#درس_مؤثر

تحدي جديد ممكن تشاركنا بيه دلوقتي على الجروب وثوابه بإذن الله كبير وانت كمان هتطلع مستفيد 🧡

أكيد كل واحد فينا اتفرج أو سمع دروس اثرت فيه وفعلاً فرقت معاه بشكل كبير وطلع منها بشحنة إيمانية عالية

المطلوب انك تختار درس واحد فقط منهم وتحطلنا صورة منه في بوست على الجروب وتقولنا في سطور نبذة عنه والأجمل والأجمل إنك تكتبنا ملخص ليه في نقط (علشان اللي مش هيقدر يسمعه)

انت هتستفيد مراجعة الدرس والنقط المستفيدة منه وغيرك هيستفيد ترشيح جميل يضيفه عنده أو ملخص يقرأه ويفرق معاه 🧡

فيديو اليوم :
ما لا تعرفه عن الجنة

لينك الفيديو :
https://youtu.be/RvqCAcPjDc0?si=CAf_pS-rWN-jxhTg

سُنة اليوم ☘️
ترديد الأذان

ومش هتلاقي حد عاقل يعرف ثواب سُنة زي دي مش هتاخد دقايق في اليوم ويفوتها على نفسه ! 🙈

في حديث صحيح عن الرسول عليه الصلاة والسلام أنه لما سمع الأذان قال مثل قول المؤذن وعندما سمع حي على الصلاة حي على الفلاح قال: لا حول ولا قوة إلا بالله ثم قال مثل قول المؤذن في آخر الأذان ثم قال عليه الصلاة والسلام: "من قال ذلك من قلبه دخل الجنة"

انت متخيل ؟!
دخول جنة علطول كده بس علشان رددت الأذان ! 🧡

وفي حديث تاني "من قال حين يسمع النداء: اللهم رب هذه الدعوة التامة والصلاة القائمة، آت محمدًا الوسيلة والفضيلة، وابعثه مقامًا محمودا الذي وعدته، حلت له شفاعتي يوم القيامة"

شفاعة النبي عليه الصلاة والسلام بدعوة بسيطة زي دي ! 🧡

وفي حديث تالت "من قال حين يجيب المؤذن عند الشهادة: رضيت بالله ربًا، وبالإسلام دينًا، وبمحمد رسولًا؛ غفر له ذنبه"

يتغفر ذنبك بجملة تقولها بعد كل أذان !

هل ممكن تفوت على نفسك كل الثواب ده بعد كده ؟!
تعالوا نلتزم بيها من النهاردة ونوصي حبايبنا كمان يشاركونا الثواب ان شاء الله 🧡🧡

#vlog

تحدي جديد حابين الكل يشاركنا بيه على الجروب بكره ان شاء الله 🧡

إيه رأيك تعمل تحدي لنفسك إنك توثق بالفيديو لقطات من يومك وتجمعهم مع بعض وتشاركنا بيه في فيديو على الجروب ؟؟

مش لازم يومك يكون مليان أحداث
روتينك البسيط - درس بتتفرج عليه - مذاكرة بتخلصها - مهمة عملتها

التجربة هتكون ممتعة جداً بالنسبالك وهتشجعك تعمل خطوات مفيدة في يومك وهتكون ملهمة لغيرك ومصدر طاقة إيجابية لأي حد هيشوفها مهما كان فيديو بسيط في النهاية

شاركونا يومياتكم
عايزين الجروب مليان أجواء وبهجة رمضان ونشجع بعض اننا نكمل بنفس الهمة بإذن الله 💪🧡

فيديو اليوم :
يعلمون ظاهرًا من الحياة الدنيا

لينك الفيديو :
https://youtu.be/WvhmhoL_k3Y?si=W-qcZk_UpOprdlr5

سُنة اليوم ☘️
دعاء الدخول والخروج من الخلاء

احنا مسلمين مش بندخل ونخرج من الحمام عادي كده

لكن أمرنا النبي عليه الصلاة والسلام إننا ندخله برجلنا الشمال ونقول "اللهم إني أعوذ بك من الخبث والخبائث" .. ونخرج برجلنا اليمين ونقول "غُفرانك"

عايزين نتعود عليها ونعود كل اللي معانا في البيت .. إيه رأيك تعمل تصميم حلو وتطبعه أو تكتبه في ورقة بخط جميل وتعلقه جنب باب الحمام من بره علشان الكل يفتكر وتاخد ثوابهم ؟؟ 🧡🧡

يلا يا مبادرين 💪

#افتحوا_الصور

تحدي لذيذ ممكن تشاركنا بيه على الجروب
والناس بتحب النوعية دي من البوستات وبتكون ملهمة ومفيدة ليهم

ممكن تشاركنا مجموعة صور تقولنا فيها على تطبيقات مفيدة بتفرق معاك .. أو مجموعة نصائح تخص الطلبة أو الأمهات أو الخريجين أو أي فئة حابب تفيدهم بنصائح وتحط صور مناسبة ليها .. أو مجموعة اقتباسات من كتاب معين .. أو صور لتلخيصات انت كتبتها لأي فيديو أو سلسلة أو دورة مفيدة .. أو صور لمقتطفات من يومك تلهمنا وتصدر لينا طاقة إيجابية لما نشوفها مهما كانت بسيطة

شاركونا بإبداعاتكم
علشان الناس الملتزمة معانا تظهر بدري بدري 😉🧡

فيديو اليوم :
من أين أبدأ ؟

لينك الفيديو :
https://youtu.be/Bgjz1VxODjY?si=S8wCXs4Tf6UJ6mDJ

سُنة اليوم ☘️
قراءة سورة الكهف يوم الجمعة

ويكفي قول النبي عليه الصلاة والسلام "من قرأ سورة الكهف يوم الجمعة أضاء له من النور ما بين الجمعتين"

الأسبوع الصح بيبدأ بسورة الكهف
فتعالوا ننور أسبوعنا 💪🧡

#دعائي_المفضل

حابين إنك تشاركنا في بوست على الجروب تقولنا فيه دعاء مقرب إلى قلبك

سواء لمعناه اللي بتحس إنه بيأثر فيك وانت بتقوله .. أو لإنه مرتبط عندك بموقف معين أو بتحقيق حاجة معينة .. أو لإنه مرتبط بموقف أو قصة لنبي أو لصحابي ودايماً بتفتكرها

قولنا صيغة الدعاء وكلمنا عنه شوية وعن سبب ارتباطك بيه لعلك تشجعنا نلتزم بيه احنا كمان وتاخد ثوابنا 🧡

فيديو اليوم :
كيف تتلذذ بالقرآن ؟

لينك الفيديو :
https://youtu.be/hK-9Be0prrA?si=ccueVNGA-dRfOLTV

سُنة اليوم ☘️
التبسم 😊

أي جمال في هذا الدين أن تكون ابتسامتك فقط في وجه أخيك صدقة تؤجر عليها ! 🧡

الإبتسامة مصدر طاقة إيجابية
والطاقة الإيجابية مُعدية وممكن تنقلها لغيرك فقط بإبتسامتك
وكان النبي عليه الصلاة والسلام كثير التبسم

افرد وشك وخدها نية
وهتلاقيها بتنعكس على نفسيتك وطاقتك انت قبل غيرك 🧡

#خير_أمة

وده تحدي جميل وبسيط حابين الكل يشاركنا بيه

كل واحد يشاركنا في بوست على الجروب بنصيحة تنفعنا كلنا أو تنفع فئة معينة مخصوص مهما كانت النصيحة بسيطة لكن خدها بنية إنك بتنفع غيرك وبتدله على معروف وبتحقق اللي ربنا وصفنا بيه في "خير أمة" 🧡

سواء كانت النصيحة دي عن تجربة معينة مريت بيها وبتنقلها لينا .. أو نصيحة قرأتها أو سمعتها من حد وفرقت معاك .. أو نصيحة من مجال شغلك أو دراستك وحابب تنفعنا بيها

فيديو اليوم :
الرجل الصمد

لينك الفيديو :
https://youtu.be/TI4VTIYub4s?si=wCee8JwSjdBtg1gi

سُنة اليوم ☘️
الشرب ثلاثاً مع الجلوس

تخيل إنك مع كل مرة بتشرب فيها عندك فرصة تطبق ٥ سُنن عن النبي عليه الصلاة والسلام وتاخد ثوابهم ؟!

هتسمي الله .. هتقعد على كرسي .. هتشرب بإيدك اليمين .. هتشرب على ٣ مرات .. هتقول الحمد لله

اطبعها أو اكتبها في ورقة وعلقها جنب المكان اللي بتشرب فيه (ومتنساش تحط كرسي وتثبته في المكان ده علشان اللي يشرب بعد كده يقعد عليه)

تصرفات بسيطة لكن لو دخلتها في روتينك اليومي هتتفاجئ بجبال حسنات يوم القيامة بإذن الله 🧡

خطة الأسبوع الثاني 🧡🧡

وانتظروا خلال أيام ان شاء الله الإعلان عن مهرجان هدايا رمضان والعيد وهتشوفوا حاجة مبهرة بإذن الله مش هتلاقوها في أي مكان تاني غير No Zero Days 🔥🧡

فادخل اثبت حضورك من دلوقتي معانا
واكتب "قد التحدي 💪" في كومنت واعمل شير لجدول الأسبوع 👇👇

https://www.facebook.com/share/p/Ayf9pqK1iwUXyp5t/?mibextid=WC7FNe

#تجربتي_مع

تحدي جديد حابين إنك تشاركنا بيه في بوست على الجروب

تحكيلنا عن تجربتك مع أي حاجه جت في بالك وهتبقي مفيدة بالنسبالنا وتشجعنا عليها (ممكن تكون تجربتك مع عادة معينة التزمت بيها - تجربتك مع التطوع في مكان معين - تجربتك مع دعاء معين أو تدبر سورة معينة من القرآن - تجربتك مع تطبيق معين - تجربتك مع سلسلة أو دورة أو مصدر معين - وهكذا)

شاركونا تجاربكم الإيجابية وجددوا النوايا إنكم تاخدوا ثواب أي حد هيستفيد بيها 🧡

فيديو اليوم :
التوبة وطرق عملية لنتوب بصدق وماذا نفعل إذا عدنا للذنب وفرح الله بالتائب

لينك الفيديو :
https://youtu.be/qS_D9AW3TPg?si=ZFX5o_tPZp4QoCF-

سُنة اليوم ☘️
البسملة قبل جميع الأعمال

إيه أجمل من إنك تفكر نفسك بالإستعانة بالله قبل أي عمل بتعمله ؟ إنك تسمي الله قبل أكلك وشربك وعملك ومذاكرتك ووضوءك وخروجك ودخولك فيها بركة انت محتاجها

اتعود عليها وخليها على لسانك دايماً
احنا محتاجين نستعين بالله في كل أمور حياتنا والبسملة مفتاح يذكرنا بالإستعانة دايماً 🧡