#فيلـوفوبيـا
(سميتك الخوف البطمن)
#الحلقة:السادسـ 6ـة
#بقلـ ✍️ـم:نوودين=Πeedoo

ع الأقل كُنت سَتطمئن لو وُجِد شَخص واحِد فَقط، يُمسِك بيدك ويخبرك أن كُل شئ بَخير.. 💔!

مشيت الجامعة اتلاقيت مع دان .. ملامحا م كانت عاجباني خالص حاولت اتكلم معاها بس بي طبعي مابعرف أواسي لي زول أو بالاحري بحس أني م مفروض أدخل في خصوصيات الزول لما اشوف حد زعلان بحب أخليه ع راحتو إذا حكى أهلا وسهلا م حب يحكى ع راحتو.

بعامل الناس ف حدود علشان بعدين م يكون في تعامل متبادل بيني وبينهم ع قدر ماتكون قريب لي انا م ح احكي ليك مقتنعة جدا انو الفضفضه دي أحسن منها الكتمان .. ماعدم ثقة ف الحوالي بس مابعرف ف شعور جواي بمنعني للأسف.

قعدنا في الكافتريا كنا مستنين ميناس تجي قالت لي

-رزان !!

=هااا

-عايزة استشيرك ف حاجة بس جاوبيني بصراحة ممكن!؟

=اهااا

- ختي نفسك مكاني .. اعتبري انك عايشه مع مرت ابوك وهيا مابتظهر ليك تعامل سئ قدامك بس من وراك بتحس انك ثقيله عليها ومشاركاها ف حق اولادا وبتحكي مع الناس عنك بالسؤ .. قادرة تفهميني، ،يعني قدامك هي حلوة معاك واي شي بس انتي عارفه نواياها وفاهمة تصرفاتا بتوحي لشنو حتتصرفي معاها كيف!؟

=للحظة سرحت واتخيلت نفسي مكان دان يعني م ف اصعب من انك تعرف انو الشخص بكرهك بس انت مضطر تبتسم معاه .. النفاق دا حاجة سيئة جدا وكونو شخص يتعامل معاك بنفاق خاصة لما تكون عارفو حيطلع من نفسك ومستحيل تقنع عقلك انو يتقبل تعاملو الحلو .. قلت ليها كلمة طلعت مني سهوا م عارفة ليه جات كدا (طب يادان م تريحي نفسك منها)

اتخلعت ونططت عيونا قالت لي كيف!؟؟

=انا اصلا م عارفة ولافكرت ف الموضوع بس فجأة الكلمة جات ف بالي يمكن لاني اتعودت وقمت كدا ف المحيط الحوالي علموني اخلص من الحاجة البضايقني واريح نفسي منها كلمة (ريحي نفسك دي في بيتنا عادية شديد) وانا عمري 13سنة سمعتها وامنت بيها لما حبوبة وخالتو بتكلمو مع امي وقالو ليها (ريحي نفسك منو)  بعدها عرفت انو الطلاق كان راحة امي من ابوي حتي بدون م يفكرو ف راحتنا … سمعتها مرة تانية لما كنت عايزة اعيد ف مدرسة خاصه علشان اجيب نسبه تدخلني جامعة كويسه كنت خايفة ومتوترة من فكرة ادرس ف مدرسة اساتذاها رجال  سمعتها من كل ناس البيت (طيب ماتريحي نفسك من الفكرة واقري ف مدرستك دي) … سمعتها مرة تالتة. لما جيت اقدم للجامعة وكنت خايفة من فكرة اختلط مع اولاد وقتها قالو لي (قدمي ف جامعة م مختلطة وريحي نفسك)  … انا من قمت عرفت انو الواحد مفروض يريح نفسو ويسيب الحاجة البتآذي حتي بدون م يفكر اذا الراحة دي مؤقتة ولا دايمة … قلت ليها م عارفة ي دان بس لو انا مكانك كنت عملت اي شي يريحني من كلاما وتصرفاتا دي. 

دان سرحت وفكرت كيف ترتاح منها وهي م عندها مكان غير اللى هيا قاعدة فيه معاها !؟؟

______________________________________

=خالتو عشه صباح الخير

-صباح النور ي بتي كيف اصبحتي!؟

=كويسة الحمدلله .. عم عبدالرحيم عايزك ف المكتب

-خير ان شاءالله (واتحركت علشان تمش )

انتي ي سامية عشة  الايام دي كترت مشياتا لمكتب عبدالرحيم ليه!؟

هيي بري علمي علمك انا كمان لاحظت وقبل كم يوم شايفاهم طلعو سوا

ماباين عليها كدي!!

الدنيا دي كمان بيضمنو فيها زول!؟ بعدين ليه بتتكمم كدي التقول عاملالا جريمة!؟

هي مش مطلقة! ؟

من زمان شديد!!

واولادا وين! ؟

معاها!!

اسكتو كدي النسألا هدي جاية علينا

ياعشة المدير م طلع المرتبات!؟

(اتوترت وحست انو هم شافوها طلعت من مكتب المدير بلعت ريقا وقالت ليهم بري م عارفة)

اها قلنا بما انك جاية من مكتبو يكون كلمك

ابدا والله

______________________________________

يأحمد أمي قالت ليك أنزل الفطور

ماعايز ي أروى خليني عندي شغل كتير

في اللحظة دي جات أمو قوم ي ولد م كفاك يعنى من أمس م اكلت شى بعدين نحن اخر مرة قعدنا سوا متين!؟

خلاص ي أمي بعدين نتغدا سوا اسي والله مشغول

وهي نازلة وقلبها مكسور علي ولدا البضيع عمرو كلو شغل وماقادر يحافظ علي علاقاتو حتي مع ناس البيت .. بعيدا عن الناس التانية

أروى تفتكري أخوك دا حيعيش حياتو متين تعبني والله انا نفسي اشوف اولادو، نفسي اطمن عليه وهو ف بيتو ومستقر، حياتو كلها شغل شغل لمتين كدا

ياأمي براهو خسرا أحمد م زول يتعاش معاه ماحتلقو بت تستحمل فظاظتو دي حدي لقا بت كويسة بس مشت خلتو بسبب عمايلو، شكلو حلمك دا م حيتحقق ..

ماتقولي كدا الله دا م كريم بت الحلال الح تصونو وتغيرو موجودة الله يجمعا بيهو عاجلا ام آجلآ يارب

______________________________________
الووو

اهلا اهلا ي سعاد

كيفك ي أم أحمد

بخير الحمدلله وانتو كيفكم

كلنا بخير نحمدالله

البنية كيفا

قصدك دان!؟

اي .. عساها كويسة!؟

كويسة م عندها اي عوجة الا مع القراية

والله ي سعاد العملو ولدي معاكم م بتسامح بس لو تدوني فرصة تانية و

ماعندك مشكله الاولاد بفضلو اولاد ومصيرهم يغلطو ونحن م علينا الا نسامحهم

الله

يكملك بعقلك انتي  بقيتي ليها نعم الام والله

اعمل شنو معتبراها بتي ودي أمانة ومسؤلية انا لازم اصلحا لو غلطت

بري بتك م بتغلط الا احمد غليظ انا بعرفو طيب بنجيكن يوم الجمعة انا بحاول اتكلم معاها

ان شاءالله ربنا يكتب الفيهو خير

بتتكلمي مع منو ياسعاد  مؤتمن دا. من قبيل جا من المدرسة ويدق الباب م فتحتي

كنت بتكلم مع الهام

ملامحو اتغيرت وحس بضيق هو من يوم دان طلبت الطلاق ورجعت بيت ابوها هو حاس بالندم وماعايز يفتح السيرة دي سعاد واصلت كلاما بدون م تديه فرصة حتي قالت .. الناس ديل كويسين  وعايزين دان فكر فيها هي بت لسة صغيرة وحياتا م مفروض تبقي ف زواج وطلاق لو امها عايشه م كان خلت بيتا يخرب .. انا زي امها وح احاول اصلح الاتخرب اكيد م بتهون علي دان مكانتا عندي زي مكانة منة ومؤتمن هي زي اولادي وانا خايفه عليها .. الهام اتكلمت بي كل ندم انو احمد غلط بس الراجل م بتعاب علي اخطاء بسيطة كدا احمد راجل وبمسك دان خليها تقعد ف الواطة دي وتعقل شوية طلاق شنو وهي عشرين سنة م تمت ..

كالعادة سعاد قدرت تظهر لأبو دان انها خايفة علي مصلحة بتو ونظرة الناس ليها قال ليها لو قدرتي تقنعيها ماعندي مشكله بس لو رفضت تاني الناس ديل م ف اي علاقة تجمعني بيهم

______________________________________
أحمد بعد م أمو طلعت من عندو قفل اللابتوب ومشى ع غرفتو .. او بالاحرى غرفتهم من يوم دان مشت من البيت وهو حاس انو مخنوق مانفسو يدخل الغرفة المليانة تفاصيل دان هنا التسريحة كان بيجي يلقاها مستنياه خصلات شعرا ماخدة عقلو كمية البراءة ف ملامحا خاطفة قلبو بس بيتجاهلا بدون م يعاين ليها مرتين بيعمل نفسو ع طول مشغول ومافاضي ليها، بيعمل نفسو م مهتم ابدا بالعلاقة دي، هنا كان دولابا مليان ملابسا كل الالوان اللايقة جدا عليها الاصفر الفاقع، السماوي،البنفسج، حتي الاسود لما تلبسو بتسحرو بجمالا، كانت حلوة بكل الالوان، جميلة شديد وبسيطة وبتعرف تتآنق لما تكون طالعة معاه عشان م تخذلو قدام الناس ويحكو عليه، عاين للغرفة مسافة بسترجع كل الزكريات ،دخل الحمام ولسة شايف صورتا كان عارف انها بتهرب هنا علشان تواجه دموعا اللي هو السبب فيها كان عارف ف كل لحظة اتاخرت ودخلت هنا كانت بتبكي بس م كان بيدو يعمل ليها شي .. اتزكر كيف كانت العواقب لما فكر يعمل كل شي مع واحدة ماتستاهل ولاشى من العملو .. بين لحظة ولحظة كان ضميرو بأنبو دان ذنبها شنو تتعاقب علي حاجة م ليها دخل فيها، طب هو اصلا عرسا ليه لما ماعندو نفس يدخل العلاقة دي، لما م قادر يتجاوز الفات ،ليه هيا اللى تدفع التمن ...

("كم تمنّيتُ أن أخلعَ هذا الرّأس المُثقل بحكاياتٍ لا تنتهي،
كأَن أمشي وأتسكّعُ بخفّةِ الرّيشة،
لا ثقلَ يتجوّلُ معي".🙇‍♀️💛)

#يتبع
#نهاية_الحلقة_السادسـ6ـة
#بقلـ ✍️ـم:نوودين_بت_من_حب

📕.

📖 اذا انتهيت من قراءه  الروايه اضغط علي #لايك 👇 واذا حصلنا علي #خمسين    (50) لايك سوف نقوم بتنزيل    #بقية_الرواية.

#فيلـوفوبيـا
(سميتك الخوف البطمن)
#الحلقة:الـسابـعـ7ـة
#بقلـ ✍️ـم:نوودين=Πeedoo

هُناكَ دائمًا شخصٌ مُختلف، يمكنُه أن يسرقَ ثقلَ هذا العالمِ عن كتفيكَ دونَ أن تشعُر ✨❤️

أحمد رفع تلفونو وإتصل لـ دان في البداية م ردت بس لما كتر المكالمات ردت

=السلام عليكم

-وعليكم السلام

=كيفك ي دان

-بخير

=عرفتيني

-عايز مني شنو!؟

=اعتذر ليك

-علي شنو!؟

=ماعارف بس ياريت لو تديني فرصة اخيرة خلينا نتلاقي ونحكي

-معليش يااحمد انت اخدت كل الفرص والموضوع دا بالنسبة لي منتهي ماعايزة فيهو نقاش ممكن تاني م تجيب لي سيرتو

=دان عارف نفسي غلطة عليك كتير بس ندمان والله حياتي بدونك م تمام اديني فرصة اخيرة انا والله...

-عرفت متآخر جدا للاسف وانا م بقدر اتخيل نفسي معاك بعد كل الحصل ياريت تاني م تتصل لي

احمد طليق دان هما صاح م اطلقو رسمي بس هيا رافضة ترجع ليهو، بقت تخاف من حاجة اسمها علاقات م نفسها تعيش نفس المآسأة من اول وجديد كتير مرات بتفكر حيحصل ايه ف حياتا الجاية لسه عمرها ماتم 20 وهي خسرت نص حياتا بي سبب زواج مدبر حست نفسها ضحية، علاقة مقرفة سلبت منها كل احلاما عن الزواج، علاقة كانت عبارة عن كابوس مرعب بالنسبه ليها لسة كل يوم وهيا نايمة بتهلوس بالزكريات كمية وجع اتراكم جواها، ممكن تبين انها قوية ومافارق معاها بس بتتألم في كل لحظة تشوف عروس مبسوطة، واحدة مخطوبة ومبسوطة في حياتا مع خطيبا،صحباتا ف الجامعة وهما مبسوطين بعلاقات الحب،بتتوجع لما جاراتهم ينظرو ليها نظرة شفقة، لما عمتا تعاملا بضيق وكأنها عالة عليها،لما المجتمع كلو بنظر ليها بنظرة مطلقة كأنها عار، كأنها إختارات يحصل معاها كدا 😔💔

أحمد جدع التلفون وقعد في طرف السرير ومسك راسو وبقا ضاغط عليه شديد .. اتزكر زواجو الاول من ريم .. البت اللي حباها طول عمرو وقرر يتزوجا وبعد الزواج قلبت حياتو لجحيم .. عرف انو بالحب براهو م ممكن نبنى بيت .. الحب م بكفي إنو يأسس حياة متكاملة .. الحياه بتطلب حاجات تانية أكبر من الحب زي .. التفاهم .. الثقة .. واهم شي .. الأمان .. إحنا محتاجين نطمن ونرتاح للعلاقة قبل كل شى .. العلاقات بكل مسمياتا لو مافيها أمان م حتنجح  .. أحمد وريم رغم الحب البينهم كان ناقصهم آمان في كل لحظاتهم .. البيت، الاسرة،المال ماكان كافي علشان العلاقة ديا تنجح ،، للآسف أحمد كان عندو نقص جواهو ريم ماقدرت تتقبلو براحبة صدر .. أحمد كان بعانى من ضعف جنسى وقتها ريم سمعتو كلام هز كل ثقتو في نفسو وفي الزواج بصورة عامة، لحظة غضب، كلمة جارحة قدرت تكسر كل مجاديفو، نهت كل الحب الكان بينهم، طلبت الطلاق وسابت وراها شخص خايف، مجروح،مكسور،محطم،ماليهو نفس ف الحياة، كيف يقدر يشرح للحواليهو قدر شنو هو عانى من العلاقة دي، أختو وأمو اللى بفضلو يزنو ف راسو، بإنو لازم يكمل حياتو ويواصل بدونا خاصة إنو قال سبب وهمي جدا لانفصالهم، خلي الحقيقه بينو وبينها، بعد سنتين إضطر يستسلم لاهلو ورغبتهم في إنو يتزوج أمو إختارات ليه دان لما شافتا مرة في مناسبة من وقتها دان وقعت ضحية علاقه فاشله، علاقه أخدت منها أكتر مما أدتا، علاقة دمرت رغبتا في الحياة الزوجية، علاقة كانت مرهقة ومؤذية بالنسبة ليها هيا وأحمد ..هو م حكى ليها وهي ماقادرة تبرر تصرفاتو معاها، علشان تخت ليهو عذر حاولو ينفصلو بس أهلهم بفضلو يزنو ف راسهم من جهة أم أحمد اللي نفسها ولدا يستقر في حياتو وتفرح بيه وتشوف أولادو، من جهة سعاد اللى نفسها تتتخلص من مسؤلية دان وتشوف تربية أولادا بعيدا عن بت أبوهم المدللة زي مابتحب تسميها وفي النهاية الخسران منو دان وأحمد 💔

_______________________________
عمر كان بعدي اليوم كلو وهو مقلق ع رزان من لما كانو صغار كان متعود يعدي وقتو معاها .. بيحكي ليها تفاصيلو .. بتشاركو كل شي فجأة ف شى اتغير بقو بعيدين كل البعد عن بعض .. يمكن هو السبب ف الحاجز الاتبني بينهم بس زهج، خلاص فاض بيه، ماقادر يخفي مشاعرو أكتر من كدا، هو بحبها، ومتعلق بيها جدا، لمتين حيكون متخفي بقناع الاخ، كيف يشرح ليها انو بحبها ك حبيبه م اخت، انو نفسو تكون معاه ،ماعايزة تشوفو كأنو الحارس بتاعا، تجيهو لحظات خوفا،ماعايزا تطمن مع غيرو ..

جاتو بت ف الدكان كان سرحان وبفكر شكلها ندهت عليه مرتين بس م سمع في المرة الاخيرة

-اااا .. معليش يا..

=الشاغلة بالك تتهني بيهو

-ماكدا بس سرقني التفكير و..

=م يهمك .. فاهمة عليك المهم كيفك!؟

-بخير .. الحمدلله اتفضلي!

=ليه مستعجل كدا ولاانت أصلا طبعك بتختصر الناس كدا

-العفو ياخ معليش ماقصدي

جات رزة بي كل حماس بعد م قررت تسامح عمر علي اللى عملو ف لحظة غضب وم كان واعي راجعت زكرياتهم وقالت إنو البينهم اكبر من انها تخسرو للسبب التافهه دا بعدين هو زول اخوها شديد وحياتا بدونو م حلوة خالص جات مبسوطة علشان تقول ليه انها سامحتو ونفسها يرجعو زي اول مجرد م دخلت

-عووووووومررررري

=رزة!

_معاك ضيوف ماشاءالله .. هييي كيفك

=البت عاينت

لعمر وملامح وشو اللي اتغيرت فجأة 180° وعاينت لرزة وردت ببرود .. اهلين

-رزة دخلت جوة لعمر وسلمت عليه وفضلو ماسكين ايادي بعض وعمر بعاين ليها مستغرب يعني ليها فترة م كانت معاه كدا .. اطمن عليها وسألا من الجامعة واذا هيا كويسة نسي انو ف بت واقفة مستنياه ..  بعد شويه رزان انتبهت  للبت قالت ليو عمر مشي زباينك انا م ضيفة .. طلعت شنطتا وفتحت التلاجة شالت ليها كيك وبيبسي وقعدت جنبو اثناء م عمر بحول رصيد للبت .. شاف رزان ماسكة البيبسي جراهو منها وقال ليها كم مرة قلت ليك ماتشربي ع معدة فاضية .. البت اتغاظت شديد وقالت ليهو طيب ياعمر بعد تفضى ح اجيك 🙂 واتحركت علشان تطلع قاليها حولتو ليك 🙂 الرقم عندي مكرر وحفظت جزو منو اثناء م انتي بتمليني استزكرتو وحولت ليك عايزة شي تاني!؟
امممم لا لو احتجت ح اتصل ليك  ..

عمرررر ياخ اديني البيبسي،نفسي فيهو
قبل يرد للبت طلعت ورجعو يتناقشو هو ورزان في النهاية هي عنيدة خلاهو ليها شالتو وطلعت .. عمر فضل مبتسم ومبسوط،طول اليوم هو عندو رزان بالدنيا بس هيا تكون معاه وتفضل جنبو م عايز شي،غيرا

رجعت البيت اخدت لي دش وجيت سرحت شعري وبكرة الجمعة مروقة ماعندي،موضوع طلعت دفاتري وبقيت ارسم فجاة بقيت اضحك 😹😹

ناس مروة .. هيييي بسم الله الحقو رزة جنت

-دا الطبيعي عندها كل م ترسم بتضحك

قلت ليهم انتو مالكم اسي،ضحكت بخشمكم م اضحك 🙄

اتزكزت منظر الولد،صاحب المكتبة وغلبني اكتم الضحكة تلقائيا لقيت نفسي اساسا من زمان بادية رسمة بتشبه ملامحو قعدت فيها ساعتين رسمتو بي تفاصيلو جيت الون الواني م متناسقة وانتهت .. في شي جواي قال لي امش ليهو تاني ف المكتبة هزيت راسي،وقفلت دفتري جات مروة

ممكن اشوف رسمتي منو !؟

جرت الرسمة وبقت تضحك وكلهم جو وبقو يضحكو

=ادوني رسمتي انتو م بتعرفو الخصوصية

-دا منو ي رزة! ؟

=بري م بعرفو 🙄

-شكلو عريسك 😹😹👏لكن وهمي كدا مالو

=تعرسي النمل .. بعدين قلت ليكم م بعرفو بس رسمة واترسمت م تركزو خلاص ..

بعد تعب نسو الموضوع طلعت صليت المغرب ولسة أمي م جات حاولت تلفونا م بترد غريبة اول مرة تتآخر كدا 🙇‍♀️ قلت الليله الخميس واحيانا بتدخل السوق يمكن اتاخرت وم لقت مواصلات .. دخلت رتبت حاجاتي الساعه 8الا ولسة أمي م جات اتصلت لعمر قال لي ح اقفل البقاله واطلع اشوفا قفلت منو لقيتا جات جريت عليها

-يمة ليه اتاخرتي كدا ياخ

=بسم الله ي رزة الساعه يداب 8انا صغيرة ولا صغيرة امسكي مني الحاجات دي وجيبي لي موية اشرب

-كانت شايله مواد التموين مع انو الشهر لسه م انتهي بس جابتهم الغريبه انو قبل كم يوم كانت بتقول لرزاز م عندها قروش وم صرفوهم .. قلت ياخ بتكون صرفت وكدا دخلت الحاجات وجبت ليها مويه بعدها ختينا الاكل قالت لينا م جيعانه وتلفونا اتصل شالتو ومشت مننا ...

(هنالك أشياء نفعلها غير قابله للتبرير 💛🥀)

#يتبع
#نهاية_الحلقة_السابعـ7ـة
#نوودين_بت_من_حب

#فيلـوفوبيـا
(سميتك الخوف البطمن)
#الحلقة:الثامنـ8ـة
#بقلـ ✍️ـم:نوودين=Πeedoo

الخوف عمرو م دافع علشان نعمل الغلط، لان البيخاف م بتجرأ يغلط، الغلط بطلب مننا شجاعة!  🙂💔

-اها ي عشة وصلتي كيف

=الحمدلله سيد الامجاد وصلني للبيت

-اذا نقصك شي كلميني

=الله يديك العافية يارب

جيت داخله لقيت امي بتتكلم بالتلفون قفلت بسرعة وقالت لي انتي مش قلتي عايزة رسوم  امتحانات! ؟

-اي حقات السمستر التاتي

-اها كويس ..هاك دي
وطلعت مليون ادتني مع اني محتاجة 600بس

-يمة بما انك صرفتي ادي رزاز قروش قالت عايزة تقص ليها فستان لعرس مزن

=اي زكرتيني … فتحت مطبقتا كان عندها قروش كتيرة واثناء م هي بطلع فيهم وقع منها كرت شكلو حق عيادة وكدا رفعتو جرتو مني بسرعة طلعت مليون ونص ادتني قالت لي امشو سوا ماتخليها تبزر القروش ساي وقبل ارد ليها دخلت

ليه امي بتتصرف معاي بغرابة كدا بقيت محتارة ماعارفة اعمل شنو!؟

مشيت الموضوع ع كدا لما كلمت رزاز فرحت شديد صراحة انا م متحمسة للعرس دا خالص وم عايزة احضرو بس مزن بت عمتي ظريفة معانا وهيا اكتر واحدة بتسأل عننا وبتجينا لو م مشيت حتزعل …

______________________________________
يابت يادان اصحي كفاك

-حاضر ي عمتو صحيت اهو

=تعالي امسحي الحوش دا كلو الليله جايننا ضيوف

-حاضر

مشت نضفت الحوش كلو ومسحت ودخلت الهول وفرشت وبخرت .. دان بي طبعها م فضوليه ولا بتحب تتكلم كتير الحاجة البتتطلب منها بتعملا بدون اي ترردد من يوم جات عمتا وعاشت معاهم ماسمعت منها غير كلمة حاضر .. فطرو ودخلت المطبخ مع عمتا موضوع غداء وفطاير وتحليه وعصاير كأنو عرس دان إستغربت قالت ليها

-ياعمتو مين اللي جاي..!!

=قرايبي كدا .. انتي اخلطي،العصير دخلي التلاجة وامش اخدي دش واعملي ليك شوية مك اب

_ههههههه مك اب قولي ي عمتو انتي جايبة لي عريس وانا م عارفة ولا شنو..!!؟

=بري عريس شنو مش عريسك قاعد! ؟

_دان غيرت ملامح وشها .. وسكتت نفسها تعرف ليه عمتا مصرة علي علاقتا مع احمد رغم كل الحصل يمكن دان م قدرت تحكي ليها انها عانت معاهو والاسباب الاساسيه الخلتا تكره العلاقة دي بس برضو ورتا قدر شنو احمد سيئ وبعاملا باسؤ اسلوب ليه ماعايزة تفهما ولا علشان هيا م امها حتي ولو ف النهاية هي ام مفروض تحس لو بتها اتختت في مكان دان كان حيرضيها تعيش كدا ..

اول م خلصت العصاير دخلت ادوشت وفعلا عاينت لنفسها ف المراية هيا ليه دافنة نفسها بالحياه كدا .. هيا حلوة وتستاهل تبقي احلي فتحت صندوق المك اب وعملت شوية .. طلعت عمتا شاغلتا ايوة كدا بقيتي تشبهي العروسات

______________________________
في بيت ناس الهام: -

أحمد الله يرضي عليك ياولدي م تخذلني ارح انا كلمت الجماعة وهما رضو نجي نتكلم معاهم

=ياأمي عليك الله اعفيني من الرسميات دي دان م حترضي حتي لو اهلا رضو

ياولد انت م تباصرا مرة واحدة وقول خير انا تعبت والله خايفة امووت ..

=الف بعد الشر عليكي ماتقولي كدا

طيب قوم غير ملابسك دي،الجماعة راجيننا أنا و خالك بنتكلم انت خليك ساكت

احمد من جواهو بتمني لو زول يصلح الهو ماقادر يعملو .. نفسو دان ترجع تكون جنبو يتصبح بصوتا .. يشوفا قدامو .. تهتم بادق تفاصيلو .. يمكن دان مختلفه عن ريم .. دان كانت بتدي،بلا م تاخد منو اي مقابل .. عكس ريم اللي اخدت كل شي الحب، الدلال،المال،وفي النهاية ادتو شنو غير الخوف، زرعت جواه خوف بي سببو خسر دان ..

احمد لاول مرة يستسلم ومايعند سمع كلام امو دخل غرفتهم فتح دولابهم شال جلابيه اتزكر مرة وهيا واقفه بتكوي ليهو ف جلابية الجمعة فضل واقف بعيد متمني لو يقرب منها يحكي ليها قدر شنو هو نفسو البينهم يبقا اقوي بس ف خوف بمنعو بعد م خلصت مشت .. مشت وهو م قدر يحكي الفي قلبو شال نفس الجلابيه ولبسا اتعطر من العطر اللي هدتو ليه دان .. وطلعو

_______________________________
لما وصلو فتح ليهم مؤتمن، مؤتمن اخو دان عمرو 9سنة وأختو منة 7سنة

فضلهم ودخلو أحمد كان باين عليه متوتر شديد وحتي ناس أمو .. طلعت ليهم سعاد سلمت عليهم وندهت ع دان تجيب المويه،

-التمن الضيوف الجو منو!؟؟

=راجلك وأمو وأختو ..

-كذااااب..!!

=خلاص م تصدقيني اسألي منونة كمان

-منة براحة اطلعي شوفي الجو ناس منو

منة جري طلعت ومن مكانا كوركت دندون والله التمن كلامو ثاح راجلك جا 😹😹

ووووب من الفضيحة 🙂💔💔💔💔💔

وقتها دان أمورا جاطت وبقت م فاهمة شي وبهناك سعاد بتحاول تصلح الموقف الختتو فيهم بتها بصوتا العالي دا .. أحمد الوحيد الكان مبسوط رسم إبتسامة مقوسة علي وشو كان عارف دان طفوليه وتصرفاتا حمقاء رغم انو اكبر منها ومرتب شديد ومابجامل في التصرفات دي بس بلقي نفسو عايز يشوفا وهي بتتصرف بحماقة .. ولا مرة لمح ليها انو م بحب الحركات الطفوليه دي بالعكس كان بستمتع ..

دان لما تخاف يدها بترجف بقت متوترة اصلا م توقعت يكونو هم .. اي نعم مشكلتا مع أحمد بس أمو وأختو ظريفين معاها وهيا م حتقدر تطلع مكشرة وشه

ا وتبين إنها م مبسوطة من جيتهم .. شالت العصير وماشه بتفكر الجابو شنو مش حذرتو م يحاول يعترض طريقا .. طب ليه طول الفترة الفاتت م جو يداب حس انو حيخسرا مثلا ..

طلعت سلمت عليهم أروى مسكت منها الصينيه وحضنتا مسافة وبقت تلوم فيها ي كعبة حتي م بتردى علي رسايلي يخسس عليك ..

بعدها سلمت لأمو وخالو لما جا دورو فضلت تعاين ليهو ولوت خشمها وسحبت يدها منو بسرعة قعدت جنب عمتها .. بعد اتكلمو شويه اتحججت انها عندها شى ف المطبخ ..

أروى قالت حتساعدا مشو المطبخ وبقت تعتذر منها علي تصرفات أخوها وتحكى ليها قدر شنو أحمد حياتو جاطت من بعدها وإنو فعليا محتاج لوجودا بس هو غبي مابيعرف يعبر ك أي أخت دافعت عن أخوها حتي بدون م تدي دان فرصة تقول راي .. يعني كدا كدا ضغطت عليها .. دان اكتفت بانها هزت راسا وشالت ضيافة وطلعو ..

لقو سعاد بتتكلم مع الهام .. والرجال ف الديوان بتناقشو وصوتهم طالع ..

اول م جات عمتا قالت ليها دان ي بتي أقعدي،وبدو يتكلمو معاها والكلام المعهود المرة لازم تسمع كلام راجلا، تحافظ علي بيتا،تتنازل،تسامح،تجي علي نفسها عشان اهلا وكلام الناس وعشان اولادا

طب دان م عندها اولاد، سامحت كتير، اتنازلت الف مرة، حاولت تحافظ ليه بيتعاد ليها نفس الكلام اللي اصلا عملتو مسبقا .. لقت انو السبب الاساسي كلام الناس 💔
المجتمع 💔 يعني حياتا م مهمة علي قدر م مهمين رايهم فيها، هيا تتحرق، تولع، تموت بس المجتمع يشوفا مبسوطة ف بيتا ومحافظة عليه بغض النظر عن البحصل جوة البيت دا 🙂💔

سمعتهم للاخر وقالت ليهم طب انا محتاجة وقت شوية ح ارد ليكم بعد يومين تلاته ،محتاجة اقعد مع نفسي ..

ناداني مؤتمن قال لي بابا بناديكي مشيت قال لي أحمد دا عايزك ف كلمتين رايك شنو قلت ليهو طيب طلعنا وفضلنا ساكتين فتح لي باب العربية قلت ليهو م ماش اي مكان اذا عندك شي احكيه بسرعة ..

دان اركبى م حنمش مكان بس ماظريفة نكون واقفين قدام الباب

ركبت وانا ساكتة .. ركب دور العربية

ولامرة أخدت بـ راي ولا حتي بتسمع كلامي مش قلت ليك م ماشة اسي ماش بي وين

م ح اخطفك ومابسمع كلامك لانو مابينفع معاي

انا كلي م بنفع معاك عايز مني شنو .. احمد سيبني في حالي وم تقرفني حياتي اكتر من كدا ممكن!؟

دان انا اسف

اسسسف!؟؟؟

اي عارف غلطة عليكي كتير بس انتي م عارفة

ماعارفة شنو ي احمد، ويداب جاي تعتذر بعد خراب مصر يلا اعتذارك دا مرفوض ورجعني وياريت م اشوفك ف حياتي تاني 🙂

قلتي كدا يادان !؟

ايوة .. يلا رجعني بيتنا

رجعو ودخلت غرفتا بسرعة وهما طلعو ...

(كلمة اسف لما تتآخر م ف أي فايدة منها ،مابتجبر الاتكسر 🙂💔)
#يتبع
#نهاية_الحلقة_الثامنـ8ـة
#نوودين_بت_من_حب

#فيلـوفوبيـا
(سميتك الخوف البطمن)
#الحلقة:الـتاسعـ9ـة
#بقلـ ✍️ـم:نوودين=Πeedoo

ح يفضل الليل قاسي على ناس مُش كويسه من جواها بس بتضحك دايماً 🙂💔

في غرفة مظلمة كانت بتبكي بصوت واطي حتي لو تبكي للصباح وباعلي صوت م ف حد حيسمعا لا اخت، لا ام 😔💔 هيا عاشت كدا طول عمرها كان مناها يكون عندها كتف م بميل تتكئ عليه، تبكي وتبكي وتطلع كل الجواها، في اللحظة دي بتفكر لو كانت امها عايشه دا كلو م حصل، امها اللي م متزكرة تفاصيلا حست انها محتاجة تشوف ضحكتا علشان تطمن، صوتا اللي مابتعرف نبرتو حاليا عارفة انو لو سمعتو حيطمنا، فيها شنو لو كان عندها اخت تسمع حكاويها، اخت تشكي ليها، طب م ضروري تشكي المهم اخت تكون جنبها  ،بتكره الليل شديد لانو بيوجعا، نفس الليل اللي اخد منها كل شي حلو ف حياتا، دان بالنهار مختلفه تماما عن دان بالليل، بتعمل نفسها قوية وحتتجاوز بس الليل برجعا لنقطة الصفر بقت محتارة ليه بيحصل ليها كدا هيا م عملت شي تتعاقب عليه كدا من ناحية حياتا الفقدت معني الحياة خوفا من انو م تحقق ولا حلم واحد في حياتا، خوفا الشديد من انها م تقدر تكمل حياتا طبيعي، خوفا من انو بكرة مايفضل ليها سند حيحصل ايه لو ابوها بقا م ف ف الحياة القاسية دي!؟
حتمش وين اذا كبرت ف العمر وهيا لسة في نفس النقطة قبل سنين م قادرة تتجاوزا! ؟
تعمل ايه اذا فضلت براها لاام، لااب،لااخ،لاسند!؟
حاجات كتيرة شاغلة تفكيرا ومالاقية اجابة، ساعات بتحس انو كل الظروف بتثبت ليها انو الزواج هو الحل الوحيد عشان تواجه بيه الحياه، يمكن م الحل الامثل بس الوحيد، بي كل السؤ اللي خاتاه عنو هو الحل، احمد الراجل الوحيد في حياتا ومسخ عليها بقيه الرجال .. هو كيف قدر يسلب منها حبها للحياه، كيف حطم احلاما لمجرد انو كان من حقو يستمتع بحياتو حتي لو علي حسابا!؟
طيب والقصص الحلوة المفروض تعيشا! ؟

بتنوم وجواها الف سؤال ماليه اجابة بس المرة دي قررت تلقي اجابة الساعه كانت 3ص رسلت لأحمد مسج كالاتي:-

(انا بكرهك شديد، بكره كل لحظة جمعتني بيك ي احمد،بكره كل لمسة، كل مرة قربت فيها مني، انت كنت اناني معاي شديد، غرورك وكبرياءك ديل ماتفتكر بقدرو يشترو ليك لحظات سعيدة، عمرها السعادة م كان ليها تمن،انت فاكر اهلي مامصدقين انك واو وزول رهيب وخلاص الدنيا واقفة عليك علشان كدا ،اوعك تفتكر انو ف بت بتهون علي اهلا، حتي لو م عندها اهل هي فعليا م بتحس انها هانت عليهم، انا صاح م كنت بكرهك لما عرستك وسلمت بالامر الواقع ورضيت اكمل حياتي معاك، نفذت كل الوصايا م قصرت معاك بس انت م عندك احساس، انت بتحب نفسك، ورغباتك فوق كل شي، انت م بتعرف قدر شنو انا قرفانة منك ومن نفسي ومن كل لحظة قربت علي فيها، بكرهك وبكره الليل علشان بزكرني بيك، بزكرني قدر شنو انا جنيت علي نفسي وضيعت نص عمري وانا بتحمل بشاعة تصرفاتك، ماحصل قلتها ليك بس ندمانة علشان بجي علي نفسي ومابعبر، ماغلطك دا غلطي كنت اقولا ليك من اول مرة ،بكرهك وماتحاول ترجع لي لاني مابطيقك ولا ح اقدر اتخيلك جنبي باي شكل من الاشكال، شكرا لانك عملت فيني كدا وقرفتني حياتي الاصلا م بقت تتسمي حياة )

قفلت تلفونا بدون م تشوف الرد كانت مغبونة وحست انو نفسها تفرغ كل الجواها 🙂💔

……………………………………………

الصبح اذن قليل من الناس البتصحي تصلي حاضر والاغلب بكون نفسهم يطلبو شي من ربنا تلقائيا بلقو روحهم صحو وكأنها مواعيد بينهم وبين الرب في كل مصلاية كانت بتطلع دعوات زي:-

يارب قلبو اربط عليه ولدي ماكان كدا رجعو لي زي اول اديهو بت الحلال المابتهون عليه 💙🌸

ودعوة تانية:-
يارب بتي انا ممكن في لحظة غفلة جنيت في حقها حتي لو تاخد حقها مني بس خليها مبسوطة ف حياتا انا عمري تاني م ح اعمل شي يأذيها انت سخر ليها الخير وين ماكان 💙🌸

ووحدة بتقول: -
يارب انا ماعارفة اعمل شنو محتارة شديد ف حياتي انت قادر وانا وكلت امري كلو ليك سهل لي الفيهو خير لي ولاولادي، وابعد عني الشر واتقيني من كلام الناس يارب الناس 💙🌸
______________________________________

أحمد صحي ولقي رسالة دان مع كل حرف كان بيقراه  قلبو بوجعو .. هيا قست كدا ليه ماكانت كدا .. قفلت عليه كل الطرق م خلت شى غير انو يبرر ليها تصرفاتو مشي ع تربيزة المكتب وطلع ورقة وقلم وبدا ليها رساله طويله حكي ليها كل الجواهو .. فضل يقرا فيها مرتين وتلاتة لحد م اقتنع انو فعلا عايز يعمل كدا يبرر ليها ويريح ضميرو ..

نزل بسرعة حتي م مشي يصبح لامو دور عربيتو وطلع .. وصل الشركة بدري شديد دخل مكتبو وظرف الرساله وخت معاها الدبلة ..

في مكان تاني: -
مرة واقفة جنب الظلط وباين عليها الخوف كانت بتتلفت وكأنها مراقبة .. جو مارين بجنبها نسوان سلمو عليها من بعيد وواصلو مشوارهم واحدة فيهم قالت للتانية ..

- أسي لو م القسمة البطلعا من صباح الله تكابس ف المواصلات والشغل شنو!؟

-بري والله الناس ديل قسمتم كعبة دا حالهم كدا..!

=هن م عندن راجل في بيتهن يقيف قصادن..!

-راجل منين واحدة

قتلتو وقعدت والتانية طفشتو ماتشوفيها كدا في عز شبابا لما عرسوها كانت بنيه دابا عمر 16سنة واسي بتها الكبيرة م تامة 20

=دافنا روحا بالحياة وخبارا م تزوجت تاني.!؟

-تتزوج وين بقا عندها اولاد منو بدور مرة مطلقه بي اولادا

=كررر عليها ياقولك قسمتن كعبه الناس ديلا

-ماشفقانه علا علي بناتن بيت ملان بنات ولاواحدة م عنا عليها راجل

-كررر كرررر ماتقولي لي البنات السماحة الدنيا عليهن ديلا

=ياهن اختها عندها اتنين كبار بقن ستات بيت وهي عندها اتنين واحدة مفعوصه كدي رافعة مناخيرا بتلقيها ف الدكان اليوم كلو مع ود خالتا تتضاحك والتانيه صغيرة بشوية تقرا مع ناس بتك مناسك

-شفتهن في عرس ثويبة خدومات وسماحة الدنيا عليهن ولا بودو ولابجيبو قعدن معاي في الصينية كان م اتغدن تخيلي قاعدت يغسلن ف العدة علا قومتهن انا ختيت ليهن الغدا سألتن من امهاتن واحدة فيهن قالت مشن عزا

_ياهن بنات منى الا بتها شايفة نفسها ولابتجي للناس زاتو كان لقتك في الشارع سلام الله دا م بتديكي،ليه

=قصتن غريبة يحليلن الله يديهن ود الحلال م يستاهلن

-وين معا بقوليك الشي تبعم دا وراثة قسمتن كعبة كدي ..

بعد طول انتظار جات عربية  وقفت قدام المرة .. معليش اتآخرت شوية

-عبدالرحيم انا قلت ليك م ف داعي تجيني بالعربية اصلا بس انت اصريت

= طريقنا واحد ماف داعي للمرمطة بالمواصلات .. مافيها شي بعدين نحن ماشين نفس المكان

=انا عارفة نياتك بس كلام الناس

-انتي البتديهم فرصه يتكلمو فينا .. قلت ليك انا عايزك علي سنة الله ورسوله شي واحد بخليك ترفضي ماف

=بعد العمر دا ي عبدالرحيم انت راجل م بتتلام ولا في زول حيقول عنك شي وبعدين ولدك كبر واتفهم احتياجك لمرة في حيااتك.. وولدك مقعد بحتاج رعايه واهتمام لنفسو م حيقدر يهتم بيك اكيد م ح يعاتبك لو قلت ليو عايز تتزوج بعد دا بس خت نفسك مكاني ي عبدالرحيم اقول لاولادي شنو! ؟
لسة ماحيتفهمو اني قبل المرة بعدتهم من ابوهم تاني اجي اقول ليهم عايزة اتزوج اعيشهم وين! ؟

-انا م عندي مشكلة يقعدو معاي البيت واسع بشيلنا ح اوفر ليهم كل احتياجاتهم وعد م حيشكو من شي

=انا م علمت اولادي يتربو علي الاحتياج المادي اناخايفه من حاجات تانية ي عبدالرحيم انت م حتفهمني

_كلو بتحل ياعشة انتي جربي تستخيري وفكري ف الموضوع

_ انا م خايفه الا من كلام بتي الكبيرة  ..كلام الناس دا بقدر عليه اصلي متعودة عليهو

=دي بتك الفي الجامعة !؟

- اي صعبة م بتتفهم ي الله قادرة تتقبل فكرة الانفصال وبقت انطوائية وعدوانية تاني اجي اقول ليها اتزوج اعفيني م بقدر ي عبدالرحيم

=خير ي عشة ربنا يكتب الفيهو خير

"يُقاس الألم بأثره لا بسببه؛ إنني أجهلُ كيف يجرؤ إنسانٌ أن يقول لآخرَ أنّ الأمر لم يكُن يستحق!"

#يتبع
#نهاية_الحلقة_التاسعـ9ـة
#بقلـ ✍️ـم:نوودين_بت_من_حب

#فيلـوفوبيـا
(سميتك الخوف البطمن)
#الحلقة:الـعاشـ10ـرة
#بقلـ ✍️ـم:نوودين=Πeedoo

‏كُل شيء قابل للثبات إلا مزاجي😴✨

يابت مالك وشك مخطوف كدا ..!؟

مممف شي ياروز .. ارح نلحق اللاب

اوك بس إذا في شي حابة تحكي ماتترددي

طيب لبعدين كدا

طول اللاب دان كانت سرحانه وم مركزة خالص فتحت تلفونا قرت المسج اكتر من مرة .. اتخيلت شعور احمد حيكون شنو وهو بقرا الكلام الجارح القالتو دا .. دان شخصية حساسة جدا ممكن يأذوها بس أبدآ م بتأذي أول م طلعنا من اللاب شايفاها بتحاول تتصل وظاهر انها متوترة ..

-دان مالك ي بت في حاجة!؟

=روز انا رسلت لأحمد أمس

-رسلتي ليهو ليه! ؟

=ارح نقعد الموضوع طويل ح أحكي ليك

فعلا دخلنا الكافتريا وحكت لي من لما جوهم ف البيت وشوفتني الرسالة .. صراحة بقيت محتارة م عارفة أقول ليها شنو أنا أفشل واحدة ممكن تفهم في العلاقات 💔

أثناء قعدتنا تلفونا إتصل رقم غريب سامعاها بتتكلم مع بت وبتوصف ليها بعد 5دقايق جاتنا بت سلمت علينا مدت ظرف لدان ومشت

-دي منو ي دان

=سكرتيرة أحمد .. أرح الاستراحة أشوف دا شنو

دخلنا وفتحتو لقت رسالة والدبلة بتاعتا فتحتا وكان مكتوب فيها: -

"‏بعض الأحيان يجب أن تبني من حولك جدار للعزلة، لا لتُبعد الناس عنك، بل لترى من سيهدم الجدار لكي يراك "
دان انا عارف اني آذيتك كتير .. كتير زاتا بسيطة علي الاتحملتيهو مني بس يشهد الله ماكان بييدي انتي كنتي الحاجة الناقصه ف حياتي .. الوحيدة الخلتني اقدر اعيد شوية من ثقتي ف نفسي .. ماكنتي اختياري بس الخيار الوحيد الانا قادر اتعايش معاه .. معليش،ع كل الحصل .. عارف معليش م بتجبر الاتكسر بس انا مجبور .. مجبور ي دان كنت بكمل نقصي بيك .. سألتي نفسك مرة أنا ليه ببعد منك!!؟؟
ليه مانعك أبسط حقوقك!؟
ليه ماعايزك .. وفي نفس اللحظة ماعايز أسيبك!؟
هي م أنانية زيما انتي افتكرتي أبدا والله .. أنا بس كنت محتاجك عارفة يعني شنو زول يحتاجك .. يحتاج يحس إنو حياتو ماشة طبيعي .. محتاج يرجع شويه من ثقتو الاتهدت .. محتاج يحس إنو ليهو مكانة .. والاهم محتاج يحس بعظمة نفسو كونو انسان يتقال عليه راجل .. ماكنت قادر أحس بالاحساس دا الا معاك علشان كدا إتعاملت معاك وكأنك صفقة العمر .. ماكنت حابب أخسرك .. كنتي كل آملي .. م أظهرت ليك الحاجة دي يوم .. ولالحد غيرك .. بس الليله بعدما خسرتك وخسرت صفقة عمري حابب أقول ليك إني ناقص بدونك .. أحمد ولا أي شئ بدون دان .. دان اللى قدرت تدي وهو المامتعود يأخد .. دان اللى هدتو إحساس هو بالمقابل أخد منها .. تعرفي كم مرة نمتي وأنا فضلت سهران بعاين فيك .. ولامرة حسيتى قدر شنو بكون مبسوط،وإنتي بتقولي انك مرتي ‏.. دان أنا حتي لو قلت ليك الحصل بالتفصيل اللى ماحد عارفو غيري إنتي م حتصدقي .. بس حابب اقول ليك إني ماكنت عايز أفرط فيك بس للاسف مااتمسكت بيك أنا خسرتك وخسرت نفسى .. عارف قلت الكلام دا متآخر بس أقلاها يبقي،عندك سبب منطقي تكرهيني بيه .. يكون ضميري مرتاح إني قلت ليك الحقيقة .. الحقيقة البخاف أواجها وإنو بي سببا حياتي م إستقرت مع ريم .. اللى عارفاه عن علاقتي مع ريم كان بعيد كل البعد عن الحقيقة .. أنا وريم م إنفصلنا علشان ماإتفقنا .. الحقيقة إنفصلنا علشان هي كان عايزة أحمد غير اللي أنتي إتقبلتي بكل سؤؤ وبرودو وفظاظة إسلوبو معاك .. ريم اللي حبنا كان أكبر من علاقاتي بكل البشر خلتني أحس إني ولاشى بالنسبه ليها كل الحكايه إنو الحب م كفايه علشان نكمل بيه حياتنا .. والخوف منو كمان سبب بدمر كل حياتنا الجاية علي قدر م هو م مهم شديد بس ضروري .. أنا وانتي علاقتنا م نشأت عن طريق الحب بس علشان كان لابد منو ف كل علاقة مانجحت .. للمرة الاخيرة وقبل الوداع إكتشفت إني بحبك قبل م أكون محتاجك .. إكتشفت إنك بتكمليني لاني لازم أكون ناقص ..تتقبليني زيما أنا ..معليش لاي لحظة ماعبرت ليك فيها .. ماغلطك إنتي تستاهلي تتحبي وحد يربحك ويخسر العالم عشانك .. لما تصلك الرساله م عايز منك تتراجعي عن كرهك لي .. ماعايزك تلومي نفسك بعرفك حساسة شديد .. وطلب اناني لاخر مرة م عايز حد يعرف السبب في نهاية علاقتنا خلي أمي عايشة علي أمل إنو ولدا ممكن يكمل حياتو ويستقر في يوم من الايام
                               مع خالص حبي 💛

اول م خلصت قرايه بقت تبكي ماعرفت اهديها شلت الرساله منها قريتا بس الصراحة م حسيت بشي 😹 لكن قلت اسكت بت الناس دي لانو الاستراحة كلها بقت مركزة معانا .. بعد تعب قدرت تتفاهم معاي غسلت وشها وقالت لي انا ماشه .. لازم امش الشركة ضروري شديد وطلعت بدون م تفهمني..

-
البعض يأتيكَ بمثابة اعتذار من الحياة، وكأنّها تطبعه قُبلةً على جبينك . ♥️

محاضرتي التانية كانت فاضية .. وميناس م جات وابراهيم كمان م ف حسيت بالوحدة طلعت من الجامعه بفتش علي مكتبه عايزة الوان  فجأة وانا ماشة من غير انتبه لقيت نفسي جنب المكتبة حقت المرة الفاتت ..
ساقتني خطاي للمكتبة لقيت نفس الولد بس الليلة مرتب علي شوية

😹 مشغل قران ومشغول بتلفونو وقفت رفع راسو عاين لي مسافه كأنو بحاول يستزكر قاطعتو قلت ليهو

عايزة كانسون وأقلام رصاص 3D والوان

كانسون ماف A4ينفع معاك!؟؟

طب القاهو وين فتشت كتير م لقيت..!؟

والله ممكن اجيبو ليك لو بتستني يومين تلاته..!!

اوك م مشكلة .. طيب ح اجي أخدهم ..!!

أديكي بقية الحاجات ولا حتجي تأخديهم سوا!؟

لاع أديني الالوان والاقلام ويومين ح اجي أخد الورق

بقا يفتش لي فيهم وانا إندمجت مع القران أصلا شغال بصوت القارئ المفضل عندي 💙إسلام صبحي 😍💙بعد مسافه قال لي لو سمحتي

ها

عايزة كم قلم

بقيت أسألو بي كم وكدا جات مرة داخله شكلها أمو .. بتنادي عليه ي عمار الفطور لما لقتني معاه سلمت علي وأعتذرت مني .. وقالت لي إتفضلي معانا الفطور ي بتي

ولايهمك ياخالتو .. بالهنا ليك

عليك الله م تجي تفطري معاي ي بتي قاعدة براي والشقي دا مابجي اسي بطلع

معليش ياخالتو عندي محاضرة لازم الحقا وانا فطرت الحمدلله .. خلي عمار يفطر معاك

سامع ي عمار البت دي قالت ليك تجي تفطر فما تتحجج

ياحنو جاي ماتشغليها لي خليني اشوف شغلي 😹

بعد أمو مشت ضحك قال لي إنتي نفسك الجيتي المرة الفاتت صاح!؟

خجلت ماعرفت أرد ليهو

معليش ع الموقف بتاع المرة الفاتت انا كنت بنضف و..

لا ولايهمك انا برضو م كان أدخل و..

عادي ياخ ياقول امي دي قسمة وحاجات من النوع دا

😹😹😹بقيت اضحك .. شكلهم كل الامهات نفس الرينج

بالضبط كدا اسي ماحتعدي لي الموقف دا علي موقف المرة الفاتت حطلع لي منو قصة

وانت اساسا حكيت ليها ليه!؟

ماعارف بالصدفة 😹

خلاص سيب الكلام امش افطر معاها بتكون مستنياك 💛

طيب حتجي تاني صاح! ؟

باذن الله

اتحركت  .. قال لي بس ماوريتيني اسمك

رزان

وانا عمار

تشرفنا

طلعت وانا مستغربة في نفسي دا شنو الهببتو دا 🙄 من متين بتونس مع الاولاد كمان 🙇‍♀️💔 رجعت الجامعة اتصلت لدان عشان اطمن عليها م بترد

______________________________________

مع دان :-
ركبت اقرب مواصلات واتحركت اتجاه شركة أحمد لما وصلت مشت ع الريسبشن وكان حسب الاجراءات تستني يكلموه حتي تدخل ليه ف المكتب قالت ليهم لا م تكلمو حابة أعملا مفاجأة دخلت المكتب وكان بلم في فايلات فضلت واقفة بتعاين ليه لما انتبه ليها فضل ساكت كانو ساكتين وبعاينو لبعض فجأة ...

(يقضي عمرهُ نادمًا من يُفرّط بامرأه عرفته على حقيقته وظلّت تحبه 💛)

#يتبع
#نهاية_الحلقة_العاشـ10ـرة
#بقلـ ✍️ـم: نوودين_بت_من_حب

#فيلـوفوبيـا
(سميتك الخوف البطمن)
#الحلقـة:الحادية_عشـ11ـر

فقط عانق من يتقبل عالمك الاسود ♥🖇

أحمد خت الملف وبقا مستغرب دان الجابا شنو!؟ وليه ملامحا م بتبين أي ردة فعل!؟ قطع حبل تفكيرو صوت خطواتا وهيا ماشة تجاهو .. كانت عيونا مليانة عتاب .. كأنها بتلومو ع كل لحظة خلتا تسؤ فهما تجاهو وهو كان السبب فيها .. هو كان مرتبك ومافاهم شي اول م شافا في شعور جواهو إتحرك ..

لما قربت منو شديد بدون ماتقول ولا شى إرتمت في حضنو وبقت تبكي .. وقف مصدوم ماعرف يعمل شنو اخد مسافة وبعدها ضماها عليهو وفضلو ساكتين ..

دان غمضت عيونا شديد وكأنها بتحاول تنسي كل الفات وبس لو تبدا صفحة جديدة .. أحمد كان حاسس بحمل تقيل إنزاح عنو في إحساس حلو شديد من زمان م حس بيه .. إنتبه لصوت بكاها بيعلى بقا يحنس فيها .. دان حبيبي كفاية .. انا جد أسف ..

بقا يمسح دموعا ويسكت فيها .. وهي كل مرة تزيد ف البكا طلعت كل الجواها بعد مسافة قعدا وأداها موية هدت شوية وإعتذر منها ..

كان مكسور شديد وهو بيحكي ليها المر بيه في حياتو .. كل الاسباب البقت سبب في انو علاقتهم تصل المراحل دي .. كان عارف إنو دان م ليها ذنب .. هي أحسن واحدة قدرت تتعايش معاه وإحتوتو .. بس هو الكان بصدها بتعاملو الجاف 💔 حكو كتير وإتصافو 🐥💛

طيب أخدي راحتك شوية وح أجيك

أوكيه .. أتزكرت إنو مفروض تطمن رزان طلعت تلفونا إتصلت ليها طمنتا .. أحمد جا داخل جاب ليها موية وفطور قعدو مع بعض فطرو وكل واحد بعاين للتاني بكل حب فجأة دان ضحكت 😹 وهو بقا يضحك بدون م يعرف هيا اصلا ضحكت علي شنو بعد مسافة قالت ليه إنت بتضحك ساي عارفني أنا ضحكت علي شنو!؟

ماعارف بس كدا مبسوط 💛

إكتفت بإبتسامة .. عاين للساعة وقال ليها لو م كان جيتي كنت ح أسافر

ماش وين!؟

أي مكان بعيد عنك

للدرجة دي 🙂💔

خلاص لغيت الرحلة وتاني م ف حاجة بتبعدني عنك

للابد 😢💛

بإذن الله .. يلا خلصي فطورك علشان تقومي تغسلي وشك وأرجعك البيت

بيتنا 🙈

لا بعد أجي أخدك من بيتكم وحننزل في شقة بالاول

ليه ليه كل البروتوكولات دي .. خلينا نمش بيتنا ونعملا سبرايز لاهلي وأهلك

😹😹مجنونة دي حركات شفع أنا لازم أمش إعتذر لابوك وأشكرو وأخدك من يدك قدامو كدا

طب ماشي ي أستاذ أبقي قابلني في بيت أبوي 😌 وقامت علي حيلا عايزة تمش

جراها عليهو وقال ليها إنتي لسة مرتي ع فكرة 😉

أنا م ناسية 🙈

طلعو وكل الناس بتعاين لاحمد .. أحمد مختلف خالص غير اللي كان معاهم مبسوط، وعيونو بتلمع،وبضحك كان ماسك دان من يدها وطلعو فتح ليها باب العربية ورجعا بيتهم ..

________________________________

عدي اليوم عادي رجعت البيت ودان اتصلت لي قعدنا نحكي قريب ساعة لما ناس سماح استغربو من ايمتا وانا بكون عندي صحبات، وبحكي معاهم مكالمات ولما يجوني ف البيت ..

كنت مستكينة ف حوش ناس عمر وبتكلم بعيد عن المزعجين ماعارفة بس حسيت نفسي مبسووطة شديد لدان 💛هيا تستاهل كل شي حلو كانت طايرة من الفرح وهي بتحكي 💛بعد خلصنا رجعت حوشنا وسرحت شعري وجهزت لبستي حقت بكرة رزاز جاتني

رزة !

ها..!!

بكرة عندك كم محاضرة!؟

اتنين .. ليه السؤال!؟

عايزاك تمش معاي السوق

عارفاني م بحب الزحمة والحاجات دي سوقي سماح ولا مروة يمشو معاك

خلاص غلطانة انا اصلا ولامرة عملتي لي شي كل م اطلب منك حاجة بتتحججي

طلعت مشت خلتني ماعارفة للحظة كنت مبسوطة وافتكرت اني بديت اتقبل حياتي عادي بس كل مرة يحصل شي بزكرني انو انا لايمكن اتجاوز حتتة اني ماح اقدر اتعايش مع خوفي من الزحمة ولمة الناس، والعلاقات 😢💔

رزاز اختي الصغيرة ومن حقها تطلب مني العايزاه وانا انفذو بس بيحصل العكس هي بتلجأ لي ك اخر شخص بعد م تقنع انو م ف حد حيساعدا بتجيني ك خيار بديل وبعدا ولامرة لقت مني المساعدة لانها دايما بتطلب حاجات فوق طاقتي، حاجات بترهقني لو قلت اعملا زي مثلا امش معاها لصحباتا 💔 او بيت عماتي 💔زي مشي السوق كلها حاجات بكرها و نفسيتي بتتأذم لو قلت اعملا .. انا بحاول اعمل البطلع بيدي بس بلقاني عاجزة وماطالع بيدي شي قفلت معاي انا عارفة حتكون ختت ف بالا اني اخت سيئة وهيا م محظوظة بأختها الكبيرة 😢💔

طلعت دفتري وبقيت الون رسوماتي من ضمنهم رسمة عمار وقفت عندها انا رسمتو ليه!؟ ولا رجعت المكتبة اساسا ليه!؟ليه بتكلم معاهو بدون خوف!؟انا ليه ماحاسة تجاهو نفس احساس الخوف تجاه كل الاولاد!؟هو كيف قادر يمحي كل الخوف من جواي!؟ملامحو ليه مريحة بالنسبة لي!؟اسئلة كتيرة م ليها اجابة ..

لونت الرسمة تبعو بلون ازرق وكتبت تحتها

(أرحم فؤادي يا فتى إني وربي متعبة..)

وقتها م عارفة كنت وين دا شنو البكتبو دا، لا اكيد انا م طبيعيه ..

قفلت الدفتر وطلعت لقيت رزاز وسماح بتونسو شكلهم اتفقو يمشو السوق مع بعض لما جيت طوالي رزاز قامت قلت ليها خليكي انا الح امش ..

جات امي داخلة غريبة الليلة جات بدري مشيت مسكت منها الحاجات وسلمت عليها ..

مالك في زول زعلك

لا م ف شي .. انتي اقعدي

ح اخت ليكي الغدا

م جعانه تعالي وريني مالك

طيب ح اجيب ليك موية .. انا خلاص دموعي م فاضل الا تمطر عديل لما ازعل بتخنق ومابحب زول يسألني دخلت المطبخ قشيت دموعي وغسلت وشي شلت موية لـ أمي وديتا ليها وقعدت تسألني مالك! ؟

ماصدقت قعدت أبكي رزاز جات قالت ليها أسي بتك المدلعة دي السألا منو وبقت تقول ليها انتي دلعتيها كدا ماف زول ف البيت دا سألا براها بتخترع مواضيع المهم انا بس كنت مضايقة وعايزة افرغ الجواي أمي زعلت وقالت لينا يعني انا بشقي عمري دا كلو عشان منو!؟ تجو تتشاكلو لي وكأنكم م اخوات قلت لامي طيب معليش ومشيت دخلت غرفتنا كملت البكي قريب للمغرب طلعت اتوضيت جابو اكل قلت ليهم م عايزة أمي برضو  قالت م عايزة .. مشيت راضيتا وقلت ليها انا م جعانة ح اكل بعدين

خالتي قالت لي خلاص خلوها تاكل مع عمر بعدين .. اتزكرت عمر صح هو الايام دي مالو مشغول عني شلت تلفوني اتصلت عليه

عمرررر

رزة انتي كويسة!؟

زهجانة ..!!

في شنو ي انا مالك! ؟

ماعارفة

اتشاكلتي مع زول!؟

خلاص انسي م تشغل بالك .. وتعال بدري مستنياك للاكل

البسي عبايتك وتعالي لي

ليه!؟

اعملي كدا بس

دخلت لبست عبايتي امي قالت لي اها ماشة الدكان مش

اي

عمر كم مرة قال ليكي ماتطلعي براك

يمة هو قال لي امش

سماح قالت لي جيبي لي معاك زبادي ورزاز قالت لي جيبي معاك لبان

طلعت لقيتو واقف لي ف بداية الشارع لما وصلتو قال لي ها مالك

اتشاكلت مع رزاز

معليش،ماتشتغلي بيها 💛

نحن حنمش وين!؟

المحطة ولا م نفسك في باسطة!؟

اي نفسي فيها 🙈

مشينا مع انو ماقاعد يرضي لي اطلع خاصه المحطة لانها مليانة اولاد وكدا بس لما اكون معاهو م عندو مشكلة مشينا اشتري لي باسطة براي ولناس البيت براهم قعدنا في المظلة حقت المواصلات مسافه .. عمر الوحيد القادر ينتشلني من عز الزهج ويخليني مبسوطة ونسني واتكلمنا كتير بعد مسافة قال لي يلا امك اسي،حتقلق عليك رجعنا البيت مزاجي رايق امي وخالتي اتكلمو كتير واني ابطل دلع وحركات بس م اشتغلت بيهم شلنا باسطتنا واي زول اخد ليهو كباية لبن وقعدنا ف التلفزيون ..

(شايفة انو أعظم حاجة ممكن يقدمها شخص لـ التاني هي انه ما يهُون عليه زعلو  و دي آقصى درجات الحب على مستوى كل العلاقات الإنسانية💙✨..)

#يتبع
#نهاية_الحلقة_الحادية_عشـ11ـر
#بقـلـ ✍️ـم:نـوودين_بت_من_حب

#فيلـوفوبيـا
(سميتك الخوف البطمن)
#الحلقـة_الثانيـة_عشـ12ـر
#بقلـ ✍️ـم:نـوودين=Πeedoo

_"هَل انتَ مثلي؟يرتَبك نبضُك ٳن حادَثتني..؟!❤️"

عمار طلع السوق مخصوص علشان يجيب كانسون والوان لرزان .. رغم انو م حابي الشغل ف المكتبة  بس في فترة من حياتو لقي نفسو م عايز يعمل شي ..
علشان يشغل نفسو ويطلع من الحزن والكئابة بقا فاتح المكتبه ..

بعد مشي واشتري حاجات كتيرة حس نفسو اخيرا بقا يعمل شي غير التفكير والزعل، شاف انو كونك تعمل شي علشان زول م بالسؤ الهو فاكرو .. طول الطريق كان بفكر حتجي!؟ هي اكيد م حتشتري كل الكمية دي هو ليه اتحمس للفكرة وجايب حاجات كتيرة كدا!؟اساسا نادرا م يجو زباين والمكتبه مكانا م واضح هو ليه فجأة بقا شاغل تفكيرو بالمكتبة لمجرد انو هي بقت تجي تشتري منها .. حاجات كتيرة شاغلة تفكيرو رجع البيت ودخل رص الحاجات بطريقه حلوة وفضل مستنيها علشان تجي جات امو نادتو للفطور بس اتحجج انو مشغول وشويه ح يجي..

الساعة كانت ماشه لـ12 ورزان م جات حس باليأس وبطل ينتظر ..!!

________________________________
الصباح وانا طالعة لقيت امي واقفة غريبة هي طلعت بدري للان م لقت مواصلات لما قربت منها شايفة عربية وقفت ليها وركبت .. اتصلت ليها: -

-يمة..!!

=اها ي رزة في شنو!؟

-مف شي كنت شايفاك واقفة للزمن دا و

=انتي وين!؟

-جنب الظلط يداب طلعت علشان اركب

=تعالي انا معاي دكتور عبدالرحيم نوصلك

-لالا ماعايزة

=يابت سيبي العوارة م حتلقي مواصلات بسرعة تعالي اهو نحن راجعين ليكي

-امشو انتو انا بركب اسي

=بت يارزان اسمعي الكلام

-طيب

بعد شويه جوني راجعين فتحت الباب ركبت وسلم علي .. رديت ع قدر السلام وسكتا أمي أبدا م قالت شي هو فضل يسألني
-عمرك كم!؟
-بتدرسي وين!؟
-تخصصك شنو!؟
-ناوية تعملي شنو بعد تتخرجي!؟
-انتي ليه سكوتة كدا!؟

فضل يتكلم معاي كتير وانا بطبعي مابحب زول يدخل في خصوصياتي ويسألني كتير كدا 😒 بعاين لأمي تنقذني منو وهي ولامركزة معاي 🤦‍♀️ زهجت زهج قلت دا شنو دا خرب لي مودي من الصباح هو مالو سئال كدا .. لا وهو اصلا ماش امدرمان وانا العربي حلف يوصلني قدر م قلت ليه نزلني هنا ح اواصل رفض طلعت تلفوني وبقيت مشغولة بيه وهو يسكت 5دقايق تاني يتزكر ليهو سؤال يسألني لما وصلت بحري قلت ليهو نزلني هنا ح اتلاقي مع صحبتي .. اخيرا نزلت ولاقلت لأمي أنا ماشة زاتو قفلتي للباب مشيت ولا كأني كنت معاهم .. ركبت وصلت الجامعة مشيت ع محاضراتي ..

____________________________
=لاحول ولاقوة الا بالله جادة دي بتك

-مش كلمتك صعبة صعبة لدرجة بعيدة

=انتي حاولتي تفاتحيها ف الموضوع!؟

-افاتحا باي وش ياعبدالرحيم براك شايفا .. امس قلت اشوف ردة فعلها لقيتا متشاكلة مع اختها وزعلانه م  حبيت اتكلم معاها

=جربي تتكلمي معاها ..!!

-الله يهون

_______________________________
-رزة .. رزة

=ها يابت مالك..؟!

-مبسوووطة انا 🙈

=ظاهر يامدام 😹

-انا بحبو يارزة

=امممممم .. وحترجعو صححح؟!

-اي اي ماشايفة الرسم دا .. 🙈

=لما شكلك بقا كيوت الليله وشك منور

-دا الحب يابت 😌

=نحب ولا ايه 🙈

-اي ياخ حبي عموري دا انتي مالك الود ظاهر انو بحبك 😭عايني بعاملك بحنيه كيف؟!

=هووي ي بت اختيني .. عمر دا زي اخوي

-مصيرك تقعي ف الحب وتقولي دان قالت 😉

=ياااع ☹️☹️

-ارح ارح نفطر انا راجعة البيت م عايزة احضر اللاب ماشه اجهز شنطتي احمد حيجي الليلة

=طيب م مشكلة اصلا لاب مامهم

بعد خلص اللاب اتزكرت اني مفروض امش المكتبه عشان قال حيجيب لي الورق دخلت إتوضيت وصليت طلعت الشمس كانت حارة ياخ .. كويس انو المكتبة قريبة لشارع المواصلات اول م وصلت شايفة عمار بقفل خليتو قفل واتجه علي

-رزان؟!

=اسفة اتاخرت عليك؟!!

-انا افتكرتك م ح تجي

=كنت مضغوطة و

-م مشكله ح افتح جبت ليك طلبك

=فعلا فتح المكتبة ودخلت قال لي اتفضلي وجاب لي موية باردة وطلع لي الورق حتي لقيتو جاب الالوان والاستيك نوت الملونة وجاب دبابيس وورد ومغلفات جرايد بقيت اتفرج ع الحاجات قال لي ها رايك

=حلوين بالعادة مابتلقو الا ف سوق امدرمان وبكسل امش اجيبهم .. ح اجي اخد منك

-شيلي اسي وجيبي القروش ع راحتك

=لا م ..

-بقيتي زبونة عادي مااهو المكان ماراحلين نحن .. عايزة شنو ؟!!

=فتحت الميموري وشفت الحاجات العايزاهم كلمتو جهزهم لي وشكرتو طالعة قال لي ساكنة وين؟!

-بحري

=نترافق؟!!

-فضلت ساكتة ماقدرت اقول ليه لا اساسا ماف سبب بخليني ارفض وغير كدا هو اساسا كان جاهز وشكلو طالع .. قاطعني صوتو

=م ح ازعجك 😹 بسكت ساي

-طيب

=قفل وقال لي نمشي؟!

-ارح .. فضلنا ساكتين هو مشغول بتلفونو بعد وصلنا الموقف وصدفة لقينا مواصلات ركبنا وطول الطريق كان بونسني 😹 م سكت ولا ثانية قربت اقول ليهو دا وعدك لي انك حتسكت بس الغريبة اندمجت معاه ف الونسة وم حسيت ع الوقت لحد م وصلنا بحري نزلنا حيت ادفع قال لي بدفع ليك انا وماتعملي لي فيها متحسسة والكلام الماياهو

دا اعتبريها ضريبة لاني ازعجتك طول الطريق ضحكت ومشينا ع السوق قال لي انتي واصلة وين!؟

=الصبابي هنا قريب

-ماعازماني ايس كريم؟! قالو عندكم ايس كريم ظابط

=ماشاءالله عارف محل اظبط،ايس كريم اها وتاني

-  😹😹 دا زمن الشباب كنت بحوم مابخلي مكان بس من سنتين م جيت والله

=طيب ليك عندي عزومة حدد اليوم بس

-اوكيه خليني افكر لوقتها وبديك خبر

=اتفقنا

-طيب تصلي بالسلامة 💛

ابتسمت وودعتو .. مشيت ركبت وقبل اصل البيت مشيت لعمر سلمت عليه

-مشيتي السوق؟!!

=ابدا من متين بمش السوق براي؟!!

-انا عارف شايفك شايله اكياس قلت تكوني دخلتي السوق

=لا دي ادوات رسم اشتريتهم من مكتبة جنبنا

-اها كويس لسة م ناوية ترسميني 😹

=رسمتك زمان وقالو م حلوة تاني م برسمك

-انتي مالك ومالهم انا عاجباني

=عمرررر سيب المجاملة

-خليتك طيب .. اها عايزة شنو

=جيت اسلم ليك بس

-الله ع الزوق دا جبتي من وين 😹

=ياخي

-خلاص خلاص روقي المنقة ي اصلية 😹

=ماوريتك

-اها

=الصباح لقيت الزول  داك مع امي ووصلني للمحطة الوسطي 🤦‍♀️

-قصدك عم عبدالرحيم

=عمى كباس 😒

-ههههه ابردي مالك يابت هو زول طيب والله

=ها ها طيبة انا .. سئال تقول محقق

-وانتي لقيتي وين لما سألك وعايز منك شنو؟!

= 😹😹🚶‍♀️ابرد اكيد م حيكون عايز يخطب،لي ولدو .. لقيتو موصل امي وركبوني معاهم

-عرفنا امك شغالة معاهو وانتي شارعك معاهم واحد؟!

=عمررررر .. بطل تحقق معاي انا م عندي ليهو شي وافكارك م تمش بعيد هو سألني،أسئلة عادية يعني ماتفور دمك

-تمام امشي البيت لبعدين

=عايزة بارد

-ماتشربي،ع معدة فاضية اوكيه

=حاضر ياعم

- 😹 امشي سريع

______________________________________

مع دان بعد كلمت أهلا إنو هي وافقت ترجع لاحمد طبعا بعد إعتذر منها وإتصافو .. عمتا اكتر واحدة فرحانه علشان أخيرا دان حترجع بيتا حست كأنو هم وإنزاح دان فكرت بالمنطق وحكمت عقلها أساسا م ناقصه مشاكل في حياتا م عندها ام تقيف جنبها ولا اخ ولااخت كبيرة اذا بكرة حصل شي لابوها هي حتعمل شنو؟! بعدين أحمد م بالسؤ الكانت خاتاه ف بالا وأساسا هي مشاعرا تجاهو ماكراهية .. ليه تخسرو لاسباب م كانت بايدو قررت ترجع تستقر في بيتا 💛

كانت راسمة شكل حلوة ولبست توب كبدي سادة واكسسوار فضي،وشبط،فضي لما احمد جا يسوقا بعد ودعت ناس بيتهم طلعت معاه طول الطريق كان بعتذر منها وبوعدا م حيتكرر الكان بحصل بينهم وانو ندمان ع كل لحظة قضاها بعيد،عنها .. لما وصلو الشقة كان بعاملا وكأنها عروس يداب .. وهي عايشة الدور كمان 😹💛

______________________________
عمار بعد رجع البيت امو بقت تتونس معاه

-عمار البت السميحة اللقيتك معاها قصتا شنو

=ياحنو حكاوتي انا كل شويه لازم احكي ليك قصه 😹

-ياولدي نحن ف الحياة دي كلنا كدا قصص

=والله انا لابقدر اجاريك في كلامك الزي الفلاسفة دا لاقادر افهمو انتي كيف بتفسري الامور ؟!

-يامارو نصيحة مني ليك اسمعا وختها حلقه في اضانك دي

=انا ولد ي امي 😹 مقدر انك كنتي عايزة بت بس،دا ما معناه تقلبيني بت وتعامليني كأني بت

-ها الاهبل دا مثل ماتقاطع كلامي خليني اقول ليك

=اها ي  حنان  المايك معاك اتحفينا ..

-سيب المساخة والقلة ادب

=معليش طيب

-القصة كلها مخططة من الله م ف شي بحصل ساي ياولدي مرات ف عز الزهج بيحصل شي يفرحنا اكان م زهجنا بنضوق طعم الفرح؟!

-ياولدي الحياة دي بتمش كدا زي المسلسل قصه ورا قصه ورا قصة لما نصل الحلقة الاخيرة .. البنية دي مكتوب ليكم قصه، الزول البتلاقيه ف المواصلات وتتناقشو تقولو كلمتين حلوين ويهون عليك الطريق دي قصة صغيرة كدا في يومك .. المدرسة والاصحاب الفيها قصة .. المسجد ودربو والناس البتلاقيهم فيه وتتونسو وتصلو سوا دي قصة .. انا لما اقول ليك قصتك معاها شنو علشان عارفه انو هي م جات في دربك عبث كدا لي سبب امكن هي في حياتا قصص .. وانت لمتك معاها واحدة من القصص برضو ..

=اها اها كملي

-انت بتمشي فيني سرحان وين؟!

=معقوله ي نبع الحنان م بمش فيكي انا بس سرحت واتزكرت حاجات وبديت استوعب كلامك والقصص الحصلت ..

-قوم الحق الصلاة .. القصة لسة م كملت بحكيها ليك مرة تانية

=طيب يلا نقول بسم الله والله يقبل امش المسجد وم بتآخر ..

(ماف زول بدخل حياتنا عبث، والصدف لما تكتر مامن فراغ وراها قصة راجعو حياتكم وشوفو كم قصة حلوة بالصدفة ابتدت  😌💛)

#يتبع
#نهاية_الحلقة_الثانيـة_عشـ12ـر
#بقـلـ ✍️ـم:نـوودين_بت_من_حب

📖 اذا انتهيت من قراءه  الروايه اضغط علي #لايك 👇 واذا حصلنا علي #خمسين    (50) لايك سوف نقوم بتنزيل    #بقية_الرواية.

#سـلسلـة_فـوبيـا
(فيلـوفـوبيـا 😔🥀)
#الحلقـة_الثالثـة_عشـ13ـر
#بقلـ ✍️ـم:نـوودين=Πeedoo

(إنني غارقة في وحل
الكتمان وعدم الثقة مجدداً ..!!😔💔)

-يامنى الراجل دا كويس واي شي بس انا مابقدر العلاقه دي حترهقني نفسيا حاجات زي دي انا في غني عنها ..

=انا عارفاك خايفة من رزان ماتتقبل الموضوع انا معاك انها ممكن تنزعج وماترضي بس حاولي اتكلمي معاها رزان م صغيرة عارفه كويس سنة الحياة ..

-ماعارفة يامنى والله غلبني عديل الموضوع دا .. أفكاري جاطت بقيت ماعارفة اعمل شنو ساعات بفكر اخلي الشغل دا واشوف غيرو لانو انا تعبت ..

=دا هروب انتي وانا عارفين كويس كلام الناس،م بكمل هو راجلي المات اجل الله م خلوني وبقولو انا كتلتو ودا نحس مني حتي الموت الناس،دي،م بترحم فيهو زول يومو تما انا اكون جبت ليهو النحس كيف؟
ماتخافي من الناس عشة ي اختي انتي لسه في بداية عمرك وبناتك كمان صغار رزان بت متين عشرين م تمت واذا يعني بكرة لو هي ورزاز مشو بيوتهم رامى دا لسه صغير حيعمل ليكي شنو؟الراجل دا م زول يترفض عارف وضعك ومتقبلو وهو قال ليك م عندو مشكلة مع اولادك ومستعد يسكنهم معاه وين المشكلة؟!

-جيت من الجامعه تعبانة ومرهقة قبل ادخل قلت اطلع جزمتي برة سمعت ونسة خالتو منى وأمي فضلت مصدومة وواقفة ف الباب لحد م جات رزاز من برة قالت لي هيييي انتي اتصنمتي زحي خليني ادخل هنا خالتو وامي التفتو علي والظاهر فهمو انو انا سمعت جزو من كلامم .. ملامحهم م بتتفسر كأنهم بقولو  في شي مفروض انا بالزات م اسمعو وللاسف سمعتو .. دخلت طوالي ومشيت غرفتنا امي فضلت تنده علي

-رزان .. بت يارزان .. رزة انا بتكلم معاك

=ماكان لي نفس أسمع شي أكتر من اللي سمعتو 💔لأول مرة أعاند أمي وم أسمع كلاما أمي الطول عمري خاتا كلاما علي راسي الليلة حسيت إني ماعايزة أسمعا ..

دخلت غرفتي وإتفقعت بكي ماعارفه انا ببكي ع شنو هما الناس مشكلتهم شنو .. ؟!
المرة م بتقدر تعيش بدون راجل؟!
البنات حياتهم م بتظبط،لو م فيها اولاد؟!
في الجامعه الشلة المافيها اولاد بحسسوهم كأنهم م طلبه معانا ..
ليه مصرين يقولو انو نحن بنحتاجهم في حياتنا وكأنهم شي أساسي؟!
الناس مقتنعه اني معقدة وفي جزو منهم سماع اضاني قالو انا مريضة نفسية..
هل انا فعلا مريضة نفسية؟!
هم عارفين المريت بيه ووصلني للمرحلة دي؟!
كيف يحكمو علي كدا بدون سبب؟!
مش دي حياتي وانا حرة فيها ادخل فيها اولاد او لا دا م شي بيعنيهم؟!
ناس الحي مشكلتهم معانا شنو شايفننا دون الناس؟!
راجل دا الا يكون متزوج المرة حتي يتسمي راجل جدو وعمر ديل م رجال واقفين معانا وساكنين معانا ف نفس البيت؟!
ليه بفضلو يقولو م عندنا راجل؟!
ليه بفكرو في مستقبلنا ويقولو م ف زول حيتزوجهم؟!
هل القسمة ف يدهم؟!

أسئلة كتيرة ماليها إجابة .. نفسي اعرف الناس كلها مالا ولا انا مالي 😢💔

دقو الباب وسامعاهم جايطين برة يمكن اتسببت ف مشكله واحراج لامي اكتر مما هي محرجة من الموضوع بس م عارفة انا ليه مافكرت بعقل وقتها كنت عايزة امي ورزاز يفهمو الانا حاسة بيه .. يقدرو خوفي وشعوري ماراجيه من كل الناس تتفهمني لانو هما م عاشو اللي عشتو بس ع الاقل امي ورزاز 💔 بس حتي هما متعايشين مع الموضوع ومطلعيني انا زولة سايكو هما ماعارفين انا بحاول قدر شنو، طيب كيف هما قادرين ينسو المأسي والزكريات السيئة وبتعاملو مع أبوي عادي .. انا ليه م قادرة أنسي زيهم حتي أمي نست وعايزة تعيد التجربة من وين بجيبو الثقة دي 💔 كيف بقدرو يعيدو التجارب الفاشلة 💔 انا م عايزة اظلم أمي بس كمان مابقدر .. مابقدر والله 😔

أخدت وقتي بعد زهجو مني .. كالعادة اتكلمو مع عمر بحكم انو هو الوحيد البقنعني طلعت صليت المغرب ولقيتهم ختو الاكل نادوني قلت ليهم م عايزة شلت هدومي ومشيت الحوش التاني لقيت حبوبة  مفرشة الفرشة وقاعدة في مصلايتا لسة م قامت منها مشيت قلت ليها

-يمة

=الرزاز؟!

-انا مارزاز

=ادني علي  ي السميحة

-جيت قعدت جنبها

=ادني لسة

-ختيت راسي في رجلينا وفضلت ساكتة وهي م قالت شي بقت تلمس لي شعري .. قلت ليها يمة ليه امي وابوي حصل بينهم كدا

=القسمة يابتي .. الحياة دي كدا انتي م تساسقيها .. الببقي دا كلو مكتوب وم بتفات ..انتي م تشيلي في خاطرك من الدنيا دي خليها ع الله

-لو امي عرست عم عبدالرحيم انا عايزة اقعد معاكم ماعايزة امشي منكم

=البيت بيتك تقعدي جوة عيونا زول بقوليكي تمشي منو ماف

- فضلت جنبها لحد صلاة العشا قالت لي قومي خليني اصلي قبل جدك يجي من الجامع كلامو كتير م بخليني اصلي لو جا
ضحكت وقلت ليها بكلم ليك يابا لو جا طردتني من جنبها قلت لي م كل الناس يكونو زي جدو وحبوبة 💛 ليهم عمر مع بعض ولسة حلوين بهتمو ببعض وبخافو ع بعض بعد كل السنين دي في حب بيناتهم لما يقعدو ويتونسو ويضحكو انا بكون مبسوطة،شديد علشان كدا كل م ضاقت بي بجيهم 😔💛 الله م يحرمني منهم ..!

شلت الموية وقعدت اغسل جا عمر بصفر ازعجني قلت ليهو

=صررعتنا ياااخ

-مزتي معليش،طيب

=

😒😒ماناقصاك

- مالا رزتي زعلانه كدا

=امشي مني ي عمر

-افوتك وين؟

=ماوقتك ياخ

-طيب سوري وريني مالك؟

=😔معارفة

-جا قعد في الكرسي الح اخت فيهو ملابسي وقال لي سيبي الغسيل عايني لي هنا

=خليني ياعمر عليك الله انا عايزة اقعد مع نفسي

-اوك ح اخليك بس بعد م توريني انتي ليه زعلانه كدا

=طيب ح اوريك بس بعد اروق اسي امشي مني ماعايزة زول يقعد معاي

-حتي انا؟

=سكتة منو انا عنيدة بس عمر دا لايوووق عديل كدا لو قلت اتكلم معاهو كلمتين دموعي حتنزل وانا م حابة ابكي قدامو ..

-رزة ..!!؟

=في شنو ياعمر؟!!

-بتكلم معاك عايني لي هنا

=رفعت راسي وخلاص دموعي ماقدرت اسيطر عليهم 😭

-انتي بتبكي مالك اسي؟
يرضيكي تقضي حياتك خايفة وزعلانه علي طول كدا؟
رزة الحياة دي م بتجي علي قدر احلامنا طق نحن لازم نواجهه مشاكل ونعاني ونتعب علشان بعدين نفرح لما ننال .. رزة انا مقدر وضعك وم مستهتر بخوفك والحاسة بيه بس كمان م شايفه انو كفاية؟!
مالاحظتي انو الحكاية دي ماشه تتآزم؟!
انتي كل مرة زايدة للاسؤ حصل يوم حاسبتي نفسك؟!
حصل واجهتيها؟!
حاولتي تتخلصي من العقدة دي؟!
ختيتي نفسك مكان امك؟!

-عمر فاكر انو عاجبني الوضع؟!

انا نفسي اعيش الحياة زيماكل الناس عايشاها بس ماقادرة ..

انت عارف انا بعاني قدر شنو لما ابين اني عادية واعمل الحاجات البضايقني دي؟!

حد منكم خت نفسو مكاني؟!

في زول يوم فكر انا ليه علي طول خايفة؟!

انتو كلكم بتعاملوني ع اساس دي طبيعة فيني؟!

انتو اتقبلتوني كدا سألتو نفسكم العالم شايفني كيف؟!

رزة الشخصية المدلعة،العنيدة،الخايفة دي انتو صنعتوها .. انتو الكنتو بتعاملوني علي اساس الحياة دي سهلة وبتمشي زيما انا عايزة ..اذا م نفسي في حاجة يبقي ماف داعي اعملا .. اذا عايزة حاجة يبقي لازم تبقي لي .. اذا خايفة انتو جنبي ماف داعي اخاف ..

انتو م علمتوني انو م كل شي ف الحياة دي بمشي ع مزاجنا .. في مجتمع، في عادات وتقاليد بتحكمنا في قوانين مالازم نتخطاها، ما اي شي انا م عايزاه يبقي خلاص لا في حاجات بتحصل غصبا عننا عشان دي حياة م جنة .. ماكان لازم اعتمد علي وجودكم حوالي بنسبة 100% كان لازم تعلموني انو حيجي يوم وم حتكونو جنبي حياتكم خاصه بيكم انا م لازم اكون فيها ..

امي طول عمرها خايفه مني اكتر من المجتمع والناس .. انت وقفت حياتك وبقيت مركز معاي..

عمر ايمتا اخر مرة انت كنت مع صحباتك وعشت حياتك؟!

كان كل شي في البيت دا عمر .. عمر .. عمر ..

رزان زعلانه نادو ليها عمر..!!

رزان عيانه كلمو عمر يتكلم معاها تاخد الدواء..!!

رزان عايزة تمشي المدرسة خلو عمر يقدما ..!!

رزان مااكلت خلوها تمشي البقالة لعمر تجيب حاجة تاكلا..!!

رزان عايزة قروش .. عمرر..!!

رزان مامقتنعة باالحاجة دي .. خلو عمر يتكلم معاها..!!

عمر انت لو كنت اخوي الحقيقي،م كان عملت دا كلو علشاني .. اخواتك قنعو من انو انت تفضي ليهم وتركز معاهم كانو دايما بقولو لي عمر م شايف ف البيت دا زول غير رزان ..

انت لمتين حتفضل تعمل معاي كدا؟!
امي لمتين حتوقف حياتا وتباري نفسياتي وخوفي؟!
حاسة نفسي انانية شديد علشان انا عايزة كل شي يمشي بمزاجي .. ماعايزة زول ابرر ليهو انا بعمل كدا ليه؟!
عايزة زول يقيف جنبي ويفهمني بدون م اقول ليهو كدا .. انا خلاص تعبت من الحياه دي م نفسي اقعد فيها اكتر من كدا يارب تاخدني

بعد وقت طويل كنت بتكلم بدون م اسكت عمر كان بعاين لي بس وانا بتنهد والكلام ي الله طالع مني قمت ماشه مسكني من يدي ..

(بنحتاج احيانا زول يسمعنا بدون م يقول لينا شي،زول نحكي ليهو كل الحاسين بيه، كل الكاتمينو جوانا من سنين، زول واحد نقدر نعبر قدامو عن احساسنا بدون م نرتب كلامنا، زول عارفين انو حيفهمنا 💛)

#يتبع
#نهاية_الحلقة_الثالثة_عشـ13ـر
#بقلـ ✍️ـم:نـوودين_بت_من_حب

#فيلـوفوبيـا
(سميتك الخوف البطمن)
#الحلقـة_الرابعـة_عشـ14ـر
#بقلـ ✍️ـم:نـوودين=Πeedoo

-"ماذا لو تعانقّنا وأزلنا كل سُوء يحِيط بنا؟"😔💛

وانا ببكي وزعلانه عمر مسك يدي .. ماكان فيني طاقه اقول ليهو فكني حتي .. جا وقف قدامي وفضل يعاين لي كنت بجر النفس جر حاسة نفسي مخنوقة .. في غصة في حلقي ..في حاجة واقفة لي في قلبي .. نفسي اغمض شديد وم افتح الا وكل الشعور السيئ دا راح مني ..

عمر قرب مني وقش لي دموعي .. لما خته يدو في خدي حسيت جسمي كلو ارتعش نفس الخوف للمرة الالف رجع لي .. انا متعودة اكون اقرب مايكون من عمر ليه لما يقرب علي بخاف .. ليه بحس بنفس الشعور البحسو من الناس الغرباء .. قبل أقول أي شي قال لي

رزة فاكرة إنو نحن أو خليني أقول أنا ماحاسس بيك؟!

خلاص ياعمر حينفع شنو انت عايز تقول لي زي كل مرة انك هنا ومعاي وم حتخليني و...

قاطعني بانو جراني عليهو شديد بكل حيلي لقيت نفسي ف حضنو همس لي رزة ماتخافي انتي بطلي تخافي وكلو حيظبط  .. كنت قادرة اسمعو بوضوح رغم الخوف والرجفة البتهز كل جسمي ..

عمر كيف يعمل فيني  كدا هو من وين جاب الجراءة دي؟!! .. كان ضاميني عليهو شديد لزيتو لما قرب يقع ومشيت بدون م اعاين وراي ..

دي المرة التانية عمر يغلط معاي نفس الغلطة .. مرتين دخل جواي نفس الخوف .. عمر مالو يعني ليه بقا يتصرف معاي كدا .. حتي هو .. انا م ح اقدر اواجه الحياة دي اذا الطعنة بتجيني من الحتة الامنت فيها .. اذا عمر بتعامل معاي كدا انا اقول يامنو ..

كنت ماشة بسرعة وانا مشمئزة من نفسي لقيت مروة جنب الباب مارفعت راسي عاينت ليها حتي بس متأكدة إنها شافتنا .. حوشنا كان صاني وامي قاعدة متحسرة فاكرة انو عمر لما يتكلم معاي حيقنعني اول م جيت قالت لي رزان؟!

داخلة انوم وان شاءالله مااصحي زاتو 🙂💔

ماانتظرت رد منهم دخلت الغرفه واتمنيت لو اقفلا علي وم افتحا بس حتي الحق دا م عندي ليهو مابراي ف الغرفه دي ..

طلعت توبي وعطر عمر عالق في كل جسمي حسيت اني بكرهو شديد فضلت واقفة في مكاني مسافه .. مشيت دلفتي طلعت البوم الصور قعدت اشوف صورنا هنا انا في حضن ابوي ..انا عشت زكريات طفوله حلوة مع ابوي وباين من الصور كان بدلعني انا ليه ناسية الحاجات دي .. كل صوري معاه كان رافعني او حاضني وكل صورة كانت فيها لعبه او حتي حاجة بياكلوها كنت مبسوطة وانا جنبو .. باين انها صور عفويه التقطوها لينا في اماكن مختلفه .. صورة بملابس البيت هو واقف وراي وانا بلعب بالطين .. صورة وانا نايمة في حضنو .. صورة وانا منكوشة وهو بسرح لي شعري .. صورة بملابس الروضة مكتوب عليها اول يوم ف الروضة .. صور كتيرة انا وابوي برانا حتي الصور الفيها ناس امي ورزاز كنت انا بكون جنبو او ف حضنو .. في صورة واحدة ماسكنا انا ورزاز مع بعض وكان بعاين لي .. انا من وين جايبة القساوة دي تجاه ابوي .. كيف ووين ومتين اللحظات الحلوة دي كلها اتحولت لجحيم .. ليه م قادرة اتزكر اللحظات دي وعالقة ف زاكرتي اللحظات السيئة؟!!

بقيت ببكي وانا بعاين للصور .. اتزكرت كل مرة كان يتكلم مع ناس رزاز فيديو كول واكون جنبهم وبقول ليهم ماعايزاه قولو ليه انا م ف 😢💔

اتزكرت لما تعب وعملو ليه عملية زايدة كل البيت كان مقلق عليه حتي امي .. امي اكتر واحدة عانت ف الحكاية دي قدرت تتجاوزو وتسامحو وماشايلة ف قلبها تجاهو وبتدعي ليه وبتخاف عليه .. الا انا 💔

انا كنت فاكراه بكرهني 😔 مع انو انا الختيت الحاجز دا بينا انا الاخترعت الشعور دا وصدقتو 💔 اتزكرت كل مرة بسمعو بقول لناس رزاز اعفو لي وخلوها تعفي لي 💔

كنت بهرب من كل شعور بحسو باني ابكي .. البكي هو الحل البواجه بيه مشاكلي
ببكي لما اخاف .. لما اشتاق .. لما احن .. ببكي في كل مرة وزي اسي بعمل اهو ببكي لاني م عارفه اعمل شنو 💔

________________________________________
في يوم حلو شديد كان مزاجو رايق عبر ليها عن حبو ومن بعدها عاشو احلي ايام ،، بني معاها كل آمالو ،، البت الوحيدة القدرت تخطف قلبو ،، عافر شديد علشان يصل ليها ،، كان بتعب ليل ونهار علشان عارف أهلا لايمكن يرضو لبتهم الوحيدة بحاجة بسيطة ،، في كل مرة بقول ليها انا اعمل شنو لاهلك ديل ،، من وين اجيب ليهم كل الطلبات دي ،، ايمتا حتخلو عاداتكم وتقاليدكم دي ،،كان كل م يشتغل ويزيد قروشو بفرح ويجي يقول ليها فضل بسيط ،، في اخر لحظة اتخلت عنو ،،هيا مادافعت عن حبها ليهو ،، ماقدرت تقول ليهم انو هيا بتحبو وهو نفسو يكمل معاها وكان بتعب علشانا ،،، الزعلو اكتر كانت عارفة انها مصيرا تكون لولد عمها اللى. أساسا خاطبا من هيا صغيرة. ،، بس كملت معاه كانت بتحب حبو ليها. ،، اهتمامو ،، خوفو عليها. ،، خلتو ف نص الطريق من وقتها وهو ماقادر يثق في زول ،، ماقادر يكمل طبيعي ،، كل م يتناسى وجعو بيصتدم بالواقع. ،، عندو فكرة إنو كل البنات زي بعض ،، فقد الثقة في العلاقات ،، حتي في نفسو 😔💔وبقا عمار مختلف خالص عن اللي كان زمان

_____________________