#سيرة_امهات_المؤمنين

🌛الحلقة 12🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼وأولادي اللي بيحبوا سيدنا محمد أكتر واحد في الدنيا كلها ..

🌻لأنه بيعلمهم كل الخير و بيعرفهم إزاي يكونوا في أحسن مكان ... جنة ربنا
هيقولوا بأحلي صوت :

🌼اللهم صلي علي سيدنا محمد

🌻و دلوقتي حبايبي الشاطرين هايقولولي مين هو اول واحد و واحده آمنوا بالرسول صل الله عليه وسلم

🌻ايوا برافو 👏🏼

🌻أول واحده أسلمت هي أمنا خديجه

🌻وأول راجل أسلم هو سيدنا أبو بكر صاحب الرسول

🌻وأول ولد أسلم هو سيدنا على بن ابي طالب بن عم الرسول

🌻وأول مولى أسلم هو سيدنا زيد بن الحارثه

🌻و طبعا بنات الرسول كلهم هما أول بنات أسلموا

🌻و فضلت عايشه الاسره دي بسعاده و اتحقق حلم السيده خديجه و علشان كده كانت بتعمل أي حاجه تخلي بيها الرسول وأولادها و كل الناس اللي عايشين معاها سعداء

🌻وعلشان هي كانت حاسه بالسعاده و علشان كده كانت عايزة تسعد اللي حواليها

🌻و في يوم من الايام خبط الباب..يا ترى مين اللي جه ؟

🌻فاكرين مين حليمة السعديه..ايوه برافو هي دي مرضعة الرسول

🌻وأول لما الرسول سمع صوتها رحب بيها و قالها أهلا بأمي و فرش لها سجاده تقعد عليها

🌻سألها الرسول عن اخبارها فشكت له من شده فقرها وسوء الأحوال

🌻فلما سمعت السيده خديجه ان مرضعه الرسول فقيره و محتاجه

🌻راحت أعطتها أربعين خروف و جمل كبير و روحت بيتها و هي سعيده

🌻و طبعا الرسول كان سعيد اكتر منها بكرم أمنا خديجه مع أمه ومرضعته

🌻و فضلت الاسره عايشه في سعاده و قرب الرسول من سن الأربعين زي ما قلنا قبل كده

🌻 و بقت تحصله حاجات كتير جدا في الوقت ده

🌻بدأ النبي يحكي لأمنا خديجه انه بيشوف ضوء و يسمع صوت و هو قاعد في غار حراء

🌻و كانت السيده خديجه بتسأل علطول ابن عمها ورقه بن نوفل عن اي حاجه بتحصل

🌻و كان بيقولها ان اللي بيجي ده هو سيدنا جبريل علشان يعلم سيدنا محمد

🌻و كان الرسول بيحلم كتير و أول ما يصحى الصبح يتحقق الحلم اللي هو حلمه بالضبط زي ما شافه

🌻و بعد ما سيدنا محمد شاف سيدنا جبريل و قاله اقرأ زي ما عرفنا في قصة سيدنا محمد

🌻الشياطين بدأت تتجسس وتسمع أخبار السماء لكن ربنا كان بيخلي النجوم و الشهب تحرقهم لو حاولوا يسمعوا ايه اللي بيحصل بين سيدنا محمد و سيدنا جبريل

🌻و في فتره كان النبي زعلان فيها قوي لأن سيدنا جبريل إتأخر عليه و مبقاش يجيء

🌻و في يوم من الايام و سيدنا محمد راجع من غار حراء شاف سيدنا جبريل قاعد على كرسي كبير قوي

🌻و كان الكرسي يملأ ما بين السما و الارض

🌻و نزلت سوره المدثر و بدأت دعوة الرسول للإسلام في السر علشان الكفار ميعرفوش

🌻و زي ما قلنا من شوية ان أهله و اصحابه اول ناس آمنوا بيه

🌻وأول واحد ساعد الرسول بعد السيده خديجه هو صاحبه سيدنا أبو بكر

🌻أول ما الرسول عرض عليه الإسلام أسلم علطول

🌻مش بس كده ده كمان راح يقول لصحابه علشان يؤمنوا بالرسول

🌻وهم سيدنا عثمان بن عفان و سيدنا الزبير بن العوام و ده كان ابن عمة الرسول صفية بنت عبد المطلب و عبد الرحمن بن عوف و سعد بن أبي وقاص و ده خال الرسول صل الله عليه وسلم و طلحه بن عبيد الله

🌻 كل دول دخلوا الإسلام على يد أبو بكر و من العشرة المبشرين بالجنه

🌻و بدأ النبي يتوسع بدعوة الناس للإسلام
بس ازاي توسع النبي بدعوته وازاي امنا خديجة ساعدته

🌻هنكمل بكرة إن شاء الله

🌻تصبحوا على خير يا حلوين🌻

🌻اللهم صل على سيدنا محمد
🌻🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛الحلقة 13🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا محمد

🌻و دلوقتي يا حبايبي الحلوين هنعرف ازاي توسع نبينا الكريم في دعوته

🌻لما وصل عدد الناس اللي آمنوا بالرسول 30 واحد و واحده اختار ليهم الرسول دار الارقم بن أبي الأرقم زي ما قلنا قبل كده علشان يقابلهم فيها و يعلمهم دينهم و استمروا كده 3 سنوات

🌻و كل ده و السيده خديجه بتساعد الرسول بكل حاجة عندها

🌻و بعد ما خلصوا ال 3 سنوات سيدنا جبريل قال لسيدنا محمد إن لازم الدعوة تكون علنيه

🌻و بدأ سيدنا محمد يروح الكعبه و يقول للناس على الإسلام

🌻و بدأ الكفار يضايقوا الرسول لأن الإسلام مكنش بيفرق بين غني و فقير و بدأ الكفار يقولوا إزاي الإسلام بيقول إننا ممكن نصلي مع العبيد الفقراء في نفس المكان و نقعد معاهم كمان

🌻و قرروا يواجهوا الرسول حتى لو وصلت إنهم يموتوا الرسول

🌻و كل ده السيده خديجه بتصبر الرسول لأنها كانت فاكره كلام ورقه بن نوفل إنهم هيحاربوا الرسول و يخرجوه من مكه

🌻 وراحوا لأبو طالب عم الرسول و قالوا له يرضيك كده محمد ابن اخيك بيشتم الالهه و بيعيب علينا وبيتهمنا بالكفر

🌻يا إما تمنعه عن اللي هو بيعمله يا إما تسيبه لينا

🌻فقعد يتكلم معاهم علشان يهدوا و راح للرسول

🌻و قاله ما تسيب الدين ده يا محمد و ترجع لدين آبائك انا مش هقدر أدافع عنك لأن كل الناس واقفه ضدك

🌻فرد عليه الرسول و قاله و الله يا عم لو وضعوا الشمس في يميني و القمر في يساري على ان أترك هذا الأمر حتى يظهره الله أو أهلك فيه ما تركته

🌻يعني مش ممكن أسيب المهمه اللي ربنا كلفني إني أعملها حتى لو مت

🌻فراح أبو طالب قال للرسول خلاص أنا هقف جنبك و أساعدك بس مش هقدر أبقى مسلم زيك

🌻و الكفار رجعوا تاني لأبو طالب و عرضوا عليه عرض غريب..قالوا له ايه رأيك تاخد إبننا اللي اسمه عماره بن الوليد بن المغيره و ده أجمل وأغنى شباب مكه كلها

🌻خده و سلمنا ابن أخوك محمد..طبعا أبو طالب رفض و قالهم انتوا مجانين ولا ايه

🌻عايزين آخد ابنكوا أربيه و تاخدوا ابني تقتلوه

🌻 و فضل النبي صل الله عليه وسلم يدعو الناس الى الله وحده و أمنا خديجه واقفه جنبه علشان تساعده و تخفف عنه آلامه و أحزانه و تساعده بالفلوس بتاعتها

🌻و كمان عمه أبو طالب كان بيحميه من الكفار و مش بيخلي حد يأذيه

🌻 و نزلت الايه اللي في سوره المائده (والله يعصمك من الناس ) فعرف سيدنا محمد ان الله هو اللي هيحميه و ان الدين هيوصل لكل الناس

🌻و فضل الرسول مش بينام الا قليل اوي و بيفضل يكلم الناس عن الاسلام كتير

🌻و في الوقت ده ربنا فرض على الرسول صلاة واحدة كان بيصليها بليل بس اسمها قيام الليل ودلوقتي إحنا بنصليها بالليل بعد صلاة العشاء ودي ثوابها كبير والدعاء فيها ربنا بيحققه

🌻و نزل سيدنا جبريل و علم الرسول إزاي يتوضأ و الرسول علم السيده خديجه و بقت تصلي معاه

🌻و زي ما قلنا قبل كده ان بنات الرسول الاثنين رقيه و ام كلثوم اتجوزوا من ولاد ابو لهب عتبه و عتيبه

🌻لأن أبو لهب بقى عدو للرسول بعد الإسلام و علشان ينتقم منه خلى ولاده يطلقوا بنات الرسول

🌻و كانوا بياذوه كتير زي ما قلنا قبل كده ويحطوا الشوك في طريقه

🌻 لكن ربنا خلى بنت الرسول رقيه تتجوز من سيدنا عثمان بن عفان و ده كان مسلم مش كافر وهومن الخلفاء الاربعه الراشدين والعشرة المبشرين بالجنة

🌻و اما ماتت رقية اتجوز سيدنا عثمان من اختها ام كلثوم و علشان كده بقى اسمه ذي النورين علشان اتجوز بنتين من بنات الرسول

🌻لكن بردو الكفار فضلوا يضايقوهم و مسبهومش في حالهم

🌻بس علشان دلوقتي جه معاد النوم هنعرف بكره ايه اللي حصل لعيلة سيدنا محمد و السيدة خديجة

🌻و لسه في حاجات تانيه كتير عايزين نعرفها عن حياه أمنا خديجه وسيدنا محمد لأنه حصلهم حاجات كتير قبل و بعد الإسلام

🌻و ازاي وقفت جنبه زوجته خديجه

🌻اللهم صل على سيدنا محمد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛الحلقة 14🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا محمد

🌻كانت السيده خديجه بتشوف اللي كان بيحصل لرسونا محمد صل الله عليه وسلم من أذيه و سخريه وكانت بتواسيه و تخفف عنه و تقوله ميهمكش من الناس دي

🌻و مش بس كان زوجها هو اللي بيتعرض للاذى ده كمان بناتها كانوا بيتعرضوا للاذى وهي كمان

🌻وفي اخر السنه الرابعه من بدايه النبوة زاد أذى الكفار على المسلمين

🌻و فضلت المشاكل تكبر و الأذى يزيد لغايه ما وصلوا لنص السنه الخامسه من بدايه النبوة

🌻و كانوا الكفار بيبحثوا عن أي طريقه علشان يتخلصوا بيها من المسلمين

🌻لدرجه انهم سألوا واحد يهودي علشان يدلهم على طريقه يتخلصوا بيها من سيدنا محمد و المسلمين

🌻و اليهودي ده قالهم يسألوا النبي 3 أسئلة

🌻أول سؤال مين هما أصحاب الكهف و إيه قصتهم؟؟!!

🌻و تاني سؤال مين هو الخضر و إيه قصته مع سيدنا موسى؟؟!!

🌻و ثالث سؤال مين هو ذي القرنين؟؟!!

🌻و طبعا الكفار كانوا فرحانين و فاكرين إنهم بالأسئلة الثلاثه دول هيخلوا الناس تبعد عن سيدنا محمد لأنهم كانوا فاكرين إنه مش هيعرف يجاوب عليهم

🌻 قعدوا الكفار يترقيوا على الرسول ويسخروا منه لأنهم اول ما سألوه قال لهم بكره هجاوبكوا و نسي يقول إن شاءالله

🌻فربنا سبحانه و تعالى كان عايز يعلم الرسول إنه مينفعش يعمل اي حاجه الا بعد ما يقول إن شاءالله

🌻و علشان كده قعد فتره سيدنا جبريل مينزلش ومفيش أي إجابة على الاسئله دي عند الرسول

🌻و طبعا الكفار فرحانين و كانوا واثقين إن الرسول مش هيعرف يجاوب على الأسئله

🌻لكن ربنا أنزل سوره الكهف مع سيدنا جبريل و فيها إجابه عن كل الاسئلة دي و كمان بتحكي عن حاجات كتير وكانت بتقول للرسول ولا تقولن لشيء إني فاعل ذلك غداً إلا أن يشاء الله يعني قبل ما تعمل أي حاجة لازم تقول إن شاء الله

🌻لكن ربنا كان بيعلم الرسول و يعلمنا أن مش لازم اول ما ندعي ربنا يُعطي لنا ما نريد ..لازم نصبر شويه

🌻و كمان علمنا نقول إن شاءالله قبل ما نعمل اي حاجه

🌻 و رد الرسول على الكفار و قالهم ان أصحاب الكهف دول كانوا شباب مؤمنين عايشين في وسط ناس كفار

🌻و الناس الكفار دول كانوا بيؤذوهم و علشان كده ربنا خلاهم يمشوا من المدينه الكافره و يروحوا يقعدوا في الكهف و خلاهم يناموا في الكهف نوم طويييييل أوي تقريبا 300 سنه او اكتر شويه

🌻و بعد كده ربنا خلاهم يصحوا وبعتوا واحد منهم علشان يشتري لهم أكل ومايه وطبعا كان معاه الفلوس القديمة اللي هي من 300 سنه فاتوا

🌻فأول ما راح السوق لقى ناس تانيه خالص غير اللي هو يعرفهم و لقى الفلوس شكلها اتغير

🌻و عرف ان ربنا خلاهم يناموا 300 سنه علشان ينقذهم من الناس الكفار

🌻يعني ربنا بيقول للمسلمين اللي في مكه انتوا كمان لازم تسيبوا بلاد الكفر دي و تمشوا

🌻لأن ربنا بيعلمنا ان القرآن اللي هو نزله علشان في حل لمشاكلنا زي بالضبط ما حصل في قصه أصحاب الكهف و المسلمين فهموا إنهم لازم يسيبوا بلاد الكفر

يا ترى ايه إجابة الأسئة الباقية


🌻اللهم صل على سيدنا محمد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛الحلقة 15🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا محمد

🌻وتاني حاجة سألوا عليها الكفار كانت الخضر و سيدنا موسى لما قوم سيدنا موسى جم و سألوه مين اكتر واحد عالم وبيفهم في الارض فرد سيدنا موسى بسرعة و قالهم انا طبعا

🌻فربنا زعل من سيدنا موسى علشان هو جاوب من غير ما يسأله

🌻و قاله ان في حد اكتر منك علم و بيعرف اكتر منك اسمه الخضر روح دور عليه لغاية متلاقيه و اتعلم منه و سافر سيدنا موسى

🌻و قعد يدور على الخضر لغايه ما لقاه و طلب منه اإه يعلمه علشان ربنا قاله إنه هو أعلم أهل الارض

🌻فرد الخضر و قاله أنا موافق اني أعلمك بس عندي شرط واحد

🌻مهما عملت متسألش ليه و متعترضش على كلامي

🌻لكن سيدنا موسى مسمعش الكلام و أول ما ركبوا السفينه خرمها الخضر و راح سيدنا موسي قاله إنت كده هتخلي الناس تغرق ومش هيعرفوا يصطادوا علشان يأكلوا ولا هيلاقوا سفينة تانية تنقلهم

🌻رد عليه و قاله لأ انا كده بحميهم علشان في ملك على الناحية التانيه من النهر و بيدور على السفن السليمه و ياخدها من الناس بالعافية لأنه ملك ظالم

🌻فكده أما يشوف السفينه مخرومه مش هياخدها و أصحاب السفينه هيعرفوا يصلحوا السفينه بسهوله

🌻بس إنت كده خالفت الشرط يا موسى و اتكلمت

🌻فرد عليه موسى و قاله أُعذرني أنا اسف مش هعمل كده تاني

🌻و مشيوا شويه و راح الخضر لقى ولد صغير و قتله

🌻فراح سيدنا موسي قاله انت ازاي تقتل الولد كده حرام

🌻فرد عليه الخضر و قاله ربنا كان عايز يديهم ولد طيب ياخد باله منهم و يبعد الولد الشرير ده عنهم

🌻بس على فكره يا موسى انت مسمعتش الكلام بردو و اتكلمت

🌻فرد عليه موسى وقال له خلاص انا اسف دي اخر مره لو اتكلمت تاني متعلمنيش حاجة تانية خالص

🌻فمشيوا شويه لحد ما وصلوا قريه و أهل القريه كانوا بخلاء ومش راضين يعطوا لموسى والخضر ولا أكل ولا ميه

🌻لحد ما لقوا سور مكسور و بدأ الخضر يبنيه ويصلحه

🌻فراح موسى قاله انت بتبني كده من غير فلوس و هما مش راضين يعطوا لنا ولا غداء و لا ميه

🌻فرد عليه الخضر و قاله كده خلاص يا موسى إنت مش هتكمل معايا الطريق لأنك مش عارف تصبر و أنا هحكيلك ليه أنا بعمل كده

🌻السور ده تحته كنز و الكنز ده لولدين أيتام و لو كنت تركت السور ينكسر كان ممكن اي حد ياخد الكنز ده

🌻فربنا أمرني إني أبنيه لحد ما يكبروا و ياخدوا الكنز بتاعهم

🌻و القصه دي علمت المسلمين و الكفار حاجه مهمه اوي..حد عرفها يا ولاد ؟

🌻علمتهم ان ساعات الحاجة اللي بتحصل قدامنا بنكون فاكرينها شر بس ربنا بيكون مخبي وراها خير

🌻فربنا هو اللي بيعرف و احنا منعرفش و بكده ربنا ادى امل للمسلمين انهم هينتصروا على الكفار حتى لو فات شويه وقت

🌼وكمان علمتنا حاجة تانية مهمة إننا لازم نصبر ومش لازم نفضل كل شوية نسأل المدرس على حاجات لأنه هو أكيد هيقولها لما يخلص شرح وبعد لما يخلص الدرس ممكن أسأل على الحاجات اللي مش عارفها

🌻و القصه الثالثة اللي سألوا عليها الكفار كانت عن ذي القرنين؟؟!!

🌻و ده كان ملك قوي جدا و معاه جيش كبير جدا

🌻و كان وظيفه الملك ده إنه ياخد الجيش بتاعه ويبحث ويدور على الناس اللي محتاجة مساعده علشان يساعدهم

🌻و ينصر المظلوم و يعاقب الظالم لدرجه انه بنى سور عالي أوي علشان يحمي الناس الضعفاء من الكفار الأقويا

🌻و ده بيعلمنا و بيعلم المسلمين في مكه ان ربنا بعتلهم الرسول علشان ينقذهم من الكفار

🌻و بعد ما الرسول جاوب على الأسئله دي كلها فرح المسلمين و اتغاظ الكفار اكتر

🌻و زاد أذى الكفار للمسلمين فربنا نزل سوره الزمر اللي بتقول للمسلمين إن أرض الله كبيره يالا روحوا هاجروا فيها علشان تحافظوا على دينكوا من الكفار زي ما أهل الكهف عملوا

🌻و في رجب سنه 5 من النبوة سافرت أول مجموعة من الصحابة الى الحبشه اللي ملكها كان اسمه النجاشي

🌻و كان ملك عادل مفيش حد عنده بيتظلم

🌻و اول مجموعة من المسلمين سافروا كان عددهم 12 راجل و 4 ستات و كان المسؤول عنهم سيدنا عثمان و بنت الرسول السيده رقيه

🌻و الرسول قال لهم إن ده اول بيت مسلم يهاجر في سبيل الله بعد سيدنا إبراهيم و سيدنا لوط لما هاجروا علشان يبعدوا عن الكفار

🌻و وقفت السيده خديجه علشان تودع وتسلم على بنتها و هي بتعيط لكن بردو كانت صابره و عارفه ان ربنا هينصر المسلمين في الاخر

🌼يا ترى إيه اللي حصل للمسلمين في الحبشة ومكة بعد كده


🌻اللهم صل على سيدنا محمد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛الحلقة 16🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبيﷺ

🌻كانت السيده خديجه بتشوف اللي كان بيحصل لرسونا محمد صل الله عليه وسلم من أذيه و سخريه وكانت بتواسيه و تخفف عنه و تقوله ميهمكش من الناس دي

🌻و مش بس كان زوجها هو اللي بيتعرض للاذى ده كمان بناتها كانوا بيتعرضوا للاذى وهي كمان

🌻وفي اخر السنه الرابعه من بدايه النبوة زاد أذى الكفار على المسلمين

🌻و فضلت المشاكل تكبر و الأذى يزيد لغايه ما وصلوا لنص السنه الخامسه من بدايه النبوة

🌻و كانوا الكفار بيبحثوا عن أي طريقه علشان يتخلصوا بيها من المسلمين


🌻و زاد أذى الكفار للمسلمين فربنا نزل سوره الزمر اللي بتقول للمسلمين إن أرض الله كبيره يالا روحوا هاجروا فيها علشان تحافظوا على دينكوا من الكفار زي ما أهل الكهف عملوا

🌻و في رجب سنه 5 من النبوة سافرت أول مجموعة من الصحابة الى الحبشه اللي ملكها كان اسمه النجاشي

🌻و كان ملك عادل مفيش حد عنده بيتظلم

🌻و اول مجموعة من المسلمين سافروا كان عددهم 12 راجل و 4 ستات و كان المسؤول عنهم سيدنا عثمان و بنت الرسول السيده رقيه

🌻و الرسول قال لهم إن ده اول بيت مسلم يهاجر في سبيل الله بعد سيدنا إبراهيم و سيدنا لوط لما هاجروا علشان يبعدوا عن الكفار

🌻و وقفت السيده خديجه علشان تودع وتسلم على بنتها و هي بتعيط لكن بردو كانت صابره و عارفه ان ربنا هينصر المسلمين في الاخر

🌻وسافر المسلمون على الحبشة وزعلوا الكفار أوي

🌻لأنهم كانوا بيروحوا يبيعوا تجارتهم في الحبشة

🌻فخافوا إن المسلمين ياخدوا مكانهم

🌻وخافوا إن أهل الحبشة يدخلوا في الإسلام ويقتنعوا بكلام المسلمين

🌻بس حصلت حاجة غريبة جداً

🌻الرسول كان قاعد عند الكعبة ونزلت عليه سورة النجم وكان فيها أول سجدة تلاوة يعني وإحنا بنقرأ القرآن أول ما نشوف علامة السجدة جت نسجد على طول

🌻ولأن الرسول صوته جميل الكفار اللي كانوا حوالين الكعبة قعدوا يسمعوا سورة النجم

🌻وأول لما جت علامة السجدة سجد الرسول فسجد كل الكفار اللي في الكعبة ورا الرسول

🌻والأخبار دي وصلت للمسلمين في الحبشة وعرفوا كمان إن عّم الرسول حمزة بن عبد المطلب أسلم وعمر بن الخطاب كمان بقى مسلم ودول الإتنين كانوا أقوياء والنَّاس بتخاف منهم ومحدش بيقدر يقف قدامهم

🌻ففرح المسلمون اللي في الحبشة أوي وافتكروا ان الدنيا بقت أمان

🌻فقرروا يسيبوا الحبشة ويرجعوا لمكة

🌻بس طبعاً الكفار مكنوش أسلموا ولا حاجة والمسلمون اللي كانوا في الحبشة رجعوا على الفاضي

🌻هو طبعاً لما بقى سيدنا حمزة وسيدنا عمر مسلمون الناس اتشجعت وبقت تدخل الإسلام

🌻بس الكفار بدأوا يفكروا إزاي يتخلصوا من المسلمين

🌻وخصوصاً بعد ما عدد المسلمين زاد

🌻وبدأ الكفار يعذبوا المسلمين ويمنعوهم من السفر

🌻وحطوا حراس على كل مخارج وأبواب مكة علشان المسلمين ميعرفوش يسافروا تاني

🌻وفي الوقت ده قرر الرسول إن المسلمين يهاجروامرة تانية للحبشة

🌻وكان عدد المسلمين اللي هيروحوا الحبشة ٨٠ راجل و١٨ست والمرة دي كان رئيسهم جعفر بن أبي طالب

🌻بس هيخرجوا إزاي والكفار واقفين عند الأبواب والمخارج

🌻اتفقوا إنهم يعملوا خطة
شوية من المسلمين اللي مكنوش هيسافروا وهيقعدوا مع الرسول والسيدة خديجة في مكة يشغلوا الحراس علشان المسلمون اللي هيسافروا يخرجوا من غير ما حد يشوفهم وطبعا قعدوا يدعو ربنا علشان محدش يشوفهم من الكفار

🌻وفعلاً نجح المسلمون إنهم يخدعوا الكفار و يسافروا ويركبوا المركب اللي رايحة على الحبشة

🌻والصبح أول ما الكفار عرفوا جريوا على البحر علشان يمسكوا المسلمين لكن معرفوش

🌻والحمد لله المسلمين سافروا واللي غاظ الكفار أكتر إن كل المسلمين اللي سافروا أغنياء ومن عائلات كبيرة يعني هيقدروا يعتمدوا على نفسهم وهينجحوا في التجارة في الحبشة وهياخدوا مكانهم

🌻وبسرعة قرر الكفار إنهم يبعتوا ناس يجيبوا المسلمين اللي سافروا للحبشة

🌻يا ترى هيحصل إيه للمسلمين
🌻اللهم صل على سيدنا محمد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛الحلقة17🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبيﷺ

🌼اللهم صل علي سيدنا مُحَمَّد

🌻ولما المسلمين سافروا الحبشة للمرة التانية اللي غاظ الكفار أكتر إن كل المسلمين اللي سافروا أغنياء ومن عائلات كبيرة يعني هيقدروا يعتمدوا على نفسهم وهينجحوا في التجارة في الحبشة وهياخدوا مكانهم

🌻وبسرعة قرر الكفار إنهم يبعتوا ناس يجيبوا المسلمين اللي سافروا للحبشة

🌻وأختاروا عمرو بن العاص علشان كان صاحب النجاشي ويعرفه كويس وكمان كان ذكي جدا وبيعرف يتكلم كويس وكمان سافر معاه عبد الله بن أبي ربيعة بن المغيرة

🌻وأخدوا معاهم هدايا كتيرة جدا وغالية وخصوصا الجلود علشان النجاشي وأهل الحبشة كانوا بيحبوا الجلود وهما في مكة كان عندهم حيوانات كتيرة وخصوصا إن الناس كانت بتيجي مكة علشان تذبح بعد ما تزور الكعبة وطبعا صرفوا فلوس كتيرة جدا على الهدايا

🌻علشان كده ربنا نزل قرآن يتكلم عليهم وعلى اللي عملوه

🌻{إِنَّ الَّذِينَ كَفَرُوا يُنْفِقُونَ أَمْوَالَهُمْ لِيَصُدُّوا عَنْ سَبِيلِ اللهِ فَسَيُنْفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ وَالَّذِينَ كَفَرُوا إِلَى جَهَنَّمَ يُحْشَرُونَ} [الأنفال: 36].

🌻وراح عمرو بن العاص الأول على الوزراء والبطارقة اللي بيكونوا قاعدين على طول مع النجاشي

🌻وأقنعهم بإنه لازم ياخد المسلمين معاه لمكة علشان يساعدوه لما يتكلم مع النجاشي وطبعاً أعطى لهم هدايا كتيرة جداً علشان يخليهم يسمعوا كلامه

🌻وبعد كده دخل عند النجاشي وقال له يا ملك يا عظيم

🌻جه عندك شوية ناس من مكة مجانين وهما سابوا دين آباءهم وكمان مدخلوش دينك واخترعوا دين جديد اسمه الإسلام

🌻وإحنا جايين من عند أهلهم في مكة وطلبوا مني إني أطلب منك رجوعهم معنا لأن أهلهم أسياد وأشراف في مكة ولهم تجارة مع الحبشة

🌻وطبعاً مين اللي وافق على الكلام ده أعوان الملك اللي خدوا من عمرو بن العاص هدايا علشان يقفوا جنبه ويساعدوه

🌻طبعا النجاشي مردش على كلام عمرو بن العاص وقاله استنى لغاية ما نسألهم ونشوف هيقولوا إيه؟؟

🌻وجه المسلمون مع رئيسهم جعفر بن أبي طالب وكانوا اتفقوا إنهم مش هيقولوا غير الحقيقة

🌻فسألهم النجاشي إيه الدين الجديد ده وبيتكلم عن إيه؟؟ وليه سبتوا دين أهلكم وليه مدخلتوش دين معروف زي الدين بتاعي أنا

🌻فرد جعفر بن أبي طالب ابن عّم الرسول بعد ما عرف نفسه للنجاشي وعرفه إنه ابن ناس مهمة في بلده ومش مجنون زي ما قال عليه عمرو بن العاص

🌻"أيها الملك، كنا قومًا أهل جاهلية، نعبد الأصنام، ونأكل الميتة، ونأتي الفواحش، ونقطع الأرحام، ونسيء الجوار، يأكل القوي منا الضعيف".

🌻يعني عايز يخلي الملك يفهم إن دين عمرو بن العاص كله غلط وهو ده كان دين آباءهم

🌻وبعدين قال له
فكنا على ذلك حتى بعث الله إلينا رسولاً نعرف نسبه وصدقه وأمانته وعفافه".

🌻يعني بيشكر في الرسول وبيقول إنه كان معروف قبل الإسلام بصفات حلوة

🌻فدعانا إلى الله لنوحده ونعبده، ونخلع ما كنا نعبد نحن وآباؤنا من دونه من الحجارة والأوثان، وأمرنا بصدق الحديث، وأداء الأمانة، وصلة الرحم، وحسن الجوار، والكف عن المحارم والدماء، ونهانا عن الفواحش، وقول الزور، وأكل مال اليتيم، وقذف المحصنة، وأمرنا أن نعبد الله وحده لا نشرك به شيئًا، وأمرنا بالصلاة والزكاة والصيام".

🌻يعني بيفهم الملك إن كل أوامر الدين حلوة ومفيش حاجة غلط زي ما قال عمرو بن العاص

🌻وبعدين كمل كلامه وقال
"فصدقناه، وآمنا به، واتبعناه على ما جاء به، فعبدنا الله وحده فلم نشرك به شيئًا، وحرمنا ما حرم علينا، وأحللنا ما أحل لنا".
فعدَا علينا قومنا، فعذبونا وفتنونا عن ديننا، ليردونا إلى عبادة الأوثان من عبادة الله، وأن نستحل ما كنا نستحل من الخبائث".

🌻يعني عايز يفهمه إن الكفار وحشين ودينهم غلط وإنهم بيعذبوا المسلمين

🌻وبعدين كمل كلامه وقال
فلما قهرونا وظلمونا وشقوا علينا، وحالوا بيننا وبين ديننا، خرجنا إلى بلدك، واخترناك على من سواك، ورغبنا في جوارك، ورجونا ألاَّ نظلم عندك أيها الملك".

🌻يعني عايز يقول له إنك ملك عادل ومحدش بيتظلم عندك علشان كده جينا ليك علشان تحمينا من الكفار

🌻طبعاً عمرو بن العاص كان عايز يوقع بين جعفر والنجاشي فراح قال له على فكرة القرآن بتاع المسلمين بيشتم سيدنا عيسى وبيتريقوا على دينكم

🌻وطبعا الكلام ده مش صحيح لأننا بنؤمن بجميع الرسل ومش ممكن نعمل كده

🌻فسأله النجاشي معاك حاجة من الدين اللي بتتكلم عليه

🌻فرد جعفر وقال أيوه طبعاً معايا

🌻واختار سيدنا جعفر قراءة سورة مريم اللي بتتكلم عن عيسى وزكريا ويحيى -عليهم وعلى نبينا أفضل الصلاة والتسليم علشان هما عنده نفس الكلام ده في كتابهم اللي اسمه الإنجيل

🌻فقرأ جعفر سورة [مريم: 1- 22].

🌻يا ريت تقرئيها من المصحف لأبناءك

https://www.tgoop.com/noury1217

#سيرة_امهات_المؤمنين

🌛الحلقة 18🌜

🌛تابع السيدة خديجة🌜

🌻كان ياما كان و مايحلي الكلام
إلا بذكر النبيﷺ

🌼اللهم صل علي سيدنا مُحَمَّد

🌻وفضلت قريش والكفار اللي فيها يفكروا كل شوية في فكرة جديده يضايقوا بيها الرسول و المسلمين

🌻فاتفقوا مع بعضهم ان هم يقاطعوا المسلمين و ميتجوزوش حد منهم

🌻و لا يبيعوا لهم أكل ولا شرب ولا يشتروا منهم حاجه

🌻و اتحبس الرسول و السيدة خديجه و بناتهم و المسلمين في منطقة اسمها شِعْب ابي طالب 3 سنوات

🌻لدرجه ان هما كانوا بياكلوا ورق الشجر

🌻وشفايفهم كلها نشفت و اول ما تيجي قافله إلى مكه و يروحوا المسلمين يشتروا منهم حاجات

🌻يمنعهم ابو لهب انهم يبيعوا لهم و علقوا ورقه على الكعبه علشان اي حد يدخل مكه يقرأ الورقه دي و ميبعش حاجه للرسول و لا أصحابه

🌻و لو حد باعلهم حاجه من ورا الكفار يباعهالهم بأضعاف الاسعار

🌻و بعد ما مرت الثلاث سنين أهل سيدنا محمد الطيبين زي عمته صفيه و غيرها وقفوا قدام قريش

🌻و بقوا كل فتره كانوا يبعتولهم اكل في السر

🌻 و اجتمع هشام بن عمرو بن ربيعه مع مطعم بن عدي و شويه ناس تانين و قالوا احنا لازم نوقف المقاطعه دي علشان كده حرام مينفعش نعمل كده في اهلنا ده حتى العرب هيعيرونا اننا عملنا كده فيهم

🌻لكن الرسول في نفس الوقت ده قال للمسلمين ان ربنا خلى حشره اسمها الارضه اكلت الورقه اللي متعلقه على الكعبه

🌻ما عدا كلمه بأسمك اللهم مكلتهاش

🌻و انتهى الحصار و الحبس بتاع المسلمين لكن السيده خديجه كانت تعبت اوي من قله الاكل

🌻و نزل سيدنا جبريل على سيدنا محمد و كان في الوقت ده قاعد مع السيده خديجه

🌻و قاله إن الله يقرىء خديجه السلام فردت خديجه إن الله هو السلام و عليك السلام و رحمه الله و بركاته

🌻و في نفس السنه دي اللي هي كانت سنه 10 من النبوة بعد ما خرجوا من شعب ابي طالب بست شهور حصلت حاجه زعلت الرسول صل الله عليه وسلم

🌻عمه ابو طالب مات و هو اللي كان بيدافع عنه و ينصره و الرسول مزعلش بس علشان هو مات ده زعل علشان مات و هو كافر و مرضاش يسمع كلام الرسول و يسلم و فضل يتحايل عليه الرسول قبل ما يموت ويقول له هي كلمه أشهد لك بها عند الله لكن أبو جهل عم الرسول قعد يقولوا أوعى تقولها العرب كلها هتعيب عليك و هتسخر منك

🌻 فرفض أبو طالب إنه يقولها فقاله الرسول خلاص انا هستغفر لك ربنا علشان يسامحك يا عمي

🌻 لكن ربنا سبحانه و تعالى نزل الآيه في سوره التوبه اللي بتقول
مَا كَانَ لِلنَّبِيِّ وَالَّذِينَ آمَنُوا أَن يَسْتَغْفِرُوا لِلْمُشْرِكِينَ وَلَوْ كَانُوا أُولِي قُرْبَىٰ مِن بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ (113)

🌻و كمان ربنا نزل آيه تانيه بتقول
{إِنَّكَ لَا تَهْدِي مَنْ أَحْبَبْتَ وَلَكِنَّ اللَّهَ يَهْدِي مَن يَشَاءُ وَهُوَ أَعْلَمُ بِالْمُهْتَدِينَ }القصص56

🌻و جاله عمه العباس بن عبد المطلب و قاله مش عمك ده اللي كان بيدافع عنك إزاي بتقول إنه هيدخل النار

🌻فرد عليه الرسول و قاله هو في ضحضاح من نار ولولا أنا لكان في الدرك الأسفل من النار يعني إيه الكلام ده؟؟

🌻يعني لابس جزمه في رجله و الجزمه دي مولعه نار ده علشان هو كان بيساعد الرسول لكن الكفار بيتعذبوا بكل جسمهم في النار

🌻ولما مات أبو طالب زاد أذى قريش للنبي لأن أبو طالب هو اللي كان بيدافع عنه لدرجه إن الكفار كانوا بياخدوا التراب و يرموه على راس النبي

🌻و حاجات تانيه كتير كانت بتزعل النبي و أهله

🌻و سموا السنه دي بعام الحزن علشان مش بس عمه أبو طالب هو اللي مات دي كمان زوجته خديجه ماتت في شهر رمضان

🌻و كان عندها 65 سنه يعني الرسول كان عنده 50 سنه

🌻و قال الرسول عنها كَمُلَ من الرجال كثير و لم يكمل من النساء إلا آسيه إمرأة فرعون و مريم إبنه عمران و خديجه بنت خويلد

🌻يعني الرسول بيقول إنها إنسانه كاملة وأخلاقها حلوة وكل الناس بتحبها وكمان ربنا بيحبها

🌻ولو فكرنا في الثلاث نساء دول اللي الرسول قال عليهم هنلاقي إن كل واحدة فيهم كانت واقفه جنب نبي وصدقته و ساعدته و آمنت بيه

🌻فآسيا كانت واقفه جنب سيدنا موسى و مريم كانت مع سيدنا عيسى و خديجه كانت مع سيدنا محمد

🌻و من الحاجات اللي لازم نعرفها إن النبي متجوزش حد قبل السيده خديجه خالص و لحد ما ماتت برده متجوزش حد غيرها و زعل عليها النبي جداً

🌻 إن شاء الله هنعرف اكتر ازاي كان الرسول بيحب أمنا خديجة وبيفكر فيها على طول



🌼اللهم صل علي سيدنا مُحَمَّد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

#سيرة_امهات_المؤمنين

🌛تابع السيدة خديجة🌜

🌛الحلقة 19والأخيرة🌜

🌻كان ياما كان و مايحلي الكلام
إلا بذكر النبيﷺ

🌼اللهم صل علي سيدنا مُحَمَّد

🌻ومن الحاجات اللي تبين وفاء الرسول للسيده خديجه الطاهره اللي حصل في غزوة بدر بعد ما الرسول هاجر للمدينة

🌻 لما زوج ابنتهما زينب اللي اسمه العاص بن الربيع خدوه المسلمين أسير عندهم

🌻و أسير يعني لما تحصل حرب بين جيش و جيش تاني في جيش منهم بيفوز

🌻و بياخد من الجيش التاني ناس و دول اسمهم أسرى..وَيَا ترى بياخدهم علشان إيه ؟

🌻علشان الجيش التاني لو خد حد من المسلمين يبدلوهم مع بعض

🌻 او يبدلوه و ياخدوا اي حاجه هما عايزينها أو ياخدوا فلوس علشان يسيبوه

🌻 المهم أول لما زينب بنت السيده خديجه و الرسول صل الله عليه وسلم عرفت إن زوجها خدوه أسير

🌻وهي كان عندها سلسله مامتها إديتها لها يوم فرحها هدية

🌻 و السلسلة دي كانت غاليه و حلوة جدا

🌻 راحت بعتت السلسلة دي لجيش الرسول علشان يسيبوا زوجها

🌻يعني بدل ما تدفع فلوس

🌻وجوزها كان لِسَّه كافر بس كان لِسَّه ربنا مقلش إنه مينفعش المسلمة تتجوز كافر

🌻لكن الرسول أول ما شاف السلسلة إفتكر زوجته السيده خديجه

🌻و قال لأصحابه لو سمحتم ممكن تسيبوا زوج بنتي من غير ما تاخدوا منها السلسله وده يُبين إن الرسول كان حاكم عادل ومكنش بيستخدم مكانته علشان يعمل اللي هو عايزه لأنه كان ممكن يؤمرهم ويقول لهم سيبوه وخلاص لكن الرسول بيعلمنا العدل والأخلاق الصح اللي لازم نتعامل بيها مع بعض

🌻و طبعا أصحاب الرسول سابوا زوج السيده زينب أبو العاص و طبعا السيدة زينب فرحت جدا لما عرفت اللي حصل

🌻و ده كان موقف يدل على وفاء الرسول صل الله عليه وسلم لزوجته خديجه

🌻و في كمان موقف يدل على وفاء الرسول للسيده خديجه

🌻بعد ما ماتت السيده خديجه تزوج الرسول من السيده سوده و السيده عائشة

🌻و كان كل شويه يقعد يشكر في السيده خديجه وهو قاعد مع زوجاته

🌻و ده دليل إنه كان لسه بيحبها حتى بعد ما ماتت

🌻 و في يوم من الأيام قالت السيده عائشة أنا أكتر واحده كنت غيرانه منها من الستات اللي الرسول اتجوزهم هي السيده خديجه

🌻 لأن الرسول علطول فاكرها..لما يذبح يقولنا ابعتوا شويه لحمه لأصدقاء خديجه

🌻 فقلت للرسول كل شويه تقول خديجه خديجه

🌻 فرد عليها الرسول و قال (إني قد رزقت حبها ) يعني أنا بحبها جدا وسمى الحب رزق لأن ربنا هو اللي بيرزقنا بالحب زي ما بيرزقنا بالفلوس

🌻و في مرة من المرات و هو قاعد يتكلم مع السيدة عائشة

🌻قلتله كأن مفيش ست في الدنيا غير خديجه

🌻فقعد الرسول يحكي لها قصه حياته مع السيدة خديجة و ان هي الوحيده اللي ربنا رزقه منها ولاد

🌻و في مرة من المرات و هو قاعد يتكلم عنها

🌻قلتله انت لسه فاكر الست العجوزة دي ما ربنا ادالك حد أصغر و أحلى منها (كانت بتتكلم عن نفسها )

🌻فرد الرسول و قال لا والله ربنا مبدلنيش أحسن منها..دي هي اللي آمنت بيا في الوقت اللي الناس كفرت بي و صدقتني وقت ما كذبني الناس و صرفت من فلوسها كتير وساعدتني و ربنا رزقني كل أولادي منها

🌻و في يوم من الأيام جت ست عجوزة أوي كانت صاحبه السيده خديجه

🌻 فجري الرسول و استقبلها بنفسه و فرش لها العبايه بتاعته علشان هدومها متتوسخش وعلشان تقعد عليها و قعد يتكلم معاها و يسأل عن أحوالها و يتكلموا عن أيام خديجه

🌻فاستغربت السيده عائشة و قالتله ليه بتعمل كده يا رسول الله

🌻قالها لان خديجه كانت بتحبها و بتفرح لما تيجي تزورها

وفي قصص تانية كتير بتبين لنا قد إيه إن الرسول كان زوج بيحب زوجته وعنده وفاء لها ولكل حد هي كانت بتحبه

🌻 و بكده نكون وصلنا لنهايه قصه السيده خديجه مع الرسول صل الله عليه وسلم

🌻بعد ما عاش معاها الرسول 25 سنه و كانوا أسعد زوجين في الدنيا بالرغم من كل المشاكل اللي واجهتهم

🌻وزعل عليها الرسول أوي لما ماتت بس اللي كان مطمن الرسول إن ربنا قال إنها هتدخل الجنه و عندها قصر كبير و حلو أوي في الجنة

🌻 ولو قعدنا نتكلم عن السيده خديجه الكلام عمره ما هيخلص

🌻رضي الله عنها و أرضاها و جمعنا بها في الفردوس الأعلى

🌻وإحنا إن شاء الله هنقابل السيدة خديجة في الجنة وهنقول لها إننا عرفنا حاجات كتير عنها وإننا بنحبها

🌻وبكره إن شاء الله هنعرف مين الزوجه التانيه اللي الرسول اتجوزها بعد السيده خديجه

🌻ودلوقتي جه معاد النوم

🌻تصبحوا على خير يا حلوين

🌼اللهم صل علي سيدنا مُحَمَّد
🌻🌼🌼🌻🌼🌻🌼🌻🌼🌻
إقرأ 📚 وانشر 📬 تُؤْجَرْ
https://www.tgoop.com/noury1217

السلام عليڪم وࢪحمة ﷲ وبࢪڪاتة🤍🥹

هنبدأ دوࢪة أمهات المؤمنين🩷🌷

خلصنا بفضل ﷲ السيده خديجه هنبدأ عن السيده سوده💜🌹

ڪل يوم هنزل حلقه من حلقات أمهات المؤمنين🧡🌸

حلقه مڪتوبه🍃

وحلقه مُسجله لـ: ۾/علاء حامد🪻

الـلهم اجـعل هـذه القناة شفيعه لـي يـوم أسـأل عـن شبابـي فـيما أفنيـته واجـعلها صـدقة جـاࢪيـة لـي و لـ والدي🥹🤎🤎✰.*
*۶ৎ🥹🤎🤎🤎🤎🤎🤎🤎🤎🤎🤎🫰🏻. ⿸""
https://www.tgoop.com/noury1217

#سيرة_امهات_المؤمنين

🌙الحلقة الثانية 🌙

🪴 السيدة سودة رضي الله عنها


🌻كان ياما كان و مايحلي الكلام
إلا بذكر النبيﷺ

🌼اللهم صل علي سيدنا مُحَمَّد

🌻وتزوجت أمنا سودة من النبيﷺ

🌻 وفضلوا عايشيين مع بعض 3سنين في مكة

🌻وكانت أمنا سودة بتعمل اللي تقدر عليه علشان تخلي النبيﷺ سعيد

🌻وكانت دايما تقول نكت و تحكي قصص علشان تضحك النبيﷺ وكانت مشهوره بخفه دمها

🌻لكن كانت حاسه إنها مش قادرة تملى الفراغ الذي تركته السيده خديجه

🌻 وكانت بتخفف عن النبيﷺ لما الكفار بيضايقوه وكانت تقعد تحكيله عن بلاد الحبشه والحاجات اللي حصلتها وهي هناك

🌻وكانت تقعد تحكيله عن بنته رقيه وزوجها عثمان لانها كانت عارفه انه بيحب يعرف اخبارهم و يطمن عليهم وهي كانت جارتها لما هاجروا للحبشة

🌻وفي يوم من الايام رجعت السيده رقيه بنت الرسول هي و زوجها عثمان من الحبشه

🌻وانتشر في مكه الخبر ده و أول ما الباب خبط جريت أم كلثوم وفاطمه علشان يفتحوا لأختهم وقعدوا يفتكروا أيام أمهم السيده خديجه

🌻وطبعا أمنا سودة اهتمت بيهم وقعدت تصبرهم ولما جه الرسول فرح جدا وحضن بنته و زوجها ورحب بيهم وقعدوا يتكلموا عن اللي كان بيحصل في الحبشه

🌻 وفضلوا عايشين مع بعض و بيواجهوا الكفار و بيصبروا الرسول و جه سيدنا جبريل للنبيﷺ وقاله إن ربنا بيقول انه لازم يهاجر للمدينة المنورة

🌻وبعدين جهز النبيﷺ نفسه و زي ما إحنا عارفين من قصه الرسول اللي حكيناها قبل كده ان نام مكانه سيدنا علي بن أبي طالب وإنه سافر هو وسيدنا أبو بكر بعد ما عملوا خطه علشان يهربوا من الكفار

🌻وأول ما الرسول وصل للمدينه بعت سيدنا زيد و أبو رافع مولاه بجملين وفلوس علشان ياخدوا زوجته السيدة سودة وبناته للمدينة

🌻و قعدوا كلهم في المدينه و بعدوا عن الكفار الاشرار

🌻وبدأوا يساعدوا النبيﷺ في تعليم الناس دينهم

🌻وتزوج النبيﷺ بأمنا عائشة بعد الهجرة للمدينه

🌻 وحست أمنا سودة ان النبيﷺ بيحب السيده عائشة أوي

🌻وكانت شايفه ان النبيﷺ علطول مشغول ومعندوش وقت علشان كان في غزوات كتير وعلشان كانوا بيبنوا مدينه جديده وعايزين يخلوا كل الناس يبقوا مسلمين

🌻وعلشان كده أمنا سودة قالت للنبيﷺ انا عايزة أخلى اليوم بتاعي اللي بتقعد معايا فيه للسيده عائشة

🌻وطبعا الموقف ده كان موقف عظيم لأنه مش سهل ان الزوجه تسيب زوجها

🌻بس هي كانت بتحب النبيﷺ واللي بيحب حد بيحاول يعمل الحاجه اللي هو بيحبها

🌻و كانت دايماً السيده عائشة تقول عن السيده سودة إنها ست عظيمه ودمها خفيف

🌻وكانت بتحصل مواقف تضحك بينها و بين السيده عائشة

🌻 في يوم من الأيام كانت السيده عائشة جايبه للنبيﷺ أكل

🌻و النبيﷺ كان قاعد بين السيده سودة والسيدة عائشة

🌻فحطت الأكل وقالت للسيده سودة يالا اتفضلي كلى

🌻فراحت قالتها السيدة سوده لأ مش عايزة آكل

🌻فراحت السيده عائشة قالت لها لو مكلتيش هأكلك بالعافيه

🌻وهي بتأكلها وشها اتملى أكل زي الأطفال لما بييجوا ياكلوا

🌻فراح النبيﷺ أعطى الأكل للسيده سودة وقالها اكليها وبوظي وشها زي ما عملت فيكي

🌻وقعدوا يضحكوا هما الثلاثه

🌻و بعدها جه سيدنا عمر بن الخطاب فراح النبيﷺ قالهم قوموا بسرعه إغسلوا وجهوكم

🌻 ومن يومها والسيده عائشة بتقول انها بتخاف من سيدنا عمر علشان لقت النبيﷺ بيعملوا حساب

🌻 وفي يوم من الأيام سمعت النبيﷺ و هو بيحكي عن قصه المسيح الدجال فخافت وجريت إستخبت في بيت مفيش حد ساكن فيه

🌻وقعدوا السيده عائشة و السيدة حفصه زوجات الرسول يضحكوا عليها

🌻و لما جه النبيﷺ قالها إنتي بتعملي إيه يا سودة قالتله هو جه المسيح الدجال ولا لسه يا رسول الله

🌻فقعدوا يضحكوا عليها كلهم فطلعت من البيت المهجور وهدومها كلها تراب

🌻 يعني يا ولاد كانوا عايشين حياة عادية جدا زي اي حد فينا

🌻وبكرة إن شاء الله نكمل قصة امنا سودة

🌻ودلوقتي جه معاد النوم

🌻تصبحوا على خير يا حلوين

🌼اللهم صل علي مُحَمَّد
إقرأ 📚 وانشر 📬 تُؤْجَرْ
https://www.tgoop.com/noury1217

الـتـفـاعـل يـ صُـحـبـه ♥️🌹