✨.

✨.

أحِبّ من أضوچ لو أتعب أرجع أتصفح بالمنشورات القديمة بـ نُقطة، أحِبّ هالشعور والابتسامة الّي تنطينياه وإنها گادرة رغم الفترة الطويلة تبقىٰ مشاعري مثل ما هيَ بكلّ منشور كتبته. ♥️

أعرف أفكار اللّيل شگد مهلكة للواحد،
أعرف يمكن حتّىٰ من صفنتك بالسگف أطلع من اللاشيء شيء، ويمكن حتّىٰ تخلي مشاكل العالم صايرة بسببك، أي لا تضحك أعرف هالشعور :)، بس تدري علمود تتحمل هاللّيالي وتعديهن وتغمض عينك وحتّىٰ تگعد لصبح ثاني أنت بيه تحاول، تذكر كلّ محاولة سابقة دفعت بيها دم گلبك علمود تخليها تنجح، وعلمود كلّ لحظة تعب قدمتها حتّىٰ تحصل الّي تريده، وبكلّ مرة قدمت حلمك علىٰ صحتك وراحتك في سبيل تشوفه حقيقة بين أديك مو حلم تتخيله من تغمض عيونك، خليك متذكر هالأمور هم وأنت تحاول تكدّر خاطرك بأفكار تالي اللّيل الّي أكثرها مو حقيقة ولا تمثلك.

الواحد دائِمًا يجب أن يَعيش في الجَو الإيجابي، ويُحاوِل أنْ يوحي لِنفسهِ بالإِيجابيّة،
ولا يگول ما أگدر!، ولا يگول الآخرون يختلِفون عنّي!،
لا،
يگول أگدر بإذن الله، أتوكَّل علىٰ الله، إن شاء الله يصير، ماكو هُنالِكَ مُستحيل، كُلّ شَيءٍ مُمكِن بإذن الله تَعالىٰ.

ـ السيّد مُحمّد رِضا الشيرازي.

الخُطوة الصَّعبة اليَوم مُمكِن تكون بداية الرّاحة باچر.

مُتبَاركِين بِولادَة أمّنا فَاطِمة. 💚🌿🎊🎉

كلنا مقصرين وعدنا عيوب، بس نحاول نصلح نفسنا ونتعلم ونجاهد حتّىٰ نعيش كـ خوش أوادم،
نحاول نوفي ولو مثقال ذرة من النِّعم الّي ربنا غمرنا بيها من أوّل تكوينا ليومنا هذا،
كلنا نريد نكون أحسن، وما نخلّي منفذ للنّفس الأمّارة تسيطر علينا، هاي حقيقتنا: إنو نحاول نحصل نظرة رضا من ربنا ونستشعرها، وما نبقىٰ بحالة ركود بس لأن مقصرين.
والصح، إنو نحاول رغم تقصيرنا، نحاول رغم عيوبنا، نحاول رغم ذنوبنا، نحاول لأن ماكو غير المحاولة تلوگلنا وهيَ الشي الوحيد الّي مُمكِن يغير واقعنا.

ولأن إحنا بهالصورة، وماكو شي مثالي أو كامل، نحتاج ننظر للموضوع من زاوية إنو كلّ إنسان عنده عيوب، مثل ما إحنا عدنا عيوب، فَ المقابل هم هيچ، ويحتاج نفكر ونتقبل هالشي بقناعة تامة، مو مجاملة أو كـ شي مؤقت.
الأهم إنو ما نخلّي زلّة وحدة أو خطأ مُمكِن يتصلح ينسينا ويغطي علىٰ ألف موقف وذِكرىٰ حلوة.

مو الباقي علىٰ الله،
لا،
هوَ كله من البداية للنهاية مخليتها علىٰ الله وبأمانته،
بجهدي وتعبي وحتّىٰ لحظات خوفي وافكاري إنو الأقدمه مو كافي .. كله مسلمته لله وحاشا سبحانه يضيع شي يمه،
حتّىٰ أبسط الأشياء مثل گومة الفراش گد ما بسيطة بس إنو تبدي من جديد وتقاوِم رغبتك إنو تنام وتختار تگوم تكمل، هالمحاولة بحد ذاتها مؤمنة إنّها يم ربنا محفوظة وما تضيع.

ما راح أعتمد علىٰ لُطف الكلام إذا كان الفعل يثبت العكس، ولا راح أعرف أقيس محبتي وحسن ظن المقابل واِحمل أخاك علىٰ سبعين محملًا من الخير، إلا بوقت الخصام وأوقات الأنطفاء والأخبار السعيدة.
بالنهاية، العلاقات الصحية القوية تُبنىٰ علىٰ أفعال تعكس الكلام، وتظهر المحبّة بوقت الحاجة، وأني أحتاج أشوف الوضوح بالتصرفات مثل ما أسمعه بالكلام، لأن الفعل الحقيقي هوَ الّي يثبت المحبّة ويخليني أبقىٰ بأمان بعلاقتي مع المقابل، والعلاقة الصحيحة تقوم علىٰ أساس هذا التوازن والثبات لا إفراط ولا تفريط.

قبل، من چنت صغيرة وأني أشوف أفلام الكارتون والّي عدهم قوىٰ خارقة، چنت أتمنّىٰ عندي قوّة مثلهم تخليني أگدر أسوي كلشي أريده، وماكو شي يمنعني أو أعجز عنه.
هالأمنية راحت ويّ فترة الطفولة، أمّا هسّة، وبهالعمر، ما لگيت قوّة أعظم من قوّة الدُعاء والإيمان بقدرة الله لتنظيم وحماية حياتي، هالقوّة تگدر توصلني للي بصغري چنت أتمنّاه.
وما أنسىٰ قول الإمام عليّ (عَليهِ السّلام) :
"إنّ كرم الله سبحانه لا ينقض حكمته، فلذلك لا تقع الإجابة في كلّ دعوة."
فَ كرم الله وحكمته لدعائي، سواء كانت نتيجة الإجابة بالمنح أو المنع، هيَ يقينًا بمصلحتي وخير إليّ.

دفتر أبيض بيه ٣٦٥ ورقة فارغة، مخصّصة ألك وحدك، تگدر تمليه باللي يرضي الله ونفسك، كلّ ورقة تمثل يوم من عمرك، وأنت عليها مسؤول، لا تخلّي نفسك تحِسّ أنك وحدك وأنت تمشي بكتابة هذا الدفتر، أبدًا، الله و١٤ معصوم وياك، يعينونك مثل ما سووا بكلّ الأيّام الّي مضت والدفاتر الّي انتهت.

.♥️.

شكرًا هوايّ الكم وللقنوات الّي توجه منشورات نُقطة، الحَمدلله إنو هالقليل يگدر يأثر بيكم ويهون عليكم وأتمنّىٰ إنو الأيّام تكون أخفّ وأحنّ عليكم وإذا چانت العكس فَ يا ربّ الصّبر والقوّة يكونن رفيقات الكم برحلتكم. ♥️

وهالمرة مثل الّي قبلها وقبلها، لگيتني أگول: يا ربّ افعل بي ما أنتَ أهله، ولا تفعل بي ما أنا أهله .. بثقة وتوكّل وأمان تام لتدبيرك وحكمتك بأمري، فَ يا ربّ أختَر لي ولا تخيّرني، هٰذي رغبتي بـ ليلة الرّغائِب وكلّ ليلة عظيمة ومُباركة.

شايف مرّات من توگع بمشكلة أو يصيرلك بلاء أو موقف صعب، شلون تحِسّ إنو گلبك مو حِمِل للي صار ولا عنده سِعة يتحمل ويصبر ويقاوم؟
شگد شعور العجز بهيچ وضع يكون صعب وثگيل علىٰ الروح؟
بس سبحان الله، شلون فجأة وبعد شويّة وقت تلگه سِعة گلبك محتوية الصار، صابرة ومحتسبة أمرها للي تدبيره ما يمنعه شي.
وإن شاءَ يشاء للي بيه رضاك وخيرك، بس يمكن تعرف هالشي بالنهاية لأن بطبيعة أغلبنا عجولين لمعرفة الحكمة من كلّ حدث يصيرلنا.

يعجبني الّي ما يتكلّف بمشاعره، واضح باللي يحِسّه، وحقيقي بمبادرته، تلگاه بكلّ حالة تمر بيها، كلّ همّه شلون يشاركك ويحِسّسك إنه يمك، حتّىٰ لو ما گدر يغير شي.
يفرح لفرحك، ويحزن لحزنك، ويصفگ لأنجازك، ويسندك بعثرتك، واسمك بين دعواته وذِكره.
للأبد أحِبّ هالصورة من المشاركة والمحبّة.