أنا يلي مستغربتو كيف في عالم عم تفترض حسن نية عند هاد الرجل يلي ذل الناس باللقمة

كل هالمصاري ماكان فيه يفتح مشروع ويشغل العالم بدل ما يعاملن عأنن شحادين

السوريين اعظم من هيك والله نحنا أعظم من هيك

تخيل حدا يتذكرك ويقول
(حسبي اللَّه ونعم الوكيل فيك)

مخيف هالشي مخيف جدًا
بيمحي كل توفيقات الإنسان
حاول ما تنحفظ عند أي حدا بهيك صورة

يومكن رايق 💗

اتركوا الناس تحقق حلما ..
بدنا نعيش بسلام 💚🌿

معلش نسمع ونحلم ونتذكر لحظات حلوة مرقت علينا ..
والله مش حرام 💚

من الحُجب الثخينة
يلي بتعيق القلب عن رؤية الإله
هوي حجاب مُحاكمة التانيين
وتنفيذ الحكم بالغضب والتكفير والدونيّة

ممكن يكون بين أولئك يلي بيخالفوك شو ما كنت
شب ممتلي حياء من الله
وأنت مو شايف منُه إلا رأيه المُغاير لرأيك
أو ختيار طايف قلبه زهد ونادت فطرته سما الرب العظيم
بس بلسان غير لسان دينك

شو رح تقول للأنبياء يوم القيامة
لمّا يتفقدوا قلبك فما يشوفوا فيه
إلّا وجه القاضي وسيف الجلّاد؟

وأنت وأنا والكل بيعرف
أنو التوجه الديني غالباً موروث

القاعدة بسيطة
الآخر حجابك .. اصنع منه طريق لله مو لتبعد عنه 🌾

بعرف أنو اليوتيوب معبى خطب لمشايخ عم يفتولك بقتل فلان وعلتان .. وتكفير فلان وعلتان
بفهمك
بس الله يلي خلق القرآن والأنبياء يلي منقرأ عنن وعن رحمتن ماظني فيه بيرضى يموت بني آدم بيأمن فيه وهوي أعزل طالب سلم
ما ظني فيه بيرضى ذل مؤمن على وجه الخليقة والتعامل معه بتصغير وجرح لكرامته
خافوا ربكن وارجعوله
طالما عم تحكوا طول الوقت باسمه
حاج تصفوا البشر بحجج طائفية مقيتة
وبفتوى مشايخ هنن بشر متلنا
صدقوني بيخطأوا عادي وبصيبوا
ومارح ياخدو ذنوبك وقت توقف بين أيدين رب العالمين
لا بقا تألهوا خطابات الآخرين
حكموا عقولكن وقارنوها بكتاب الله وسنة رسوله
وارجعوا نعمر هالبلد
مابدنا نكون إلا سوريين
بوجه كلشي ناوي يقسمنا وعم يستغل الكره والحقد ويدفع سوريا باتجاه التقسيم ..
بوجه كل هدول خلونا نوقف

طيب مو شي ببكي
هدول الناس كل عمرا عايشة مع بعضا
ليش عم نضطر عند كل جريمة نبري حالنا منها لأنو حدا متشابه معنا بالدين أقدم عليها
هدول السوريين
هدول نحنا
جبر بخاطر كلشي كان بالعزا‌‌

واعتصموا بحبل الله جميعاً ..

جميعاً يا سادة

بعرف أنو في مآسي كتيرة وكتار منكن عم يخسرو أخوة ورفقة بصمت وبحزن وبيأس لأنو ببساطة ماحدا حابب يشوف وقلال يلي عم يجبروا خاطركن لو بكلمة أو تطمينة ..

بس هاد اختبار لصبرنا
ماعندي جرأة اطلب من حدا خسر سابقا أو عم يخسر حاليا حدا بخصه أنو يهدا ويتحمل ويحتسب بلاءه عند الله سبحانه

ببساطة التنظير سهل

بس اسمعوا شو قال والد الطفل شهيد عين الشرقية
أنا ابني فدا الوطن والشعب والمحبة

شخص بسيط ومحروق بهاللحظة ع أغلى شي بيملكه بس قادر يتسامح
مافي شي رح يرجعله ابنه
مافي شي رح يرجع ولاد السوريين كلن

شي واحد ممكن يخلي الناس تحس أنو الدم ما كان رخيص .. هوي البلد تصير بلد ما تضل مزرعة عم يتقاسموا الكبار ونحنا عم نصفقلن ونطبلن ونعيش عمرنا نقتات عالحكي

بدي الناس تفهم أنو ماحدا بدو التقسيم بس لما تمد لحدا أيدك ..
((هوي مو واثق فيك بلحظتا))
بس متأمل ما تكسرله ياها
متأمل تكون صادق ويقدر يوثق فيك
فصدقك ..
حاول تكون قد كلمتك وبدل ما تخوّنه تلبيه

لما بدك تنبذ حدا هوي رح ينبذك
يمكن قال بدو تقسيم بس من قلبه متمني تقلوله أنت متلنا ابن البلد

بعرف أنو يلي هون هربانين أصلا من السياسة ..
وأنا بكل مرة بقول ماعد احكي عن أي شي بيخص بلدي سوريا ..
ماعد احكي عن آراء شخصية بموضوع عم حسه كبير أكبر مني ومن السوريين نفسن
بس واجبي ذكركن أنكن كلكن بتحبو البلد
كلكن بتتمنوا يجي يوم تشوفو حالكن فيها
لهيك بدل هالصرعات قوموا عمروها
قوموا واسوا هالأمهات
حاولوا تفكرو بالكلمة قبل ما تحكوها
هالكلمة رح تداوي أو رح تفتح جروح غميقة
السلاح رح يضل يحكي
ومافي حل غير ينشال من أيد الكل
الكل يعني الكل
بس مابعرف يبدو لا حياة لمن تنادي

ممكن يكون الأمل كائن ما بيتجاوز الـ 2500 غ ❤️

صباح الأمل ❤️

التعافي ماله وقت ثابت ولا سنة مُحددة ..
كلما تشوف نفسك عم تضغط على حالك برحلة التشافي ..
تذكر إنو عادي كتير تدخل السنة الجديدة
وإنت عم تداوي بجروح السنة القديمة 🤍🪄

قبل شوّي لمحت هذا الدُعاء ..

هبني ربّاه القوة والشجاعة أن أنظر إلى قلبي وجسدي من دون احتقار!

وتذكرت كتير بنات بعرفن
لما تنفتح الكاميرا تبع التلفون ع وجههن بالغلط ..
أول كلمة بتطلع منن بتكون بمعنى :
"شو هالمنظر"
"طالعة متل الجني"

بشوفه شي شجاع وصعب
أنه اليوم بقدر اطلع ع حالي وشوف الحلو اللي فيها قبل كلشي ..
شي شجاع وصعب
أنو حب روحي
حبها لدرجة ما أكبس بسرعة على كبسة الرجوع من الكاميرا إذا شفت وجهي فيها بالغلط
ما بغطي وجهي بأيدي اذا شفت حدا عم يصورني بلا فلتر

ما بخاف إنو اطلع على هالروح
ومابيخوفني انعكاسي بكل مرايات الدنيا 🩷

مبروك عليكم الخلاص ويرحم الشهداء 💚

(أوهن من بيت العنكبوت)
بيت عنكبوت واهن
على وشك الزوال بعد سقوطه
اخلاقياً واقتصادياً ودولياً ..
اللهم زوال قريب ..
وعودة الحق لأهله 🌼

طلّ من الليل 💙

يخلي لمّة حبايبكن بالليل وبالنهار
وبكلّ الأوقات 💙

صباح الخير ♥️
ثُمّ إنو
حتى أشطر كتكوت بيحتاج استراحة
فلو سمحت لا تضغط على نفسك 🌤♥️

بمقابلته الأخيرة على بي بي سي نيوز عربي قال جملة كتير وقفت عندها ..

دي أكبر هدية أنا عملتها في حياتي للأنسانية
و طبعاً أنا طول عمري عايز اشتغل للأنسانية

د.مجدي يعقوب ❤️

اللي عامله إذا نجح حرفيا رح يكون ثورة بعالم جراحة القلب ❤️

‏﴿إِنَّ رَبِّي قَرِيبٌ مُجِيبٌ ﴾
ماخيّب من رفع كفّه داعيا 🤎

مرّات كتير بزعل من الطريقة
يلي بيمشي فيها هالعالم ..
بزعل من الطريقة يلي الناس
بتحترم فيها الناس التانية
بزعل لمّا كون طول وقتي مضطرة
دافع عن حالي مع أغلب الناس
يلي بعرفن ويلي مابعرفن ..
بزعل كتير لما ضل عم حاول
لاقي لنفسي مكان بهالبلد
صراحة .. ولا مرة عم لاقي 🖤

يا أيّها الناس
ناصروا أحباب اللّه فقراء البلد ..
إن منازلهم قبور إلا إبتسامة
وأولادهم موتى إلا رغيف 🥀