روحي صبخه وانتَ غيمة شوگ
تتباهه بنسايمها وهواها

جُمعه الحلّفي

يا شتاي...
شگد شبابيچ اعله صدري متانيه امغازل هواك
شگد گلتلك ضلمه روحي بيا كتر نايم ضواك ..؟!
شگد دمع فاض اعله خدي
والاحبك بين چلمه وچلمه تعثر
سما الوادم عشگ تمطر
وانته مدري شعطلاك ..؟!
شعطلاك.....؟؟
السنبل اصفر...
وانه خايف لايمر منجل غريب وتنكتبله
حيل خايف لا أتيهك و أگضي عمري بلايه قبله...

جواد زغیر

شجاك ؟ اشميلك عني ؟

چنت من الشعاع اعدل

يشوگ البارحه اليچوي

البرد كلش ، ولا يسال

ولا نشغة اجروحي اتفزز ادموعك ؟


ولا صفنه التكضك فوك الوساده ؟

وتشوف اغيار وجهي اكبالك وتخجل...
.

عبدالکریم القصاب

بعدهَ ولف الضيعيته بديرتك ينشد عليك ..
بعدهَ عمري الغرگيته ابير يترجى عليه اتمد اديك..
بعدهَ كلبي اليّ خسف بيه الوكَت يتنخى بيك ..
وذيجة روحي الكَصصيت جناحها اتحوم ولوّن تكدر تجيك!
هااا ولو لبّك تسلَس بس گشر هم اشتهيك !
ها وتمنيت روحي تصير حنة تنام ليلة بحضن أديك ..


_ الكاطع

هاا يفلان


عبدالامير المسير

وحبيت ♥

چا شيصير
لو انه بمكان گلادتك اغفه
ولم روحي اعله گد حضنك

شوكح حسنك
شتل بيه نثيث الشوگ يا حسنك

انه البيك والمنك
احضني وخذني بعيد عن ولايه الوحشه

اليحب من يبقه وحده ينام
يضل يرجف گبل رمشه

وذا حسنك هواي هواي انه اسوه
اسگيني بليله من عينك اخضرلك عمر يسوه

ولزمني بهداوه شوگ
تره داعيك گذله يطيح كله بلزمه چفوفك
يا چتالي ماعوفك

بعدني شما ردت اغفه احضر الحچي لطيوفك
ويمر طيفك قطار وما يتانيني

وفز ولگاك شذره بمحبس سنيني
تعال بداعه اخر سالفه بعيني
َ
حيدر الطآئي

🤍،