله بهذي المحنة... كل يوم اخذ عباس ونروحله وجان لازم اساعده واسانده... وصلنا للمستشفى ونزلنا اني وعباس... جان علاء كاعد هو واخو كبال غرفة بهاء..
سلمت عليهم وكعدت يمه شويه وطلع الدكتور وكال...
الدكتور... يحتاج الى عملية أخرى
علاء... يعني شلون دكتور
الدكتور... هذي العملية منكدر نسويها هنا لازم تاخذو للهند

علاء... بس دكتور تعرف نحتاج وقت
الدكتور... اي امامكم شهر لازم تاخذوا للهند حتى ما تسكط رجله الثانية وكذالك إذا ما تعالج راح يفقد قدرته على الانجاب وممارسة حياته الزوجية.
علاء... ماشي دكتور شكراً
راح الدكتور وكعد علاء ونزلت دمعته... حضنته واني دموعي تتسابق حتى تنزل... اجه عباس وحضنه اني وعلاء وهو يكول..
عباس... معقولة تبجون واني لا
خالد... كفوو
عباس... علاء ما مقبولة منك تنزل دمعتك واحنه موجودين المن تنراد الخوة لعد
علاء... ما تقصرون اخوتي الله يحفظكم إلي
خالد... شوف كل تكاليف العملية علينه انت لا تهتم
عباس... مثل ما كال خالد من باجر راح نروح نجهز اجراءات السفر وانت ويانا.
علاء... ما تقصرون موقفكم هذا مراح انسى أبد
عباس... نجب الخايس شنو موقفكم لعد عليمن خابصين نفسنه إذا ما نوكفلك بوقت العازة
بعد ما كعدنا يمه شويه اني ترخصت ورجعت وبقه عباس يمه... طلعت بوجهي للكاع مالتي الي جنت مخطط ابنيها من نتزوج اني وريم... عرضتها للبيع والحمدلله لأن مكانها مميز ثاني يوم اجوني شراية وبعتها بسعر كولش زين...
بعد ما بعتها اتصلت عليه إيمان وعزمتني اني وفاضل يمهم بمناسبة ختان ابن حماها... قررنا نروح اني وخالد هم اشوف خواتي واطمئن عليهن وهم نأدي الواجب.
ثاني يوم طلعت من الصبح ورحت للمستشفى وجان علاء ما موجود اطمأنيت على بهاء ورجعت للبيت لكيت فاضل متحضر طلعنا اني ويا والجهال لكربلاء...
وصلنا بعد 3 ساعات والحمدلله جنا مقررين نزور الإمام من نرجع... استقبلونا استقبال خاص وجان بيتهم هوسة لأن مسوين احتفالية جبيرة... كعدنا وشوية واجن إيمان وشيماء.

إيمان...
جنا دنحضر لحفلة ختان كيان أبن حماية وقررت اعزم اخواني لأن مشتاقتلهم... وعمي راد يعزمهم وكوتله اني اتصل عليهم بس جان هو متصل عليهم قبلي ورجعت اني عزمتهم مرة ثانية وجنت متاكدة يجون... بيوم الاحتفالية جنت اشوف حماتي الصغيرة كل شويه وتسألني على اخوية فاضل... تعجبت وبنفس الوقت خفت هي بعدها صغيرة بعمر 16 سنة...
خفت لا يسمعوها وراح يتهموني اني الي مقربتها لاخوي... سمعت صوت سيارة خالد وجنت متلهفة اشوفهم حيل مشتاقتلهم...
اجتني حماتي دلال وهي تركض...
دلال... اجو اخوانج
إيمان... اي حبي شفتهم
دلال... اخوانج والله حلوين واكثر شي هذا اخوج المتزوج يجنن
إيمان... امممم اي حبي من ذوقج شكراً
دلال... هو مو طلك مرته
إيمان... أي حبيبتي
دلال... شعجب ميتزوج بعد
إيمان... لا
دلال... ليش بعده زغير هو
إيمان... حبيبتي هذا شي خاص بي احنه منتدخل
دلال... ماشي
حيل خفت منها والاكثر خفت لا يسمعها مصطفى والله يدفنها واني ادري هي بعدها زغيرة ومراهقة مغرورة بسوالف البنات والحب... يالله شجابها على فاضل 32 سنة وهي 16 حتى ميتوالمون.
شويه واجاني مصطفى وكلي اروح اسلم على اخوتي ورحنا اني وشيماء... صدك جنت مشتاقتلهم حيل بحيث حضنتهم بلهفة ومثل كل مرة جانت حضنة خالد مختلفة احسه ابوي مو اخوي.. كعدنا نسولف وياهم شويه وبعدها كمنا نحضر الغدة لأن البيت صار هوسة... جانت عدهم عادة حلوة، بالمناسبات الزلم تطبخ مو النسوان..
يعني يجيبون طباخيين واحنه منتعب لأن الأكل بكميات هواية... خلينا الغدة للزلم وبعدين للنسوان وصار وقت غدة... صعدت لغرفتي ابدل ملابسي لأن توسخت... اجيت ادخل لغرفتي ولمحت دلال تطلع من غرفتي... تفاجئت شتسوي بغرفتي، كملت طريقي ودخلت للغرفة بدلت وطلعت.
جانت النسوان مخليهم بيت شيماء والزلم بيت عيالي الي هو بصفنه... وعمتي، وحمواتي اجن لبيت شيماء.
نزلت جوة وشفت دلال تباوع من شباك المطبخ على فاضل وهو ديغسل برة...سحبتها من ايدها جوة واخذتها لغرفة شيماء...
دلال...شبيج إيمان عوفي ايدي
ايمان...دلال حبيبتي انتي بعدج زغيرة ومتعرفين الي ابالج غلط ديربالج تتهورين وبعدين مراح تضرين غير نفسج
دلال...انتي شعليج بيه بكيفي اسوي الي يعجبني
إيمان...دلال خلي عقلج براسج تره اخوي فاضل ميناسبج هو جبير ومطلق وانتي بعدج زغيرة ومتعرفين مصلحتج خوش شيلي هالفكرة من راسج واهتمي بدراستج.
دلال... مالج دخل بيه ولا تدخلين بحياتي
دفعتني وراحت وجنت متوقعة ردة فعلها ياربي شنو هالمصيبة...اللهي استر إذا عرف مصطفى يذبحني ويذبحها.
حسيت هذا الموضوع راح يصير مصيبة بسببه ولازم اوكف دلال عند حدها بس ما اعرف شلون خاف احجي وتتاذه بسببي...
بعد ساعة اخواني ترخصوا واني بالي مشغول بهالمصيبة الجديده..ودعناهم وراحوا ورجعنا نكمل شغل ما بعد العزيمة...التعزيل والتنظيف يكسر الظهر.

ريم...
الأيام تمر والكل فرحان بعرس حسين وسارة الي جانت مثل البلسم وهادئة وحبابة حيل وحسين فرحان ومكيف واتفق ويه ابو البنية حبها وميريد يطلكها...

جانت ايام تمر بدون منحس بيها واحنه نحضر لعرس حسين والكل فرحان والبيت مخبوص ساعة ركص وساعة اغاني...وحسين يدخل ويطلع يركص ويصيح (زفوني ما اريد العشه هههههههه)
حتى وسام جان فرحان اله وجان مستمتع كالعادة الا اني...تعودت وصار عندي الألم عادي والحسرة عادي...
وبيوم الحنة الكل مشغول يجهز نفسه للحنة واني جنت تعبانه والم بطني فضيع...كاعده بغرفتي واحس شي بده ينزل عليه...وفجأة اجاني الم كطعني تكطع...صرخت بكل صوتي واريد احد يسمعني...
اجاني وسام يركض وهو يصيح...
وسام...شبيج ريم
ريم...الم موتني اللحكني يمكن راح يوكع الطفل
وسام...شيوكع بعدج 3 اشهر
ريم...ما اعرف داحس شي يوكع عليه الله يخليك اللحكلي
اجتي الحجية وخالتي يركضن وميس وياهن...
ميس...ولج ريم بس لا الطفل ميت بطنج
ريم...ما اعرف الله يخليكم خلصوني راح اموت
الحجية...يمه وسام شيلها خلي ناخذها للمستشفى
شالني وسام واخذني هو وخالتي والحجية للمستشفى...شوية ووصلنا واني احس روحي بدت تتكطع..نزلوني بسرعة ودخلوني لصالة الولادة...
اجتي الدكتوره وبدت تفحص بطني والطفل واني اصرخ...شويه وكلتلي..
الدكتورة...ماما انتي سقطتي الطفل
ريم... ليش دكتورة
الدكتوره...ما اعرف الظاهر واكعة او متعرضة لضربة على ضهرج
ريم.. اي وكعت
الدكتوره...اي حبيبتي الله يعوضج والطفل بعده صغير كولش بالاشهر الأولى لا تضوجين.
نظفتني وانطتني ابر لدرجة صرت احس الألم بده يخف...هدأت وشوية ودخلوا وسام والحجية وخالتي...
وسام...الحمدلله على سلامتج
الحجية...يمه الحمدلله على سلامتج شلون هيج وكع
ام حسن...الظاهر من وكعة البارحه والله عرفته راح يوكع لأن وكعتها قوية
الحجية... يا يمه غير تنتبهين
ريم... والله ما جنت ادري الكاع مبللة
ام حسن...يله الحمدلله يمه الله يعوضج المهم سلامتج

شوية وطلعوني واني احس بالم خفيف ساعة بطني ةساعة بظهري...رجعنا للبيت وجان وقت غده الكل مجتمع ديتغدون... اخذني وسام لغرفتي وخلاني على الجرباية...
نمت وما حسيت على نفسي غير لليل...الكل جانوا بالحنة مالت سارة ورجعوا...بس اني ما رحت... بالليل كعدت واني احس نفسي تحسنت...
كمت اخذت علاج واكلت وجان وسام ماخذ علاوي وسجاد وابو الأكبر يمه لحفلة الولد...
كعدت يم البنات واني مختنكة حيل وحاسة نفسي تلعب...شوية ورجعت لغرفتي ومر الوقت ولحد 12 بالليل يله رجع وسام هو والجهال...
تمدد على الجرباية وهو يكولي...
وسام...شلون صرتي
ريم...الحمدلله زينة
وسام...طلكتها
ريم...منو
وسام...سجى
ريم...ليش
وسام...لأن عمري ما حبيت غيرج
ريم... سكتت وما كدرت اجاوبه
وسام... ريم إذا صار بيه شي امانة تديرين بالج على الجهال
ريم...اسم الله ليش تتفائل على نفسك
وسام... ما اعرف حاس بنفسي عمري مو طويل
ريم... وسام شنو هالحجي الله يخليك سد الموضوع
وسام... إذا متت تبجين عليه
ريم... قبل كولشي انت انسان ولا تنسى انت زوجي وابو جهالي
وسام...يعني اكو بكلبج الي محبة
ريم... اكيد
وسام...شكراً لأن فرحتيني بكلامج
ريم... بعد لا تعيد هذا الموضوع شبيك والله اضوج منهن
وسام...تدللين مدام بالخدمة ههههههه

بدت تمر الأيام ووسام رجع نفسه وسام القديم واني صرت احس بشي غريب اتجاها مو حب بس تعاطف وعبالك تغيرت نظرتي اله.

ودق...
بعد اسبوع كمل علاء اجراءات السفر وجانوا مقررين يسافرون هو ومهدي وعباس لأن عباس جان مقرر يروح وياهم وخالد قرر يبقى حتى يتكفل بينه...جنت احس علاقة علاء بعباس وخالد اكثر من علاقة علاء بمهدي وبهاء...
الاربعاء الجاية موعد سفرهم واني حضرت جنطة السفر لعلاء ومهدي وجانت عمتي خايفة وطول اليوم تدعي وتبجي...
جان موسى يبجي ومعذبني حيل... وبيوم جنه كاعدين اجه علاء وجان مبين مهموم ومتوتر...
كعد يمنه وهو تعبان اخذ مني موسى وكام يباوعله...صدك نقهرت علي وجنت حاسه اكو شي وعلاء بي شي...
تقربت يمه وجانت عمتي كاعدة...باوعتله وسألته...
ودق...شبيك حبيبي
علاء...ماكو شي بس تعبان شويه
ودق...متأكد بس اني حاسه بيك شي
علاء... اوف تحسين بيه
ودق...طبعاً احس بيك غير انت روحي
علاء... يروحي فدوة اروحلج
ودق...احجيلي شبيك
علاء... بعت الكاع مالتي وما كمل المبلغ وحرت شاسوي وما اكدر اتقرب للبيت الورث لأن مو ملكي بس اني.
ودق... وليش ضايج حبيبي توكل على الله تنحل أن شاء الله

رحت جبت كل ذهبي واجيت خليته كباله...
ودق... اني وياك واحد والذهب اني ممحتاجته وجودك يمي وضحكتك تسوه عندي ذهب الدنيا كله.
علاء... ما اعرف شنو اكلج بس ما عفتيلي كلمة اكولها
ودق...بدون متحجي شي اخذه وتصرف بي وكمل الفلوس
ام علاء... الله يرضى عنج أن شاء الله صدك بنت اصل والله
علاء... الله يقدرني واعوضج
كام وراح حتى يبيع الذهب وجان بوقتها الذهب صاعد وفعلا جاب مبلغ زين...صح بعده ما اكتمل بس المهم بقه القليل.

خالد...
جنت مقرر اروح اشوف علاء واطمئن على سفرهم الي تقرر الاسبوع الجاي...اخذت فاضل ورحت لبيتهم وجنت ادري علاء بيته...
وصلت للبيت نزلنا ودكينا الباب واستقبلنا علاء...دخلنا جوة وجنت اريد انطي تكاليف السفر الي اني تكفلتها...
كعدنا سوية وعلاء راح شويه واجه وكعدنا نسولف على السفر وشكد يكلفه.. شفت علاء جان قلق ومتوتر عرفت اخوي بي شي...فاتحته بالموضوع..
خالد.... حبيبي ابو موسى اني كتلك كل تكاليف السفر عليه لهذا السبب لا تهتم كلشي يمي
علاء...متقصر حبيبي بس والله إذا احتاج اكلك
خالد...عيب عليك تحاجيني هيج من شوكت احنه نفكر هيج أنت اخوي
فاضل... علاء احنه اخوتك لا تستحي منه
خالد... حبيبي علاء اني جبتلك الفلوس وان شاءالله ترجعون بالسلامة وها لا تهتم اني هنا واهلك بركبتي وهمة اهلي.
علاء...ما اعرف شلون اجازيك
خالد...انت ليش ما تسكت ماكو بيناتنا هالسوالف حبيبي

كعدنا نسولف وشوية وطلعنا سلمت المبلغ لعلاء ورجعنا اني وفاضل للبيت..
واحنه راجعين رن موبايل فاضل...جاوب فاضل...
فاضل... الوو منو
دلال... الوو
فاضل...منو حضرتج تفضلي
دلال... عادي إذا اكلك
فاضل... غير اعرف انتي منو
دلال... اني معجبة بيك
فاضل... ههههههه بوية مبينة من صوتج بعدج صغيرة ما تلوكلج هالسوالف بنيتي ابتعدي عنها.
نسد الاتصال...باوعلي فاضل وهو يضحك...
خالد... ها شبيك ومنو هاي
فاضل... وحدة دكولي معجبة ومبينة بعدها طفلة
خالد...هههههههههههه رزق والله جابه يخوي جان هسة زوجناكم
فاضل... هههههههه ولك اخذ طفلة لعد لا خطيه ما ينطيني كلبي
خالد... اي والله اني ما اشجع على زواج المراهقات أبد
فاضل... فعلاً

رجعنا للبيت وجانوا جهال فاضل كاعدين يبجون... ركض فاضل وحضن ابنه وهو متلهف...
فاضل... شبيك بابا حبيبي
علي... بابا ليش عفتنه
فاضل... لا حبيبي ما عفتكم طلعنا شويه ورجعنا انتو جنتو نايمين شكعدكم
علي... كعدت جوعان
فاضل... هسة اخليلك اكل وليدي تدلل

ـــــــــــــــــــــــــــــــــــــــــــــــــــــــــــــــ
توقعاتكم للقادم...؟
خليتلكم المفاجئة بالبارت القادم....
باللنسبة لصداقة خالد وعلاء وعباس للأسف ماكو هيج بهذا زمنه مع الأسف....صح الرواية احداثها صارت قبل 10 سنوات بس جانت أيام احسن من هسة وعلاقات أفضل من علاقتنا هسة.
حيل عجبتني هيج علاقة قوية ❤❤❤

نرجــس صــادق ✍️